22
«Baebha na badh'ami, bɔɔkɛi to mpa sinde nɛɛyɔngɛla nee mosá l'anu.» 2 Mbènɔ nde bamɔki nee n'ayɔnga n'ibɔ a koEbhalania, aba badhaa go kpɛɛ. Mpa, Pɔlɔ ab'ayɔnga ate: 3 «Eme, ne nde moYuda, nɛbɔtɛani nde naa Talasɔ a lɛɛngɔ a Kilikia. Nɛmɔtɛli nde Yɛlusalɛma ani. A njaga a Gamaliɛli† yɛu negoli madomi-domi maanɔ nda bàtata asu, aba neetia nto a mouɔ a yɔnga la Mokonga bía benu bɔbhu ndiende. 4 Ai neenobisi bande ai babelea asii nda Yesu nangɛ móa l'abɔ. Ai neenyangisisa baboo, nangɛ bake na màa l'abɔ asub'a ngɔmɔ. 5 Omi nde ma baɛlɛli na bakpɛga bɔbhu nde ba na ntua, aanga batɔndɔlisa ami bende indɔ a nde domi. Ai bamopi baloa nde ai baeandekei badh'asu baYuda nde ba Damasiki, bende negɛ needhungɛ bakilisitɔ ndɔ, na nebhiɛ n'ibɔ naa Yɛlusalɛma nga baɔnɛ giti†.Pɔlɔ atɔmiaga sinde ai anebei na Yesu
6 Adhoi ndɔ, n'aha ne na asii, a mpiti a Damasiki, bhi-bhi l'etonge a máni, nkobà imoti, da-njenja atì toa la na kobha, jegia-li ab'amotimbilaga. 7 Aba negua a dodo, aba nɛɔka moyo a nto n'amongodea ate: ‹Saulɔ, Saulɔ! Omonobisa mbɛɛ nde nga éma sina?› 8 Aba nemulisa nte: ‹Mokama, o nde màni?› Eme iyɛ ate: ‹Ne nde Yesu mma Najalɛti, eme yɛu mbɔ omonobisa ndɔ.› 9 Bato nde nei n'ibɔ ai baɔni njenja ndɔ, mpa nnd'ai baɔka yɛu nde moyo a nto nde ai amɔyɔngisa ndɔ. 10 Mpa, aba nemulisa nte: ‹Mokama, nɛkɔlɛ boni?› Emesunga n'iyɛ ate: ‹Omɛ, ogɛ naa Damasiki. Io yɛu baongodea mande éma bhulibhu nde atɔlɛli ɔkɔlɛ.› 11 Na sinde nnd'ai ye nɛɔna a yɔnga la bobhu la njenja ndɔ, badh'ami yɛu aba bamodhungilaga a njaga na ga l'ami nee Damasiki.
12 Mpa, nto moti ai o, ina aɛ n'a nde Anania. Iyɛ, ai ansikisa Mokonga na Tɔlati nd'asu kpɛɛ. BaYuda bɔbhu nde ai baiki we na bayɔnga hɛlɛ ang'aɛ. 13 Ab'abhia amodhonda, ab'ama a mpiti ami, ate: ‹Saulɔ dh'ami, ɔɔnɛ to go.› A mbènɔ l'indɔ, iso ami ab'akodoana, na aba nɛmɔna. 14 Ab'amongodea ate: ‹Mokonga nde ma bàtata asu aye aɔsɔmbɔli nga bende oúbhɛ éma nde akóndi, na ɔna la Nto a domi, na ɔɔkɛ moyo aɛ iyɛ nganga. 15 Nga, obá mande ntɔndɔlisi nde maɛ mosá la bato bɔbhu, a tɔmia la éma nde ɔɔni, na inde ɔɔki. 16 Mpa, obondea nde éma sina? Omɛ, oondiisisɛ, okogɛ ina aɛ nga bende, agɛgiɛ ilɔlɔ nd'aɔ.›
Pɔlɔ atɔmiaga sinde Mokonga antei nee ang'a bato nde nndaga baYuda
17 Adhoi ndɔ, mbusa a siana l'ami naa Yɛlusalɛma, na nɛmmɛma Mokonga n'endu aɛ, aba nɛɔta njei. 18 Aba nɛmɔna Mokama, ab'amongodea ate: ‹Okamisɛgɛ toa la Yɛlusalɛma dia ndɔ nga, bato nde ba bɔma nde nnda balebea mande bɔtɔndɔlisi aɔ a yɔnga l'ami.› 19 Mpa aba nɛyɔnga nte: ‹Mokama, baúbha hɛlɛ bende, ai nengiaga a endu a sinagogi moti-moti ga nyanga la bande baolebei. Ai neemaa asub'a ngɔmɔ na bɛtisisa l'abɔ. 20 Na mbènɔ nde bammói na ntɔndɔlisi nde maɔ Sitɛfanɔ, na eme nei be. Ai nelebeisi kukua l'aɛ, na bhísa la ngɔmbɛ† nda bande ai bammói ndɔ.› 21 Mpa Mokama ab'amongodea ate: ‹Gɛ to, neotea mande dhɔlɔ ang'a bato nde nndaga baYuda.›»
Pɔlɔ ame mosá la omi nde ma basoda nde ba Lɔma
22 Bato aba bamɔkanea Pɔlɔ kida la mbènɔ nde ayɔngi nee a yɔnga la bato nde nndaga baYuda ndɔ. Mpa, aba basòmba moyo abɔ kpɛɛ bate: «Bontosɛi nku-ganja nde na lɛɛngɔ, akuɛ! A nde bende, nnd'atɔlɛli alendɛ go na lɛɛngɔ oni.» 23 Aba balulusa go, aba bakɔbhaga ngɔmbɛ nd'abɔ, aba bata eluule na anjaga-li n'egoo. 24 Omi nde ma basoda ndɔ ab'asosia bende, banngisɛ Pɔlɔ sub'a endu a basoda, bam'bɛtɛ nga, ayɔngɛ hɛlɛ mbénɔ nga éma sina yɛu bato ndɔ banyogea bo. 25 Mpa, mbènɔ nde bam'boigi nee na ngolí, Pɔlɔ ab'anngodea omi nde ma basoda nde ai wa, ate: «Nabana nto a nde mɔLɔma, o na bokama la bɛta l'aɛ na basɔ̀i-mbɛ yɔnga nd'aɛ†?» 26 Mbènɔ nde omi nde ma basoda aɔki nee bo, ab'aga antɔmila mokama nde maɛ, ate: «Odhu ote ɔkɔlanɛ nde iboni? Nto nde a nde mɔLɔma!» 27 Mokama ndɔ ab'asɛdɛa a mpiti a Pɔlɔ, ab'amulisa ate: «Omongodeɛ to, o nde mɔLɔma?» Éme iyɛ ate: «Ɛhɛ!» 28 Emesunga na mokama ndɔ ate: «Eme nelèi ngbota a ntondɔ nga bende, nebɛ mɔLɔma.» Éme Pɔlɔ ate: «Ka mpa, eme ne nde mɔLɔma a bɔtɛana.» 29 Dia ndɔ, bande ai bate bam'bɛtɛ Pɔlɔ ndɔ aba baejujia. Mokama ndɔ ab'atea mbènɔ nde aúbhi nee bende Pɔlɔ a nde mɔLɔma, na sinde ai annyangisisi nee.
Pɔlɔ aɛyɔngɛla mosá la ntua mati nda baYuda
30 Uma-li, mokama nde ma basoda nde ba Lɔma ab'akaba úbha la domi-domi mbénɔ éma sina yɛu baYuda banchoela Pɔlɔ. Ang'a indɔ, ab'ankodisisa Pɔlɔ, na kogisisa la omi nde ma baɛlɛli na basɔ̀i-yɔnga bɔbhu nde ba baYuda nga bende, batulanɛ. Mpa, ab'andhidhisa Pɔlɔ toa l'a endu a basoda, na mesa l'aɛ mosá l'abɔ.