23
Pɔlɔ ab'aetumia bato nde ba ntua mati ndɔ iso, ab'ayɔnga ate: «Badh'ami, a lenda l'ami bhulibhu, nnd'a be éma nde aanga basolea a meema ami na a tambela l'ami mosá la Mokonga kida la ndiende.» 2 Mpa, Ananiaa, omi nde ma baɛlɛli ab'aesosia bato nde bai a mpiti a Pɔlɔ bende, bam'bɛtɛgɛ a nyɔɔ aɛ. 3 Mpa Pɔlɔ ab'anngodea Anania ate: «Owɛ yɛu, Mokonga aɔbɛta mande, o nde bía ebòmbo nde babhumisi na pɛmbab! Oiki wa a sɔ̀a la yɔnga namɔ sinde Tɔlati ayɔngi nee, mpa go n'ongoisa Tɔlati-li, n'ososia bende bamɔbɛtɛgɛ!» 4 Bande bai a mpiti a Pɔlɔ aba bayɔnga bate: «Chaa! Ɔɔng'ɔtɔa n'ɔmɔ́tigi omi nde ma baɛlɛli nde ma Mokonga?» 5 Emesunga na Pɔlɔ ate: «Badh'ami, nnd'adhu neúbha bende a nde omi nde ma baɛlɛli. A nde bende, baandeki asub'a Ketabo nda Mokonga bende: ‹Ɔnyɔngɛla-i mɛnɔ mokama nde ma bato nde baɔ ajede†.›»6 Pɔlɔ ai aúbha bende bato bimoti angal'a bande bai a ntua ndɔ bá nde baFalisayo na batɔɔ baSadukayo. Ang'a indɔ, ab'asòmba moyo aɛ a ntua ndɔ ate: «Badh'ami, ne nde moFalisayo, muna-baFalisayo†. A nde nga, nɛɛkɛtɛli yɔnga la jujua la bàku yɛu aangisa na bamochoeli.» 7 Inde ayɔngi nee bo ndɔ, makakatanɔ ab'akɛngɛtisa a nsɔlɔ a baFalisayo na baSadukayo, na mpíta-li ab'abuanaga. 8 A nde bende, baSadukayo bayɔnga bende, bàku nnd'aanga bajujua. Ago, bayɔnga bate bamalaeka nnda bá be, nangɛ baketi. BaFalisayo ibɔ, bálebei yɔnga ndɔ bhulibhu†. 9 Nkokoto mati ab'aóbela, mpa, bangɛngɛlɛ a Tɔlati bɔlɛbɛ bande bá a boio a baFalisayo, aba bama, aba baàya kpɛɛ bate: «Nnda bɛɔni bujede ang'a nto nde, iisi. Nabana eketi aɔ malaeka yɛu ayɔngɛli asub'aɛ, nnd'aanga beúbha.»
10 Kokotana ndɔ ab'aja atì kpɛɛ. Bɔɔ aba am'baa mokama nde ma basoda ndɔ, n'atea bende, bato ndɔ aanga banchɔaga Pɔlɔ. Ang'a indɔ, ab'aesosia basoda nde baɛ bende, badhidhɛ na bantosɛ Pɔlɔ a nsɔlɔ abɔ, bangɛ nee a endu a basoda.
11 Kiia ndɔ, Mokama ab'ankidia, na ngodea l'aɛ ate: «Pɔlɔ, odhodeɛ meema aɔ! Sinde ai ɔtɔndɔlisi yɔnga namɔ naa Yɛlusalɛma, ìbo yɛu atɔlɛli ɔtɔndɔlisɛ go yu naa Lɔma.»
BaYuda bakɔli man'diɛ la móa la Pɔlɔ
12 Akidi ye bha-uma-li, adha baYuda aba batulana a bɔsɔmbi, aba baɛsɛma bende, nnd'aanga baléa na noa, na bammói-mbɛ Pɔlɔ. 13 Etángi la bato nde ai bangi a mpíta ndɔ, ai anyɛni ekomi ini. 14 Ibɔ, aba baga nɔngɔ a baomi nde ba baɛlɛli na bakpɛga, aba baengodea bate: «Bɛɛsɛmi bende, nnd'aanga beléa na noa, na bemmói-mbɛ Pɔlɔ. 15 Mpa, mbènɔ-mbènɔ nde, benu na bakpɛga nde ba ntua mati, bonngodeɛ mokama nde ma basoda bende ambhiɛ na Pɔlɔ mosá l'anu, a bende bokaba lengisana la yɔnga nd'aɛ hɛlɛ. Mpa na besu, aye bɛsɔlɔlii sinde bemmóa nee mosá la kida l'aɛ ani.»
16 Ang'a indɔ, mɔliana mma Pɔlɔ, aɔki ye man'diɛ ndɔ, ab'aga a endu a basoda ndɔ, ab'angia, ab'antɔmila Pɔlɔ mbinɔ ndɔ. 17 Mpa, Pɔlɔ ab'ankoga adha baomi nde ba basoda ndɔ moti, ab'anngodea ate: «Ongɛ na muluana nde nɔngɔ a mokama nde manu nga, a na yɔnga nde anngodea.» 18 Ìbo yɛu omi nde ma basoda ndɔ ab'anga nee nɔngɔ a mokama nde mabɔ, na ngodea l'aɛ ate: «Pɔlɔ, mmbe bannyangi ndɔ, adhu amokogi, ab'amongodea bende, nembhiɛ na muluana nde nɔngɔ aɔ nga, a na yɔnga nde aongodea.» 19 Mokama nde ma basoda ab'andhunga muluana ndɔ a njaga, ab'anga nee bhaandɔ, na ulisa l'aɛ ate: «Yɔnga sina yɛu okaba tɔmila l'ami?» 20 Emesunga na ganja ndɔ ate: «BaYuda balebeisani a mɛma l'aɔ Pɔlɔ uma bende, agɛ a ntua mati nda sɔ̀a la yɔnga. Baedhemisaga na indɔ nde nga, boakɛ bende bakaba lengisana la yɔnga nd'aɛ. 21 Olebea-i yɔnga l'abɔ nga, batì, nyɛna la ekomi ini, baɛsɔmɛni na asii na babondei dhunga l'aɛ. Baɛsɛmi bende, nnd'aanga baléa na noa na bammói-mbɛ Pɔlɔ. Mbènɔ nde, aye basɔlɔliigi éma-li bhulibhu, babondei masa bende owɛ olebeɛ.» 22 Ìbo yɛu, mokama ndɔ ab'ansosia ganja ndɔ ate: «Onngodea-i naa nto bende, odhu ɔmɔtɔmili yɔnga nde.» Mpa, ab'ansisa.
Bangee na Pɔlɔ nɔngɔ a amɛnɛ a ɛkɔngɔ Feliki
23 Mpa, mokama ndɔ ab'aekoga baomi babale nde ba basoda nde baɛ, ab'aengodea ate: «Bɔɛsɔlɔliɛ basoda eyana ibale na batɔɔ ekomi sobe-lalɔ, bande batamba antat'a bafalasi, na bato a ekonga eyana ibale nga, bagɛ naa Kaisalia kiia a mbènɔ l'inda isalɔ. 24 Boekabɛ go na bafalasi, bon'daisɛ Pɔlɔ antat'a moti na bongɛ nee na bɔkɔlɔ nɔngɔ a amɛnɛ a ɛkɔngɔ Felikic.» 25 Mpa, ab'aandeka baloa, bende:
26 «Mangɛsɛ Feliki, mokama, eme Kɔlɔdiɔ Lusia, neosesei! 27 BaYuda ai bandhungi nto nde bate, bammóɛ. Mbènɔ nde nɛɔki nee bende, a nde mɔLɔma, eme na basoda ab'aga bentosa a njaga abɔ. 28 A kaba la úbha la inde baYuda banchoeli, auma nengee nee a ntua mati nd'abɔ nda sɔ̀a la yɔnga. 29 Nɛɔni bende, banchoeli masa a yɔnga la maanɔ nd'abɔ. Nndag'ai akɔli naa bujede nde atɔlɛli kulia-li, nangɛ màa l'aɛ asub'a ngɔmɔ. 30 Mpa, adhuma nɛɔki bende, baYuda bimoti bakɔli man'diɛ, bakaba móa l'aɛ. Aangisi adhuma nekamisigi tea l'aɛ nɔngɔ aɔ. Auma neesosii bande banchoela bende, agɛ bayɔngɛ yɔnga nd'abɔ mosá l'aɔ.»
31 Mpa, basoda aba bakɔla sinde mokama nde mabɔ aesosii nee, aba bam'bɛsa Pɔlɔ, aba banga nee kiia ndɔ kida la Antipatili. 32 Uma-li, basoda ai batambi antat'a bafalasi aba baga mosá áma imoti na Pɔlɔ, na bande ai batambi n'ego, aba baedoa na siana la asub'a endu abɔ. 33 Bande ai batamba antat'a bafalasi, kida l'abɔ Kaisalia, aba bammòa amɛnɛ a ɛkɔngɔ Feliki baloa, na bhísa la Pɔlɔ a njaga aɛ. 34 Amɛnɛ a ɛkɔngɔ ab'asɔma baloa ndɔ, mpa ab'amulisa Pɔlɔ ina a ɛkɔngɔ nd'abɔ. Iwa, ab'aúbha bende, a nde nto nde maa Kilikia. 35 Emesunga na Feliki ate: «Nɛɔɔkanea mande n'aye bande baochoeli bakidi.» Mpa, ab'aesosia basoda bende, banangɛ Pɔlɔ a endu a ɛbɔamɛ nda Ɛlɔdɛd.