Ɛkɔli 24

BaYuda banchoeli go Pɔlɔ naa Kaisalia

Mbusa a kia itanɔ, Anania, mɔɛlɛli mati, ab'adhidhila naa Kaisalia na adha bakpɛga bɔlɛbɛ na nyɔngɛli moti ina aɛ Tɛlɛtulɔ. Aba bakida mosá la amɛnɛ a ɛkɔngɔ Feliki^a a yɔnga la choela la Pɔlɔ. 2 Aba bankogisisa Pɔlɔ, na Tɛlɛtulɔ ab'akɛngɛtisa choela l'aɛ ate: «Mangɛsɛ, a yɔnga l'aɔ yɛu aangisi be bá na bɔkɔlɔ niina nde. A nde a bokama nd'aɔ yɛu ebhodo atì akɔkɔtiani a lɛɛngɔ asu nde. 3 Mangɛsɛ Feliki, beosìma a éma nde ɔkɔla a mpuɔ bhulibhu na mbènɔ bhulibhu. 4 Mpa, neòloisa-i bosa, ang'a indɔ, nɛɔmɛmi belebele, ɔsɔɔkɛ mbɛɛ n'ɛdɛ. 5 A nde bende, besu bɛɔni bende nto nde a nde nto a nkokoto kpɛɛ. Aejajisi baYuda asub'a lɛɛngɔ-li bhulibhu. Iyɛ, a nde omi nde ma boio nda baNajalɛti^b. 6 Ai akengei go ujisa la bobhu la endu a Mokonga, aba bendhunga. [Auma bekóndi bende, bɛsɔ̀ɛ yɔnga nd'aɛ sinde maanɔ nd'asu ayɔngi nee. 7 Mpa, mokama Lusia adhuma angàmeli, na tosa l'aɛ a njaga asu am'ekanda-kanda. 8 Mbusa-li, ab'aesosia bato nde banchoeli bende, babhiɛ nɔngɔ aɔ^c.] Nangɛ n'omulisigi, owɛ nganga ɔb'ɔɔna kodomi la inde benchoeli.» 9 BaYuda nde bai wa, aba balebeisa indɔ bate: «Domi l'aɛ yu ndɔ.»

Pɔlɔ aɛyɔngɛla mosá la amɛnɛ a ɛkɔngɔ Feliki

10 Mokama Feliki ab'ansosia Pɔlɔ na njaga bende ayɔngɛ, n'iyɛ ab'ansisila ate: «Neúbha bende, o nde nsɔ̀i-yɔnga a lɛɛngɔ nde toa la elemɔ atì. Ang'a indɔ, nnda ne na maamaa a ngodea l'aɔ yɔnga namɔ. 11 Owɛ nganga aanga olengisana yu nga, atesi-mbɛ kia mɔkɔ́ na ibale toa la mbènɔ nde netálii nee Yɛlusalɛma ga bhebha la Mokonga. 12 Bamodhondi-mbɛ na beambola na nto, aɔ na neejajisa bato abɛ n'endu a Mokonga, aɔ asub'a endu a sinagogi, aɔ go áma atɔɔ na bɔma. 13 Bato nde nnd'aanga batɔa angelisa l'aɔ kodomi a yɔnga nde bamochoeli au mbènɔ nde ani. 14 Mpa, inde nelebei gɔɛ mosá l'aɔ a nde bende: Nembhebha Mokonga nde ma batata asu, na belea la asii nde ibɔ bate, a nde boio a mbéa. Nelebei yɔnga bhulibhu nde baandeki asub'a Tɔlati nda Mósa, na asub'a ketabo nda baúbhilili. 15 Ne na bɔɛkɛtɛla ang'a Mokonga sinde bande n'ibɔ ba nee bende, bato banja na bato bajede bɔbhu bajujua lɛ a kukua^†. 16 Indɔ yɛu aangisi, na neengbamisa esa-li bhulibhu nga, nebɛ na meema nde nnda neesolea au mosá la Mokonga na mosá la bato.

17 Mbusa a bólana l'ami Yɛlusalɛma a elemɔ atì, nebhii go a yɔnga la gabhea la bato nde ba lɛɛngɔ asu ntondɔ a tabela l'abɔ, na gabhea la Mokonga bɔɛmbɔ. 18 Ai bamodhondi n'aye nɛgɔbi gabhea la bato bɔɛmbɔ a bɔlɔliɔ ndɔ n'endu a Mokonga. Nnd'ai be mɔlɔndɔ a bato nangɛ nkokoto^† l'abɔ. 19 Mpa, adha baYuda nde ba Ajia bai wa. Ibɔ yɛu ai atɔlɛli babɛ mosá l'aɔ ani na choela l'ami nabana bai na yɔnga n'eme. 20 Aɔ, bato nde ba ani nde, bayɔngɛ to kosà bujede sina yɛu baɔni ang'ami, mbènɔ nde nedhu nee mosá la ntua mati la sɔ̀a la yɔnga. 21 Kosà ai baɔni ajede mbènɔ nde ai neláki nee na moyo enda mosá l'abɔ nte: ‹A nde nga nelebei yɔnga la jujua la bàku a kukua yɛu aangisi ndiende bɔsɔ̀ɛ yɔnga namɔ bende^†!›»

22 Feliki, ai n'aye aúbhi hɛlɛ yɔnga la Asii nda Yesu nde, ab'asosia bende basɔ̀ɛ yɔnga ndɔ esa atɔɔ, ate: «Nɛsɔ̀a mande yɔnga nd'anu mbènɔ nde mokama nde ma basoda Lusia abhia mande nee.» 23 Mpa, ab'ansosia omi nde ma basoda ndɔ bende, anangɛ go Pɔlɔ a ngɔmɔ, mpa bannobisa-i, na aɛkɔ́misa-i badh'aɛ bhia lenga l'aɛ.

Pɔlɔ aɛyɔngɛla mosá la Feliki na nkaɛ Dulusila

24 Mbusa a kia bɔlɛbɛ, Feliki^† ab'ambhia na nkaɛ Dulusila^d, mmbe ai moYuda. Ab'ankogisisa Pɔlɔ na ɔkanea l'aɛ a yɔnga la boosobela l'aɛ ang'a Kilisitɔ Yesu. 25 Mbènɔ nde Pɔlɔ akɛngɛtisi nee yɔnga la sinde atɔlɛli nee bá la na tambela la domi, lenda la makanga guliaga la éma na a yɔnga la esa nde abhia nde, mbènɔ nde Mokonga aɛsɔ̀a lɛ bato, Feliki ab'abɔgɔmanaga. Ab'anngodea ate: «Abɛ sunga wa, oong'oga! Neokoga go mande n'aye nɛɔni mbènɔ.» 26 Ai aaka bende, Pɔlɔ ammòa mande ntondɔ. Ang'a indɔ yɛu, ai ankogisisaga Pɔlɔ nkobà atì, bhia ambola la n'iyɛ.

27 Mbusa a elemɔ ibale, Pɔlɔkiɔ Fɛsitɔ^e ab'asenga a mpɛnɛ a Feliki. Mpa, Feliki ai akɔ́mi kodaga la Pɔlɔ nga, ai akaba boekóndisisa la ang'a baYuda.