Pɔlɔ anákeli mɔamɛ Kaisali
25
Mpa Fɛsitɔ ab'akida asub'a ɛkɔngɔ ndɔ. Mbusa a kia isalɔ, ab'atoa Kaisalia tália la Yɛlusalɛma. 2 Io, baomi nde ba baɛlɛli na bakpɛga nde ba baYuda, ab'aga banchoela Pɔlɔ mosá l'aɛ. 3 Aba bangámelaga Fɛsitɔ bende akɔlɛ abɔ enjambi a bhìsa la Pɔlɔ naa Yɛlusalɛma. Nga, ai balebeani bhísa la bato na asii bende, bammóɛ Pɔlɔ. 4 Mpa, emesunga na Fɛsitɔ ate: «Pɔlɔ a asub'a ngɔmɔ naa Kaisalia. Na eme nganga, nesiana we dia. 5 Negɛ na adha baomi nde banu we. Nabana nto nde akɔli éma ajede, bagɛ banchoelɛ io.»6 Fɛsitɔ ab'ala o bía kia lalɔ aɔ mɔkɔ́, ab'adhidhila naa Kaisalia. Uma-li, ab'aika a ntua la sɔ̀a la yɔnga, na sosia la bende, bambhiɛ na Pɔlɔ. 7 Mbènɔ nde Pɔlɔ akidi nee, baYuda nde ai batoi Yɛlusalɛma, aba bantimbilaga, aba banchoelaga yɔnga atì nde atiadigi kpɛɛ, inde nnd'aanga batɔa ɔngiana la kodomi-li. 8 Pɔlɔ ab'aɛyɔngɛla iyɛ nganga, ate: «Nnda nɛkɔli naa bujede moti, abɛ a Tɔlati nda baYuda, abɛ a endu a Mokonga nangɛ ang'a mɔamɛ Kaisali.»
9 Fɛsitɔ, sinde ai akaba nee boekóndisa ang'a baYuda, ab'amulisa Pɔlɔ ate: «Oong'okónda tália la Yɛlusalɛma nga bende, basɔ̀ɛ yɔnga nd'aɔ bhulibhu io?» 10 Emesunga na Pɔlɔ ate: «Neme a ntua la sɔ̀a la yɔnga nda mɔamɛ Kaisali, na iani yɛu atɔlɛli basɔ̀ɛ yɔnga namɔ. Nnda nɛɛkɔlɛli baYuda bujede imoti, sinde owɛ nganga oúbha nee hɛlɛ ndɔ. 11 Nabana nɛkɔli ajede, aɔ nɛkɔli éma nde atɔlɛli nekuliɛ yu, nelebei kukua. Mpa, nabana inde bamochoela nndaga domi, kesi nnd'a be nto nde atɔlɛli màa l'ami a njaga abɔ. Nenákeli mɔamɛ Kaisalia.» 12 Fɛsitɔ, mbusa a ulisana la na bato nde ba ntua nd'aɛ, ab'ansisila Pɔlɔ ate: «Sinde onákeli na mɔamɛ Kaisali ndɔ, oga mande mosá l'aɛ.»
Bambhii na Pɔlɔ mosá la mɔamɛ Agilipa
13 Mbusa a kia bɔlɛbɛ, mɔamɛ Agilipab na Bɛlɛnikɛ, aba bakida Kaisalia, ga sesea la Fɛsitɔ. 14 Sinde ai bale nee o ngbota a elie, Fɛsitɔ ab'antɔmilaga mɔamɛ Agilipa yɔnga nda Pɔlɔ, ate: «Nto moti a ani, mmbe Feliki auma an'du a ngɔmɔ. 15 Mbènɔ nde ai negee naa Yɛlusalɛma, baomi nde ba baɛlɛli na bakpɛga nde ba baYuda, ai banchoeli bende, amɔnɛ mokpata. 16 Ab'ai neesisila bende: BaLɔma nnda bá na nkani la sɔ̀a la yɔnga nda nto ìbo. Atɔlɛli mbɛɛ batulanɛ na bande banchoeli. Mpa, aɛyɔngɛlɛ iyɛ nganga a inde banchoeli au. 17 Mpa, ai nebhii n'ibɔ ani áma imoti, nnd'ai nɛlɛbhisi, uma-li aba neika a ntua la sɔ̀a la yɔnga, na sosia la bende, bambhiɛ na nto ndɔ. 18 Mbènɔ nde bande banchoeli bakidi nee, nnd'ai nɛɔni au yɔnga ajede sinde ai neaka nee. 19 Ai bakakatana n'iyɛ masa a yɔnga la esomba nd'abɔ ibɔ nganga, na a yɔnga la nto moti ina aɛ Yesu, mmbe ai aku, na Pɔlɔ ai ayɔnga ate, aɔnɛa go. 20 Eme, nnd'ai neúbhi sinde aanga nɛsɔ̀a na yɔnga ndɔ. Ang'a indɔ, aba nemulisa Pɔlɔ bende, nabana alebei ga la Yɛlusalɛma nga, bagɛ basɔ̀ɛ yɔnga nd'aɛ we. 21 Mpa, iyɛ ab'angámelaga bende, aɛyɔngɛlɛ yɔnga nd'aɛ mosá la mangɛsɛ Kaisali. Aba nesosia bende banangɛ a ngɔmɔ kida la sinde nentea nee nɔngɔ a mɔamɛ.» 22 Agilipa ab'anngodea Fɛsitɔ ate: «Na eme ne na sei a ɔka la nto ndɔ.» Mpa, emesunga na Fɛsitɔ ate: «Uma yɛu ɔɔka mande adha moyo aɛ.»
23 Uma-li, Agilipa na Bɛlɛnikɛ aba babhia na boumu mati. Aba bangia a ntua ndɔ na tulana la na bakama nde ba basoda, na bakpɛga nde ba bɔma ndɔ. Fɛsitɔ ab'aesosia basoda bende, bambhiɛ na Pɔlɔ. 24 Fɛsitɔ ab'ayɔnga ate: «Mɔamɛ Agilipa na benu bɔbhu nde bo ani, bɔmɔna nto nde! Mmbe baYuda bɔbhu ai banchoeli mosá l'ami naa Yɛlusalɛma na iani go. Aba bakoga kpɛɛ bate, nnd'atɔlɛli aɔnɛanɛ go na lɛɛngɔ. 25 Eme, nɛɔni bende, nnd'a be éma nde atɔlɛli akuliɛ. Mpa, nga iyɛ auma anákeli mangɛsɛ Kaisali, nelebei tea l'aɛ we. 26 Mpa, nebóli yɔnga niina nde aanga neanndekea mɔamɛ Kaisali a yɔnga l'aɛ. Indɔ yɛu aangisi, nembhia nee mosá l'anu, kpɛɛ mbɛɛ mosá l'aɔ owɛ mɔamɛ Agilipa. Omulisɛgɛ nga, nebɛ na inde neandeka a yɔnga l'aɛ. 27 A nde bende, tea la nto nde bannyangi nɔngɔ a mɔamɛ Kaisali makanga angelisa la hɛlɛ yɔnga nde aangisi banchoela, a masa ebhobho.»