Pɔlɔ aɛyɔngɛla mosá la Agilipa
26
Agilipa† ab'anngodea Pɔlɔ ate: «Beososii bende ɔyɔngɛ to yɔnga nd'aɔ.» Mpa, Pɔlɔ ab'asòmba njaga aɛ na ab'aɛyɔngɛla ate: 2 «Mɔamɛ Agilipa, ne na bujɛmɛ mati ma la mosá l'aɔ ndiende a yɔnga bhulibhu nde baYuda bamochoela au. 3 Nga, oúbha hɛlɛ nkani bhulibhu nda baYuda na yɔngaga l'abɔ. Ang'a indɔ yɛu nɛɔmɛmi nte ɔmɔɔkaneɛ na meema nde adhodeani.4 BaYuda bɔbhu baúbha lenda l'ami, a toa la kobuluana l'ami a meeme a batob'ami, nangɛ naa Yɛlusalɛma. 5 Bamoúbha toa la kala, nabana bakóndi aanga batɔndɔlisa yɔnga namɔ bende ai nelenda na nesikisa maanɔ nda boio nda baFalisayo† na nɛbhɛda nkási nda Mokonga na mouɔ. 6 Mpa ndiende, neme a ntua la sɔ̀a la yɔnga nde ani nga nelebei mɔkɔ̀ nde Mokonga aelàki bàtata asu. 7 Mba mɔkɔ́ na ibale nda bato nde basu, bambhebha Mokonga kiia n'etonge na mouɔ na baɛkɛtɛla kida la mɔkɔ̀ ndɔ. Mɔamɛ Agilipa, a yɔnga la bɔɛkɛtɛla ndɔ yɛu aangisi baYuda na bamochoela. 8 Nga éma sina yɛu na benu bòaka bende Mokonga nnd'aanga aejujusa bàku toa l'a kukua? 9 Domi, nɛngɛbɛ n'eme nedhu neaka bende atɔlɛli nemanisɛ ina a Yesu nde maa Najalɛti sinde neúbhi nee. 10 Indɔ yɛu ai nɛkɔla naa Yɛlusalɛma. Na eme nganga ai neemaa bambhumani batì a ngɔmɔ a bokama nda baomi nde ba baɛlɛli. A mbènɔ a móa l'abɔ ai nɛdɛgɛlisa bende a nde yɔnga anja. 11 Ai nega a kela endu a sinagogi nkobà atì ga ɔnisa l'abɔ mokpata, na ai nɛɛsɔ́a bende baɔtɛgɛ ina a Yesu. Asub'a boetani l'ami, ai neebelea nangɛ a bɔma l'inda lɛɛngɔ atɔɔ† ga nobisa l'abɔ.
Pɔlɔ atɔmia sinde ai aetii nee mokilisitɔ
12 Mpa a yɔnga la indɔ, ai nega naa Damasiki a bokama na a nkási nde baomi nde ba baɛlɛli ai bamopi. 13 Esa imoti, na ne na asii, a meeme a etonge, mɔamɛ Agilipa sɛ, aba nɛɔna njenja nde atoa na kobha. Njenja ndɔ anyɛni njenja la máni. Ab'aɛnia a timba l'ami na bande netamba n'ibɔ. 14 Besu bɔbhu aba begua a dodo. Mbusa indɔ mpa, aba nɛɔka moyo n'amongodea a eluu nda baEbhalania ate: ‹Saulɔ, Saulɔ, nga éma sina yɛu omonobisa? O na meema akpɛ bía ntɛ nde nnd'atea gbutu a mee nda nangi nde maɛ. Oenobisa nde owɛ nganga!› 15 Na aba nɛyɔnga: ‹O nde màni Mokama?› Na Mokama ab'ayɔnga ate: ‹Eme ne nde Yesu, mmbe onnobisa ndɔ. 16 Mpa, oomesiɛ to na omɛ bo ngbi! A nde bende, neoóbeli na nɛɔsɔmbɔli bía nkɔbɛ nde mamɔ na ntɔndɔlisi a éma nde ɔɔni ang'ami ago na a inde nɛɔɔngia mande. 17 Neoóloisa mande ang'a batob'aɔ na ang'a bato nde ba na lɛɛngɔ atɔɔ, bande neotei nɔngɔ abɔ. 18 Neotei nɔngɔ abɔ nga oukuɛ iso abɔ. Baetiɛ toa la asub'a dhoda na ngia la asub'a bobhu, na batoɛ a bokama nda Sitani baetiilɛ ang'a Mokonga. N'iyɛ aliliɛ ilɔlɔ nd'abɔ nga, badɔ̀ɛ moando nde aebhísii bato nde baɛ a yɔnga la boosobela nd'abɔ ang'aɛ.›»
Pɔlɔ atɔmia nkási nd'aɛ
19 «Mɔamɛ Agilipa, ang'a indɔ nndag'ai nɛkɔ́mi sikisa la njei nde atoi na kobha. 20 Mpa, ai neelabheli mbɛɛ bande ba Damasiki, mbusa-li bande ba Yɛlusalɛma, na ang'a bande ba lɛɛngɔ a Yudɛa bhuu na bande ba lɛɛngɔ atɔɔ. Bolabhɛ ndɔ ai nde bende batiɛ meema abɔ, na baetiilɛ ang'a Mokonga na lenda l'abɔ aɔngiɛ bende aye baetii†. 21 Ang'a indɔ yɛu baYuda adhu bamodhungi na ne n'endu a Mokonga, aba bakaba bate bamɔgɔbɛlɛgɛ. 22 Mpa, nga boangɔ nda Mokonga amolangi kida la ndiende, neme ani na nɛtɔndɔlisa ang'a bande nnda bá na boumu na bande bá na boumu. Nndaga nɛyɔngi éma atɔɔ nyɛna la inde baúbhilili na Mósa ai balabhi bende aóbela lɛ. 23 A nde bende, atɔlɛli Kilisitɔ anobɛ, abɛ mmbe ajujua mamosá-mosá angal'a bàku. Nga alabhɛ bende njenja la bolamisi aejegii mpa bato bɔbhu, baYuda na bande nndaga baYuda†.»
Pɔlɔ akaba bende Agilipa anebeɛ Yesu
24 Pɔlɔ n'aha aɛyɔngɛla, Fɛsitɔ† ab'ayɔnga na moyo enda ate: «Pɔlɔ sa, ogee nde egesile! Ka yu nde gola la atì aoyalisi nde.» 25 Pɔlɔ ab'ansisila ate: «Mangɛsɛ Fɛsitɔ, nndaga negee egesile, mpa a gɔɛ nde yɔnga la domi na inde a na bɔɛngɛ yɛu nelabha. 26 A nde bende, Mɔamɛ Agilipa aúbha yɔnga nde bhulibhu, ang'a indɔ yɛu nnda ne na bɔɔ mosá l'aɛ. Neúbha domi gela bende, angal'a inde nnd'a be naa éma imoti nde abosi, nga nnd'ai aóbeli a bɔsɔmbi. 27 Mɔamɛ Agilipa, o na boosobela a yɔnga nda baúbhilili? Neúbha bende o na boosobela ndɔ.»
28 Emesunga na Agilipa ate: «Oaka ote ɔtɔa tia l'ami mokilisitɔ a mbènɔ ɛdɛ mbɛɛ!» 29 Pɔlɔ ab'ansisila ate: «N'aye nde a mbènɔ atì aɔ ɛdɛ, nɛmɛma Mokonga bende, nndag'a masa owɛ, mpa nangɛ bɔbhu nde bamɔɔka ndiende, babɛ sinde ne nee nde, makanga nkɔndɔ́ nde.»
30 Mbusa a yɔnga la indɔ, mɔamɛ ab'ama na amɛnɛ a ɛkɔngɔ n'iyɛ na Bɛlɛnikɛ na bande baiki n'ibɔ. 31 A toa l'abɔ wa, aba bayɔngisanaga bate: «Nto nde nnd'akɔli éma ajede nde aang'aangisa n'akulii aɔ màa l'aɛ asub'a ngɔmɔ.» 32 Agilipa ab'anngodea Fɛsitɔ ate: «Adhu aanga ban'dɔlɛa nto nde, nabana nnd'adhu anákeli mɔamɛ Kaisali.»