Bangee na Pɔlɔ naa Lɔma
27
Mbènɔ nde balamoli ga l'asu nee a koko saka lɛɛngɔ a Italia, aba bambhísa Pɔlɔ na adha bande baenyangi bɔlɛbɛ a njaga a omi nde ma basoda mmbe bankoga bate Yuliɔ. Iyɛ ai go nde a boio a bande ai bananga mangɛsɛ Kaisali. 2 Ab'ai bedaa a koko nde ai atoa naa Adalamitia, n'aga n'ama a njabhɔ ntuantua nda ɛkɔngɔ nda Ajia. Bei áma imoti na Alisitalikɔ nde maa Makedonia nji nda Tɛsalɔnika. 3 Uma-li aba bekida naa Sidɔni. Yuliɔ ab'ankɔlɛla Pɔlɔ bonja, na sosia l'aɛ bende agɛ nɔngɔ a badh'aɛ nga bagɛ bammòɛ inde a nee bungu. 4 A toa l'asu wa, aba bedaa go a koko-li, kukisa ab'asotalokisa tamba la hɛlɛ. Ang'a indɔ, aba bɛnyɛna a ɛbhɛ-ɛbhɛ la kesanga nda Kipulɔ a kpangba la kukisa ndɔ. 5 Mbusa a jabha la íbo nde ai alengelani na lɛɛngɔ a Kilikia na Pamifilia, aba bekida a bɔma nda Mila a ɛkɔngɔ nda Likia na sìmila la wa. 6 Io, omi nde ma basoda ab'aɔna da-kokob mati nde ai a toa naa Alekisandulia n'aga naa Italia, ab'asodaisa au. 7 Aba betamba kia enda n'ɛdɛ asub'a koko ndɔ, a go boyede na aba bekida a enobɔ mati a mpiti a bɔma nda Kinidɔ. Nga kukisa ai masii ab'asotalokisa tamba, ab'ai betesa mpasɔ a kesanga nda Kɛlɛtɛ saka Salamɔni. 8 A enobɔ mati, aba bekida áma bakoga bate Njabhɔ-Anja, a mpiti a bɔma nda Lasɛa.9 Mbusa a esa atì, tamba-li ab'aja ang'asu na mokobobo, nga mbènɔ a dinyɛc la ika la makanga léa la eléa ai n'aye anyɛni. Pɔlɔ ab'aekèngemisa ate: 10 «Baboo nde sa, nɛɔni bende tamba nde abá nde nda enobɔ kpɛɛ na mokobobo, nga nndaga masa a koko na nkumba-li bhulibhu nde asubi yɛu aujuana. Mpa go, nangɛbɛ lenda l'asu besu bamɛnɛ n'eyu bebungisa.» 11 Mpa, omi nde ma basoda ndɔ, kanga bende aɔki yɔnga nde Pɔlɔ adhu ayɔngi, ab'aɔka nde ind'a ntambisi-koko na ind'a amɛnɛ a koko-li. 12 Nga saka kubhi a íbo nndag'ai we mpuɔ anja áma ika a elemɔ a heɔ akpɛ, mpa bato batì a koko-li aba bayɔngisanaga bate, atɔisanɛ gɔɛ nde na bekidi naa Fɔinikia a bondelaga la sía la elemɔ a heɔ-li. Fɔinikia ai nde njabhɔ anja a sɔmɛa la koko a yɔnga la kukai nde atoa saka naande máni aki aóbela nee.
Kukai atesa antat'a íbo
13 Na-nyia-moheɔ ab'atoa saka a mpasɔ ab'atesa, aba baɔna bende nkási nd'abɔ aanga atɔisana. Aba baodia mpondo-li na aba bakpangbaga a mpiti-mpiti a kesanga nda Kɛlɛtɛ. 14 Mbusa a mbènɔ ɛdɛ, ab'aóbela kukai nde bakoga bate Ɛlakilɔ, inde ai atoeli saka a kesanga ndɔ. 15 Kukai ndɔ ab'abɛta koko-li. Nga indɔ go, nndag'ai be inde aanga bɛkɔla, aba bedoa kukai-li asogɛ nee. 16 Aba betesa saka a mpasɔ a kesanga nnd'ɛdɛ inde bakoga bate Kauda, n'iyu ab'asodegelaga a kukai ndɔ. Ab'ai bɛtɔisa a noba kpɛɛ sòmba la na-nyia-koko-li, na gesa-li antat'a koko la mmbe mati. 17 Bato a koko-li, mbusa a sòmba la nyia-koko ndɔ, aba batimbisaga koko la mmbe mati ndɔ na ngolí. Na batea bende baga-i bakiga áma a ntánda aleɔ saka nkpalɔ a lɛɛngɔ a Libia. Aba bamaa asub'a íbo éma nde aangisa koko n'agee bɔbɔɛ na aba badoa kukai bende, atambisɛ koko-li. 18 Mpa nga kukai-li ai n'aye asosugbigi kpɛɛ, uma-li bato a koko-li aba bakɛngɛtisa maa l'adha nkumba-li asub'a íbo. 19 Bha a uma-li, bato a koko-li aba bamaa adha kioma nda koko-li asub'a íbo na njaga abɔ ibɔ bamɛnɛ. 20 Ai n'aye bele esa atì makanga ɔna la máni nangɛ balɛlɛngɔa. Mpa nga kukai-li ai n'aha masii, nndag'ai aye be na boosobela la làma.
21 Bato ai n'aye bale kia atì makanga léa l'eléa, Pɔlɔ ab'ama a meeme abɔ na ngodea l'abɔ ate: «Benu baboo, n'adhu bɔmɔɔki bende betoa-i Kɛlɛtɛ, mmbɛ beóloi a kukua na a bungisa la nkumba bende. 22 Mpa, nenongodea bende bobubilɛ. A nde bende, nnda angal'anu mmbe akua, masa koko-li yɛu agbɔlɔana. 23 A nde bende, eme ne nde nto nde ma Mokonga, mmbe nembhebha. Na ndiende kiia, malaeka nde maɛ moti adhu ame a mpiti ami, 24 ate: ‹Pɔlɔ, otea-i! Nga atɔlɛli omɛ mosá la mɔamɛ Kaisali, na aande Mokonga aopi a boangɔ lenda la bato bɔbhu nde o n'ibɔ asub'a koko-li.› 25 Molemɔ badh'ami! A nde bende, neesobeli Mokonga bende, yɔnga ndɔ akida masa sinde adhu n'aye amongodei nee. 26 Mpa gɔɛ, koko nd'asu yɛu aga akiga a kesanga imoti.»
27 Mbusa a kiia mɔkɔ́ na ini, kukai ai n'aha ga na asosugbaga asub'a íbo mati nda Adɛlia. A meeme a kiia, batambisi-koko ndɔ ai baaka bende aye bakidi mpiti a kubhi. 28 Aba bamaa ngolí asub'a íbo a úbha la bonda la kibha-li na aba baɔna bende kida la na te a nde njaga ekomi ibale. Sɛdɛa la mosá n'ɛdɛ, aba go bamaa, iwa ab'a be njaga mɔkɔ́ na itanɔ. 29 A tea la dhɔa la koko-li na balabala, aba badhidhisa mpondo ini nda saka mbusa a koko-li na babondelaga sa la máni. 30 Bato a koko ndɔ ai bakaba tatea, aba badhidhisa nyia-koko la mmbe mɛdɛ asub'íbo na baedhemisaga bende bakaba nde maa la mpondo nda mosá la koko-li. 31 Pɔlɔ ab'aga anngodea omi ndɔ na basoda-li ate: «Bato nde na nnd'aye batígi asub'a da-koko nde, kesi nnd'aanga bolama.» 32 Mpa, basoda aba bauda ngolí a koko la mmbe mɛdɛ ndɔ, na dɔ́isa-li asub'íbo.
33 A bondela la sa la máni, Pɔlɔ ab'aegámelaga bato-li bɔbhu bende baléɛ eléa, ate: «Ndiende a nde kia mɔkɔ́ na ini, na boiki asub'a bɔɔ la makanga léa la éma. 34 Ang'a indɔ yɛu nenogámeligi nte boléɛ eléa nga anopɛ ekanda. A nde bende, nnd'a be naa nto nde abungisa mande sia-moo aɛ.» 35 Mbusa a Pɔlɔ yɔnga la ìbo, ab'abɛsa mokate, ab'ansìma Mokonga mosá la bato bɔbhu. Ab'abúnaga yu ab'akɛngɛtisa léa. 36 Bato-li bɔbhu aba batuma na mouɔ, n'ibɔ aba baléa eléa. 37 Bei asub'a koko-li bato bɔbhu, eyana ibale sobe-lalɔ na motoba. 38 Mbusa a kuta l'eléa, aba bamaaga nganɔ asub'íbo a humisa la koko-li.
Bɔɔgbɔla la koko
39 Mbusa a sa la máni, batambisi-koko ndɔ nndag'ai baúbhi lɛɛngɔ ndɔ mbénɔ a nde lɛɛngɔ sina, mpa aba baɔna mpuɔ anja áma ga mesa la koko-li na nkpalɔ. Mpa aba balamola bende aanga ga bakigisa koko-li wa. 40 Aba bakodaga ngolí a mpondo-li, aba basaga yu nga bende andiɛ asub'íbo. Na aba badhɔndɔisa ngolí nde aki anyanga mbáɔ a tiisa la koko hɛlɛ. Ago aba badaisa ngɔmbɛ nga bende kukai ndɔ agɛ na koko-li mosá, saka na nkpalɔ. 41 Mpa, aba bakida áma nde nkala aleɔ n'a nde áma íbo ibale atulaneli, iwa yɛu ab'aga bakiga. Saka a mosá la koko-li ab'akiga asub'íbo, na hale l'inda mbusa ab'aebúnaga nga kukai na íbo-li ai masii. 42 Basoda aba ba na maakɔ a móa la bande ai baenyangi ndɔ, a tea la bende moti angal'abɔ aoloa-i n'akáti. 43 Mpa, omi nde ma basoda ndɔ ab'akabisaga sinde aanga anamisa nee Pɔlɔ, mpa ab'aekálelisa basoda ndɔ, kɔla la inde adhu n'aye baaki. Ab'aesosia bande aanga batɔisa káta bende baemaɛ mbɛɛ asub'íbo na jabha. 44 Na bande batɔɔ aba bajabhelaga a hale-hale a mbáɔ, na batɔɔ go a éma nde atoigi a koko-li. Ìbo yɛu bɔbhu aba bajabha na kida la kubhi na bɔkɔlɔ.