Jujua la Yesu a kukua
24
Kiia-kiia kpɛɛ la esa la yenga, bake ndɔ ai bagee na bhota na bakumbi gamba nde a na su a nkoki nde ai bakɔkɔtii. 2 Aba badhonda ɛtɛ nde ai badegi na mpume la bhota-li na balingitisi. 3 Bake ndɔ aba bangia asuba bhota ndɔ, mpa nnd'ai badhondi kiinda a Mokama Yesu. 4 Mpa bake ndɔ n'aha ba asuba bangisana ndɔ, baboo babale aba baeóbela na balɔli ngɔmbɛ nde anjenjaga. 5 Bɔɔ ab'aedhunga na aba bagusa iso abɔ a dodo. Baboo ndɔ aba baengodea bate: «Anga éma sina yɛu bonkabaga mmbe aɔnɛa angala bande baku? 6 Iyɛ, nnd'aye ani, aye ajujui toa la asuba kukua. Bokanisɛ masa inde ai anongodei a esa nde ai n'aha Galilaya, bende: 7 ‹Atɔlɛli Muna-Nto bamóbisɛ a njaga a bato a ilɔlɔ, nga bam'bɛtɛlɛgɛ a mosalaba na a kia l'inda isalɔ ajujuɛ.›» 8 Mpa bake ndɔ aba bakanisa yɔnga nda Yesu. 9 Toa labɔ na bhota, aba baga batɔmiaga mbinɔ ndɔ anga bagoli bande ba mɔkɔ na moti na anga bande batɔɔ. 10 Bai nde Malia nde maa Mangadalɛna, Yɔana na Malia amá-Yakɔbɔ, na bake la bande bai nabɔ a asii imoti. Bai batɔmia yɔnga ndɔ anga batetei. 11 Mpa batetei nnd'ai balebei yɔnga nde bake ndɔ ai baɛtɔmili, nga ai baaka bate a nde ndɛlɛndɛlɛ. 12 Mpa Pɛtɛlɔ ab'ama na tatea la naa nde bhota-li a nee. Kida laɛ, ab'agɔtɔma ab'aɔna masa ngɔmbɛ nde ai banyangigi na kiinda-li. Na mbusa wa, ab'asiana na am'bangisi, a yɔnga nde ai anyɛni ndɔ.Yesu aeóbeli bagoli nde ba Emausi
13 Mpa, masa a esa nd'imoti ndɔ, angala bagoli ndɔ, babale ai baga a nji nde aki bakoga bate Emausi, a nde nji nde aiki a mpiti a Yɛlusalɛma a mbènɔ ibale la tamba. 14 Ai batɔmilanaga a meeme abɔ inde aye atesi bhulibhu. 15 N'aha bayɔnga na ulisanaga ndɔ, Yesu iyɛ amɛnɛ ab'aedhonda na tamba la na ibɔ áma imoti. 16 Mpa iso abɔ ai adegeani a úbhilila laɛ.
17 Mpa Yesu ab'aeulisa ate: «Éma sina yɛu boga na booulisaga au na botamba?»
Aba bama, na batumi na ngomi. 18 Moti angala abɔ, mmbe aki bankoga bate Kɛlɛɔpa, ab'ansisila ate: «Angala bato-li bɔbhu asuba Yɛlusalɛma, a masa owɛ nganga yɛu nnd'oúbha yɔnga nde auma atesi uma nde ani nde?»
19 Mpa Yesu ab'aeulisa ate: «Yɔnga sina?»
Aba bansisila bate: «Yɔnga nde bankɔlɛli Yesu mmbe maa Najalɛti. Ai nde múbhilili makpɛ mosá la Mokonga na bato bɔbhu, a yɔnga laɛ na a ɛkɔli aɛ. 20 Baomi nde ba baɛlɛli na baomi nde basu ai bamóbisi nga bammóɛ na aba bam'bɛtɛlaga antata mosalaba. 21 Na besu ai beesobeli iyɛ nga ai beúbha gea-la-bende iyɛ yɛu ai aanga aetosa baIsilaɛli a bɔkɔbɛ ndabɔ. Dhɔlɔ na indɔ go, mpa ndiende aye kia isalɔ áma éma ndɔ ateselɛ. 22 Ago, adha bake nde be na abɔ adhu basobangisi kpɛɛ. Adhu bagee kiia-kiia na bhota 23 nnd'adhu badhondi kiinda aɛ. Adhu babhii basɔtɔmila bende bamalaeka adhu baeóbeli na ngodea labɔ bende: ‹Yesu aye ajujui.› 24 Adha besu adhu bagee áma bhota-li, mpa inde adhu baɔni we a masa sinde bake ndɔ adhu batɔmii nee, n'iyɛ, nnd'adhu bamɔni.»
25 Eme sunga na Yesu ate: «Benu bato makanga maɛnɛkɔ sa! Meema anu adokomani a lebea la yɔnga bhulibhu nde baúbhilili bayɔngi. 26 Nnd'ai boúbha bende atɔlɛli Kilisitɔ anobɛ ibo mosá la ngia la ɛbɔamɛ ndaɛ?» 27 Mpa, toa l'asuba ketabo nda Mósa na ngia l'asuba ketabo nda baúbhilili-li bɔbhu, Yesu ab'aeangelisa inde ai baandeki angaɛ asuba Maandekɔ-li bhulibhu.
28 Mpa n'aye ba bhi-bhi la kida l'a nji nde ai baga au ndɔ, Yesu ab'aga mosá bía nde akaba doana la n'ibɔ. 29 Mpa bagoli ndɔ aba bangamelaga kpɛɛ bate: «Ɔtigɛ na besu ani nga, máni nde aye agɔgɔmani nde.» Ab'angia asuba n'endu nga alɛ nɔngɔ abɔ.
30 Mpa Yesu ab'aika n'ibɔ a léana, ab'abɛsa mokate na ab'agesa au ntutu, ab'abunaga yu na ab'aepa. 31 Mpa iso abɔ ab'akodoana na aba bamúbhilila, toa la iwa Yesu nnd'ai ye aɔnɛani go. 32 Na aba bangodeana sasan'abɔ bate: «Nndaga meema asu adhu atumi kpɛɛ na bujɛmɛ mbènɔ nde adhu asɔtɔmila nee na asii na sɔndɔlisa lasu yɔnga nda asuba ketabo nda Mokonga ndɔ?»
33 A mbènɔ ndɔ, aba bama na siana la Yɛlusalɛma. Aba baedhonda bagoli nde ba mɔkɔ na imoti na baiki na bato batɔɔ, 34 na bayɔnga bate: «A nde domi, Mokama aye ajujui, na adhu aóbeli anga Simoni.» 35 Mpa na bagoli nde babale ndɔ n'ibɔ aba batɔmia inde ai atesi na asii na sinde ai bamúbhilili nee mbènɔ nde ai abuni abɔ mokate.
Yesu ab'aeóbela bagoli nde baɛ
36 N'aha batɔmia go, Yesu iyɛ amɛnɛ ab'aóbela a meeme abɔ na ngodea labɔ ate: «Bɔkɔlɔ abɛ na benu!» 37 Bagoli ndɔ aba baima, bɔɔ ab'aedhunga na baaka bate bamɔni nketi. 38 Na Yesu ab'aengodea ate: «Boimi nde anga éma sina? Na anga éma sina yɛu meema anu nnd'akondi lebea? 39 Eme yɛ mbe! Bolengɛ to njaga ami na ego lami! Bɔmɔbhɛdɛɛ to, bolengɛ hɛlɛ nga eketi nnd'a na ngobho na nkuà, sinde bɔmɔɔna nee bende.» 40 N'aha ayɔnga ibo, ab'aɛɔngia njaga aɛ na ego laɛ. 41 Bía nde ai na balebei-mbɛ a yɔnga la bujɛmɛ, nga go ai n'aha aebangisi, Yesu ab'aeulisa ate: «Bo na eléa ani?» 42 Aba bammòa hale a sale nde aye basumbi. 43 Ab'abɛsa yu na ab'aléa na bamɔna a a nde wa. 44 Mbusa-li ab'aengodea ate: «Bɔɔni yɔnga nde ai nenongodea esa nde ai neha na benu. Atɔlɛli bhulibhu akidɛ sinde ai baandeki nee a yɔnga lami asuba ketabo a Maanɔ nda Mósa, ketabo nda baúbhilili na ketabo a Lembɔ.» 45 Mpa iwa, ab'aukua maɛnɛkɔ abɔ a úbha la maandekɔ, 46 na ab'aengodea ate: «A nde bía sinde ai baandeki gea-la-bende: Kilisitɔ anoba lɛ na alɛ ajujua a kia la inda isalɔ a toa la anga bande baku. 47 Na atɔlɛli golisa a ina aɛ toa la Yɛlusalɛma na anga bato nde ba mba-li bhulibhu nda na lɛɛngɔ nga batiɛ tambela labɔ ajede na Mokonga aliliɛ ilɔlɔ ndabɔ. 48 Benu yɛu bɔɔni inde bhulibhu na iso anu. 49 Mpa bɔmɔɔkɛ hɛlɛ! Nɛkɛbɛa antata anu mbènɔ-mbènɔ nde ani inde abhami ai alakia. Mpa botigɛ a bɔma nda Yɛlusalɛma kida la mbènɔ nde botuma nee na ekanda nde atoi n'egoo.»
Siana la Yesu na kobha
50 Mbusa iwa, Yesu ab'aega na bagoli nde baɛ a mpiti a nji nda Bɛtania. Iwa ab'asòmba njaga aɛ n'egoo. Ab'agesa ntutu angabɔ. 51 N'aha agesa ntutu angabɔ, ab'adoana n'ibɔ, na Mokonga aba an'daisa na kobha. 52 Ibɔ, aba babúna moo-a-kuu labɔ mosá la Yesu, na mbusa-li aba basiana Yɛlusalɛma na bajanga kpɛɛ. 53 Na esa-li bhulibhu nnd'ai batoa asuba endu a Mokonga nga bhebha laɛ.