Yesu ame mosá la nsɔndɔlisi Pilatɔ
(Olengɛ go Mat 27.1-2,11-14; Luk 23.1-5; Yɔan 18.28-38)
15
Ab'akida umauma kpɛɛ, baomi nde ba baɛlɛli aba baekoga bakpɛga nde ba nji, bangɛngɛlɛ a Tɔlati na bato bɔbhu nde ba na ntua la sɔ̀a la yɔnga, aba bangia mpíta na bhísa la maakɔ abɔ áma imoti. Mpa, aba bannyangaga Yesu na ga laɛ nee nga bansolɛ anga Pilatɔ. 2 Pilatɔ ab'amulisa Yesu ate: «Nndaga owɛ yɛu o nde mɔamɛ nde ma baYuda?» Emesunga n'iyɛ ate: «Owɛ yɛu ɔyɔngi.» 3 Mpa, baomi nde ba baɛlɛli aba bantɔnga na yɔnga ati. 4 Pilatɔ ab'amulisa go ate: «Mpa, nnd'osisi naa yɔnga imoti? Nndaga ɔɔna da-yɔnga nde baɔtɔnga au nde?» 5 Mpa, Yesu nnd'ai ye ansisi naa yɔnga moti. Pilatɔ aɔni ye bo, indɔ aba am'bangisa.Bansɔ̀ɛli Yesu kukua
6 A dinyɛ-li bhulibhu, Pilatɔ ai ankodaga abɔ nto moti nde ai bannyangi, mmbe bato ai bammɛma. 7 Mbènɔ ndɔ, nto moti, ina aɛ n'a nde Balaba ai bannyangi áma imoti na bajiji batɔɔ bande ai baemói bato a mbènɔ a nkokoto. 8 Mpa, mɔlɔndɔ a bato aba baga nɔngɔ a Pilatɔ. Aba bakɛngɛtisa mɛma laɛ bate: «Ɔkɔlɛ asu sinde aki ɔkɔlaga nee mosá ndɔ.»
9 Emesunga na Pilatɔ ate: «Bokondi bote nenkodɛ anu inde mɔamɛ nde ma baYuda?» 10 Ai aulisi bo nde nga ai aúbhi bende baomi nde ba baɛlɛli ai bansoli Yesu a yɔnga la boso. 11 Mpa, baomi nde ba baɛlɛli aba baɛjɔjɔlisa mɔlɔndɔ a bato ndɔ, nga bayɔngɛ bende ankodɛgɛ abɔ gɔɛ nde Balaba. 12 Pilatɔ ab'aeulisa go ate: «Boni yɛu nɛnkɔlɛ mmbe bote a nde mɔamɛ nde ma baYuda?» 13 Bato bɔbhu aba go bakoga kpɛɛ bate: «Ɔnkɔkɛlɛgɛ a mosalaba!» 14 Pilatɔ ab'aeulisa ate: «Éma ajede sina yɛu akɔli?» Aba go bakoga kpɛɛ bate: «Ɔnkɔkɛlɛgɛ a mosalaba!» 15 Na Pilatɔ a konda la jangisa la mɔlɔndɔ a bato ndɔ, ab'ankodaga abɔ Balaba. Aba am'bɛtisisa Yesu kibɔkɔ, na sola laɛ nga bankɔkɛlɛgɛ a mosalaba.
Basoda banjangelaga Yesu
(Olengɛ go Mat 27.27-31; Yɔan 19.2-3)
16 Basoda aba banga na Yesu asuba a nsɛngɛ a endu a Pilatɔ. Aba baekoga basoda badhabɔ bɔbhu. 17 Aba banɔlisa ngɔmbɛ anjua, aba babhísa a moo aɛ mbidha bía inda baamɛ, na baoki na kuà! 18 Mpa, aba banngodea bate: «Beosesei, Mɔamɛ nde ma baYuda!» 19 Aba bam'bɛtaga a moo aɛ na ngada, aba bansuliaga soi, aba babúnaga mooku labɔ, na tumiaga la moo abɔ a dodo mosá laɛ. 20 Mbènɔ nde bagɔbi na tɛbhɛlaga laɛ bo, aba batubha ngɔmbɛ anju ndɔ, mpa, aba banɔlisa go ngɔmbɛ ndaɛ. Aba bamóbisa na ntanga nga agɛ bankɔkɛlɛgɛ a mosalaba.
Bankɔkɛligi Yesu a mosalaba
(Olengɛ go Mat 27.32-44; Luk 23.26-43; Yɔan 19.17-27)
21 Nto moti mmbe bankoga bate Simoni, nto nde maa Kulɛnɛ, abhaɛ na Alɛsandulɔ na Lufu†, n'adhu anyɛna toa laɛ na tio, basoda aba bansosia kumba la mosalaba nda Yesu. 22 Mpa, aba banga na Yesu áma nde bakoga bate Gɔlɔgɔta, na indɔ a nde yɔnga la bende «Áma a Kɛlɛkɛlɛ.» 23 Iwa, aba bakengea mòa laɛ divai na basɔli na manɛmanɛb. N'iyɛ nndag'ai anu yu.
24 Mbusa indɔ, aba bankɔkɛlaga a mosalaba, aba babuaga ngɔmbɛ ndaɛ nkunguanabɔ, aba bakɔlɛla yu bɔsɔmbɔli nga úbha la mbénɔ nto sina yɛu abɛsa† mande inda wani. 25 Ai nde a mbènɔ isalɔ la umauma yɛu ai bankɔkɛligi Yesu a mosalaba. 26 A hale a mbáɔ nde ai bagesi gulu a moo aɛ, ai baandeki au inde aɔngiani yɔnga nde akulii bate: «Mɔamɛ nde ma baYuda.» 27 Ai bankɔkɛligi a mosalaba áma imoti na bajiji babale, moti a njaga nd'akpɛ na matɔɔ a njaga nd'emisɔ. 28 [Ìbo yɛu, yɔnga nde a asuba a Ketabo nda Mokonga ab'aɔnɛana. Nga, baandeki bate: «Ai bantangi áma imoti na bajiji.»]c 29 Mpa, bato nde ai banyɛnaga be, ai bamɔtaga, na batima moo abɔ, na yɔnga la bate: «Iyeee! Owɛ nde ote ɔgbɔla endu a Mokonga na hìa-li a kia isalɔ†, 30 oolamisɛ to owɛ nganga, na oosìmisɛ a mosalaba ndɔ wa!»
31 Nangɛ baomi nde ba baɛlɛli na bangɛngɛlɛ a Tɔlati n'ibɔ ai banjangelaga na bayɔnganaga nkunguanabɔ bate: «Ai aelamisi bato batɔɔ, mpa, iyɛ nganga nnd'atɔi boolamisa! 32 Nabana a nde Masia domi, mɔamɛ nde ma baIsilaɛli, asìmɛ to mbènɔ-mbènɔ nde a mosalaba ndɔ, nga bɛɔnɛ na belebeɛ.» Bajiji nde ai baɛkɔkɛligi na Yesu áma imoti ndɔ, n'ibɔ ai bamɔtaga.
Kuá la Yesu
(Olengɛ go Mat 27.45-56; Luk 23.44-49; Yɔan 19.28-30)
33 Akidi ye mbènɔ motoba l'etonge, dhoda ab'adega lɛɛngɔ-li bhulibhu kida la mbènɔ sobe-komi l'ɛgɔgɔ. 34 A mbènɔ sobe-komi ndɔ, Yesu ab'alaka ate: «Eloi, Eloi, lama sabakatani?» A nde bende: «Mokonga nde mamɔ, Mokonga nde mamɔ, omodu† anga ee?» 35 Adha bato nde bai wa, mbènɔ nde baɔki na yɔnga ndɔ, aba bayɔnga bate: «Bɔɔki, ankogi Elia.» 36 Adha abɔ moti ab'aga mbangɔ, ab'abɛsa sifɔngɔ, ab'aùbha suba a divai nde agagi. Ab'anyangela yu a sese a ngada, ab'ammòa Yesu bende anyunyɛ yu. Nto ndɔ ab'agea ate: «Bedoɛi! Bɛɔnɛ mbénɔ Elia abhia ndende ansìmisa.» 37 Mpa, Yesu ab'alaka kpɛɛ, na meema aɛ ab'akɔdɔa.
38 A mbènɔ ndɔ, pajiad nd'asuba a endu a Mokonga ab'anyɔana toa la n'egoo kida la mpasɔ. 39 Mpa, mokama nde ma basoda nde ba Lɔma, n'adhu mosá la Yesu, ɔna laɛ sinde meema a Yesu akɔdɔi nee bo, ab'ayɔnga ate: «Domi domi, nto nde ai nde Muna-Mokonga.»
40 Bake bɔlɛbɛ bai wa. N'ibɔ ai balenga na bame dhɔlɔ. Angala abɔ ai be: Malia mmaa Mangadalɛna na Malia amá-Yakɔbɔ la mbe nii, Yɔsɛ na Salɔmɛ. 41 Bake ndɔ ai bam'belea Yesu na tabelaga laɛ mbènɔ nde ai naa Galilaya. Bake batɔɔ bati, bande ai batalii naa Yɛlusalɛma áma imoti n'iyɛ, n'ibɔ bai wa.
Úmba la Yesu
(Olengɛ go Mat 27.57-61; Luk 23.50-56; Yɔan 19.38-42)
42 Akidi ye ɛgɔgɔ, na sinde ai nde mbènɔ a kɔkɔtia la esa la sabato, 43 Yɔjɛfu, nto nde maa Alimatɛi, mosikɛ nde ma ntua nda basɔ̀i-yɔnga nde ba baYuda, ab'akida. N'iyɛ ai abondea kida l'ɛbɔamɛ nda Mokonga. Mpa, ab'aga nɔngɔ a Pilatɔ makanga bɔɔ, ga mɛma la kiinda a Yesu. 44 Yɔnga ndɔ aba am'bangisa Pilatɔ ɔka la bende Yesu aye aku. Mpa, ab'ankogisisa omi nde ma basoda, bhia ulisa laɛ mbénɔ Yesu adhu aku kala. 45 Mbusa a ɔka la inde omi nde ma basoda ndɔ ai ansisili nee, mpa, Pilatɔ ab'anebeela Yɔjɛfu bɛsa la kiinda a Yesu. 46 Yɔjɛfu ai n'aye asómbi ngɔmbɛ la úmba la na kiinda. Ab'asìmisa kiinda a Yesu a mosalaba ndɔ, ab'anyangaga yu na ngɔmbɛ ndɔ na ga úmba laɛ a bhota nde ai batongi asuba a ɛtɛ. Ab'akingitila a mpume a bhota-li da-ɛtɛ mati. 47 Malia mmaa Mangadalɛna na Malia amá-Yɔsɛ, ai balengelela áma nde bamúmbi Yesu.