Man'diɛ la móa la Yesu
(Olengɛ go Mat 26.1-5; Luk 22.1-2; Yɔan 11.45-53)
14
Ai n'aye atigi esa ibale kida la dinyɛ la mokate makanga masau†, inde ai bakoga bate Pasaka ndɔ. Baomi nde ba baɛlɛli na bangɛngɛlɛ a Tɔlati ai bakabi sinde aanga bandhunga nee a ebhetebhete na móa laɛ, mpa ai baetea bato. 2 Nga, ai bayɔnga bate: «Nnd'atɔlɛli dhunga laɛ esa la dinyɛ nga bato bajaja-i.»Duila la Yesu nkoki
(Olengɛ go Mat 26.6-13; Luk 7.36-50; Yɔan 12.1-8)
3 Yesu ai naa Bɛtania, asuba a endu a Simoni mmbe ai aku kebukebu ndɔ. Nke moti ab'angia n'aha baiki áma a leléa ndɔ, n'akumbi chupa a nkoki a nadɔ† nde babɔngisi hɛlɛ na a na esombi ati kpɛɛ. Ab'atena na dua-li a moo a Yesu. 4 Adha bato nde bai wa ndɔ ab'aɛlɛma, aba bayɔngisanaga: «Nga iboni bungisa la nkoki ndɔ? 5 Adhuma aanga basómbisa yu ntondɔ ati nyɛna la eyana isalɔ na gabhea la bayɛnɛ.» Aba bansolea nke ndɔ kpɛɛ. 6 Yesu ab'ayɔnga ate: «Bon'doɛ, nga boni yɛu bonnobisa? Amɔkɔlɛli nde enjambi. 7 Mpa, ka esa-li bhulibhu bo na bayɛnɛ†, na aanga bootabela mbènɔ nde bokondi. Mpa angami, nnda ne na benu esa-li bhulibhu. 8 Nke nde akɔli inde atɔi. Amosìi nkoki nde nde a bɔngisaga la ngobho ami mosá la úmba lami. 9 Domi nenongodea bende, áma nde alɛ balabha Mbinɔ Anja nde asuba a lɛɛngɔ-li bhulibhu, alɛ batɔmia mbinɔ anja la nke nde, a kanisa laɛ.»
Yuda angabhi Yesu
(Olengɛ go Mat 26.14-16; Luk 22.3-6)
10 Mbusa iwa, Yuda Sikaliɔta, moti angala bande bamɔkɔ́ na babale ndɔ, ab'aga nɔngɔ a baomi nde ba baɛlɛli nga angabhɛ Yesu angabɔ. 11 Ɔka la indɔ, aba bajanga kpɛɛ. Aba banhahoela bende bammòa mande ntondɔ. Na Yuda ab'akabaga asii anja la gabha laɛ.
Yesu ali Pasaka áma imoti na bagoli nde baɛ
(Olengɛ go Mat 26.17-25; Luk 22.7-14, 21-23; Yoan 13.21-30)
12 A esa l'inda ma-mosá-mosá la dinyɛ la mokate makanga masau, mbènɔ a sɛnga la bamboli a Pasaka, bagoli nde baɛ aba bamulisa bate: «Iwani yɛu okabi ote begɛ bɛkɔkɔtiɛ aɔ Pasaka-li?» 13 Ab'aetea babale angala bagoli nde baɛ ate: «Bogɛ na bɔma, bontulanisa moo moti mmbe akumbi bholo a íbo. Mpa, bom'beleɛ. 14 Áma angi a endu, bonngodeɛ amɛnɛ a endu-li bende: ‹Ngolisi ate: 'Mbénɔ iwani yɛu neleléa Pasaka na bagoli nde bamɔ?'› 15 N'iyɛ anoangia ndende endu l'inda gulu inde a na mpuɔ ati kpɛɛ, éma-li bhulibhu aye ibeli. Iwa yɛu bɔkɔkɔtiɛ asu Pasaka-li.» 16 Bagoli nde baɛ aba batoa na ga la na bɔma, aba badhonda sinde adhu aengodei ne, aba bakɔkɔtia Pasaka-li. 17 Adhoi ye ɛgɔgɔ, Yesu na bagoli nde baɛ mɔkɔ́ na babale ndɔ aba bakida. 18 N'aha baléa, Yesu ab'aengodea ate: «Domi nenongodea, moti angal'anu, mmbe aléa na eme amogabha mande†.» 19 Aba bakɛngɛtisa kúa la ngomi, aba banngodea moti-moti bate: «A nde eme?» 20 Ab'aengodea ate a nde moti angala bande bamɔkɔ́ na babale, mmbe agesa njaga aɛ a saani imoti na eme. 21 Nga Muna-Nto aga aɛ sinde baandeki ne†. Mpa a nde boanya mati anga mmbe angabhi! Ai aang'aba anja angaɛ abɔtɛana-i.
Yesu ali eléa nkobà l'inda sungia na bagoli nde baɛ
(Olengɛ Mat 26.26-30; Luk 22.15-20; ago na 1 Bakol 11.23-25)
22 Adhoi ndɔ n'aha baléa, ab'abɛsa mokate, ab'agesa au ntutu, ab'abúnaga na gabha-li angalabɔ na yɔnga la bende: «Bɔbɛsɛ inde, a nde ngobho ami.» 23 Ab'abɛsa kɔpɔ a divai na mɛma la Mokonga, ab'aepa, aba banoa adh'au bɔbhu. 24 Yesu ab'aengodea ate: «Divai nde a nde nsangi ami, nsangi a nsaeɔ nde aduani anga bato bati. 25 Domi, nenongodea, nnd'alɛ nenoa go na benu adha divai nde, kida la esa nde alɛ go nenoa adha inda mbènɔ-mbènɔ a ɛbɔamɛ nda Mokonga.» 26 Mbusa a lemba la lembɔ, aba batoa na ga la na mamba a Mojaetuni.
Yesu alabhi bende Pɛtɛlɔ anngana mande
(Olengɛ Mat 26.31-35; Luk 22.31-34; Yɔan 13.36-38)
27 Mpa Yesu ab'aengodea bagoli nde baɛ ate: «Boba ndende na maamaa a boosobela lanu. Nga baandeki bate: ‹Nɛm'bɛta mande nangi na bamboli aba baanjana†.› 28 Mpa, mbusa jujua lami asuba a kukua, nega mande mosá lanu ga bondea lanu naa Galilaya.» 29 Pɛtɛlɔ ab'anngodea ate: «Nɛngɛbɛ bɔbhu na baosagi, eme nnd'aanga neosaga.» 30 Yesu ab'anngodea ate: «Domi neongodea, owɛ, ndiende kiia, mosá la ɔsa la kɔkɔ gɛndɔ ibale obá ndende n'aye omongani gɛndɔ isalɔ.» 31 Na iyɛ ab'asuilila masa yɔnga ndaɛ ate: «Nɛngɛbɛ nabana a nde kúa la na owɛ, nnd'aanga nɛɔkɔ́ma.» Na bagoli-li bɔbhu aba bayɔnga masa ìbo.
Yesu ammɛma Mokonga naa Gɛtɛsɛmani
(Olengɛ go Mat 26.36-46; Luk 22.39-46)
32 Aba bakida áma nde bakoga bate Gɛtɛsɛmani†. Yesu ab'aengodea bagoli nde baɛ ate: «Boikɛ ani, na eme negɛ áma ɛmɛmi.» 33 Aba am'bɛsa Pɛtɛlɔ na Yakɔbɔ bona Yɔani ab'akɛngɛtisa saimana, na meema aɛ ab'asanga na bɔɔ. 34 Ab'aengodea ate: «Meema ami atumi na ngomi sùa kúa. Botigɛ ani, bola-i.» 35 Ab'asɛdɛa nɛdɛ, ab'agua a dodo, ab'ammɛma Mokonga ate: «N'atɔisani, mbènɔ nde anyɛnɛ dhɔlɔ ami.» 36 Na ai ayɔnga ate: «Abaa! Ebha, éma-li bhulibhu atɔisana angaɔ. Otosɛ ami kɔpɔ a enobɔ nde a mpiti ami, mpa abá-i sinde eme nekondi ne, mpa sinde owɛ yɛu okondi ne.» 37 Ab'asiana, ab'aedhonda na bale tɔɔ. Ab'anngodea Pɛtɛlɔ ate: «Simoni sa! Ole nde? Nnd'ɔtɔi ika la makanga la naa mbènɔ imoti? 38 Bola-i na bɔmɛmɛ nga bogua-i asuba bɔɔkì. Meema a na ekanda mpa ngobho yɛu aholomani.» 39 Yesu ab'atoa bhi labɔ, ab'aga amɛma n'asilia masa yɔnga nd'imoti ndɔ. 40 Ago siana laɛ, ab'aga aedhonda na bale tɔɔ, nga iso abɔ ai n'aye atiadi nde na tɔɔ. Aba babóla inde banngodea. 41 Ab'abhia gɛndɔ la isalɔ, ab'aengodea ate: «Mpa bolɛ, boyombiɛ! Abɛ sunga wa, mbènɔ-li akidi. Bolengɛ to, Muna-Nto, bangabhi a njaga a bato a ilɔlɔ. 42 Bomɛ na begɛ! Mmbe amoóbisa aye bhi.»
Dhunga la Yesu
(Olengɛ go Mat 26.47-56; Luk 22.47-53; Yoan 18.3-12)
43 A mbènɔ ndɔ, Yesu n'aha ayɔnga wa, Yuda ab'aóbela, moti angala bande bamɔkɔ na babale, áma imoti na mɔlɔndɔ a bande ba na ekpatɔ na gɔngɔ. Bande ai batoi nde nɔngɔ a mɔɛlɛli mati na bangɛngɛlɛ a Tɔlati na bakpɛga. 44 Mmbe ai amóbisi ai n'aye aepi mbunde nde bamúbhilila au: «Mmbe nengulia na umbia laɛ, kesi iyɛ yɛ mbɔ, bondhungɛ. Bongɛ ne na bonengɛ hɛlɛ.» 45 Mbènɔ nde Yuda akidi ne, ab'aga angulia Yesu na ngodea laɛ ate: «Labi!» Ab'amumbia. 46 Bato la bande batɔɔ, aba bangbakumia Yesu. 47 Moti adha bande bai wa, ab'aóbisa molima ndaɛ, aba am'bɛta nkɔbɛ nde ma mɔɛlɛli mati ab'asɛnga etue† laɛ. 48 Yesu ab'aengodea ate: «Iboni yɛu bobhii bomodhunga na ekpatɔ na gɔngɔ, bía mojiji? 49 Esa-li bhulibhu ai ne mosá lanu, a endu a Mokonga na negolisa, nnd'ai bomodhunga. Mpa inde akidi nde nga inde baandeki asuba a Ketabo nda Mokonga aɔnɛanɛ.» 50 Bagoli nde baɛ, aba batatea na doa laɛ. 51 Mpa ai wa muluana moti mmbe ai am'belea Yesu, n'alɔli masa ngɔmbɛ la boodega. Aba bandhunga. 52 Mpa na iyɛ ab'aetosa a ngɔmbɛ ndɔ na tatea la masa ndumbu.
Yesu ame mosá la basɔ̀i-yɔnga
(Olengɛ go Mat 26.57-68; Luk 22.54-55, 63-71; Yoan 18.13-14,19-24)
53 Aba banga na Yesu mosá la mɔɛlɛli mati. Baomi nde ba baɛlɛli, bakpɛga, na bangɛngɛlɛ a Tɔlati aba batulana bɔbhu. 54 Pɛtɛlɔ aba am'belea Yesu n'abhia dhɔlɔ aɛ. Ab'angia a nsɛngɛ a endu a mɔɛlɛli mati. Ab'aika a dodo na bakɔbɛ a ɔta la nsa. 55 Mpa baɛlɛli la bande batiti na bande ba ntua nda sɔ̀a la yɔnga bɔbhu, aba bakabaga yɔnga nde aanga bammóela Yesu, mpa aba babóla. 56 Bato bati ai banyɔngɛla masa mbéa†, ago yɔnga labɔ nndag'ai imoti. 57 Mpa, bimoti angalabɔ, aba bama, aba banyɔngɛla mbéa na bayɔnga bate: 58 «Besu auma bɛmɔki n'ayɔnga bende: ‹Eme, nɛgbɔla mande endu a Mokonga nde, inde bahìi na njaga a bato nde, na mbusa a esa isalɔ nenhìa mande matɔɔ, mmbe nndaga banhìi na njaga a bato†.›» 59 Nɛngɛbɛ na a indɔ yɔnga labɔ nndaga ai atulani. 60 Mɔɛlɛli mati ab'ama a meeme a bato-li na ulisa la Yesu ate: «Nndog'osisa éma? Éma sina nde bato nde bayɔnga angaɔ nde?» 61 Yesu ab'adhaa aɛ a a nde bo jɛɛ! Mɔɛlɛli ab'amulisa go, ate: «Owɛ yɛu o nde Kilisitɔ Muna-Mokonga Abh'ebhebɔ?» 62 Yesu ab'ansisila ate: «Ee, a nde eme. Mpa benu alɛ bɔmɔna Muna-Nto n'aiki a njaga la ind'akpɛ nda Mokonga Abha-bokpɛ, n'abhia na ebundu toa la na kobha†.» 63 Mɔɛlɛli mati ab'abhòma ngɔmbɛ ndaɛ n'ayɔnga ate: «Nndag'aye be na sei a mmbe anyɔngɛla! 64 Bɔɔkí sinde amɔtaga na Mokonga ndɔ, bɔɔni nde iboni?» Bato-li bɔbhu aba bayɔnga bate: «Abɔngi akuɛ†.» 65 Bande batɔɔ aba bakɛngɛtisa sulia laɛ soi, aba badega iso aɛ na bam'bɛta. Mpa aba banngodea bate: «Omúbhililɛ to mmbe aɔbɛti!» Nɛngɛbɛ bakɔbɛ n'ibɔ aba bandhunga na kasoa† laɛ.
Pɛtɛlɔ anngani Yesu
(Olengɛ go Mat 26.69-75; Luk 22.56-62; Yoan 18.15-18,25-27)
66 Iwa Pɛtɛlɔ n'aha aiki a dodo na ntanga, moti angala bakɔbɛ la bake nde ma mɔɛlɛli mati ab'akida. 67 Ab'amɔna Pɛtɛlɔ n'aɔta nsa, lenga laɛ ab'anngodea ate: «Na owɛ, oi otamba na Yesu nde maa Najalɛti.» 68 Na Pɛtɛlɔ ab'angana, ate: «Nnda neúbha ago nnda nɛɔka inde okaba yɔnga-li ndɔ.» Ab'aóba, ab'aga amá a mpiti a ngia la mpume la egitɛ. [Iwa kɔkɔ ab'aɔsa.]b 69 Ago nkɔbɛ la nke ndɔ ab'amɔna, ab'akɛngɛtisa go ngodea la bande ai bame iwa ate: «Mmbɔɛ a nde adhabɔ moti.» 70 A gɛndɔ atɔɔ go Pɛtɛlɔ ab'angana. Mbusa n'ɛdɛ bande ai bame iwa ndɔ, aba basiana go bhia ngodea la Pɛtɛlɔ bate: «Domi! O nde adhabɔ! Nga ago o nde nto nde maa Galilaya.» 71 Mpa, Pɛtɛlɔ ab'akɛngɛtisa hɔ̀a ate: «Nékua dodo! Nndaga nemúbha mmbe bɔyɔnga yɔnga laɛ ndɔ.» 72 A mbènɔ ndɔ, kɔkɔ ab'aɔsa a nkobà-li nda ibale. Pɛtɛlɔ ab'akanisa yɔnga nde Yesu ai anngodei bende: «Mosá la ɔsa la kɔkɔ nkobà ibale, omongana ndende nkobà isalɔ.» Anga indɔ, Pɛtɛlɔ ab'agua na ngamɔ.