Mpíta la móa la Yesu
22
Dinyɛ la mokate makanga masau ai n'aye a bhi-bhi, inde ai bakoga bate Pasaka ndɔ. 2 Baomi nde ba baɛlɛli na bagolisi a Maanɔ ai bakabi sinde aanga bammóa na Yesu, mpa ai baetea bato. 3 Sitani ab'angia asuba a meema a Yuda, mmbe ai bankoga bate Sikaliɔta, moti adha bagoli mɔkɔ na babale ndɔ. 4 Mpa iyɛ ab'aga aambola na baomi nde ba baɛlɛli na baomi nde ba balangi a endu a Mokonga, lenga la sinde aanga amobisa na Yesu. 5 Aba bajanga kpɛɛ, na aba balebeelana a pa laɛ ntondɔ. 6 Iyɛ ab'alebea, ab'akɛngɛtisa kaba la mbènɔ anja nde aang'amobisa na Yesu a njaga abɔ a bɔsɔmbi dhɔlɔ a mɔlɔndɔ a bato.Bɔngisaga la Pasaka
7 Dinyɛ la mokate makanga masau ab'akida, esa nde ai atɔlɛli bansɛngɛ njɔngɔ a mboli nga léa laɛ a Pasaka. 8 Yesu ab'antea Pɛtɛlɔ bona Yɔani na ngodea labɔ ate: «Bogɛ bɔkɔkɔtiɛ asu elea la dinyɛ la Pasaka nga beléɛ.» 9 Aba bamulisa bate: «Iwani yɛu okabi ote bɛkɔkɔtiɛ yu?» 10 Ab'aesisila ate: «N'aye ndende bongia asuba a bɔma ndɔ, bontulana nto moti n'akumbi bholo a íbo. Bom'beleɛ a endu nde aga angia au. 11 Bonngodeɛ amɛnɛ a endu ndɔ bende: ‹Ngolisi aoulisi ate: Iwani yɛu a nde mpuɔ nde nelélea eléa la Pasaka na bagoli nde bamɔ?› 12 Na iyɛ anɔɔngia ndende mpuɔ imoti nde bahìi antataa a endu aɛ áma nde babɔngisi hɛlɛ. Na iyo yɛu bɔkɔkɔtiilɛ elea la Pasaka.» 13 Aba baga, na aba badhonda éma-li bhulibhu sinde Yesu ai aengodei nee, na aba bakɔkɔtiila wa elea la Pasaka.
Elea nda Mokama
14 A mbènɔ a léana, Yesu ab'aika áma imoti na batetei nde baɛ. 15 Ab'aengodea ate: «Sei a léa la Pasaka nde áma imoti na benu auma amomói nde kpɛɛ mosá la noba lami. 16 Nenongodei bo nga gea la bende nnda neléa mande ye Pasaka atɔɔ, kida la esa nde yɔnga-li bhulibhu aúbhianana mande nee hɛlɛ asuba a Ɛbɔamɛ nda Mokonga.» 17 Mpa, ab'abɛsa kɔpɔ a divai-li, ab'ansima Mokonga na yɔnga la ate: «Bɔbɛsɛ inde na bobuanɛgɛ yu benu bɔbhu. 18 Nga nenongodei bende, toa la mbènɔ nde nnda nenoa mande ye divai, kida la esa nde Ɛbɔamɛ nda Mokonga akida mande nee.»
19 Mbusa indɔ, ab'abɛsa mokate, ab'ammɛma Mokonga. Ab'abuna yu na buaga-li n'ayɔnga ate: «Inde a nde nyama ami, inde negabhi a yɔnga lanu. Abá bɔkɔla bo a kanisa lami.» 20 Mbusa a léa l'eléa ndɔ, ab'abɛsa go kɔpɔ a divai ndɔ na yɔnga la ate: «Divai nde a nde nsaeɔ nda mbènɔ-mbènɔ a nsangi ami, inde aduana a yɔnga lanu.
21 Mpa, bolengɛ to! Mmbe amoobisa a a mbe beléana áma imoti n'iyɛ nde. 22 A nde gea la bende, atɔlɛli Muna-Nto agɛ aɛ sinde Mokonga ai abhísi nee. Mpa, a nde boanya anga nto nde amoobisa ndɔ.» 23 Mpa bagoli aba bakɛngɛtisa ulisana angala abɔ bate: «Màni angala asu yɛu akɔlana mande bo?»
Esani a ja la omi
24 Mpa bagoli aba bakɛngɛtisa sana a sasan'abɔ nga úbha la mbénɔ màni yɛu aanga aúbhianana bía omi angala abɔ. 25 Yesu ab'aengodea ate: «Baamɛ nde ba bande nndaga baYuda baeikidii bato nde babɔ a bokpɛ, na bande baɛsɔndɔlisa bato, bakonda bende bato aba baekoga bende ba nde bato a egabhɔ. 26 Mpa, abá-i ìbo anga anu. Mmbe nde omi angala anu yɛu abɛ gɔɛ nde bía nyia-muluana, na mmbe aɛmɛlɛli badhaɛ abɛ bía nkɔbɛ. 27 Mpa, n'aye nto moti aléana na mmbe matɔɔ n'akɔla nkási, màni yɛu a nde omi anga dhaɛ? Nndag'a nde mmbe aléana ndɔ? Mpa, eme ne angala anu nde bía mmbe akɔla nkási.
28 Benu, bo nde bande ai bomidili meema anu áma imoti n'eme a mbènɔ a noba lami. 29 Anga indɔ yɛu, nenobhísili Ɛbɔamɛ-li bía nde abhami ai amobhísili nee, 30 nga boléɛ na bonoɛ áma imoti n'eme asuba a Ɛbɔamɛ namɔ. Na boika mande go a mbata l'ɛbɔamɛ a sɔ̀a la yɔnga nda bato nde ba endu mɔkɔ na ibale nda Isilaɛli.»
Yesu ate Pɛtɛlɔ anngana ndende
31 Yesu ab'anngodea Simoni Pɛtɛlɔ ate: «Simoni, Simoni, okengemanɛ, Sitani anɔchɔchɔkɛli nga anɔsɛgɛ bía nde aki basɛga na ntubhu. 32 Mpa eme, aye nɛmmɛmi Mokonga anga aɔ nga boosobela laɔ atalokana-i. Na owɛ a siana laɔ mbusa, odhodeɛ meema a badhaɔ.» 33 Pɛtɛlɔ ab'ansisila ate: «Mokama, abɛ a nyanga laɔ basonyanga áma imoti aɔ a kua laɔ, bekua masa áma imoti na owɛ.» 34 Yesu ab'ansisila Pɛtɛlɔ ate: «Owɛ Pɛtɛlɔ, neongodei bende, mosá la ɔsa la kɔkɔ, omongana ndende nkobà isalɔ bende nnd'omoúbha.»
35 Mpa, Yesu ab'aeulisa bagoli nde baɛ ate: «Bokanisɛ, mbènɔ nde auma nenotei nee makanga ngonja, aɔ go njombi nangɛbɛ na belatɔ†, auma boboli éma sina?» Aba bansisila bate: «Nnd'auma beboli éma.» 36 Ab'aengodea ate: «Mpa, mbènɔ-mbènɔ nde ani, mmbe a na ngonja abɛsɛ yu, nangɛ mmbe a na njombi. Mmbe nnd'a na ngɔa asombisɛ ngɔmbɛ ndaɛ nga ansómbɛ aɛ moti. 37 Nenongodei indɔ nga atɔlɛli inde ai baandeki asuba a ketabo nda Mokonga a yɔnga lami aóbelɛ bende: ‹Ai bantangi bía adha bato bajede.› Nga, inde ai baandeki anga ami asaki akidɛ a sungia-li.» 38 Aba bayɔnga bate: «Mokama, ngɔa ibale a a nde.» Ab'aesisila ate: «Abɛ sunga wa.»
Ɛmɛmi nda Yesu na mamba a Mojaetuni
39 Mbusa indɔ, Yesu ab'aja na ab'aga na mamba a Mojaetuni, sinde ai nde nkani ndaɛ. Na bagoli nde baɛ aba bam'belea. 40 Kida la we, ab'aengodea ate: «Bɔmɛmɛ nga bogua-i asuba a ilɔlɔ.» 41 Mpa iyɛ, ab'asɛdɛa dhɔlɔ abɔ n'ɛdɛ, bía ego ekomi isalɔ, ab'abuna moo-a-kuu laɛ a dodo ab'amɛma 42 bende: «Ebha, nabana aɔbɔngɛli, ɔsɛdisɛ dhɔlɔ ami kɔpɔ a mokpata nde. Abá-i sinde eme nekondi nee, mpa abɛ gɔɛ nde sinde owɛ okondi nee ndɔ!» 43 Mpa, malaeka moti ab'amóbela toa la na kobha, a mòa laɛ ekanda. 44 Meema a Yesu ab'atetemana kpɛɛ na ngomi, ab'asuilila mɛma. Binja aɛ ai bía madɔkɔli a nsangi nde adɔa a dodo.
45 Mbusa a ɛmɛmi ndɔ, ab'ama, na siana laɛ áma nde adhu aedu bagoli nde baɛ ndɔ. Ab'aedhonda na bale tɔɔ nga bai na ngomi. 46 Mpa ab'aengodea ate: «Ai! Bole nde la? Bomɛ na bɔmmɛmɛ Mokonga nga bogua-i asuba a ilɔlɔ.»
Dhunga la Yesu
47 N'aha ayɔnga, mɔlɔndɔ a bato aba baóbela. Mmbe ai ame mosá labɔ ai nde Yuda, moti angala a batetei mɔkɔ na babale. Ab'asɛdɛa a mpiti a Yesu nga umbiab laɛ. 48 Mpa Yesu ab'anngodea ate: «Yuda omobisi Muna-Nto masa a umbia laɛ?» 49 Ɔna la yɔnga nde akaba kɔlɛkana la wa, bagoli nde baɛ aba banngodea bate: «Mokama, bɛɛgɔtɛgɛ na ngɔa ndasu nde?» 50 Mpa moti angala abɔ aba am'bɛta nkɔbɛ nde ma mɔɛlɛli-omi ndɔ, na sɛnga la etue laɛ la njaga nd'akpɛ. 51 Yesu ab'ayɔnga ate: «Asungiɛ wa, boodoɛ.» Ab'abhɛdia etue la nkɔbɛ ndɔ na lamisa laɛ.
52 Mpa Yesu ɔna la bande ai babhii bandhunga: Baomi nde ba baɛlɛli, baomi a balangi a endu a Mokonga na baomi nde ba nji ndɔ, ab'aengodea ate: «Chaa! Bobhii angami na ngɔa na gbutu-gbutu a mee bía nde ne nde mojiji! 53 Esa-li bhulibhu nei na benu n'endu a Mokonga nnd'ai bomodhungi. Mpa mbènɔ nde a nde indanu na inda bokama nda dhodac.»
Pɛtɛlɔ anngani Yesu nkobà isalɔ
54 Mpa aba bandhunga Yesu na ga laɛ nee a endu a mɔɛlɛli la mmbe omi. Pɛtɛlɔ na am'belea mbusa dhɔlɔ. 55 Bía nde ai bagongi nsa a meeme a ntanga-li, aba baika áma imoti, Pɛtɛlɔ n'iyɛ ab'aika a nsɔlɔ abɔ. 56 Nkɔbɛ moti la nke ab'amɔna Pɛtɛlɔ n'aiki a mpiti a nsa, ab'antumia iso. Mpa ab'ayɔnga ate: «Nto nde ai batamba n'iyɛ.» 57 Mpa Pɛtɛlɔ ab'angana, ate: «Ha! Nke nde sa! Nnda nemúbha mmbɔ waɛ!» 58 Mbusa n'ɛdɛ, nto matɔɔ ab'amɔna na ngodea laɛ ate: «Na owɛ, o nde adha abɔ moti!» Eme sunga na Pɛtɛlɔ ate: «Owɛ sa! Nndaga a nde bo.» 59 Ab'anyɛna go bía mbènɔ imoti mbusa wa, nto matɔɔ go ab'ansɔ́a nee kpɛɛ, na ngodea laɛ ate: «A nde domi, mmbe ai a mpuɔ imoti n'iyɛ, nga a nde maa Galilaya.» 60 Pɛtɛlɔ ab'ansisila ate: «Moo nde sa! Nnda neúbha yɔnga nde okaba ote ɔyɔngɛ ndɔ.» Na a mbènɔ ndɔ, n'aha ayɔnga indɔ wa, kɔkɔ ab'aɔsa. 61 Mpa Mokama ab'aetia na tumia la Pɛtɛlɔ iso. Iwa Pɛtɛlɔ ab'akanisa yɔnga nde Mokama ai anngodei bende: «Mosá la ɔsa la kɔkɔ, omongana ndende nkobà isalɔ.» 62 Pɛtɛlɔ ab'aóba na nsɛngɛ, na bookpula la na ngamɔ.
Nɛɔlɛla la Yesu na bɛta laɛ
63 Bande ai bandhungi Yesu ab'ai bannɛɔlɛla na bɛta laɛ. 64 Na ai badegi iso aɛ na bamulisa bate: «Oúbhililɛ mbénɔ màni yɛu a a mmbɔ aɔbɛti ndɔ.» 65 Na ai banngodea yɔnga ati la bhoma laɛ.
Yesu mosá la ntua la sɔ̀a la yɔnga
66 Mbènɔ nde máni ase nee, bakpɛga nde ba baYuda na baɛlɛli-baomi na bagolisi a Maanɔ aba batulana na bhia la na Yesu a ntua ndabɔ nda sɔ̀a la yɔnga. 67 Aba bamulisa bate: «Owɛ sa! Nabana o nde Masia, osongodeɛ.» Eme sunga n'iyɛ ate: «Nangɛ nenongodeɛ, nnd'aanga bokua na bolebei. 68 Na n'aye nenoulisi yɔnga, nnd'aanga bokua na bomosisili. 69 Mpa toa la mbènɔ nde, Muna-Nto aika ndende a njaga nd'akpɛ nda Mokonga amɛnɛ a bokpɛ†.» 70 Bɔbhu aba bayɔnga bate: «Kesi o nde Muna-Mokonga?» Ab'aesisila ate: «Benu nganga yɛu bɔyɔngi bote ne nde iyɛ.» 71 Mpa aba bayɔnga bate: «Nnd'aye be na sei a nto matɔɔ ngodea lasu, nga bɛɛɔkɛli besu nganga yɔnga nde atoi a nyɔɔ aɛ.»