Bɔɛmbɔ nda amekusa muyɛnɛ
21
Yesu ab'amesa moo aɛ, ab'aɛɔna bato a lua na bamaa bɔɛmbɔ ndabɔ asuba sanduku a bɔɛmbɔ. 2 Ab'amɔna go amekusa moti muyɛnɛ kpɛɛ n'iyɛ n'amaa na nyia-gbutu a kichɛlɛ ibale asuba sanduku ndɔ. 3 Mpa Yesu ab'ayɔnga ate: «Nenongodea domi, amekusa muyɛnɛ nde amai asuba sanduku ndɔ nyɛna la bato-li bɔbhu. 4 Nga, bande batɔɔ ndɔ bɔbhu bamai au masa inde nnd'aye na nkási angabɔ. Mpa iyɛ amai bhulibhu nde a nee a buyɛnɛ laɛ, inde aanga antabela a lenda laɛ.»Yesu atɔmia mbinɔ a gbɔlɔana la endu a Mokonga
5 Bato bɔlɛbɛ nde bai beli ai batɔmia mbinɔ a bonja la endu a Mokonga, na bayɔnga bate: «Bangelemisi yu hɛlɛ n'ɛtɛ la bangisana na nkumba nde ai babhii nee bía bɔɛmbɔ nɔngɔ a Mokonga.» Mpa Yesu ab'ayɔnga ate: 6 «Éma nde bɔɔna nde, a na esa nde bhulibhu agbɔlɔana mande. Nnd'atiga mande ɛtɛ antata dhaɛ makanga gbɔlɔana.»
Mbunde nda bhi-bhi na inda dhɔlɔ a mbènɔ a sungia
7 Mpa aba bamulisa Yesu bate: «Ngolisi, éma ndɔ akida mande nde mbènɔ sina, na mbunde sina yɛu aangelisa mande bende éma ndɔ atigisi akidɛ?» 8 Eme sunga na Yesu ate: «Bolengɛ hɛlɛ, nto anodhema-i mɛnɔ. Nga bato bati babhia mande a ina ami na bayɔnga bate: ‹Eme yɛ mbe Kilisitɔ!› Aɔ go ‹Mbènɔ-li aye bhi-bhi.› Boobelea-i mɛnɔ. 9 Mbènɔ nde bɔɔka mande nee mbinɔ a bìa na boojoka la bato, botea-i. Nga atɔlɛli indɔ aɔnɛanɛ mbɛɛ. Na nndag'a nde bende sungia la lɛɛngɔ aye akidi.»
10 Mpa Yesu ab'aengodea go ate: «Bato nde ba lɛɛngɔ imoti bamana mande na bande ba lɛɛngɔ atɔɔ, na bato nde ba ɛbɔamɛ imoti bamana mande na bande b'ɛbɔamɛ atɔɔ. 11 Balingina batita mande kpɛɛ. Nja na keunjɔ ntua-ntua aɔnɛana mande a mpuɔ ati. Éma nde abhìsa bɔɔ na mbunde ati atoa mande na kobha.
12 Mpa, mosá la indɔ bhulibhu, banodhunga mande na nobisa lanu. Banoga mande nee mosá la basɔ̀i-yɔnga asuba endu a sinagogi, banomaa mande asuba endu a enyangi. Banoobisa mande mosá la baamɛ na baomi nde ba lɛɛngɔ a yɔnga la ina ami. 13 Indɔ anopa mande asii la tɔmia la mbinɔ ami. 14 Bobhísɛ a meema anu gea-la-bende, nnd'aanga bokabaga nangɛ bía nde boosisila mande nee. 15 Nga, eme nganga yɛu nenopa mande yɔnga na bɔɛngɛ nde bato bɔbhu nde ba na benu enjiu nnd'aanga batɔa nganisa-li na kɔma-li. 16 Babɔti anu, baaya lanu, bato nde ba mba ndanu, na badhanu banoobisa mande. Na baekusisa mande adha benu. 17 Bato bɔbhu banoya mande a yɔnga la ina ami. 18 Nangɛ abɛ bo, nnd'a be naa sia-moo anu moti nde abunga mande. 19 Mpa, bodhodeɛ meema anu, nga a kɔla la ìbo yɛu bolamisa mande meema anu.»
Gbɔlɔana la Yɛlusalɛma
20 Mbènɔ nde bɔɔɔna mande nee babibia na batimbi Yɛlusalɛma, boúbhɛ bende gbɔlɔana-li aye a bhi-bhi. 21 Mpa, bato nde babá mande a lɛɛngɔ a Yudɛa, batateelɛ na mamba. Bato nde babá mande asuba bɔma nda Yɛlusalɛma batoɛ asubi, na bande babá mande n'ɛbhɛ-n'ɛbhɛ basiana-i asuba na bɔma! 22 Nga esa ndɔ abá mande nde esa la gisia nda Mokonga, nga éma bhulibhu nde ai baandeki aɔnɛanɛ†. 23 Aii! Ab'alɛ nde boanya mati anga bamá-kaleme na bamá-boale nde baungisa a esa ndɔ. Nga, lɛɛngɔ ndɔ anoba mande kpɛɛ na Mokonga aɔngia mande boetani laɛ antata bato ndɔ. 24 Bato bati bakua mande na ngɔa, na bande batɔɔ, baenyanga mande na ga labɔ nee asuba lɛɛngɔ atɔɔ. Bato nde ba lɛɛngɔ atɔɔ, badɛtɛla mande bɔma nda Yɛlusalɛma m'ekanda-kanda, kida l'a mbènɔ nde bokama ndabɔ asia mande nee.
Esa la siana la Muna-Nto
25 Mbunde nde a bangisana aɔnɛana mande a máni a mɔsɛla na a balɛlɛngɔa†. Na na dodo oni, bato babá mande a maamaa na noba a yɔnga la ndulu a gbɔnda na muumba íbo-li. 26 Bato bakua mande na bɔɔ a kanisa la éma ajede-jede nde aɔnɛana na lɛɛngɔ oni. Nga, éma-li bhulibhu nde a na ekanda n'egoo agbɔkaga mande. 27 A mbènɔ ndɔ, bamɔna mande Muna-Nto n'abhia a ebundu na n'ekanda na boumu† ati. 28 Éma ndɔ n'aye akɛngɛtisa mande óbela, boikɛ hɛlɛ na bomesɛ moo anu na bobɛ na mouɔ, nga, iwa bolamisi ndanu aye a bhi-bhi.
Egolisi la mee a motini
29 Mbusa indɔ, Yesu ab'aemaela bagoli nde baɛ maibhe nde ate: «Bolengɛ hɛlɛ mee a motini na mee atɔɔ bhulibhu. 30 N'aye bɔɔni kasa-li n'akɛngɛtisa tɔmbɔa, aba boúbhilila benu nganga bende mbènɔ a mogongoɛ aye asaki asiɛ kesi na mbènɔ mbúa-li aye bhi-bhi. 31 Nangɛ na benu, mbènɔ nde bɔɔna mande nee éma ndɔ bhulibhu n'aóbeli, boúbhɛ bende Ɛbɔamɛ nda Mokonga aye a bhi-bhi. 32 Nenongodei domi gea-la-bende, bato nde ba ɛbɔti nde nnd'aanga asia na éma ndɔ bhulibhu na akidi-mbɛ. 33 Kobha na dodo anyɛna mande, mpa yɔnga namɔ nnd'aanga anyɛna nangɛbɛ n'ɛdɛ.
Bokodɛ iso anu
34 Boolengelelɛ hɛlɛ benu nganga! Meema anu atiada-i a yɔnga la kɔla la dinyɛ na bokundilia, ago botiadisa-i meema anu a yɔnga la lenda. Nga esa ndɔ anokidia-i a bhutukisa. 35 Nga bía bɔɔkí, esa ndɔ aekidia mande bato bɔbhu nde baiki asuba lɛɛngɔ-li bhulibhu. 36 Mpa, bokengemanɛ kpɛɛ na bɔmɛmɛ a mbènɔ-li bhulibhu, nga bobɛ mande n'ekanda la nyɛa a éma ndɔ bhulibhu nde akida mande, na inda ma la mosá la Muna-Nto.» 37 Etonge-li bhulibhu, Yesu ai aegolisa bato a endu a Mokonga na kiia ai aga na mamba a Mojaetuni. 38 Na bato bɔbhu ai babhia nɔngɔ a Yesu umauma kpɛɛ a endu a Mokonga bhia ɔkanea laɛ.