Màni yɛu ammòi Yesu bokama?
20
Ai we esa imoti, Yesu n'aegolisa bato na labhela labɔ Mbinɔ Anja asub'endu a Mokonga. Iwa baomi nde ba baɛlɛli na bagolisi a Maanɔ na bande baɛmɛli bato asuba nji aba bankidia, 2 aba bamulisa bate: «Osongodeɛ mbénɔ a ekanda sina yɛu ɔkɔla yɔnga nde, na màni yɛu aopi bokama ndɔ?» 3 Mpa Yesu ab'aesisila bende: «Na eme nenoulisa yɔnga imoti. Bomongodeɛ, 4 ‹Màni yɛu ai ammòi Yɔani bokama la ndiisa la bato? A nde Mokonga, aɔ bato?›»5 Aba baulisana a sasana abɔ na ngodeana la bende: «N'aye benkumii Mokonga, kesi asosisila ate: ‹Nga boni yɛu nnd'ai bolebei yɔnga ndaɛ?› 6 Ago n'aye bɛyɔngi bete bato, kesi mɔlɔndɔ a bato nde basomóa nde na ɛtɛ. Nga, bato-li bɔbhu baúbha bende Yɔani a nde múbhilili.» 7 Mpa na ibɔ aba bansisila Yesu bate: «Nnda beúbha tine a bokama nda Yɔani.» 8 Yesu ab'aengodea ate: «Nangɛbɛ n'eme nnd'aanga nenongodea mbénɔ nɛkɔla éma nde nde a bokama sina.»
Maibhe la basoki bajede
9 Mpa Yesu ab'aemaela bato maibhe nde ate: «Moo moti ai akoni tio a mojabibo. Mbusa, ab'alebelana na basoki, ab'aga tamba la kia ati n'ɛdɛ. 10 Mbènɔ a gubha ab'akida, ab'antea nkɔbɛ nde maɛ moti nɔngɔ a basoki nga bammòɛ adha mbùa a mojabibo ndaɛ. Basoki ndɔ aba bam'bɛta, aba banjisa bosa. 11 Amɛnɛ a tio ab'antea nkɔbɛ matɔɔ, aba go bam'bɛta mmbɔ na kusisa laɛ soni, aba banjisa n'iyɛ bosa. 12 Ab'asilia go tea la mmbe maa isalɔ, aba bam'botisaga na bèa laɛ. 13 Mpa amɛnɛ a tio ndɔ ab'ayɔnga ate: ‹Éma sina yɛu aanga go nɛkɔla? Nenteɛ aye nde nami, mmbe nenkondi, kosà mmbɔ yɛu aanga bansikisa.› 14 Basoki bamɔni ye nii ndɔ, aba bayɔngisanaga a meeme abɔ bate: ‹Bomɛi! Amɛnɛ a tio ndɔ a a mbɔ! Bemmóɛ nga tio-li atigɛ indasu!› 15 Aba bandhunga, aba banga nee dhɔlɔ a na tio, aba bammóa.» Mpa Yesu ab'aeulisa ate: «Amɛnɛ a tio ndɔ, aɛkɔla mande basoki ndɔ nde boni? 16 Abhia nde, bhia moisisa la basoki ndɔ. Mbusa iwa, ab'agabha tio ndɔ anga bato batɔɔ.» Bato bamɔki ye bo, aba bayɔnga bate: «Aego! Indɔ nnd'aanga akoka!»
17 Mpa Yesu ab'aelengelela, na ulisa labɔ ate: «Baandeki asuba ketabo nda Mokonga bende, ‹Ɛtɛ nde bande bahia bakɔmi, aetii ɛtɛ la mbe mati nda sikisa la endu.› Yɔnga ndɔ a nde yɔnga la iboni? 18 Nto n'aye agu antate a ɛtɛ ndɔ, ngobho aɛ abunuaga. Nto nde ɛtɛ ndɔ angulia, ankpɔtaga.»
19 A mbènɔ ndɔ, bagolisi a Maanɔ na baomi nde ba baɛlɛli ai bakaba dhunga la Yesu nga, ai baúbhi bende ai amai maibhe ndɔ nde angabɔ. Mpa go aba baetea bato.
Bɔɔkì anga Yesu a yɔnga la manjànja nda mɔamɛ mati Kaisali
20 Mpa aba bakɛngɛtisa masa lengelela la Yesu, aba baetea bato nde baedhemisaga bende ba nde bato a domi, nga bankodɛ Yesu a yɔnga nde ayɔnga, na nga bangabhɛ a njaga a mokama nde ma baLɔma Pilatɔ. 21 Bato ndɔ aba bamulisa bate: «Ngolisi, beúbha bende ɔyɔnga na golisa la domi na nnd'ɔnsɔmbɔli nto, na ogolisa asii nda Mokonga a domi. 22 Mpa, osongodeɛ nabana abɔngi angasu aɔ iisi lèa la manjànja nda Kaisali?»
23 Yesu úbhilila la bɔɔkì ndabɔ, ab'aengodea ate: 24 «Bomoangiɛ mbɛɛ kichɛlɛ imoti wa! Elimelime nde na ina nde a nde nda màni?» Aba bansisila bate: «Inda Kaisali» 25 Eme sunga na Yesu, ate: «Anga a nde bo, bommòɛ Kaisali inde a nde indaɛ, na bommòɛ Mokonga indaɛ.» 26 Nnd'ai batɔi koda la Yesu a yɔnga nde ai ayɔnga mosá la bato, ab'aebangisa a inde aesisili, aba badhaa.
Ulisa a yɔnga la jujua a kukua
27 Adha baSadukayo† aba bambhilia Yesu. BaSadukayo bɔbhu aki bakɔma jujua la bande aye mɛnɔ baku. Aba bamulisa Yesu bende: 28 «Ngolisi, Mósa ai aandeki asu bende: n'aye moo aku na doa la nkaɛ makanga bani, mɔtɔ aɛ ansilia mekusa ndɔ nga ina a mmbe aku ndɔ alimia-i. 29 Mpa go, bai a ɛbɔtɛana abɔ baganja sobe-lalɔ. Ngula-li ab'asea, mbusa-li ab'akua makanga doa la nii. 30 Mmbe maa ibale, ab'ansilia amekusa ndɔ. N'iyɛ ab'akua makanga bɔta la nii. 31 Aba masa ìbo anga mmbe maa isalɔ na ga kida la anga mmbe maa sobe-lalɔ. Bɔbhu aba bakua makanga doa la nii. 32 A sungia-li na nke ndɔ n'iyɛ ab'akua. 33 Mpa, nke ndɔ, a esa la jujua abá alɛ nde mmbe ma màni angala baboo nde ba sobe-lalɔ ndɔ? Nga bɔbhu, ai n'aye bammɔmi.»
34 Yesu ab'aesisila ate: «Bande ba a lɛɛngɔ nda ndiende nde basea na ɔmana. 35 Mpa bande batɔlɛli jujua l'asuba a kukua na ngia l'asuba lɛɛngɔ nde abhia ndɔ, nnd'aanga aye basea aɔ ɔmana. 36 Nnd'aanga aye bakua, nga ba nde bia bamalaeka, ibɔ ba nde bana-Mokonga nga aye bajujuu toa l'a kukua. 37 Mósa n'iyɛ aangelisi hɛlɛ bende bàku bajujua lɛ. Mbènɔ nde aandeki a yɔnga la esasa nde ai alola ndɔ, ab'ankumia Mokama bía Mokonga mmbe ma Abolaimu, Mokonga mmbe ma Isaka, na Mokonga mmbe ma Yakɔbɔ.» 38 Mokonga nndaga a nde Mokonga nde ma bàku, a gɔɛ nde mmbe ma bande baɔnɛa, nga angaɛ batata nde basalɔ nde aha baɔnɛa. 39 Mpa adha bagolisi a Maanɔ, aba babaa yɔnga bate: «Ngolisi ɔyɔngi hɛlɛ.» 40 Nga nnd'ai aye bakengea ulisa la éma imoti.
Kilisitɔ na Daudi
41 Yesu ab'aengodea ate: «Iboni yɛu aanga bayɔnga bende Kilisitɔ a nde muna-Daudi? 42 Nga Daudi iyɛ amɛnɛ ai ayɔngi asuba ketabo nda Lembɔ:
Mokama anngodei Mokama nde mamɔ:
Oikɛ a njaga ami nd'akpɛ,
43 kida la áma neegesa banjiu aɔ kusi a ego laɔ.
44 Daudi ankoga ate Mokama. Mpa iboni yɛu aang'abá naɛ?»
Yesu aekalei bagolisi a Maanɔ
45 Ab'aengodea bagoli mosá la bato bɔbhu bande ai bamɔkanea ate: 46 «Bɔbɛsa-i nkani nda bagolisi a Maanɔ. Bakondi nyɛnaga na balɔli nkanjo endanda, na konda la bende bato aba baesesea áma bato bati batumi, na ika l'a áma bosikɛ asuba endu a sinagogi, na áma a dinyɛ. 47 Ibɔ baeula bamekusa lua ndabɔ na baedhemisaga na ɛmɛmi enda nga bato baakɛ bende ba nde bato banja. Mokonga alɛ aɛsɔ̀a ajede kpɛɛ nyɛna la bande batɔɔ.»