Yesu anamisi nkɔbɛ nde ma omi nde ma basoda
7
Mbènɔ nde Yesu agɔbi nee na yɔnga ndɔ bhulibhu mosá la bato nde ai bamɔkanea, ab'aga naa Kapɛlɛnaumu. 2 Ai wa, omi nde ma basoda nde ba baLɔma, n'a na nkɔbɛ nde maɛ n'ankondi kpɛɛ. Nkɔbɛ ndɔ n'adusuanaga na jega. 3 Mbènɔ nde omi ndɔ aɔki nee mbinɔ a Yesu, ab'aetea nɔngɔ aɛ adha baomi nde ba baYuda ga gamelaga laɛ bende abhiɛ anamisɛ nkɔbɛ nde maɛ ndɔ. 4 Mpa, baomi ndɔ aba bakida mpiti a Yesu, aba bangamelaga kpɛɛ bende: «Ɔtɔlɛli ɔnamisɛ nkɔbɛ nde ma omi ndɔ, 5 nga akondi lɛɛngɔ asu. Iyɛ yɛu ahii asu endu a sinagogi nde.»6 Mpa Yesu ab'aga n'ibɔ. Mbènɔ nde bakidi nee mpiti a endu a mokama ndɔ, iyɛ ab'aetea badhaɛ ga tɔmila la Yesu bende: «Mokama, oonobisa-i, nga nnda nɛtɔlɛli, ongia-i asub'endu ami. 7 Anga indɔ yɛu nnd'adhu atɔlɛli nebhiɛ eme nganga mosá laɔ. Ɔyɔngɛ masa yɔnga imoti na nkɔbɛ nde mmamɔ alama. 8 Eme, ne nde nto nde neiki kusi a ɛbɔamɛ nda baomi nde bamɔ. Ago ne na basoda kusi a ɛbɔamɛ namɔ. N'aye nenngodei moti nte: ‹Gɛ to!› Ab'aga. N'aye nenngodei matɔɔ nte: ‹Bhiɛ to› Ab'abhia. N'aye go nenngodei nkɔbɛ nde mamɔ: ‹Ɔkɔlɛ bende› Ab'akɔla bo.»
9 Mbènɔ nde Yesu aɔki nee yɔnga nda omi nde ma basoda ndɔ, am'bangisa. Ab'aetiila a mɔlɔndɔ a bato nde ai bam'belea ndɔ na ngodea labɔ ate: «Nenongodea, nɛmɔni-mbɛ mɛnɔ nto a boosobela bía mmbe nangɛ asuba a Isilaɛli.» 10 Mpa, bande omi nde ma basoda ai aetei ndɔ aba basiana, aba bandhonda njegi ndɔ n'alami.
Yesu anjujusi muna-amekusa mmbe aku
11 Mbusa ndɔ go, Yesu ab'aga a bɔma nde bakoga bate Naina, n'atamba na bagoli nde baɛ. Da-mɔlɔndɔ a bato aba baga n'iyɛ. 12 Kida labɔ a ngba la nji-li, aba batulana na bato na bakumbi kiinda a muluana moti, mmbe ai nde ngele a nii nde ma amekusa. Na bato bati nde ba bɔma ndɔ ai bagee áma imoti na nke ndɔ.
13 Mokama Yesu ab'amɔna nke ndɔ, ab'ankulia ngomi, ab'anngodea ate: «Ogama-i!» 14 Ab'asɛdɛa, ab'abhɛdia kipoi a kiinda-li. Bande bakumbi aba bama. Yesu ab'ayɔnga go ate: «Muluana, neongodei nte omɛ!» 15 Mmbe adhu n'aye aku ndɔ ab'ama na kɛngɛtisa la yɔnga, na Yesu ab'ammòa amáɛ. 16 Bɔbhu bande bai wa, bɔɔ ab'aedhunga, aba bambhebha Mokonga bate: «Múbhilili mati asokidii. Mokonga abhii aetambela bato nde baɛ.» 17 Mpa, mbinɔ a Yesu nde ab'agɔba lɛɛngɔ a Yudɛa na nji nde a a mpiti-mpiti-li bhulibhu.
Ulisa nda Yɔani-Ndiisi anga Yesu
18 Mpa, bagoli nde ba Yɔani-Ndiisi aba bantɔmila yɔnga la Yesu bhulibhu. Yɔani ab'aekoga adha bagoli nde baɛ babale 19 na ab'aetea nɔngɔ a Mokama, ga ulisa laɛ bende: «O nde Masia, mmbe abhia mande ndɔ? Aɔ na nnd'a bo, atɔlɛli bem'bondeɛ go matɔɔ?» 20 Mbènɔ nde bakidi nee a mpiti aɛ, aba banngodea bate: «Yɔani-Ndiisi asotei nɔngɔ aɔ ate beoulisɛ bende: ‹Mbénɔ, o nde Masia, mmbe abhia mande ndɔ? Aɔ na nnd'a bo, atɔlɛli bem'bondeɛ go matɔɔ?›»
21 A mbènɔ ndɔ, Yesu ai aelamisa bajegi bati, bato nde banoba, na bèa la baketi, na kodaga la iso a batimetime bati. 22 Mpa, Yesu ab'aesisila batetei nde ba Yɔani ate: «Bogɛ, bɔntɔmilɛ Yɔani inde bɔɔni na ɔka-li: ‹Batimetime baɔna, badɔtu batamba, bato a kebukebu balama na bakingi baɔka, baku bajujua, na bato a buyɛnɛ baɔka Mbinɔ Anja. 23 Bujɛmɛ anga a nto nde yɔnga lami nndaga anɛma.›» 24 Mbènɔ nde batetei nde ba Yɔani basiani nee, Yesu ab'akɛngɛtisa tɔmilaga la mɔlɔndɔ a bato ndɔ mbinɔ a yɔnga la Yɔani ate: «Éma sina yɛu adhu bogee bolenga na ngalagɛ? Mbénɔ adhu nde ngada nde adengaga na moheɔ? 25 Éma sina yɛu adhu bogee bolenga? Adhu nde nto n'alɔli ngɔmbɛ nde adilimani? Mpa, bande balɔli ngɔmbɛ adili na bande balendi a bujɛmɛ, baiki a endu a baamɛ. 26 Mpa, éma sina yɛu adhu bogee bolenga? Adhu nde múbhilili? A nde bo, nenongodea, iyɛ antesi múbhilili. 27 Yɔani a nde mmbe baandeki a yɔnga laɛ bate:
‹Nentei mande ntetei nde mamɔ,
amá mande mosá laɔ a kɔkɔtiila laɔ asii.›
28 Nenongodea, nnd'a we nto nde aye mɛnɔ abɔtɛani n'a na boumu nyɛna la Yɔani. Mpa go, nto mɛdɛ kpɛɛ asuba a Ɛbɔamɛ nda Mokonga a mati nyɛna laɛ.
29 Bato bɔbhu ɔkanea laɛ nɛngɛbɛ balèisi a manjànjà, ai balebei yɔnga nda Mokonga bende a nde domi na lebea la bende Yɔani aendiisɛ. 30 Mpa, baFalisayo na bagolisi a Maanɔ ai bakɔmi inde Mokonga ai akabi bende bakɔlɛ a kɔma la bende Yɔani aendiisa-i.
31 Bato nde ba ɛbɔtɛana nde aanga neelenganisa nde na nto sina? Bankengi nde màni? 32 Baekengi nde bani nde baiki a ntanga a bototi na bangodeanaga bate: ‹Beesua anu baluma, nnda bonjoa. Belemba anu lembɔ a ngamɔ, nnda bogama.› 33 Indɔ a nde gea-la-bende, Yɔani-Ndiisi abhii, na nnd'alea mokate, na nnd'anoa makana, aba bɔyɔnga bote: ‹Agee nde egesile.› 34 Muna-Nto abhii, aléa na noa, mpa na benu bote: ‹Bonengɛ abha-elea na mokundilia nde, dhaɛ na balèisi a manjànjà na bato a ilɔlɔ.› 35 Nangɛ bɔyɔngɛ bo, bɔɛngɛ nda Mokonga aúbhianani bende a nde domi anga bɔbhu nde banebei.»
Yesu asuba a endu a Simoni moFalisayo
36 Mpa moFalisayo moti ab'akɛbɛa mɔkɔ anga Yesu bende abhiɛ baléɛ n'iyɛ. Yesu ab'angia nɔngɔ a moFalisayo ndɔ ab'aika a mpua elea nga aléɛ. 37 Ai a bɔma ndɔ nke moti mmbe ai bamúbha ajede. Ai n'aye aɔki mbinɔ a Yesu bende aléana asuba a endu a moFalisayo, ab'akida na chupa a nkoki. 38 Ab'aika mbusa a Yesu a mpiti a ego laɛ n'agama. Bibiso aɛ ab'atɔtisa ego la Yesu, ab'akɔkɔmbia yu na sia-moo aɛ. Mpa, ab'aumbia ego la Yesu, n'aduia yu nkoki. 39 Ɔna la indɔ, moFalisayo nde ai amɔkɔi Yesu ndɔ, ab'aɛyɔngɛanaga: «Nabana nto nde a nde múbhilili domi, aang'adhu aúbha bende mmbe ambhɛdiaga a nde nke sina nga, a na tambela ajede.»
40 Yesu ab'anngodea ate: «Simoni, ne na éma nde neongodea.» Simoni ab'ansisila ate: «Ngolisi, yɔngɛ to!» 41 Yesu ab'ayɔnga ate: «Nto moti ai aɛbɔki bato babale ntondɔ ndaɛ. Mmbe moti ai na muunda a ntondɔ eyana itanɔ. Mmbe matɔɔ ab'a na muunda a ntondɔ ekomi itanɔ. 42 A bola la inde banèa nto ndɔ, ab'aɛdɔlɛa babale labɔ muunda ndɔ. Mpa, omongodeɛ, anga bande babale ndɔ, màni yɛu aanga ankonda kpɛɛ?» 43 Simoni ab'ansisila ate: «A nde mmbe ai na muunda ati kpɛɛ ndɔ.» Eme sunga na Yesu ate: «Ɔyɔngi hɛlɛ.»
44 Mpa, Yesu ab'aetiila saka nɔngɔ a nke ndɔ, ab'anngodea Simoni ate: «Ɔmɔna nke nde? Adhu nengi asuba a endu aɔ, nnd'odhu omopi íbo a sosa la na ego lami. Mpa, nke nde yɛu a a mbe asosi ego lami na bibiso na kɔkɔmbia-li na sia-moo aɛ. 45 Owɛ, nnd'odhu omogulii a sesea lami, mpa nke nde nnd'adu umbia la ego lami toa la mbènɔ nde adhu angi nee asuba a endu nde. 46 Owɛ, nnd'odhu oduu gamba antata a moo ami, mpa, iyɛ adhu amoduii nkoki antata a ego lami.
47 Anga indɔ yɛu neongodea nte, nga Mokonga alilii ilɔlɔ ndaɛ ati, aangisi n'iyɛ ab'aɔngia ekondi ati angami. Mmbe balilii ilɔlɔ ndaɛ ɛdɛ n'iyɛ aɔngia ekondi ɛdɛ.» 48 Mpa, Yesu ab'anngodea nke ndɔ ate: «Nelilii ilɔlɔ ndaɔ.» 49 Bato nde bai na Yesu áma elea aba bakɛngɛtisa yɔnganaga ankunguanabɔ bate: «Mambala nto sina mmbe alilia ilɔlɔ nde?» 50 Ab'anngodea nke ndɔ ate: «Boosobela laɔ aolamisi, ogɛ na bɔkɔlɔ.»