Bake nde ai bam'belea Yesu
8
Mbusa a wa, Yesu ab'anyɛnaga a bɔma na a banji ɛdɛdɛ inda lɛɛngɔ ndɔ, n'aelabhelaga bato Mbinɔ Anja la Ɛbɔamɛ nda Mokonga. Bagoli mɔkɔ na babale na batamba áma imoti n'iyɛ, 2 na bake moti-moti angala a bande Yesu ai aelamisi a eketi na a jega ntuantua. Angala abɔ ai be: Malia, nde maa Mangadalɛna, mmbe baketi sobe-lalɔ ai batoi anga aɛ ndɔ, 3 Yɔana nka-Kuja, na Kuja ndɔ na a nde mmbe amɛlɛli nkumba nda Ɛlɔdɛ, Susana na bake batɔɔ bande ai bantabela Yesu na bagoli nde baɛ na adha lua ndabɔ.Maibhe la nkoni-tio
4 Mpa, da-mɔlɔndɔ a bato ai batoi a bɔma ntuantua, aba batulanaga a mpiti a Yesu. Batulanigi ndɔ, Yesu ab'amaa abɔ maibhe nde ate: 5 «Nto moti ai agee akona mbo a tio aɛ. Mbènɔ nde ai akona mbo ndɔ, adha au ab'agua a nkpalɔ a asii. Bande ai batesa a asii-li aba badɛtaga yu na bambabu aba baléa. 6 Atɔɔ go ab'agua antata bálábálá. Mbo-li ab'atɛla, ab'aɔma a yɔnga la bola la íbo. 7 Mbo atɔɔ go ab'agua angala kuà, ab'atɛla áma imoti na kuà ndɔ. Kuà ndɔ ab'akubisa yu. 8 Atɔɔ ab'agua a mɔbɔa. Ab'atɛla, ab'abɔta mbùa ati kpɛɛ. Tine moti ab'alɛmba au mbùa eyana imoti.» Iwa, Yesu ab'atalisa moyo aɛ kpɛɛ ate: «Mmbe a na etue la ɔka, aɔkɛ.»
Anga éma sina yɛu Yesu ai ayɔnga na maibhe?
9 Mpa, bagoli nde ba Yesu aba bamulisa bate: «Maibhe nde ɔyɔngi ndɔ akaba nde yɔnga la boni?» 10 Eme sunga na Yesu ate: «Benu Mokonga anopi úbha la éma la bɔsɔmbi nda Ɛbɔamɛ ndaɛ. Bato batɔɔ baɔka nde a maibhe, nga bende,
‹Nangɛbɛ balengɛ nnda baɔna,
nangɛbɛ baɔkɛ nnda baúbha.›»
Maibhe ndɔ akaba nde yɔnga la boni?
11 «Inde maibhe ndɔ ayɔngi ndɔ a nde bende: Mbo ndɔ a nde yɔnga la Mokonga. 12 Mbo nde ai agu a nkpalɔ a asii a nde bía bato nde baɔka yɔnga nda Mokonga. Sitani ab'akida, ab'atosa yu a meema abɔ, nga balebea-i na lamá. 13 Mbo nde ai agu antata a bálábálá a nde bía bande baɔka yɔnga na bujɛmɛ, mpa na nnda ba na miigi asuba abɔ. Mboà n'aye aekidii, boosobela labɔ ab'atalokana, aba badoa yɔnga-li. 14 Mbo nde ai agu angala a kuà, a nde bía bande baɔka yɔnga nda Mokonga, mpa maakɔ éma-éma nda na lɛɛngɔ, maakɔ a lua na bujɛmɛ ab'akubisa mbo-li n'iyu ab'ataloka mɔta. 15 Inde ai agu a dodo anja, a nde bía bande baɔka yɔnga nda Mokonga, na bhísa-li a meema abɔ hɛlɛ na ba na mouɔ. Aba babubila kida la esa nde abɔta nee mbùa.
Maibhe la kasoko
16 Nto nnd'aanga alolisa kasoko nga adegelɛgɛ yu na bholo, aɔ nga abhísɛ yu asuba a eka. Mpa bakpatisa yu nde n'egoo nga bande bangia baɔnɛ ɛnia-li. 17 Éma bhulibhu nde bato basɔmɛi, aɔnɛana lɛ na éma la bɔsɔmbi bhulibhu inde nnda baúbha a mbènɔ nde, baɔka lɛ na úbha-li. 18 Anga indɔ, bolengɛ hɛlɛ bía nde bɔɔka nee. Nga anga mmbe a na éma, batɔdisa aɛ, na mmbe nnd'a na éma, nangɛ inde aaka ate a nee, babɛsa lɛ.»
Mba la Yesu
19 Mpa, amá-Yesu na baaya laɛ aba babhia banenga, mpa nnd'ai batɔisi kida la a mpiti aɛ nga mɔlɔndɔ a bato. 20 Aba banngodea bate, amáɔ na baaya laɔ ba na nsɛngɛ, bakaba ɔna laɔ. 21 Ab'aengodea ate: «Èma na baaya lami a nde bande baɔka gɔɛ yɔnga nda Mokonga na kɔla-li.»
Yesu adhaisi kukisa
22 Ai esa imoti, Yesu na bagoli nde baɛ aba badaa a koko. Ab'aengodea bagoli nde baɛ ate: «Bejabhɛ kubhi a ngɛji.» Mpa aba bakɛngɛtisa jabha. 23 N'aha bajabha, Yesu ab'ala tɔɔ. Iwa, kukai mati ab'abɛta ngɛji-li. Íbo ab'angia asuba a koko-li, sùa bende bandiɛ. 24 Bagoli aba basɛdɛa a mpiti a Yesu, aba banjujusa na bankoga bate: «Ngolisi! Ngolisi! Betindi waɛ!» Mpa, Yesu ab'ajujua, ab'akalea kukisa-li. Íbo-li ab'akɔlɔmana. 25 Mpa, Yesu ab'aengodea bagoli nde baɛ ate: «Boosobela lanu a nde wani?» Bɔɔ ab'aedhunga bagoli nde baɛ, ab'aebangisa, aba bayɔngisanaga bate: «Nto sina mmbe? Asosia nangɛbɛ kukai na ngɛji, n'iyu ab'amɔka?»
Yesu anamisi nto a baketi
26 Mbusa indɔ, aba bamesa koko-li a nji nda baGɛlasi. Nji ndɔ ai kubhi a ngɛji, n'alengelanigi na Galilaya. 27 Mbènɔ nde Yesu asimi nee a koko ndɔ, nto moti mmbe maa bɔma ndɔ ab'abhia batulana n'iyɛ. Nto ndɔ, ai na baketi. Ai n'aye ale kia ati na nnd'alɔla ngɔmbɛ, na nnd'aika asuba a endu, na ika masa na bhota. 28 A ɔna la Yesu, ab'alaka kpɛɛ, ab'agua a ego laɛ, ab'ayɔnga na moyo enda kpɛɛ ate: «Okaba nde éma sina anga ami Yesu Muna-Mokonga mmbe maa n'egoo kpɛɛ? Neogameligi, nte belebele omonobisa-i!» 29 Ai ayɔngi bo nga Yesu ai ansosii nketi ndɔ bende atoɛ anga nto ndɔ. Nga, ai n'aye aóbi a moo aɛ nkobà ati. Ai banyangaga njaga aɛ na ego laɛ na nkɔndɔ́ nga langa laɛ. Indɔ bhuu n'atenaga. Na baketi ai banhahamisa na ga laɛ nee na ngalagɛ.
30 Mpa, Yesu ab'amulisa ate: «Ina aɔ a nde ee?» Eme sunga n'iyɛ ate: «Ina ami a nde batayo.» Ai ansisili bo nde nga baketi bati ai bangi asuba aɛ. 31 Baketi ndɔ aba bangamelaga Yesu bate: «Belebele osososia-i bende begɛ asuba a Kubhu nde nnd'a na sungia.» 32 Iwa, ai be mɔlɔndɔ a bangea bati na baleanaga a mamba. Mpa, baketi ndɔ aba bangamelaga Yesu bende aelebeelɛ bangiɛ asuba a bangea ndɔ. Yesu ab'alebea. 33 Mpa, baketi aba batoa anga nto ndɔ, aba bangia asuba a mɔlɔndɔ a bangea ndɔ. Bangea ndɔ aba badhidha mbangɔ toa la na mamba, aba bandia a ngɛji.
34 Balangi a bangea nde bai wa, baɔni bo, aba batatea. Aba baga mbangɔ, ga tɔmiaga la mbinɔ ndɔ a bɔma na a banji ɛdɛdɛ. 35 Bato nde ba na bɔma, mbènɔ nde baɔki nee yɔnga ndɔ, aba babhia baɔna éma nde aóbeli. Aba bamɔna Yesu na nto nde baketi adhu batoi anga aɛ ndɔ, n'alɔli ngɔmbɛ, n'a na maakɔ anja, n'aiki a mpiti a ego la Yesu. Bande bakidi, aba bakua bɔɔ. 36 Bande ai baɔni yɔnga ndɔ bhulibhu, aba baɛtɔmila bato sinde nto a baketi ndɔ alami nee.
37 Iwa, bato-li bɔbhu nde ba nji a baGɛlasi, aba banngodea Yesu bende atoɛ a lɛɛngɔ abɔ nga bai ba na bɔɔ kpɛɛ. Anga indɔ, Yesu ab'angia asuba koko, a kaba la ga. 38 Nto nde baketi ndɔ adhu batoi anga aɛ ndɔ, ab'angamelaga Yesu bende bagɛ áma imoti n'iyɛ. Yesu ab'akɔma, ab'ansisa, ab'anngodea ate: 39 «Osianɛ nɔngɔ aɔ na ogɛ ɔtɔmiɛ yɔnga nde Mokonga aɔkɔlɛli.» Nto ndɔ ab'aga, ga labha a bɔma-li bhulibhu, éma nde Yesu ankɔlɛli.
Bɔkpɛ la Yesu antata a kukua
40 A ja laɛ toa la kubhi a ngɛji-li, da-mɔlɔndɔ a bato ai babhii bansesea Yesu nga bɔbhu ai bam'bondeaga. 41 Mbènɔ nde akidi nee, nto moti ab'agua a ego laɛ. Ina aɛ n'a nde Yailɔ, mokama nde maa endu a sinagogi. Mpa, ab'angamelaga Yesu ate angiɛ nɔngɔ aɛ. 42 Nga ai masa na ngele a nyike moti, n'a na elemɔ mɔkɔ na ibale, n'adusuanaga na jega. Mbènɔ nde Yesu ai aga weli, mɔlɔndɔ a bato aba bansɔ́anisa.
43 Ai wa, nke moti mmbe ai na jega la obisa la nsangi toa la elemɔ mɔkɔ na ibale. Ai agɔbi lua ndaɛ bhulibhu a nkabɔ a nkate nga alamɛ. Nangɛbɛ bo nnd'ai amɔni nto nde atɔisa lamisa laɛ. 44 Mpa, nke ndɔ ab'ansɛdɛɛla Yesu mambusa-mbusa, ab'abhɛdia sese a ngɔmbɛ ndaɛ, na a mbènɔ ndɔ, nsangi ndɔ ab'aɔma. 45 Yesu ab'aeulisa bato ate: «Màni yɛu amɔbhɛdɛi?» Bato bɔbhu aba bangana. Pɛtɛlɔ ab'ansisila ate: «Chaa, Ngolisi! Nnd'ɔɔna mɔlɔndɔ nde aotimbi na sɔanisa laɔ nde?» 46 Eme sunga na Yesu ate: «Nto amɔbhɛdɛi. Nga nɛɔki bía ekanda atoi anga ami.»
47 Nke ndɔ ɔna la bende nnd'aanga atɔisa bɔɔsɔmɛna, ab'abhia mosá la Yesu n'apupa. Ab'agua a ego laɛ. Ab'antɔmilaga mosá la bato-li bɔbhu inde adhu aangisi ambhɛdɛa Yesu nga bende alamɛ, na sinde adhu alami nee nkobà imoti. 48 Mpa, Yesu ab'anngodea ate: «Èma, boosobela laɔ aolamisi. Ogɛ na bɔkɔlɔ.»
49 Yesu n'aha ayɔnga wa, ntɔmii-mbinɔ moti ab'akida na atoa nɔngɔ mokama nde ma endu a sinagogi. Ab'anngodea Yailɔ ate: «Nyike nde maɔ aku. Onnobisa-i ye Ngolisi.» 50 Mpa, Yesu ab'amɔka ntɔmii-mbinɔ ndɔ, ab'anngodea Yailɔ ate: «Oba-i na bɔɔ. Obhísɛ meema aɔ anga Mokonga, nyike nde maɔ alama.»
51 Mbènɔ nde akidi nee nɔngɔ a Yailɔ, Yesu ab'akɔma ngisa la bato batɔɔ asuba a endu-li masa Pɛtɛlɔ, Yɔani, Yakɔbɔ na babɔti a nyike ndɔ. 52 Bato-li bɔbhu ai baelilia na gamea laɛ. Mpa, Yesu ab'aengodea ate: «Bogama-i! Nga nndaga aku. Ale nde tɔɔ.» 53 Bato aba bantɛbhɛlaga nga ai baúbha bende aye aku domi. 54 Yesu ab'andhunga nyike ndɔ a njaga aɛ, ab'ayɔnga na moyo enda ate: «Nii nde sa! Omɛ!» 55 A mbènɔ ndɔ ab'aheuma na má. Yesu ab'aesosia ate bammòɛ elea. 56 Iwa, ab'aebangisa kpɛɛ babɔti aɛ. Mpa, Yesu ab'aengodea ate bantɔmila-i nto yɔnga nde anyɛni wa ndɔ.