Tea la bagoli mɔkɔ na babale
9
Mbusa indɔ, Yesu ab'aekoga bagoli nde baɛ mɔkɔ na babale, ab'aepa ekanda na bokpɛ la bea la baketi bɔbhu na lamisa la bajegi. 2 Mpa, ab'aetea áma ga labha la yɔnga la Ɛbɔamɛ nda Mokonga na lamisa la bajegi. 3 Ab'aengodea bende: «A tamba ndanu, bokumba-i éma, abɛ manga, njombi, ntànda, na ntondɔ. Nangɛbɛ nto akumba-i go ngɔmbɛ nde aebongoa nee. 4 A endu nde banosesea au, boikɛ asubi kida la esa nde botoa mande iyo. 5 Mpa, áma nnda banosesei, botoɛ a bɔma ndabɔ na botitiɛ eluule la ego lanu a angelisa labɔ bende yɔnga aegulia mande.» 6 Bagoli aba baga a nji-li bhulibhu na balabha Mbinɔ Anja nda Mokonga, na lamisa la bajegi a mpua-li bhulibhu.Maamaa nda Ɛlɔdɛ anga Yesu
7 Mbènɔ nde, Ɛlɔdɛ mɔamɛ nde maa Galilaya aɔki yɔnga-li bhulibhu nde ai anyɛni, ab'abola mbénɔ akɔlanɛ nde iboni, nga bato moti-moti ai bayɔnga bate: «Yɔani-Ndiisi ajujui a kukua.» 8 Na bande batɔɔ bate: «Elia a yɛ mbɔ aóbeli ndɔ.» Na bande batɔɔ go bate: «Adha baúbhilili nde ba kala moti mbɔ ajujui a kukua ndɔ.» 9 Mpa, Ɛlɔdɛ ab'ayɔnga ate: «Ka Yɔani ndɔ yɛu adhuma neudisisi moo aɛ ndɔ badhami. Mpa, mmbe nɛɔka da-mbinɔ ati anga aɛ a nde màni?» Ìbo yɛu, ab'akabaga ɔna laɛ.
Yesu aelisi bato bati
10 A ja labɔ, batetei aba bantɔmila Yesu éma-li bhulibhu nde ai bakɔli. Mpa Yesu ab'aɛbɛsa, ab'aga na ibɔ saka lɛɛngɔ a nji nde bakoga bate Bɛtɛsaida. 11 Mpa bato aba baúbha, aba bam'baemea iweli. Yesu ab'aesesea, na tɔmila labɔ yɔnga la Ɛbɔamɛ nda Mokonga, na lamisa la bande bai na sei a bolamisi.
12 Akidi ɛgɔgɔ, bagoli nde ba mɔkɔ na babale ndɔ, aba basɛdɛa bhi la Yesu, na ngodea laɛ bate: «Oosisɛ bato-li, bagɛ a nji nde a bhi, a nkabɔ a elea na áma la, nga be nde a ngalagɛ.» 13 Yesu ab'aengodea ate: «Benu bamɛnɛ boopɛ éma a léa.» Na ibɔ aba bansisila bate: «Be masa na mokate itanɔ na basale babale. Mpa, okaba nde ote begɛ besombɛ elea anga bato nde bɔbhu?» 14 Nga, iwa bai ibeli bía baboo ɛlufu itanɔ. Yesu ab'aengodea bagoli nde baɛ ate: «Boeikisɛ a boio, moti-moti a bato ekomi itanɔ.» 15 Bagoli aba balebea, na ikisa labɔ bɔbhu a dodo. 16 Toa la iwa, Yesu ab'abɛsa mokate itanɔ na basale babale ndɔ, ab'aɔngia yu na kobha, na sima la Mokonga. Ab'abunaga yu, ab'aepa bagoli a gabhea la mɔlɔndɔ a bato ndɔ. 17 Bɔbhu aba baléa, aba bakuta. Mbusa-li, bagoli aba batulanisaga jɔ mɔkɔ na ibale la sakelaga-li.
Yesu a nde màni?
18 Esa imoti, Yesu n'ammɛma Mokonga áma aɛsɔmɛni, iyɛ na bagoli nde baɛ. Iwa ab'aeulisa ate: «Mɔlɔndɔ a bato nde bayɔnga nde bate ne nde màni?» 19 Bagoli aba bansisila bate: «Bato batɔɔ bayɔnga nde bate o nde Yɔani-Ndiisi. Batɔɔ bate Elia. Bande batɔɔ go bate, múbhilili moti nde maa kala mmbe ajujui toa la kukua.» 20 Yesu ab'aeulisa ate: «Mpa na benu, bote ne nde màni?»
Emesunga na Pɛtɛlɔ ate: «O nde Kilisitɔ mmbe ma Mokonga.»
Yesu atɔmii kua laɛ na jujua laɛ
21 Mpa, Yesu ab'aekalelisa kpɛɛ bende, banngodea-i mɛnɔ nto yɔnga ndɔ. 22 Ab'aengodea ate: «Atɔlɛli Muna-Nto anobɛ kpɛɛ, baomi na bakama nde ba baɛlɛli na bagolisi a Maanɔ bankɔma mande na móa laɛ. Mpa, a esa la inda isalɔ, ajujua mande a toa la kukua.»
Iboni yɛu aanga bam'belea Yesu?
23 Mbusa ab'ayɔnga na bato-li bɔbhu ate: «Nabana nto akaba belea lami, aɛkɔmɛ iyɛ amɛnɛ, abɛsɛ mosalaba ndaɛ esa-li bhulibhu na amobeleɛ. 24 Anga mmbe akaba lamisa la ngɛbɛ aɛ, alɛ abungisa na mmbe abungisa ngɛbɛ aɛ angami alɛ alamisa. 25 Enjambi sina anga nto ba la na ntondɔ nda na lɛɛngɔ bhulibhu, n'aebungisa aɔ n'aetindisa iyɛ amɛnɛ? 26 Anga mmbe akua soni angami na a yɔnga lami, Muna-Nto akua alɛ soni aɛ a esa nde alɛ abhia na boumu ndaɛ, inda Abhaɛ na inda bamalaeka nde baɛ. 27 Domi, nenongodei, angala bande ba ani, bande batɔɔ nnd'alɛ bakua na baɔni-mbɛ Ɛbɔamɛ nda Mokonga.»
Yesu aɔnɛani na boumu nda Mokonga
28 Mbusa indɔ, bía kia lalɔ, Yesu aba am'bɛsa Pɛtɛlɔ, Yɔani bona Yakɔbɔ, ab'adaa na bɔ na mamba áma mɛma. 29 N'iyɛ n'aha amɛma, iso aɛ ab'aetia na ngɔmbɛ ndaɛ ab'abhumana na ngelemana masa bobhiɛ! 30 Mpa, aba baɛɔna baboo babale na bayɔnganaga na Yesu. Baboo ndɔ ai nde Mósa bona Elia. 31 Bai baɔnɛani nde a boumu nda na kobha, ai bayɔnga nde na Yesu a kukua nde ai am'bondeli naa Yɛlusalɛma. 32 Pɛtɛlɔ na badhaɛ, tɔɔ n'aedhungi kpɛɛ. Mpa go, a jujua labɔ, aba baɔna boumu nda Yesu na baboo babale bande ai bame n'iyɛ. 33 A doana la baboo ndɔ na Yesu, Pɛtɛlɔ ab'ayɔnga ate: «Ngolisi, a anja angasu ika la iani, behiɛ ngbangba isalɔ: imoti indaɔ, imoti nda Mósa, na imoti nda Elia.» Ai ayɔnga nde makanga úbha la inde ayɔnga. 34 N'aha ayɔnga ìbo, ebundu ab'aedegelaga. Bɔɔ ab'aedhunga a mbènɔ nde ebundu ndɔ aedegi ne. 35 Moyo imoti ab'atoa a ebundu ndɔ n'ayɔnga bende: «Mmbe a nde nami, mmbe nensɔmbɔli, bɔmɔkaneɛ!» 36 Mbusa moyo ndɔ sia, bagoli ndɔ aba bamɔna masa Yesu iyɛ nganga. Aba badhaa bobi, aba baika makanga ngodea la nto yɔnga nde ai baɔni ndɔ.
Yesu anamisi nii nde a na baketi
37 Uma-li, Yesu na bagoli nde baɛ basalɔ n'aye basimi toa la na mamba, mɔlɔndɔ a bato aba babhia tulana la na Yesu. 38 A meeme a bato ndɔ, moo moti ab'akoga kpɛɛ ate: «Ngolisi, belebele, onengɛ nami, ngɔmu nde mamɔ, 39 nga nketi andhunga, na tatisa laɛ. N'aye ankɔli bo, ab'ansugbaga na tosa la hulu asuba nyɔɔ aɛ. Atoa anga aɛ masa n'aye anobisi na loisa laɛ kpɛɛ. 40 Adhu neegameligi bagoli nde baɔ bende, bam'beɛ nketi ndɔ. Aba bataloka.»
41 Mpa Yesu ab'ayɔnga ate: «Chaa! Benu ɛbɔti a makanga lebea, ago bam'bungɔgɔ! Neba mande na benu nde a mbènɔ enga? A mbènɔ enga yɛu alɛ nenobubila? Ombhiɛ na naɔ ani.» 42 Mpa nii-li n'aha asɛdɛa bhi la Yesu, nketi ndɔ ab'ammaa a dodo, ab'asugbaga kpɛɛ. Yesu ab'ankalea, na lamisa la nii ndɔ ab'ansisila abhaɛ. 43 Ìbo, bato-li bɔbhu ab'aebangisa a ɔna la boti la Mokonga.
Yesu atɔmii go kukua laɛ
Sinde bɔbhu ai n'aha aebangisa, a éma bhulibhu nde ai akɔli, Yesu ab'aengodea bagoli nde baɛ ate: 44 «Bokodɛgɛ etue lanu hɛlɛ a yɔnga nde nɛnɔtɔmila nde: Muna-Nto, bamóbisa mande a njaga a bato.» 45 Mpa nnd'ai baɔka yɔnga ndɔ, nga moo a yɔnga-li ai aɛsɔmɛni nga baɔka-i. Na ibɔ, aba batea ulisa laɛ a indɔ.
Màni yɛu a nde omi?
46 Mbusa indɔ, bagoli aba bakɛngɛtisa boaka a yɔnga la bende, màni yɛu a nde omi angala abɔ. 47 Mpa, Yesu úbha la yɔnga nde ai bakakatana au ndɔ, aba am'bɛsa nii, ab'ammesa bhi-bhi laɛ. 48 Ab'aengodea ate: «Mmbe ansesei nii nde a ina ami, kesi amosesei na eme. Mmbe amosesei, kesi ansesei go mmbe amotei. Nga, mmbe a mɛdɛ angala anu, iyɛ yɛu a nde omi.»
Mmbe nndaga anoye a nde dhanu
49 Yɔani ab'ayɔnga ate: «Ngolisi, bɛmɔni nto moti n'aebea baketi a ina aɔ. Adhu bekabi kalelisa laɛ nga, nnda atamba na besu.»
50 Yesu ab'ansisila ate: «Bonkalelisa-i. Nga, nto nde nndaga anoye mmbɔ a nde mmbe manu.»
Bankɔmi Yesu naa Samalia
51 Akidi esa la siana la Yesu na kobha n'aye a bhi-bhi, Yesu ab'alamola mesa la tamba a ga la Yɛlusalɛma. 52 Iwa, ab'aetea batetei mosá laɛ. Aba baga bakida a nji imoti nda Samalia, nga bɔngisɛ aɛ áma a kidila. 53 Bato nde ba nji ndɔ, aba bakɔma sesea laɛ, nga ai aga nde Yɛlusalɛma. 54 Mbusa úbha la indɔ, bagoli nde baɛ Yakɔbɔ na Yɔani, aba bamulisa Yesu bate: «Mokama, okondi ote bɛmɛmɛ nsa, atoɛ na kobha aegogɛ bɔ?» 55 Mpa, Yesu ab'aetiila anga bɔ, ab'aekalea.
56 Mpa, aba baga a nji atɔɔ.
Belea la Yesu
57 N'aha ba na asii, nto moti ab'anngodea Yesu ate: «Neobelea mande áma oga bhulibhu.» 58 Yesu ab'ansisila ate: «Bamajakala ba na kubhu. Bambabu ba na endu. Muna-Nto nnd'a na áma a yombia.» 59 Aba anngodea nto matɔɔ go ate: «Omobeleɛ!» Nto ndɔ ab'ansisila ate: «Mokama, omolebeelɛ negɛ nemúmbɛ mbɛɛ abhami.» 60 Eme sunga na Yesu ate: «Oodoɛ bato nde baku baeumbɛ baku nde babɔ. Owɛ ogɛ, ga labha la yɔnga a Ɛbɔamɛ nda Mokonga.» 61 Nto matɔɔ ab'anngodea ate: «Mokama, neobelea mande. Mpa, omolebeelɛ negɛ mbɛɛ neɔkɔanɛ na batobami.» 62 Yesu ab'anngodea ate: «Nto nde abɛsi esuka a dhɛma la tio n'aye alengaga mbusa aɛ, nnda atɔlɛli a Ɛbɔamɛ nda Mokonga.»