Yesu aetei bagoli ekomi sobe-lalɔ na babale
10
Mbusa indɔ, Mokama ab'aɛsɔmbɔla bato batɔɔ ekomi sobe-lalɔ na babale, ab'aetea babale-babale mosá laɛ a bɔma-li bhulibhu na a mpua nde ai aang'aga au. 2 Ab'aengodea ate: «Egubhɔ a ati, bato a nkási yɛu ba bɛdɛ. Nga indɔ, bommɛmɛ amɛn'a nkási-li tea la bato a nkási a egubhɔ ndaɛ. 3 Bogɛ! Nenotei bía banyia-mboli angala banyama bakpɛ bande ba na ndula. 4 Bokumba-i ngonja, aɔ go njombi nangɛbɛ na belatɔ. Bobungisa-i mbènɔ ndanu a sesea la bato na asii.5 N'aye bongi a endu, bɔyɔngɛ mbɛɛ bote: ‹Bɔkɔlɔ abɛ a endu nde.› 6 N'aye nto a bɔkɔlɔ a wa, nseseɔ a bɔkɔlɔ ndanu aba anga aɛ. Makanga indɔ, kesi bɔkɔlɔ ndanu ndɔ anosianela. 7 Boikɛ masa a endu ndɔ. Boléɛ, na noa la inde banopi. Nga, nto a nkási atɔlɛli lèa laɛ. Boumaga-i a endu endu.
8 Mbènɔ nde bongia a bɔma imoti na banosesei, boléɛ eléa nde banopa. 9 Boolamisɛ bajegi nde ba nji ndɔ na ngodea labɔ bote: ‹Ɛbɔamɛ nda Mokonga aye a bhi-bhi lanu.›
10 Mpa n'aye bongi a bɔma imoti nde nnda banosesei au, bogɛ na ntanga áma bato bati, na bɔyɔngɛ bende: 11 ‹Benotitiili eluule nda bɔma ndanu inde adhu adaetii ego lasu. Mpa boúbhɛ bende, Ɛbɔamɛ nda Mokonga aye bhi.› 12 Nenongodei bende, esa la sɔ̀a la bato, bato nde ba bɔma ndɔ Mokonga alɛ aesɔ̀a nyɛna la bato nde ba Sɔdɔmɔ.»
Bato nde ba bɔma nde bakɔmi lebea la Yesu
13 Yesu ab'ayɔnga ate: «Aii, boanya anu benu bato nde ba Kolajini na benu bato nde ba Bɛtɛsaida! Nabana Mokonga ai akɔli éma la bangisana na Tilɔ na Sidɔni, bía inde ai akɔli nɔngɔ anu, mmbɛ aye mɛnɔ bootiili anga Mokonga na ika la ebhuu na lɔla la ngɔmbɛ a bamekusa. 14 Esa la sɔ̀a la bato, alɛ bonoba kpɛɛ nyɛna la bato nde ba Tilɔ na Sidɔni. 15 Na benu bato nde ba Kapɛlɛnaumu, bokanisa bende, boanga bootalisa benu nganga na kobha? Boodhidhisa nde kida la nji a baku.»
16 Ab'ayɔnga go na bagoli nde baɛ, ate: «Nto nde anɔɔki, amɔɔki na eme. Mmbe anɔkɔmi amɔkɔmi na eme. Mmbe amɔkɔmi, kesi ankɔmi nde mmbe amotei.»
17 Mbusa tamba ndabɔ, bande ai aetei ndɔ ekomi sobe-lalɔ na babale, aba baja na bajanga kpɛɛ, aba bayɔnga bate: «Mokama, nangɛbɛ baketi basɔɔka a ina aɔ.» 18 Emesunga na Yesu ate: «Ai nɛmɔni Sitani n'agua toa la kobha na bía ɛnia la mbúa. 19 Bɔɔkɛ! Nenopi ekanda la dɛta la banjoa, bangoto na bokpɛ bhulibhu anga njiu nde manu Sitani. Na éma nnd'alɛ anɔkɔla ajede. 20 Mpa, bojanga-i a yɔnga la bea la baketi. Bojangɛ gɔɛ nde a yɔnga la bende Mokonga aandeki ina anu na kobha.»
Yesu ajangi
21 A mbènɔ ndɔ, Yesu ab'ajanga kpɛɛ a ekanda la Meema-Mabhu. Ab'ayɔnga bende: «Oo! Ebha, Mokama nde maa na kobha na lɛɛngɔ, neosimi nga, ɔsɔmɛi éma nde anga bande ba na bɔɛngɛ na maɛnɛkɔ na ob'oeangelisa bande ba bía bani. Ìbo yɛu okondi Ebha.»
22 Ab'ayɔnga go ate: «Ebha amopi bokama la éma li bhulibhu. Màni yɛu amúbha Nii, na nndag'a masa Ebha? Màni yɛu amúbha Ebha? Na nndag'a masa Nii? Na mmbe go Nii ankondi ɔngia laɛ.»
23 Mbusa indɔ, Yesu ab'aetiila anga bagoli nde baɛ ibɔ nganga, ab'aengodea ate: «Bujɛmɛ anga bato nde baɔna inde benu bɔɔna. 24 Nga nenongodea, baúbhilili na baamɛ bati, ai bakabi ɔna la inde benu bɔɔna, mpa go nnd'ai baɔni. Na ɔka la inde bɔɔka, nnd'ai baɔki.»
Maibhe a moSamalia manja
25 Mbusa, ngolisi a Maanɔ moti ab'ama n'akaba koda la Yesu na yɔnga, ab'amulisa ate: «Ngolisi, nɛkɔlɛ iboni, anga nebɛ na mɛyɔ?» 26 Yesu ab'ansisila ate: «Éma sina yɛu baandeki asuba ketabo nda Maanɔ? Éma sina yɛu ɔsɔmi asubi-li?» 27 Emesunga na nto ndɔ: «Onkondɛ Mokama Mokonga nde maɔ a meema aɔ bhulibhu, a lenda laɔ bhulibhu, a ekanda laɔ bhulibhu na maakɔ aɔ bhulibhu. Onkondɛ go dhaɔ bía nde oekondi owɛ nganga.» 28 Yesu ab'anngodea: «Omosisili hɛlɛ. Ɔkɔlɛ ìbo, na owɛ olenda a mɛyɔ.»
29 A nkabɔ a úbhisa la bende a nde nto a domi, ngolisi a Maanɔ ndɔ ab'amulisa go Yesu ate: «Màni yɛu a nde dhami?» 30 Yesu ab'ansisila ate: «Moo moti ai atoa Yɛlusalɛma n'adhidhila Yelikɔ, na asii, ab'agua a njaga a bajiji, aba batosa ngɔmbɛ ndaɛ na binda laɛ, aba baɛgɛla abɔ, na ban'doa sùa kua. 31 A ngɛbɛ-li, mɔɛlɛli moti n'adhidha a asii ndɔ ab'amɔna moo ndɔ ab'anyɛna mbamba. 32 MoLawia moti na iyɛ ab'akida iwa, ɔna la moo ndɔ na nyɛna la mbamba. 33 Mpa go nto moti mmbe maa Samalia n'a a tamba ndaɛ ab'akida mpiti a moo ndɔ, ab'amɔna, na kulia laɛ ngomi. 34 Ab'asɛdɛa a mpiti aɛ, ab'anyanga ndase ndaɛ na gesa la au gamba na divai, aba an'daisa antata ponda nde maɛ, aba baga n'iyɛ, ab'aga an'doa a endu a batambi, ab'antabela. 35 Uma-li, ab'abɛsa a njombi ndaɛ kichɛlɛb ibale, ab'ammòa mmbe amɛli endu a batambi ndɔ na ngodea laɛ ate: ‹Onangɛ, na n'aye obungisi ntondɔ anga aɛ, a siana lami alɛ neosisila.›»
36 Yesu ab'amulisa ate: «Mpa, oaki ote, angala bato nde basalɔ ndɔ màni yɛu ai nde dha a moo nde ai agu a njaga a bajiji ndɔ?» 37 Ngolisi a Maanɔ ndɔ ab'ansisila Yesu ate: «A nde mmbe ai ankulii ngomi.» Yesu ab'anngodea ate: «Ogɛ, na ɔkɔlɛ ìbo.»
Ga la Yesu nɔngɔ Malata bona Malia
38 Yesu na bagoli nde baɛ n'aha ba na asii, ab'angia a nji imoti. Iyo nke moti mmbe inaɛ a nde Malata ab'ansesea a endu aɛ. 39 Ai na mɔtɔ aɛ nyike na bankoga nde bate Malia. Malia ab'aga aika a mpiti a ego la Mokama, ab'aɔkanea yɔnga laɛ. 40 Malata n'anoba na nkási ati nda molambi, ab'abhia nɔngɔ Yesu na ngodea laɛ ate: «Mokama, indɔ nnd'aɔkɔla éma, mɔtɔmi dɔlɛa lami nkási a molambi nde? Onngodeɛ ote amotabelɛ.» 41 Mokama ab'ansisila ate: «Malata, Malata! Ookɛndɛlisa na boonobisa a éma ati. 42 Mpa éma imoti sia yɛu atɔlɛli. Malia yɛu asɔmbɔli ind'anja, nnd'alɛ batosa.»