Yesu aegolisa bagoli nde baɛ sinde aanga bamɛma nee
11
Ai esa imoti, Yesu ai a mpuɔ imoti n'amɛma. A mbènɔ nde agɔbi nee mɛma, moti angala a bagoli nde baɛ ab'amulisa ate: «Mokama, osogolisɛ mɛma bía nde Yɔani ai aegolisi na bagoli nde baɛ.» 2 Yesu ab'aengodea ate: «Mbènɔ nde bɔmɛma nee, bɔyɔngɛ bende,Ebha,
Ina aɔ abhebheanɛ.
Ɛbɔamɛ ndaɔ abhiɛ.
3 Osopɛ elea nde atɔlɛli anga asu esa-li bhulibhu.
4 Oliliɛ ilɔlɔ ndasu
nga, na besu belilia ilɔlɔ nde basɔkɔlɛli.
Olebea-i bende beguɛ n'aye bakaba dhema lasu.»
5 Yesu ab'aengodea go ate: «Nabana a angala anu nto moti mmbe a na dhaɛ, na ab'aga nɔngɔ aɛ a m'bimba na ngodea laɛ bende: ‹Dhami sɛ! Ɔmɔbɔkɛ masa mokate isalɔ 6 nga, adha badhami moti amokidii n'atoa tamba. Na neboli éma nde nemmòa.› 7 Nabana mmbe a asuba a endu ansisili ate: ‹Omonobisa-i! Aye nekpemi ekuku namɔ. Eme na banami aye bele. Nnd'aanga nema na pa laɔ inde ɔmɛma ndɔ.› 8 Nenongodea bende, nangɛbɛ na nnd'ajujui a mòa laɛ mokate nga a nde dhaɛ, ammòa nde nga dhaɛ ankusisa-i soni mosá la bato, amá na mòa laɛ bhulibhu inde amɛma.
Mmbe amɛmaga aɔna
9 Mpa n'eme nenongodei nte: bɔmɛmɛ, banopa mande. Bokabɛgɛ, bɔɔna mande. Bɔkɔgɔlisɛ, banoukuila mande. 10 Nga, mmbe amɛma, bammòa mande. Mmbe akabaga, aɔna mande, mmbe akɔgɔlisa bamukuila mande. 11 Abha-nii sina yɛu angala anu aang'ammòa naɛ kingili n'ammɛmi nde sale? 12 Aɔ n'aye ammɛmi lee, aang'ammòa nde ngoto? 13 Mpa mbɛɛ, benu nde bo nde bato bajede n'aye boúbha gabhea la bananu baéma anjanja, mpa, anga éma sina yɛu boaka bote Abhanu mmbe a na kobha, nnd'aanga akɔla indɔ a mòa la Meema Mabhu anga bande bammɛmi?»
Yesu a na ekanda nyɛna la Bɛlɛjɛbuli
14 Yesu ai am'bèa nketi nde ai antii nto moti nkingi. Mbènɔ nde nketi ndɔ atoi nee, nkingi ndɔ ab'akɛngɛtisa yɔnga. Mɔlɔndɔ a bato nde bai be ab'aebangisa kpɛɛ. 15 Mpa adha bato-li aba bayɔnga bate: «Yesu aebèa baketi a ekanda la Bɛlɛjɛbuli, omi nde ma baketi.» 16 Bande batɔɔ aba bakengea dhema laɛ, a kaba l'anga aɛ mbunde nga baúbhɛ bende atoi na kobha domi. 17 Mpa iyɛ, nga ai aúbha maakɔ abɔ, ab'aengodea ate: «Bato a ɛbɔamɛ imoti n'aye bamani a nkunguanabɔ, ɛbɔamɛ ndɔ ab'aujuana, na endu ndɔ bhulibhu ab'agbɔlɔana. 18 Mpa n'aye Sitani aemanisa iyɛ nganga, ɛbɔamɛ ndaɛ aanga alenda nde boni? Nɛyɔngi ìbo nde nga, benu bɔyɔngi bote neebea baketi nde a ekanda la Bɛlɛjɛbuli. 19 Mpa n'aye a nde domi bende, neebea baketi nde a ekanda la Bɛlɛjɛbuli, kesi mpa bato nde banu, baebea nde a ekanda la màni? Anga indɔ yɛu, bato nde banu basɔ̀a mande yɔnga ndanu. 20 Mpa nabana a nde a ekanda la Mokonga yɛu neebea baketi, ka aande kesi Ɛbɔamɛ nda Mokonga anokidii nde. 21 Nto makpɛ n'aye a na ekpatɔ ndaɛ n'alanga endu aɛ, matɔɔ nnd'aanga abhia auba nkumba ndaɛ. 22 Mpa n'aye aobeli wa nto makpɛ nyɛna laɛ ab'ammanisa na ùta la njugu a ekpatɔ ndaɛ, inde ai agesi au meema aɛ na ab'agabha nkumba inde amuti.
23 Mmbe nndaga na eme, amoye. Na mmbe nndaga amotabela tulanisa la egubhɔ namɔ aanji yu.
24 Nketi n'aye atoi anga nto, ab'aga akɔba na ngalagɛ na kabaga la áma a yombia, ab'abola. Mpa ab'ayɔnga ate: ‹Nesiana a endu ami áma nde netoi.› 25 A kida laɛ, ab'adhonda endu na babilii na bhísa-li hɛlɛ. 26 Mpa, ab'aga aɛbɛsa baketi batɔɔ sobe-lalɔ, bajede nyɛna laɛ. Aba bangia anga nto ndɔ na ika la asub'aɛ. Mbusa wa, buki la nto ndɔ ab'akalaga kpɛɛ nyɛna la inda mosá.»
Bujɛmɛ nda domi
27 Yesu n'aha ayɔnga, nke moti ab'asòmba moyo aɛ a meeme a mɔlɔndɔ a bato, ab'ayɔnga ate: «Bujɛmɛ anga mmbe ai aɔbɔti na ungisa laɔ!» 28 Eme sunga na Yesu ate: «Bujɛmɛ abɛ gɔɛ nde anga mmbe aɔka yɔnga nda Mokonga na bhísa-li.»
Mbunde a Muna-Nto
29 Na sinde mɔlɔndɔ a bato ai aga na bia, Yesu ab'ayɔnga ate: «Ɛbɔti nde a nde ɛbɔti ajede. Bakaba bate negeɛ bɔ nde mbunde. Na a mbunde, nnd'aanga baɔna mbunde atɔɔ masa inda Yɔna ndɔ. 30 Nga, nangɛ Yɔna ai nde mbunde anga bato nde ba Ninawe†, na ìbo yɛu Muna-Nto abá mande mbunde anga bato nde ba ɛbɔti nde. 31 A esa la sɔ̀a la yɔnga, mɔamɛ la nke nde maa Sɛba amá mande mosá la bato nde ba ɛbɔti nde, na gusila labɔ yɔnga, nga iyɛ ai atoi nde a lɛɛngɔ a dhɔlɔ bhia ɔkanea la yɔnga la bɔɛngɛ nda mɔamɛ Sɔlɔmɔnɔ. Kesi a ani go nto mati nde anyɛni Sɔlɔmɔnɔ. 32 A esa la sɔ̀a la yɔnga, bato nde ba Ninawe bama mande mosá la bato nde ba ɛbɔti nde, a gusila labɔ yɔnga, nga ai baetii a bolabhɛ nda Yɔna. Kesi a ani go mmbe anyɛni Yɔna.»
Iso a nde bía ɛnia la ngobho
33 Nto nnd'aanga alolisa kasoko a sɔmɛa-li, nangɛ a bhísa-li kusi a etele, mpa babhísa yu gɔɛ nde n'egoo, nga gea la bende bande bangia asuba a endu baɔnɛ ɛnia-li. 34 «Iso aɔ a nde bía kasoko a ngobho aɔ. Nabana iso aɔ a anja, ngobho aɔ bhulibhu n'iyu a asuba a bobhu. Mpa nabana iso aɔ aujuani, kesi ngobho aɔ n'iyu aba asuba dhoda. 35 Olengelelɛ hɛlɛ nga bobhu nde a asuba aɔ aetia-i dhoda. 36 Nabana ngobho aɔ bhulibhu a asuba a bobhu, makanga nyia-dhoda, mpa abá mande nde asuba a bobhu bía mbènɔ a ɛnia la kasoko nde aojegia.»
Yesu ai aehani baFalisayo na bagolisi a Maanɔ
37 Yesu n'aha ayɔnga, moFalisayo moti ab'ankoga nɔngɔ aɛ áma a eléa. Yesu ab'angia wa, ab'aika áma a léa-li. 38 MoFalisayo ndɔ, ɔna la sinde Yesu nnd'ai asosi nee njaga aɛ mosá la léana, aba am'bangisa.
39 Mpa, Mokama ab'anngodea ate: «Benu baFalisayo, bososa masa ntata a kɔpɔ na kebakoli, mpa meema anu n'atumi nde na sei a kuba na bujede. 40 Babhobho nde sa! Nnda boúbha bende mmbe akɔkɔtii ntate, yɛu go akɔkɔtii subi? 41 Boopɛi bato a buyɛnɛ adha inde asuba a meema anu. Mpa, yɔnga ndanu bhulibhu abhumana.
42 Boanya anga anu baFalisayo! Bongabhea Mokonga motolɔ na éma imoti asuba a mɔkɔ nda kasakasa nde alɛkɛmisa elea. Mpa, aba bɔbhɔna domi na ekondi anga Mokonga. Indɔ yɛu ai atɔlɛli bɔkɔlɛ, makanga doa la motolɔ ndɔ. 43 A nde boanya anga anu baFalisayo nga bokondi ika l'a mbata nda mosá-mosá asuba a endu a sinagogi. Bokaba bote aba banosesea masa áma bato batumi. 44 A nde boanya anga anu! Bokengi nde bhota nda kala, inde bato badɛtɛlaga na nnda baúbha.»
45 Adha bagolisi a Maanɔ moti ab'anngodea ate: «Ngolisi, n'aye ɔyɔnga bo, kesi osobhóma na besu nde bhóma.»
46 Yesu ab'ansisila ate: «Na benu boanya anga anu bagolisi a Maanɔ nga, bookumbisa bato nkumba nde atiadi, na nnda bokonda tabela labɔ au, nangɛbɛ a mbùa-njaga imoti. 47 Boanya anga anu! Nga, boohiila baúbhilili nde ba kala bhota, ago batata anu yɛu n'ai baemói. 48 Indɔ yɛu, aɔngii bende, bolebei éma nde batata anu ai bakɔli, bende a nde domi. Nga ai baemói baúbhilili, na benu, aba bohìa bhota abɔ. 49 Indɔ yɛu aangisi Mokonga, a bɔɛngɛ aɛ, ayɔngi bende: ‹Neetea mande abɔ baúbhilili na batetei. Baemóa mande adha abɔ na nobisa la bande batɔɔ.›
50 A yɔnga la indɔ yɛu, nsangi a baúbhilili bɔbhu, inde ai aduani toa la kɛngɛtisa la lɛɛngɔ, abá mande antata moo a bato nde ba ɛbɔti nde. 51 Indɔ ai akɛngɛtisi nde a duana la nsangi a Abɛli kida la inda Jakalia, mmbe ai bammóeli nde a nsɔlɔ a áma aki basumbila bɔɛmbɔ n'endu a Mokonga. Nenongodei domi, yɔnga ndɔ bhulibhu a nde masa antata a moo a bato nde ba ɛbɔti nde.
52 Boanya anga anu bagolisi a Maanɔ! Nga bɔsɔmɛi anga bato mpume nde bangilia au a úbha la Mokonga. Benu bamɛnɛ nnda bongi beli. Na bande bakaba ngia la be aba bɔɔkɔmisa.»