Yesu a nde Mokama la Sabato
6
A esa imoti la Sabato, Yesu na bagoli nde baɛ aba banyɛna a tio a nganɔ. Bagoli nde baɛ aba bakɔlɔa adha mbùa-li, aba bakpɔta na njaga abɔ aba baléa yu. 2 BaFalisayo batɔɔ aba baulisa bate: «Anga éma sina yɛu bɔkɔla éma nde bakalelisi esa la Sabato?» 3 Yesu ab'aesisila ate: «Bɔsɔmi-mbɛ mɛnɔ inde Daudi na badhaɛ ai bakɔli mbènɔ nde ai baku nee na nnja? 4 Ai angi a endu a Mokonga, ab'abɛsa mokate nde ai babhísi mosá la Mokonga ab'aléa na pa la badhaɛ. Mokate ndɔ a nde inde bato-li bɔbhu nnd'aanga baléa, masa baɛlɛli ibɔ nganga» 5 Mpa, Yesu ab'agɔbɛla yɔnga ndaɛ ate: «Muna-Nto a nde Mokama la Sabato.»Yesu anamisi nto nde njaga aɛ aye mɛnɔ aku
6 Ai esa atɔɔ la Sabato, Yesu ab'angia asuba endu a sinagogi ab'agolisa. Nto moti ai weli, njaga aɛ nd'akpɛ n'aye mɛnɔ aku. 7 Iwa, baFalisayo na bagolisi a Maanɔ aba banengelela Yesu kpɛɛ nga baúbhɛ mbénɔ aang'anamisa nto a esa la Sabato, nga babɛ go na yɔnga nde batula anga aɛ.
8 Mpa, nga Yesu ai aúbhi maakɔ abɔ, ab'anngodea nto a ɛdɔtu la njaga ndɔ ate: «Mɛ to! Na obhiɛ a meeme a bato ani.» Ab'aemesia, ab'ama mosá labɔ. 9 Mpa Yesu ab'aengodea ate: «Nenoulisi bende: Éma sina yɛu Maanɔ ndasu asosii kɔla-li a esa la Sabato? Kɔla la éma anja aɔ éma ajede? Lamisa la nto aɔ kusisa laɛ?» 10 Ab'aelenga bato bɔbhu nde ai bantimbi, ab'anngodea n'dɔtu ndɔ ate: «Okakiɛ njaga aɔ.» Ab'akakia njaga aɛ, ab'alama. 11 Mpa, baomi ndɔ aba basunula kpɛɛ na yɔngisana a nkunguanabɔ a inde aanga bankɔlɛla Yesu.
Sɔmbɔla la batetei mɔkɔ na babale
12 A esa ndɔ, Yesu ab'aga antata a mamba, ga mɛma la Mokonga. 13 A sa la máni, ab'aekoga bagoli nde baɛ na ab'aebɛsa au mɔkɔ na babale a meeme abɔ, na koga labɔ ate batetei: 14 Simoni, mmbe ansɔ̀i ina la Pɛtɛlɔ, Andeleya mɔtɔ aɛ, Yakɔbɔ, Yɔani, Filipɔ, Batɛlɛmayɔ, 15 Matayo, Tɔmasi, Yakɔbɔ muna-Alifayo, Simoni mmbe ai bankoga bate Jɛlɔtɛ, 16 Yuda muna-Yakɔbɔ na Yuda Sikaliɔta mmbe ai ag'amobisa Yesu.
Yesu agolisaga na lamisa la bajegi
17 Ab'adhidha n'ibɔ na ab'ama antata mpenga. A mpua ndɔ ab'aedhonda mɔlɔndɔ a bagoli nde baɛ na bato bati nde ai batoi a lɛɛngɔ bhulibhu nda Yudɛa, na Yɛlusalɛma na mpiti a Tilɔ na Sidɔni. 18 Ai babhii bamɔkanea na kaba la bolamisi a jega ndabɔ. Bande ai batetemani na baketi bajede ai balami. 19 Na mɔlɔndɔ la bato bɔbhu ai bakaba bhɛdia laɛ, nga ekanda la bolamisi ai atoa anga aɛ n'aelamisa bɔbhu.
Bujɛmɛ na boanya
20 Mpa, ab'amaa iso aɛ antata bagoli nde baɛ, ab'ayɔnga ate:
«Bujɛmɛ anga benu bato a buyɛnɛ
nga, Ɛbɔamɛ nda Mokonga a nde inda anu!
21 Bujɛmɛ anga benu nde bokua nnja a mbènɔ nde,
nga bokuta mande!
Bujɛmɛ anga benu nde bogama a mbènɔ nde,
nga bɔtɛbha mande!
22 Bujɛmɛ anga benu, n'aye mande bato banoya, n'aye banobea, n'aye banobhoma, na kɔma la inanu bía njomoɛ, a yɔnga la Muna-Nto.
23 Bojangɛ esa ndɔ na bobɛ a bujɛmɛ mati,
nga elèɔ ndanu a masii na kobha.
Nga, ìbo yɛu ai baɛkɔla baúbhilili.»
24 Mpa boanya anga anu bato a lua!
Nga, aye bopati bujɛmɛ la inda anu.
25 «Boanya anga benu nde bokuti a mbènɔ nde,
nga bokua mande go nnja.
Boanya anga benu nde bɔtɛbha a mbènɔ nde,
nga boba mande asuba kukua na asuba ngamɔ.
26 Boanya anga benu n'aye bato-li bɔbhu banobhebha,
nga ìbo yɛu babhabɔ ai bakɔlana anga baúbhilili a mbea.»
Konda la banjiu
27 Mpa nenongodei, anga benu nde bɔmɔɔka: Bookondɛ banjiu anu, bɔkɔlɛ bonja anga bande banoye. 28 Bogesɛ ntutu anga bande banojoma, bɔɔmɛmɛlɛ anga Mokonga bande banɔyɔngɛla mbea. 29 N'aye nto aɔbɛti a etama la mmbe moti, ommòɛ go mmbe matɔɔ. N'aye nto aouti kɔti ndaɔ onkalelisa-i bɛsa la simisi ndaɔ go. 30 Ompɛ kela nto nde aɔmɛmi, na mmbe aouti éma ndaɔ ɔchɔchɔka-i ote aosisilɛ iyu. 31 Inde okabi ote bato baɔkɔlɛlɛ, na owɛ ɔɔkɔlɛlɛ ìbo. 32 Nabana bookondi bande banokondi, bonja sina a iwa? Nga bato a ilɔlɔ na ibɔ baekondi bande baekondi. 33 Mpa boba na ebhebhɔ sina n'aye bɔkɔla anja masa anga bande aki banɔkɔlɛla anja? Bakɔli ilɔlɔ na ibɔ aki bakɔla ìbo. 34 Ago, n'aye bɔɔbɔka masa bande boúbha bende balèa, ebhebhɔ sina yɛu aanga bɔɔna? Nɛngɛbɛ bato a ilɔlɔ aki baɛbɔka bato a ilɔlɔ badhabɔ, nga baelèɛ ntondɔ nde ai baɛbɔki. 35 Mpa go, bookondɛ banjiu anu, bɔkɔlɛ anja na bɔka makanga bondela la lèa lanu. Iwa yɛu ebhebhɔ ndanu aba mande ati, na boba mande bana-Mokonga Mmbe maa n'egoo kpɛɛ. Nga, iyɛ a manja anga bande bajede na anga bande nnd'aki basima.
Ngomi a bande batɔɔ
36 Bobɛ na ngomi, bía Abhanu nde a na ngomi. 37 Boba-i basɔ̀i-yɔnga nga na benu banɔsɔ̀a-i, bongusila-i nto yɔnga, nga benu banogusila-i, bɔɔgɛgiɛ bande batɔɔ na benu banogɛgia mande. 38 Bogabhɛ na benu banogabhea mande, batumisa mande njombi ndanu bhulibhu! Basɔ́a mande na kidisa-li a nsenge ab'aduanaga. Nga éma nde oogabhea au bato, a masa a indɔ yɛu baogabhea au.
39 Yesu ab'aemaela go bagoli nde baɛ maibhe imoti ate: «Timetime aang'antambisa timetime dhaɛ? Bɔbhu babale labɔ nnd'aanga bagua asuba kubhu? 40 Ngolì nnd'annyɛni ngolisi nde maɛ, mpa go ngolì n'aye agoli hɛlɛ aba mande bía ngolisi nde maɛ. 41 Anga iboni yɛu og'olenga nde nyia-nkala nde a a iso a dhaɔ, mpa na nnd'okanisa gbutu a mee nde a a iso aɔ? 42 Iboni yɛu aanga onngodea aya laɔ ote: ‹Aya, obondelɛ netosɛ nyia-nkala nde a a iso aɔ.›» Owɛ nde nnd'ɔɔna gbutu a mee nde a a iso aɔ? Nto a ebhetebhete sa! Otosɛ mbɛɛ gbutu a mee nde a a iso aɔ mpa yɛu ɔɔna hɛlɛ a tosa la nyia-nkala nde a a iso a aya laɔ.
Ngolì manja
43 Nnd'a we mee anja nde abɔta maya ajede, na nnd'a we mee ajede nde abɔta maya anja. 44 A nde gea-la-bende mee-li bhulibhu aúbhianana nde a maya laɛ. Nnd'aanga bakɔda ebombi a tin'a ekanya. Ago nnd'aki batosa maya la mojabibo a ngenge. 45 Nga, nto manja aki ayɔnga nde yɔnga anja inde atoa asuba éma anja nde aiki a meema aɛ. Nto majede aki ayɔnga nde yɔnga ajede inde atoa a éma ajede nde aiki a meema aɛ. Nga, nyɔɔ aki ayɔnga nde inde atumi a meema a nto.
Kɔla la éma nde Mokama asosii
46 Mpa a nde anga éma sina yɛu bomokoga bote: «Mokama, Mokama!» Na nnda bɔkɔla éma nde nenongodei? 47 Nto nde amobelea, na ɔkanea lami na akɔla éma nde nensosii, nenoangelisa mbénɔ ankengi nde nto sina. 48 Ankengi nde nto nde ahii endu, n'atongi kubhu enda, kida la ɛtɛ. Tuma abhii, muumba a ìbo ab'aɛbɛta na endu-li, nnd'ai atɔisi dengisa-li, anga ai ahii yu hɛlɛ antate a ɛtɛ. 49 Mpa, mmbe amɔɔka, na nnd'akɔla éma nde nensosii, ankengi nde nto nde ahii endu a dodo, makanga ndui. Muumba a ìbo ab'abɛta endu ndɔ, ab'agbɔlɔana a nkobà imoti, na ujuana domi-domi.