Yesu aekogi bagoli nde baɛ nde ba mosá-mosá
5
Esa imoti Yesu n'ame a nkpalɔ a ngɛji nda Gɛnɛjalɛti, na mɔlɔndɔ a bato aba bansɔ́anisa nga baɔkɛ yɔnga la Mokonga. 2 Iwa, Yesu ab'aɔna koko ibale nde a a nkpalɔ a ngɛji-li, na baamɛnɛ-li na batoi au na basosa ntala ndabɔ. 3 Ab'adaa a koko imoti nde ai nde nda Simoni, na ngodea laɛ ate ansɛdisɛ mosá n'ɛdɛ saka na kibha. Ab'aika au na golisa la mɔlɔndɔ a bato ndɔ. 4 Gɔba laɛ yɔnga, ab'anngodea Simoni ate: «Ɔsɛdɛɛ saka áma kibha, na bomaɛ ntala ndanu a koda la basale.» 5 Simoni ab'ansisila ate: «Ngolisi, adhu benobi kiia-li bhulibhu makanga ɔla la éma, mpa nga a nde owɛ yɛu ɔyɔngi, nemaa ntala-li.» 6 A maa-li, aba baekoda dabasale bati kpɛɛ, na ntala ndabɔ ab'akɛngɛtisa boobhòma. 7 Aba baekoga badhabɔ na njaga bende babhiɛ na koko ndabɔ a tabela labɔ. Bhia labɔ, aba batumisa koko ibale-li, n'iyu ab'akɛngɛtisa ndia. 8 A ɔna la indɔ, Simoni Pɛtɛlɔ ab'aluta moo-a-kuu laɛ mosá la Yesu ab'anngodea ate: «Mokama, otoɛ a mpiti ami, nga ne nde nto a ilɔlɔ.» 9 Bɔɔ ab'andhunga, iyɛ na bande ai ba na yɛ, a ɔna la basale nde ai baekodi. 10 Yakɔbɔ na Yɔani, bana-Jɛbɛdayɔ, badhaɛ na Simoni, na ibɔ aba bakua bɔɔ. Yesu ab'angodea Simoni ate: «Otea-i, toa la ndiende ob'ookoda nde bato.» 11 Aba basisa koko ndabɔ na nkpalɔ, aba badoa bhulibhu aba bam'baemea Yesu.Yesu anamisi nto a kebukebu
12 Mbènɔ nde Yesu ai a bɔma imoti nda lɛɛngɔ a Galilaya, moo moti nde atumi na kebukebu ai be. Ɔna la Yesu, ab'agɔtɔma mosá laɛ ab'ammɛma ate: «Mokama, n'aye okondi, oong'omolamisa nga netakatɛ.» 13 Yesu ab'akakia njaga aɛ, ab'ambhɛdia na ngodea laɛ ate: «Nekondi, olamɛ.» A mbènɔ ndɔ kebukebu-li ab'atoa anga aɛ. 14 Mpa, Yesu ab'anngodea ate: «Ɔntɔmila-i mɛnɔ nto. Ogɛ oeangelisɛ mosá la mɔɛlɛli na ogabhɛ bɔɛmbɔ sinde Mósa ai anososii nee nga indɔ aúbhiananɛ anga bato bɔbhu.» 15 Mbinɔ a Yesu ab'aga kpɛɛ. Mɔlɔndɔ a bato bati bai batulani a ɔkanea laɛ na kaba la bolamisi a jega ndabɔ. 16 Mpa iyɛ ai aga na ngalagɛ ga mɛma.
Lamisa la n'dɔtu
17 Esa imoti Yesu ai agolisa, baFalisayo na bagolisi a Maanɔ na baiki a mpua ndɔ. Ai batoi a nji bhuu inda Galilaya, inda Yudɛa na inda Yɛlusalɛma. Ekanda la Mokama ai anga aɛ a lamisa la bajegi. 18 Iwa, bato aba babhia na bankumbi n'dɔtu a kipoi. Aba bakaba ngisa laɛ asuba endu na bhísa laɛ mosá la Yesu. 19 Mpa ɔna la sinde nnd'ai be li áma a nyɛnisa laɛ nga boti la bato, aba ban'daisa a guamuujɔ na dhidhisa laɛ na a eka a meeme a bato na mosá la Yesu. 20 Yesu n'iyɛ, ɔna la sinde boosobela labɔ ai anga aɛ, ab'anngodea nto ndɔ ate: «Nelilii ilɔlɔ ndaɔ.» 21 Bagolisi a Maanɔ na baFalisayo aba baaka na yɔnga la bate: «A nde nto sina mmbe ambhoma Mokonga bende? Màni yɛu aang'alilia ilɔlɔ, na nndaga masa Mokonga iyɛ nganga?» 22 Yesu ab'aúbha maakɔ abɔ, ab'aengodea ate: «Anga ee yɛu boaka ìbo a meema anu? 23 Ee yɛu a awɛdɛ yɔnga la bende: ‹Nelilii ilɔlɔ ndaɔ›, aɔ yɔnga la bende: ‹Omɛ na otambɛ!›? 24 Mpa, nekondi nte boúbhɛ bende, Muna-Nto, a na ekanda la lilia la ilɔlɔ na lɛɛngɔ oni.» Ab'anngodea n'dɔtu ndɔ ate: «Omɛ! Ɔbɛsɛ eka ndaɔ na osianɛ nɔngɔ aɔ!» 25 Mbènɔ ndɔ, ab'ama mosá labɔ wa, ab'abɛsa eka nde ai ale antate ndɔ na ab'asiana nɔngɔ aɛ n'ambhebha Mokonga. 26 Ab'aebangisa bato-li bɔbhu na aba bambhebha Mokonga, bɔɔ n'aedhungi aba bayɔnga bate: «A! Bɛɔni ndiende éma nde nnd'aki aɔnɛanaga.»
Yesu ankogi Lawi
27 Mbusa indɔ, Yesu ab'atoa wa, ab'amɔna nèisi moti nde ma manjànjà ina aɛ n'a nde Lawi n'aiki a ntua ndaɛ nda lèisa la manjànjà. Yesu ab'anngodea ate: «Omobeleɛ.» 28 Lawi ab'ama, ab'adoa bhulibhu a belea la Yesu. 29 Mbusa indɔ, Lawi ab'akɔla a Yesu dinyɛ mati nɔngɔ aɛ. Bande aki balèisa manjànjà na bato batɔɔ ai baléa áma imoti n'ibɔ. 30 BaFalisayo na bagolisi a Maanɔ aba bayɔnganaga anga bagoli nde ba Yesu bate: «Anga éma sina yɛu boléa na noa áma imoti na bande balèisa manjànjà na bato a ilɔlɔ?» 31 Eme sunga na Yesu ate: «Nndag'a nde bato nde bakandigi yɛu ba na sei a bolamisi, mpa go a nde bajegi yɛu. 32 Nnda nebhii nde a koga la bato a domi, mpa anga bato a ilɔlɔ nga batiɛ maakɔ abɔ.»
Ulisa a yɔnga la mɛma makanga léa
33 BaFalisayo aba bamulisa Yesu bate: «Bagoli nde ba Yɔani na bande basu bammɛma Mokonga makanga léa nkobà ati. Mpa, anga éma sina bande baɔ aki baléa na noa?» 34 Yesu ab'aesisila ate: «Bande baekogi a dinyɛ la ehali nnd'aanga baesosia ika la makanga léa, na nhali n'a n'ibɔ. 35 Mpa, aweli esa nde abhia nhali ndɔ alɛ atoa nee a meeme abɔ. Iwa, nnd'alɛ baléa esa ndɔ.»
36 Yesu ab'amaa abɔ go maibhe nde ate: «Nnd'a be nto nde aang'anyɔa tabhu a ngɔmbɛ nd'anja a gesa-li a ngɔmbɛ nde aku. N'aye bɔkɔli ìbo, kesi aujisa ngɔmbɛ nd'anja na nnd'aanga basɔlɔmisa ngɔmbɛ anja na inde ay'anuni.» 37 Nto nnd'aanga gesa divai nda mbènɔ-mbènɔ suba ntɛga nde aloi. Agɛ ye au, kesi divai abhoma ntɛga-li na divai-li ab'aduana, na ntɛga ndɔ ab'abunga go bosa. 38 Mpa, a anja gesa la divai nda mbènɔ-mbènɔ suba ntɛga nda mbènɔ-mbènɔ. 39 «Nnd'a be nto nde aang'akonda noa la divai nda mbènɔ-mbènɔ n'ai n'aye anu adha divai nda kala. Nga aki bayɔnga bate, divai nda kala a anja.»