Sitani akengei lɛ̀nga la Yesu
4
Mbusa indɔ Yesu ab'atoa na Yɔlɔdani, n'atumi na Meema Mabhu. Meema ndɔ ab'anga nee na ngalagɛ. 2 Iyo, Sitani ab'akengea dhema laɛ, esa ekomi-ini. Mpa, a esa ndɔ bhulibhu, Yesu nnd'ai ali éma. Mbusa indɔ, ab'akua nnja. 3 Sitani ab'anngodea ate: «Nabana o nde Muna-Mokonga domi, sosiɛ to ɛtɛ nde abɛ mokate.» 4 Eme sunga na Yesu ate: «Baandeki asuba ketabo nda Mokonga bende, nto nnd'aanga alenda masa a léa la elea.»5 Sitani aba an'daisa antata mamba. A nkobà imoti, ab'amɔngia ɛbɔamɛ bhulibhu nda na lɛɛngɔ. 6 Ab'anngodea ate: «Neopa mande ɛbɔamɛ na boumua nde bhulibhu. Nga, indɔ bhulibhu bamopi. Nto nde nenkondi yɛu n'eme nemmòa. 7 Mpa, nabana oluti moo-a-kuu laɔ mosá lami bhulibhu ab'aja indaɔ.» 8 Yesu ab'ansisila ate: «Ketabo nda Mokonga ayɔngi bende: ‹Ontukumisɛ Mokama nde maɔ Mokonga. Ɔkɔlɛ indɔ masa anga iyɛ nganga.›»
9 Sitani ab'anga nee go naa Yɛlusalɛma, aba an'daisa áma nde asengedi kpɛɛ antate a endu a Mokonga. Ab'anngodea ate: «Nabana o nde Muna-Mokonga domi, oomaɛ to na dodo. 10 Nga, baandeki bende: ‹Aesosia mande bamalaeka nde baɛ nga baolangɛ.› 11 Ab'ayɔnga go ate: ‹Baokumba mande a njaga abɔ tea la bende otukala-i a ɛtɛ.›» 12 Yesu ab'ansisila ate: «Ketabo nda Mokonga ayɔngi bende, ‹Okengea-i mɛnɔ dhema la Mokama, Mokonga nde maɔ.›»
13 N'aye agɔbi kengea la dhema la Yesu a asii-li bhulibhu, Sitani aba an'doa, ab'aga a bondea la esa atɔɔ.
Yesu akɛngɛtisi kɔla la mobili ndaɛ naa Galilaya
14 Yesu ab'asiana naa Galilaya, n'atumi n'ekanda a Meema Mabhu. Na mbinɔ aɛ ab'agɔba lɛɛngɔ ndɔ bhulibhu. 15 Ai agolisa a endu a sinagogi ndabɔ na bɔbhu ai bambhebha.
Bankɔmi Yesu naa Najalɛti
16 Mbusa indɔ, ab'aga naa Najalɛti áma nde ai bamɔtisili. Esa la Sabato, ab'angia asuba endu a sinagogi sinde ai akɔlaga nee. Mpa, ab'ama a sɔma. 17 Aba bammòa ketabo nda Isaya múbhilili. Ab'aukua yu, ab'adhonda áma nde baandeki bende,
18 «Meema a Mokama a antate ami,
amɔsɔmbɔli a tɔmilaga la bato a buyɛnɛ Mbinɔ Anja.
Amotei ga labhela la bato a ngolí esa la kodaga labɔ
na ukua la iso a batimetime,
na kodaga la bande baɛbhɔni,
19 na labha la bende elemɔ a ngɛbɛ nda Mokama akidi.»
20 Mbusa iwa, ab'aluta ketabo ndɔ, ab'ansisila nkɔbɛ nde ma sinagogi, ab'aika wa a golisa labɔ. Bato bɔbhu aba bantumia iso. 21 Mpa Yesu, ab'akɛngɛtisa ngodea labɔ bende: «Ndiende, yɔnga nda moandekɔ nde botoa a ɔka-li ndɔ aɔnɛani mpa.» 22 Yɔnga laɛ ab'aɛbɔngɛla bato bɔbhu nde ai bamɔkanea nga, yɔnga la ngɛbɛ nde ai atoa a nyɔɔ aɛ. Aba baulisanaga bate: «Mmbe nde muna-Yɔjɛfu, nndaga bo?»
23 Mpa Yesu ab'aesisila ate: «Domi, bomongodea maibhe nde, ‹Monganga, oolamisɛ owɛ amɛnɛ. Ɔkɔlɛ to ani éma nde ai bɛɔki bende oi ɔkɔli naa Kapɛlɛnaumu nga, iani a nde nji aɔ.›» 24 Ab'ayɔnga go ate: «Nenongodei domi bende: A nde bo, nnda na múbhilili nde bampikili hɛlɛ suba nji aɛ.
25 Domi, a elemɔ nda Elia, bamekusa bai bati naa Isilaɛli. Mbúa nnd'ai alɔa a elemɔ isalɔ na mɔsɛla motoba. Nja mati ab'agua a lɛɛngɔ ndɔ bhulibhu. 26 Nnda angala abɔ mmbe Mokonga ai antei Elia nɔngɔ aɛ, masa nɔngɔ a amekusa nde maa Salɛpata asuba lɛɛngɔ a Sidɔni. 27 A elemɔ nda múbhilili Elisa, bato a kebukebu bai bati naa Isilaɛli. Nnd'ai angala abɔ mmbe ai alami, na nnda masa Namani nto nde maa lɛɛngɔ a Sulia.»
28 Ɔka la ìbo, bɔbhu aba baetana asuba endu a sinagogi-li. 29 Aba bama, aba bam'bea Yesu dhɔlɔ a bɔma-li, na talisa laɛ antate a mamba nde bahìi au bɔma ndɔ, nga ban'dɔisɛ a láma. 30 Mpa iyɛ ab'aesodoa, ab'aga aɛ.
Yesu aebèi baketi anga nto naa Kapɛlɛnaumu
31 Mpa, Yesu ab'adhidhila a bɔma imoti nda Galilaya inde bakoga bate Kapɛlɛnaumu. Ai aegolisaga bato a esa la Sabato. 32 Ab'aebangisa bato kpɛɛ nga ai aegolisa n'ekanda ati. 33 Mpa, nto moti ai asuba endu a sinagogi ndɔ n'a na baketi. Ab'akala kpɛɛ ate: 34 «A! Yesu nde maa Najalɛti okaba nde éma sina anga asu? Obhii nde a tindisa lasu? Neoúbha nde hɛlɛ. Owɛ o nde Mbhumani nde ma Mokonga.» 35 Yesu ab'ankalea ate: «Odhaɛ, na otoɛ anga nto nde!» Mpa, baketi aba bantena nto ndɔ na dodo a meeme a bato-li bɔbhu. Nketi ndɔ ab'atoa anga aɛ makanga botisa laɛ. 36 Bato-li bɔbhu ab'aebangisa, aba baulisanaga a nsɔlɔ abɔ bate: «Yɔnga sina nde? Nto nde a na ekanda anga baketi na ibɔ banebeela, na batoa?» 37 Na mbinɔ a Yesu ab'agɔba lɛɛngɔ ndɔ bhulibhu.
Yesu aelamisi bajegi bati
38 Yesu toa la asuba a endu a sinagogi ndɔ, ab'aga nɔngɔ a Simoni. Ama-nka-Simoni n'akpɔkpɔma na nsesia akpɛ. Aba bangamelaga Yesu nga akɔlɛ éma anga aɛ. 39 Mpa Yesu ab'agɔtɔma anga aɛ, ab'akalea kpɛɛ nsesia ndɔ, n'iyu ab'asia, n'iyɛ ab'alama. Emá ndɔ ab'aɔmbana abɔ.
40 A lia la máni, bato bɔbhu bande bai ba na bajegi ntuantua aba baebhia nee nɔngɔ a Yesu. N'iyɛ, ab'agesa njaga aɛ anga abɔ moti-moti, na lamisa labɔ. 41 Baketi aba batoa anga bato bati na batata bate: «O nde Muna-Mokonga!» Mpa, Yesu ab'akala anga abɔ kpɛɛ, n'aekalelisa yɔnga, nga ai baúbha bende a nde Kilisitɔ.
Yesu alabha Mbinɔ Anja naa Yudɛa
42 A sa la máni, Yesu ab'atoa Kapɛlɛnaumu ab'aga na ngalagɛ. Bato bati aba bankabaga. Mbènɔ nde bamɔni nee, aba bakaba bombaga laɛ nga atoa-i nɔngɔ abɔ. 43 Mpa Yesu ab'aengodea ate: «Atɔlɛli negɛ nelabhɛ Mbinɔ Anja l'ɛbɔamɛ nda Mokonga a bɔma l'inda atɔɔ. Nga, a nde a yɔnga la indɔ yɛu amotei.» 44 N'iyɛ ai alabha asuba a endu a sinagogi nda Yudɛa.