Bolabhɛ nda Yɔani-Ndiisi
3
A elemɔ la inda mɔkɔ na itanɔ a ɛbɔamɛ nda mɔamɛ mati Tibɛliɔ Kaisali, Yudɛa n'a asuba a bokama nda Pɔntiɔ Pilatɔ. Galilaya n'a asuba a ɛbɔamɛ nda Ɛlɔdɛ. Itulɛa na Talakoniti ai asuba a bokama nda Filipɔ, muna-abhaɛ na Ɛlɔdɛ. Abilɛnɛ n'iyu ai asuba a bokama nda Lisania. 2 Anasi na Kayafa bai baomi nde ba baɛlɛli. A elemɔ ndɔ, yɔnga la Mokonga ab'ankidia Yɔani muna-Jakalia a ngalagɛ. 3 Mpa, Yɔani ab'atambaga a nji bhulibhu nda mpiti-mpiti a Yɔlɔdani n'alabha bende: «Botiɛ tambela lanu ajede, boondiisisɛ, nga Mokonga aliliɛ ilɔlɔ ndanu.» 4 Ibende yɛu aóbeli yɔnga nde múbhilili Isaya ai mɛnɔ aandeki ate,«Nɛɔki nto moti n'akoga na ngalagɛ ate,
Bɔkɔkɔtiɛ ahe nda Mokama!
Bokakiɛ aɛ banyia-asii anja!
5 Bɔduiɛgɛi mpɔnɔ-li bhulibhu.
Bɔsɛ̀ngɛɛgɛ mamba na banyia batalia-talia-li bhulibhu.
Bokakiɛi hɛlɛ áma nde aeluti!
Bodegɛgɛi áma nde a na kubhu-kubhu.
6 Na bato-li bɔbhu baɔna mande bía nde Mokonga alamisa nee.»
7 Mpa, mɔlɔndɔ a bato ai babhia nɔngɔ a Yɔani a nkabɔ a ndiisa labɔ. N'iyɛ ai aengodea ate: Ɛbɔti a banjoa nde sa! Màni yɛu anoani tatea la boetani nda Mokonga inde abhia mande? 8 Mpa, bɔkɔlɛ éma anja inde aɔngiana bende aye botii tambela lanu ajede. Bɔkɛngɛtisa-i ngodeana angala anu bote: «Tata asu a nde Abolaimu. Nga, nenongodei bende, Mokonga a n'ekanda la tia l'ɛtɛ nde abɛ ɛbɔti nda Abolaimu. 9 Aye babhísi eloa a tine a mee. Mee bhuu nde nnd'abɔti mbùa anja bangɔta mande na maa laɛ a nsa.» 10 Mɔlɔndɔ a bato aba bamulisa bate: «Mpa, bɛkɔlɛ boni?» 11 Eme sunga na Yɔani ate: «Nabana nto a na ngɔmbɛ ibale ammòɛ mmbe nnd'a na adh'au. Na mmbe a na elea akɔlɛ bo.» 12 Balèisi a manjànjà n'ibɔ, aba babhia nɔngɔ aɛ nga aendiisɛ. Aba banngodea Yɔani bate: «Ngolisi, bɛkɔlɛ nde éma sina?» 13 Yɔani ab'aesisila ate: «Boolèisa-i bato ntondɔ ati nyɛna la inde banososii lèisa-li.» 14 Basoda n'ibɔ aba bamulisa bate: «Mpa besu, bɛkɔlɛ ee?» Ab'aesisila bandɔ ate: «Boula-i ntondɔ nda nto na bonkumbisa-i yɔnga la mbea. Bojangeɛ ntondɔ nde aki banolèa.»
15 Mpa bato bɔbhu bande ai babondelaga éma nde abhia mande, na baeulisa a meema abɔ a yɔnga la Yɔani: «Mbénɔ nto nde a nde Kilisitɔ?» 16 Yɔani ab'aesisila bato ndɔ bɔbhu ate: «Eme nenondiisa namɔ nde a íbo. Nto moti abhia mbusa ami n'amɔnyɛni n'ekanda. Na nnda nɛtɔlɛli koda la ngolí a belatɔ ndaɛ. Iyɛ ndaɛ anondiisa mande a Meema Mabhu na a nsa. 17 Adhungilili lungɔ a njaga aɛ a pɛcha la nganɔ. Abhísa mande nganɔ a ngundua, mpa tɔnɛ-li asumba mande a nsa nde nnd'alɛ alimia.»
18 Yɔani ai aeana bato éma atɔɔ ati na tɔmila labɔ Mbinɔ Anja nda Mokonga. 19 Mpa, ai n'aye ankaleigi mɔamɛ Ɛlɔdɛ a yɔnga la bende ammɔma Ɛlɔdia, nka-muna-abhaɛ na a yɔnga ajede-jede atɔɔ inde ai akɔli. 20 Antata indɔ, yɛ Ɛlɔdɛ ab'akɔla bujede atɔɔ go, ab'annyangisisa Yɔani.
Ndiisa la Yesu
21 Mbusa a Yɔani ndiisa la bato-li bɔbhu, ab'andiisa na Yesu. Mbènɔ nde Yesu ai amɛma nee, kobha ab'aeukua, 22 na Meema Mabhu ab'asima antata aɛ n'a nde bía eyenga. Moyo ab'atoa na kobha na ayɔnga bende: «O nde nami, mmbe nenkondi. Nejangi kpɛɛ anga aɔ.»
Tɔlɔngɛnɛ nda Yesu
23 Yesu ai n'elemɔ bía ekomi isalɔ a mbènɔ nde akɛngɛtisi nee nkási ndaɛ. Bato ai baaka bende a nde muna-Yɔjɛfu, muna-Hɛli, 24 muna-Matata, muna-Lawi, muna-Mɛlɛki, muna-Yana, muna-Yɔjɛfu, 25 muna-Matatiasi, muna-Amɔsi, muna-Nahumu, muna-Esili, muna-Nagai, 26 muna-Maati, muna-Matatiasi, muna-Sɛmɛi, muna-Yɔsɛki, muna-Yoda, 27 muna-Yɔanani, muna-Lesa, muna-Jɔlɔbabɛli, muna-Salatiɛlɛ, muna-Neli, 28 muna-Mɛlɛki, muna-Adi, muna-Kɔsamu, muna-Elimadamu, muna-Eli, 29 muna-Yesu, muna-Eliɛjɛli, muna-Yɔlimu, muna-Matata, muna-Lawi, 30 muna-Simɛɔ, muna-Yuda, muna-Yɔjɛfu, muna-Yɔnamu, muna-Eliakimu, 31 muna-Mɛlɛa, muna-Mɛna, muna-Matata, muna-Natani, muna-Daudi, 32 muna-Yɛsɛ, muna-Ɔbɛdi, muna-Boaji, muna-Sala, muna-Nasoni, 33 muna-Aminadabu, muna-Adimini, muna-Alani, muna-Ɛsilɔni, muna-Pɛlɛsi, muna-Yuda, 34 muna-Yakɔbɔ, muna-Isaka, muna-Abolaimu, muna-Tɛla, muna-Naɔli, 35 muna-Sɛluki, muna-Lɛu, muna-Pɛlɛki, muna-Ɛbɛli, muna-Sɛla, 36 muna-Kainamu, muna-Alapakisadi, muna-Sɛmu, muna-Nɔa, muna-Lamɛkɛ, 37 muna-Matusɛlɛ, muna-Ɛnɔka, muna-Yalɛdi, muna-Malalɛli, muna-Kainamu, 38 muna-Ɛnɔsi, muna-Sɛti, muna-Adamu, muna-Mokonga.