Bɔtɛana la Yesu
2
A elemɔ ndɔ, mɔamɛ mati mmbe ma baLɔma, Kaisali Ogisitɔa, ab'asosia bende baeandekɛ bato bɔbhu bande ba a nji bhulibhu inde a asuba a ɛbɔamɛ ndaɛ. 2 Andeka nda mosá-mosá nde ai akɔlɛkani nde a mbènɔ nde Kiliniɔ ai mokama nde maa nji bhulibhu nda Sulia. 3 Bɔbhu ai baga baeandekisa, kela nto a nji aɛ nda bɔtɛana.4 Yɔjɛfu n'iyɛ ab'atoa Najalɛti a lɛɛngɔ a Galilaya ga laɛ naa Yudɛa, a nji a mɔamɛ Daudi inde bakoga bate Bɛtɛlɛɛmu. Nga, Yɔjɛfu ai nde nto nde maa endu na a ɛbɔtɛana nda Daudi ndɔ. 5 Ab'aga aandekisa ina aɛ na inda Malia nkɔta nde maɛ, n'a na leme. 6 N'aha ba Bɛtɛlɛɛmu, mbènɔ a bɔta la Malia ab'akida, 7 aba am'bɔta muluana, ngula nde maɛ. Aba am'bombaga na ngɔmbɛ, ab'analisa asuba a etubab, nga nnda bai na mpuɔ asuba a endu a batambi.
Malaeka aeóbeli balangi a banyama
8 A lɛɛngɔ ndɔ, bai weli balangi a bamboli bande ai baika na tio, na balanga etuge ndabɔ kiia áma a lisia labɔ. 9 Mpa, malaeka nde ma Mokama ab'ama mosá labɔ! Njenja la boumu nda Mokama ab'aetimbilaga. Bɔɔ mati ab'aebaa.
10 Mpa, malaeka ab'aengodea ate: «Botea-i, nga nebhii nɛnɔtɔmila mbinɔ anja inde abhìsa mande bujɛmɛ mati anga bato nde banu bɔbhu. 11 Ndiende, namisi abɔtɛani anu a bɔma nda Daudi. Iyɛ a nde Kilisitɔ Mokama. 12 Ibende yɛu bomubhilila mande: Bondhonda mbɛnjɛ na bam'bombigi na ngɔmbɛ, na banalisi asuba a etuba.» 13 Dia ndɔ, da-batayo la bamalaeka toa la na kobha aba bandhonda malaeka dhabɔ na bambhebha Mokonga bate:
14 «Boumu anga Mokonga, mmbe a n'egoo kpɛɛ!
Bɔkɔlɔ angala a bato nde ba na ngɛbɛ aɛ na dodo oni!»
15 Mbusa indɔ bamalaeka aba basiana na kobha. Mpa, balangi nde aba bangodeana bate: «Begɛi naa Bɛtɛlɛɛmu, begɛ bɛɔnɛ adha éma nde aóbeli we, inde Mokama asɔɔngii.» 16 Mpa, aba bakamanaga we, aba bandhonda Malia bona Yɔjɛfu na banalisi mbɛnjɛ-li asuba a etuba. 17 Mbènɔ nde bamɔni nee na nii-li, aba batɔmia inde malaeka ai aengodei a yɔnga la mbɛnjɛ nde. 18 Bato bɔbhu bande ai baɔki yɔnga nde ab'aebangisa a inde balangi nde ai batɔmia. 19 Malia iyɛ ai abhísa yɔnga ndɔ bhulibhu a meema aɛ na aniliac. 20 Mpa, balangi a banyama aba basiana na bambhebha na tukumisa la Mokonga a yɔnga nde ai baɔki na ɔna-li. Nga, bhulibhu ai aɔnɛani sinde malaeka ai aengodei nee.
Sɔ̀a la Yesu ina
21 Esa la inda lalɔ mbusa a bɔtɛana laɛ, ab'agua ganja. Aba bansɔ̀a ina la Yesu, bía nde malaeka ai ayɔngi nee, mosá la kumba la leme aɛ.
Bhia la na Yesu nɔngɔ a Mokonga
22 A kida la kia nde Malia na Yɔjɛfu bagee áma tosa la boaliad anga abɔ, sinde Maanɔ nda Mósa ayɔngi nee, aba banga na nii-li Yɛlusalɛma ga ɔngiae laɛ anga Mokama. 23 Nga, a nde bía nde baandeki a Maanɔ nda Mokama: «Kela ngula la muluana bangabhɛ anga Mokama.» 24 Na gabha la bɔɛmbɔ sinde Maanɔ nda Mokama asosii nee: «Boogabhɛ baetiti babale, aɔ go baeyenga babale.»
Simɛɔni ambhebhi Mokonga a yɔnga la Yesu
25 Mpa, nto moti ai a nji nda Yɛlusalɛma, mmbe ai bankoga bate Simɛɔni. Nto ndɔ ai nde nto a domi na mmbe antea Mokonga. Ai n'abondeli na sei bolamisi a baIsilaɛli. Meema Mabhu ai a mpuɔ imoti n'iyɛ. 26 Meema Mabhu ai anngodei a njei bende, nnd'alɛ akua mosá la ɔna la Kilisitɔ mmbe Mokama antei. 27 Meema Mabhu ab'antea Simɛɔni bende agɛ n'endu a Mokonga. Iwa, babɔti aba bambhia na nabɔ Yesu a gɔba la yɔnga ndaɛ sinde Maanɔ nda Mósa ayɔngi nee anga aɛ. 28 Simɛɔni ab'ambhɛda nii-li a njaga aɛ, ab'ambhebha Mokonga ate:
29 «Mokama! Mpa, onebeelɛ nkɔbɛ nde maɔ ayombiɛ a bɔkɔlɔ.
Nga, mɔkɔ̀ ndaɔ akidi.
30 Nga iso ami aɔni bolamisi ndaɔ,
31 inde oi ɔbɔngisigi a iso a bato bɔbhu:
32 a nde bende onjenja a angelisa la bande nndaga baYuda,
n'a go nde boumu anga bato nde baɔ, baIsilaɛli.»
33 Ab'am'bangisa abhaɛ na amáɛ ɔka la yɔnga nde Simɛɔni ayɔngi nee anga nii ndɔ. 34 Mpa, Simɛɔni ab'aesulia, ab'anngodea amáɛ Malia ate: «A yɔnga la nii nde, bato bati bagua mande na batɔɔ baemesia mande asuba a Isilaɛli. Abá mande mbunde nde bato bakɔma mande. 35 Indɔ yɛu, maakɔ a bato bati aɔnɛanɛ kilikili. Na anga aɔ Malia, jegeda la yɔnga ndɔ aokia mande a meema bía ngɔa.»
Múbhilili la nke, ina aɛ Ana
36 Ai beli go nke la múbhilili, ina aɛ n'a nde Ana, muna-Fanɔɛlɛ, mmbe maa mbaa nda Asɛli. Ai n'aye amɔti kpɛɛ. Ai baiki na munyaɛ elemɔ sobe-lalɔ mbusa a ɔmana labɔ. 37 Mbusa indɔ, ab'aja amekusa na ai akidisi elemɔ ekomi lalɔ na ini. Nnd'ai abolana asuba a endu a Mokonga, n'abhɛda nkási nda Mokonga kiia n'etonge, na nnd'ai aléa a yɔnga la mɛma la Mokonga. 38 Na mmbe ab'akida a mbènɔ ndɔ, ab'ansima Mokonga. N'iyɛ ab'atɔmia mbinɔ a nii ndɔ anga bato-li bɔbhu bande ai babondela ɔna la sinde Mokonga atosa nee Yɛlusalɛma asuba bɔkɔbɛ. 39 Mbènɔ nde babɔti a Yesu bagɔbi nee kɔla la inde Maanɔ nda Mokama asosii, aba basiana na nji abɔ Najalɛti nda Galilaya. 40 Mpa nii ndɔ ai amɔta, n'akandaga, n'a na bɔɛngɛ ati. Ngɛbɛ a Mokonga ai n'iyɛ.
Yesu asuba a endu a Mokonga
41 A elemɔ-li bhulibhu, babɔti a Yesu ai baga Yɛlusalɛma áma dinyɛ la Pasaka. 42 Mbènɔ nde Yesu ai akidisi nee elemɔ mɔkɔ́ na ibale, aba banga nee Yɛlusalɛma bía nde ai nkani ndabɔ. 43 A sungia la dinyɛ ndɔ, aba basiana. Nii Yesu ab'atiga naa Yɛlusalɛma, abhaɛ bona amáɛ na nnda baúbha. 44 Ai baaka bate Yesu a na badhaɛ nde batamba n'ibɔ. Aba batamba ngbulu a kia imoti, mpa, aba bakɛngɛtisa kabaga laɛ angala a batobabɔ na angala a bato nde ai baúbhana n'ibɔ. 45 Mpa go nnd'ai bamɔni. Anga indɔ, aba basiana go Yɛlusalɛma na bankabaga.
46 Bankabigi ndɔ kia isalɔ, aba bandhonda asuba a endu a Mokonga n'aiki a meeme a bagolisi, n'aɛɔkanea n'aulisanaga n'ibɔ. 47 Na bɔbhu bande ai bamɔkanea, ab'aebangisa ɔna la maɛnɛkɔ aɛ, bía nde ai aesisila nee. 48 Mpa, babɔti aɛ ɔna laɛ, ab'aebangisa kpɛɛ! Amáɛ ab'anngodea ate: «Chaa, nami! Anga éma sina yɛu ɔsɔkɔlɛli ìbo? Nga eme n'abhaɔ, amande beokabaga na maamaa.» 49 Ab'aesisila ate: «Anga éma sina yɛu amande bomokabaga? Nnda boúbha bende, aanga neba nde n'endu a Ebha?» 50 Mpa ibɔ nnd'ai baɔka inde ai aengodea.