Mbinɔ Anja sinde
LUKA
ai aandeki nee
Ngia la yɔnga nde asuba a ketabo
1
Mosikɛ Tɔfili,Bato ntuantua bakengei andeka la mbinɔ a inde ai anyɛni angal'asu, 2 sinde ai basɔtɔmili nee bande ai baɔni éma-li bhulibhu na iso abɔ toa la kɛngɛtisa-li na ja la bakɔbɛ nde ba yɔnga ndɔ. 3 Mpa, indɔ yɛu aangisi nangɛbɛ n'eme, mbusa sɔnda la éma-li bhulibhu kilikili, neoandekeɛ Mosikɛ Tɔfili, nga nekabi domi a yɔnga ndɔ bhulibhu toa la kɛngɛtisa-li, 4 nga oúbhɛ bende yɔnga nde ai baogolisi a nde domi.
Leme a enunɔ a Ɛlijabɛti
5 A elemɔ a Ɛlɔdɛ mɔamɛ nde ma baYuda, ai we nto moti mɔɛlɛli ina aɛ n'a nde Jakalia. Mmbe ai nde asuba a boio nda baɛlɛli nde ba Abia. Na nkaɛ ai bankoga bate Ɛlijabɛti, nyike nde maa tɔlɔngɛnɛ nda Aluni. 6 Bɔbhu babale labɔ bai nde bato a domi a iso a Mokonga. Na batamba bía nde Maanɔ nda Mokama ayɔngi nee, na sikisa la éma bhulibhu nde Mokonga ai aesosia kanga ndɛlɛndɛlɛ. 7 Mpa, na ibɔ bai makanga nii, anga Ɛlijabɛti ai nde ngomba, na babale labɔ ai n'aye banuni.
8 Kia imoti, Jakalia ai abhɛda nkási ndaɛ nda bɔɛlɛli mosá la Mokonga. Nga ai nde esa nda boio aɛ a ɛkɔli ndɔ. 9 N'iyɛ yɛu bɔsɔmbɔli ai angulii a esa ndɔ angala a badhaɛ a nkási a sumba la bunjɛla asub'endu a Mokama sinde ai nde nkani nda baɛlɛli. 10 A mbènɔ a sumba la bunjɛla-li, mɔlɔndɔ a bato bati ai baiki na nsɛngɛ na bammɛma Mokonga. 11 Mpa, malaeka nde ma Mokama ab'amóbela Jakalia, n'ame a njaga la ind'akpɛ áma a sumbila la bunjɛla. 12 A mbènɔ nde Jakalia amɔni nee ab'asaimana na kua la bɔɔ. 13 Mpa, malaeka ndɔ ab'anngodea ate: «Jakalia, otea-i nga Mokonga aye alebei ɛmɛmi ndaɔ. Nkaɔ Ɛlijabɛti am'bɔta mande aɔ nyia-muluana na owɛ ɔnsɔ̀a mande ina la Yɔani. 14 Abhia mande aɔ na bujɛmɛ mati, na bato bati bajanga mande a bɔtɛana laɛ. 15 Nga, abá mande nto a boumu a iso a Mokama. Nnda ab'alɛ anoa divai aɔ mambala makana-li bhulibhu. Atuma mande na Meema Mabhu n'aha asuba a sɔɔ a amáɛ. 16 Aesisa mande baIsilaɛli bati nɔngɔ a Mokama Mokonga nde mabɔ. 17 Ammɛla mande Mokama mosá, n'a na meema na ekanda bía múbhilili Elia, a sisa la bɔkɔlɔ angala a babɔti na baanabɔ, na tia la bande badegi etue ja la bato a bɔɛngɛ na domi. Abhísa mande meema anja asuba a bato a bondea la Mokama nde mabɔ.» 18 Mpa Jakalia ab'amulisa malaeka ndɔ ate: «Éma sina yɛu aangisa na neúbhi bende yɔnga nde akida mande domi? Eme na nkami aye benuni.» 19 Malaeka ab'ansisila ate: «Eme ne nde Gabhiliɛli, aki nema mosá la Mokonga. Iyɛ yɛu amotei bhia tɔmila laɔ mbinɔ anja nde. 20 Nga a nde bo, ootia nkingi, na nnd'aanga aye ɔyɔnga kida la esa nde yɔnga ndɔ akida mande nee. Nga nndaga olebei yɔnga lami inde akida mande a mbènɔ-li.»
21 A mbènɔ ndɔ, bato bɔbhu na ba a bondela la Jakalia na nsɛngɛ, ab'aebangisa ɔna la sinde alɛbhi nee asub'endu a Mokonga. 22 Toa laɛ we, ab'ataloka yɔnga la n'ibɔ. Mpa, aba baúbha gea la bende aɔni esomba asub'endu-li. Ai ayɔnga n'ibɔ masa na njaga, nga ai aetii nkingi.
23 Mbènɔ nde elemɔ a nkási ndaɛ asi nee, ab'asiana nɔngɔ aɛ. 24 Mbusa esa ndɔ, nkaɛ Ɛlijabɛti ab'akumba leme. Nnd'ai aóbaga asub'endu aɛ a mɔsɛla itanɔ. Ab'aɛyɔngɛla ate: 25 «Mpa, bɔɔnɛ éma nde Mokama amɔkɔlɛli a elemɔ nde. Amolengeleli na tosa la angami soni nde ai ne nee angala a bato.»
Malaeka atɔmii mbinɔ a bɔtɛana la Yesu
26 Mbusa a mɔsɛla motoba a leme nda Ɛlijabɛti, Mokonga ab'antea malaeka Gabhiliɛli a bɔma imoti nda Galilaya, inde bakoga bate Najalɛti. 27 Ab'aga nɔngɔ a nyike moti ina aɛ Malia. Malia ai na amúbhi-mbɛ moo, n'iyɛ ai nde nsea mmbe ma nto moti maa ɛbɔtɛana nda mɔamɛ Daudi, ina aɛ Yɔjɛfu. 28 Malaeka ab'angia nɔngɔ a Malia ab'anngodea ate: «Neosesei, ojangɛ, owɛ nde o na ngɛbɛ nda Mokonga, Mokama a a mpuɔ imoti na owɛ.» 29 Yɔnga ndɔ aba am'bangisa Malia kpɛɛ, ab'aeulisa ate: «Sesea nde akaba nde yɔnga la ee?» 30 Mpa malaeka ab'anngodea ate: «Otea-i, Malia, nga o na ngɛbɛ nda Mokonga. 31 Okumba mande leme, ɔm'bɔta mande nyia-muluana na ɔnsɔ̀a mande ina la Yesu. 32 Abá mande na boumu. Bankoga mande bate Muna-Mmbe maa n'egoo kpɛɛ. Mokama Mokonga ammòa mande mbata l'ɛbɔamɛ nda tata aɛ Daudi. 33 Abá mande mɔamɛ a mɛyɔ a endu a baIsilaɛli, na ɛbɔamɛ ndaɛ nnd'abá lɛ na sungia.»
34 Malia ab'amulisa malaeka ate: «Indɔ aang'atɔisana nde boni, nga nnda neeúbha baboo?» 35 Emesunga na malaeka ate: «Meema Mabhu abhia mande antata aɔ na ekanda la Mmbe maa n'egoo kpɛɛ aodegelaga mande na kudu aɛ. Nga indɔ mmbe ɔm'bɔta mande abá mande mbhumani na bankoga mande bate Muna-Mokonga. 36 Ntobaɔ, Ɛlijabɛti, n'iyɛ a na leme a muluana a enunɔ aɛ, na aye a nee a mɔsɛla nda motoba, mmbe ai bankoga bate ngomba. 37 Nga nnd'a be éma nde Mokonga ataloki.» 38 Mpa Malia ab'ayɔnga ate: «Ne nde nkɔbɛ nde ma Mokama. Abɛ'mi sinde ɔyɔngi nee ndɔ.» Na malaeka ab'aga aɛ.
Malia agee anenga Ɛlijabɛti
39 A mbènɔ ndɔ, Malia ab'akamanaga ga la a nji imoti, inda lɛɛngɔ a mamba-mamba a Yudɛa. 40 Ab'angia sub'endu a Jakalia, ab'ansesea Ɛlijabɛti. 41 Mbènɔ nde Ɛlijabɛti aɔki nee nseseɔ nda Malia ndɔ, nii-li ab'anjoa asuba a sɔɔ aɛ. A mbènɔ ndɔ, Ɛlijabɛti ab'atuma na Meema Mabhu. 42 Ab'akoga kpɛɛ ate: «O na ngɛbɛ nyɛna la bake-li bɔbhu. Na ngɛbɛ ndɔ abɛ anga nii nde ɔm'bɔta mande ndɔ. 43 Ne nde màni nga amá-Mokama nde mamɔ abhiɛ amolengɛ? 44 Nga, mbènɔ nde, adhu nɛɔki nseseɔ ndaɔ, nii nde maa sɔɔ ami adhu anjoi na bujɛmɛ. 45 Bujɛmɛ anga aɔ owɛ nde olebei bende Mokama akɔla mande inde ai aongodei.»
Lembɔ nda Malia
46 Mpa eme sunga na Malia ate:
«Nembhebhi Mokama a meema ami,
47 meema ami atumi na bujɛmɛ anga Mokonga Namisi nde mamɔ,
48 nga, amolengi na ngomi, eme nkɔbɛ nde maɛ makɔlɔ.
Domi, toa la mbènɔ nde, bato nde ba ɛbɔteana-li bhulibhu bamokoga mande Amá-ngɛbɛ,
49 nga Amɛna-Bokpɛ amɔkɔlɛli éma ati.
Ina aɛ a nde Amɛna-Bobhu†,
50 ngomi aɛ atandi a ɛbɔti-li bhulibhu anga bande bantea†.
51 Akɔli mobili a bangisa a ekanda laɛ, aeanji bato nde ba na meema a boenga.
52 Abúni manga l'ɛbɔamɛ nda baamɛ na mesia la bagbɔgbɔki.
53 Aekutisi bande baku nja na éma anja,
ab'aejisa bato a ntondɔ, bayɛnɛ.
54 Aetabeli baIsilaɛli bakɔbɛ nde baɛ,
kanga bosela la ngomi aɛ
55 anga Abolaimu n'ɛbɔti aɛ esa-li bhulibhu, bía nde ai aengodei nee batata asu.»
56 Mpa, Malia ab'aika nɔngɔ a Ɛlijabɛti bía mɔsɛla isalɔ. Mbusa a wa, ab'asiana nɔngɔ aɛ.
Bɔtɛana la Yɔani-Ndiisi
57 A mbènɔ nde bɔta laɛ akidi nee, Ɛlijabɛti aba am'bɔta nyia-muluana. 58 Batobaɛ na bande baiki mpiti-mpiti aɛ, aba baɔka sinde Mokama ai ankulii nee ngomi kpɛɛ, aba bajanga n'iyɛ áma imoti. 59 Mbènɔ nde nii-li akidisi nee kia lalɔ, ab'aga agua ganja. Ai bakaba ga sɔ̀a laɛ ina a abhaɛ, Jakalia. 60 Mpa, amáɛ ab'aengodea ate: «Aego! Ina aɛ abá nde Yɔani.» 61 Aba bansisila bate: «Nnd'a nɔngɔ anu naa nto moti mmbe a na ina ndɔ.» 62 Mpa, aba bamulisa abha a nii-li na njaga bate: «Okaba ote aba benkoga nde na ina sina?» 63 Jakalia ab'amɛma hale a mbáɔ na ab'aandeka antate ate: «Ina aɛ a nde Yɔani.» Ab'aebangisa bato bɔbhu. 64 Mbènɔ ndɔ nyɔɔ aɛ na edaa aɛ ab'aekodaga, ab'akɛngɛtisa yɔnga na bhebha la Mokonga. 65 Mpa, bɔɔ ab'angia anga bato-li bɔbhu, na ai batɔmia mbinɔ ndɔ a lɛɛngɔ a mamba-mamba nda Yudɛa. 66 Na bande ai baɔki mbinɔ ndɔ bɔbhu aba babhísa iyu a meema abɔ bate: «Nii nde aja mande nde màni?» Nga njaga a ekanda la Mokama ai a mpuɔ imoti n'iyɛ.
Lembɔ nda Jakalia
67 Jakalia, abhaɛ, ab'atuma na Meema Mabhu na ab'alabha ate:
68 «Abhebheanɛ Mokama, Mokonga nde maa Isilaɛli,
nga aetambeli na tosa la bato nde baɛ toa asuba bɔkɔbɛ,
69 na asopi Namisi mati asuba a tɔlɔngɛnɛ nda Daudi, nkɔbɛ nde maɛ.
70 Na indɔ yɛu ai ayɔngɛli kala a nyɔɔ a baúbhilili nde baɛ bande ba na bobhu.
71 Namisi nde asotosa a njaga a banjiu nde basu,
na bande basoye bɔbhu.
72 Ai aɔngii ngomi aɛ anga babhasu
na kanga bosela la nsaeɔ ndaɛ nda bobhu.
73 Bía njomoɛ nde ai akɔli mosá la tata asu Abolaimu,
74 asotosa mande a njaga banjiu nde basu,
nga bembhebhɛ makanga bɔɔ,
75 bebɛ na bobhu na domi a iso aɛ, a lenda lasu bhulibhu.
76 Na owɛ, nii, baokoga mande múbhilili nde ma Mmbe maa n'egoo kpɛɛ.
Nga, ɔmmɛla mande Mokama mosá a kɔkɔtia la asii ndaɛ
77 na úbhisa la bato nde baɛ bolamisi
a lilia la ilɔlɔ ndabɔ.
78 Nga Mokonga nde masu asokulii ngomi.
Anga indɔ yɛu, bía iso a máni nde abhia toa la na kobha,
79 iyɛ aejegia bande baiki asuba a dhoda na asuba a kudu a kukua, a sɔndɔlisa la ego lasu
asuba a asii la bɔkɔlɔ.»
80 Mpa, Yɔani ab'amɔta, na ab'akandaga a meema. Ab'aika na ngalagɛ kida la esa la ɔnɛana laɛ mosá la baIsilaɛli.