Yesu alabha a yɔnga la gbɔlɔana la endu a Mokonga
(Olengɛ go Mat 24.1-2; Luk 21.5-6)
13
A toa la Yesu n'endu a Mokonga, adha bagoli nde baɛ moti ab'anngodea ate: «Ngolisi, onengɛ da-ɛtɛ nde na da-endu nde!» 2 Emesunga na Yesu ate: «Ɔɔna da-ehìa nd'ati nde? Nndag'a ani ɛtɛ nde atiga mande antata a dhaɛ. Bhulibhu agbɔlɔana mande masa gbɔlɔana.»3 Mbusa indɔ Yesu ab'aika a mamba a Mijeituni kubhi na kubhi na endu a Mokonga. Pɛtɛlɔ, Yakɔbɔ, Yɔani na Andeleya, aba bamulisa mbamba bate: 4 «Osongodeɛ mbènɔ nde éma ndɔ akida mande nee na mbunde nde aangelisa mande bende éma ndɔ aóbela mande?» 5 Mpa Yesu ab'akɛngɛtisa ngodea labɔ ate: «Bolengelelɛ hɛlɛ abá-i na nto nde anodhemi. 6 Nga, bato bati babhia mande a ina ami bate: ‹Eme a a mbe, ne nde iyɛa!› Na baedhema mande bato bati. 7 Na mbènɔ nde bɔɔka mande nee mbinɔ a bìa nde aye aúti na inde asaki aútɛ, boba-i na bɔɔ. Atɔlɛli indɔ bhulibhu akidɛ, mpa abi-mbɛ sungia la lɛɛngɔ. 8 Bato nde ba ɛkɔngɔ imoti bamana mande na bande ba ɛkɔngɔ atɔɔ, bato nde ba ɛbɔamɛ imoti bamana mande na bato nde ba ɛbɔamɛ atɔɔ. Balingina badengisa mande mpuɔ ntuantua, na nja agua mande. Na éma ndɔ bhulibhu abá mande nde bía kɛngɛtisa la kònda la leme.
9 Mpa benu nganga boolengelelɛ hɛlɛ. Bato banoga mande nee a ntua la sɔ̀a la yɔnga. Banobinda mande asub'endu a sinagogi. Na banoga mande nee mosá la baomi na baamɛ a yɔnga lami. Iyo, bɔɔtɔmila mande yɔnga namɔ. 10 Atɔlɛli mbɛɛ labha la Mbinɔ Anja anga bato nde ba lɛɛngɔ bhulibhu. 11 Mpa, mbènɔ nde banokidisa mande nee a ntua la choela lanu, boonobisa-i mbɛɛ a inde aanga bɔyɔnga. Nga Mokonga anongodea mande yɔnga nde bɔyɔnga a mbènɔ ndɔ. Na nndaga benu yɛu bɔyɔnga, a nde Meema a Bobhu yɛu ayɔnga. 12 Bato a sɔɔ imoti basolana mande, na abha-nii ansola mande naɛ na kusisa laɛ. Na bani-li babá mande bajoki anga babɔti abɔ, na kusisa labɔ†. 13 Bato-li bɔbhu banoya mande a yɔnga la ina ami. Mpa, nto nde amidila mande meema aɛ kida l'a sungia, Mokonga anamisa mande.
Yesu atɔmia mbinɔ a enobɔ la bato
(Olengɛ go Mat 24.15-28; Luk 21.20-24)
14 A esa nde abhia nde, bɔmɔna mande mojiji majede n'ame áma nde nnd'atɔlɛli amɛb (mpa mmbe asɔma yɔnga nde aúbhɛ yu hɛlɛ), bato nde babá mande naa Yudɛa, batateelɛ na mamba. 15 Mmbe abá mande a ntɔndɔc a endu aɛ asìma-i na ngia la asub'endu-li nga agɛ abɛsɛ nkumba ndaɛ. 16 Mmbe agee na tio, asiana-i na nji ga bɛsa la ngɔmbɛ ndaɛ. 17 Boanya anga bamá-kaleme na bamá-boale a esa ndɔ. 18 Anga indɔ, bɔmɛmɛi Mokonga nga bende esa ndɔ abá-i mbènɔ a heɔ kpɛɛ.
19 Nga, esa ndɔ abá mande nde esa la enobɔ kpɛɛ, inde aɔnɛani-mbɛ mɛnɔ toa la mbènɔ nde Mokonga ai atɛlɛkisi na lɛɛngɔ kida la ndiende. Mambala enobɔ bía indɔ nnd'alɛ ba ye be†. 20 Na nabana Mokama nnd'ai angbimisi esa ndɔ, mmbɛ nnd'ai be naa nto moti nde ai aang'alama. Mpa, a nde a yɔnga la bande ai aɛsɔmbɔli yɛu aangisi akɔla bo. 21 A mbènɔ ndɔ, n'aye nto anongodei bende: ‹Bolengɛ, Masia a ani!› aɔ ‹Bolengɛ, a ohi›, bolebea-i. 22 Nga, baMasia la mbéa-mbéa, na baúbhilili la mbéa-mbéa baóbela mande, baangelisa mande mbunde na ekesɔ nangɛ nga dhema la bande Mokonga aɛsɔmbɔli. 23 Na benu, bokengemanɛ. Nga aye nenongodei éma-li bhulibhu mosá.
Bhia la Muna-Nto
(Olengɛ go Mat 24.29-31; Luk 21.25-28)
24 Mpa a esa ndɔ, mbusa a esa la enobɔ ndɔ, máni aetia mande dhoda, mɔsɛla nnd'abɛta mande, 25 na balɛlɛngɔa bagua mande. Na éma-li bhulibhu nde a na ekanda n'egoo agbɔkaga mande†. 26 Yɛu mpa, bamɔna mande Muna-Nto n'abhia a ebundu† n'ekanda kpɛɛ na boumu. 27 Mpa, aetea mande bamalaeka ga tulanisa la bande ai aɛsɔmbɔli saka ini-li bhulibhu nda lɛɛngɔ, toa la sungia na sungia la lɛɛngɔ†. 28 Bogolɛi maibhe nde atoa anga mee a motini. N'aye bɔɔna bende ntabhi-li n'akɛngɛtisa tɛlisa la nsoso, aba boúbha bende elemɔ anja aye bhi-bhi. 29 Ìbo yɛu na benu, n'aye mande bɔɔni éma ndɔ n'aɔnɛani, boúbhɛ bende Muna-Nto aye bhi-bhi, ame na mpume. 30 Domi nenongodei bende, ɛbɔti ndɔ nnd'aanga atesa éma ndɔ bhulibhu na akidiani-mbɛ. 31 Kobha na lɛɛngɔ anyɛna mande, mpa yɔnga namɔ nnd'alɛ anyɛna.
Yesu aengodei bagoli nde baɛ ate bakengemanɛ a siana laɛ
(Olengɛ go Mat 24.36-44)
32 A yɔnga la esa ndɔ na mbènɔ ndɔ, nnd'a na nto nde aúbha yu. Abɛ bamalaeka na kobha, abɛ Muna-Nto, nndag'a be mmbe aúbha, masa Ebha. 33 Bolengɛi hɛlɛ na bokengemanɛ. Nga, nnda boúbha mbènɔ nde esa ndɔ akida nee. 34 A nde bía nto n'agee tamba. Ab'adóa endu aɛ na dɔlɛa la bakɔbɛ nde baɛ bokama, nkɔbɛ moti na moti na nkási ndaɛ, na ngodea la nangi-mpume bende akengemanɛ hɛlɛ. 35 Anga indɔ, bokengemanɛi. Nga, nnda boúbha mbènɔ nde amɛnɛ a endu asiana nee, abɛ ɛgɔgɔ, a m'bimba, a ɔsa la kɔkɔ aɔ umauma. 36 Nabana aóbeli, bo nɔɛ! Anodhondɛ mɛnɔ na bo a tɔɔ. 37 Yɔnga nde nenongodei ndɔ, neengodea nde bato-li bɔbhu bende: bokengemanɛ.»