Malekɔ 12

Maibhe la basoki bajede

(Olengɛ go Mat 21.33-46; Luk 20.9-19)

Mbènɔ ndɔ, Yesu ab'akɛngɛtisa yɔnga la n'ibɔ a maibhe. Ab'ayɔnga ate: «Nto moti ai akoni tio a mojabibo. Ab'agitia yu, ab'atonga kubhu asub'ɛtɛ áma kamela la mbùa-li. Ab'ahìa n'ɛtɛ endu a balangi enda^†. Ab'aebhísa wa basoki na ga laɛ tamba.

2 Mpa, a mbènɔ a egubhɔ, ab'antea nkɔbɛ moti anga basoki ndɔ nga bammòɛ mohakɔ ndaɛ. 3 Basoki ndɔ aba bandhunga nkɔbɛ ndɔ, aba bam'bɛta na sisa laɛ bosa, makanga éma. 4 Amɛnɛ a tio ndɔ ab'antea go nkɔbɛ matɔɔ, mmbe n'iyɛ, aba bam'bɛta a moo aɛ na kusisa laɛ soni. 5 Ab'antea matɔɔ go, na mmbɔ aba bammóa. Na batɔɔ go bati, aba baɛbɛtaga bimoti na móaga la bande batɔɔ.

6 Mpa, amɛnɛ a tio ndɔ ai antigi nɔngɔ aɛ masa na nto moti, ngɔmu nde maɛ, n'ankondi kpɛɛ. A sungiaga, ab'antea naɛ ndɔ nɔngɔ abɔ ate: ‹Neúbha gela bende bansikisa nga a nde nami.› 7 Basoki ndɔ aba bayɔngisanaga nkunguanabɔ bate: ‹Amɛnɛ a moando ndɔ a a mbe. Bobhiɛ, bemmóɛi, nga tio ndɔ atigɛ indasu.› 8 Mpa, aba bandhunga nii ndɔ, na móa laɛ. Aba bamaa kiinda aɛ bhale a tio-li. 9 Nga indɔ mpa nenoulisi bende: Éma sina yɛu amɛnɛ a tio ndɔ aanga akɔla? Abhia mande na bhia móa la basoki ndɔ, na mòa la basoki batɔɔ tio-li. 10 Bɔsɔmi-mbɛ mɛnɔ asuba a Ketabo nda Mokonga yɔnga nde baandeki bende:

‹Ɛtɛ a hìa nde bato ai bakɔ́mi,

indɔ yɛu ai aetii ɛtɛ la sikisa l'endu.

11 Éma nde atoi nde nɔngɔ a Mokama iyɛ nganga,

n'iyu a nde nda bangisana a iso asu.›»

12 Anga indɔ, bakama nde ba baYuda, aba bakaba bía nde bandhunga na Yesu. Nga ai baúbhi bende, maibhe nde Yesu ai amai ndɔ aemaeli nde ibɔ. Ab'ai ban'doa na ga labɔ nga ai batea mɔlɔndɔ a bato.

Bommòɛ Kaisali éma ndaɛ, na bommòɛ Mokonga éma ndaɛ

(Olengɛ go Mat 22.15-22; Luk 20.20-26)

13 Mbusa wa, aba baetea adha baFalisayo na bato nde ba boio nda mɔamɛ Ɛlɔdɛ nɔngɔ a Yesu, nga lɛka laɛ a inde ayɔnga. 14 Aba babhia na ngodea laɛ bate: «Ngolisi, beúbha bende o nde nto a domi, nnd'ɔjɔmana bokama la nto. Ago nnd'onenga nto a bonja la iso aɛ. Owɛ oogolisa bato nde asii nda Mokonga a domi. Mpa, osongodeɛ, atɔlɛli lèa la manjanja anga Kaisali aɔ iisi? Belèɛ aɔ belèa-i?» 15 Mpa Yesu úbha l'ebhetebhete ndabɔ, ab'aeulisa ate: «Anga éma sina yɛu bɔmɔlɛka na yɔnga? Bobhiɛ ami na kichɛlɛ a ntondɔ moti, nga nɛɔnɛ.» 16 Aba bambhia aɛ na moti. Ab'aengodea ate: «Elimelime nde na ina nde baandeki nde a nde inda màni?» Emesunga n'ibɔ bate: «Inda Mɔamɛ Kaisali.» 17 Na Yesu ab'aengodea ate: «Éma nda Kaisali bommòɛi Kaisali, na éma nda Mokonga bommòɛi Mokonga.» Ɔka la indɔ ab'aebangisa angaɛ.

BaSadukayo bamulisi Yesu yɔnga la jujua la bàku a kukua

(Olengɛ go Mat 22.23-33; Luk 20.27-40)

18 Adha baSadukayo aba bambhilia Yesu. BaSadukayo bɔbhu aki bakɔ́ma jujua la bande aye báku^†. Aba bamulisa Yesu bate: 19 «Ngolisi, Mósa ai aandeki asu gela bende: N'aye ntoba a yɛli aku na doa la nkaɛ makanga nii, muna-abhaɛ am'bɛsɛ amekusa ndɔ, nga aɛbɔtɛ a ntoba aɛ bani^†^a. 20 Mpa, bai we baganja sobe-lalɔ asuba a endu imoti. Omi abɔ ab'ammɔma nke, ab'akua makanga a ɛbɔti. 21 Mmbe am'baemeligi mmbɔ ab'ansilia nke ndɔ, n'iyɛ ab'akua makanga bɔta la nii. Mma a isalɔ-li n'iyɛ ab'akua masa ìbo. 22 Sobe-lalɔ labɔ bɔbhu nnd'ai na mmbe am'bɔti nii. Mbusa a bɔbhu, nke ndɔ n'iyɛ ab'akua. 23 Mpa, a esa la jujua la bàku a kukua, màni angala abɔ yɛu abá mande munya a nke ndɔ? Nga sobe-lalɔ labɔ bɔbhu ai bammɔmi nke ndɔ.»

24 Yesu ab'aesisila ate: «Boodhema nde benu nganga, boúbha mbénɔ a nde nga ee? Nga nnda boúbha inde baandeki asuba a Maandekɔ, na nndaga boúbha go ekanda la Mokonga. 25 Mbènɔ nde bande báku bajujua mande nee a kukua, nnd'abá mande ye be eyamani, mpa babá mande nde bía bamalaeka na kobha. 26 A yɔnga la jujua la bàku a kukua, bɔsɔmi-mbɛ mɛnɔ asuba a ketabo nda Mósa yɔnga nde Mokonga ai ayɔngɛli a esasa nde nnd'ai asida ndɔ? Mokonga ai anngodei Mósa ate: ‹Eme ne nde Mokonga nde ma Abolaimu, Mokonga nde ma Isaka na Mokonga nde ma Yakɔbɔ^†?› 27 Mpa, Mokonga nndag'a nde Mokonga mmbe ma bande báku, a gɔɛ nde Mokonga mmbe ma bande aha balenda. Indɔ yɛu aangisi benu bobungaga kpɛɛ.»

Maanɔ sina yɛu a mati angala a ind'atɔɔ?

(Olengɛ go Mat 22.34-40; Luk 10.25-28)

28 Mɔngɛngɛlɛ a Tɔlati moti ab'ai aɔka yɔnga nde Yesu ai au na baSadukayo, ab'adɛgɛlisa bende, Yesu aesisili hɛlɛ. Ab'amulisa ate: «Ngolisi, maanɔ sina yɛu anyɛni ind'atɔɔ bhulibhu?» 29 Yesu ab'ansisila ate: «Maanɔ nde a mati kpɛɛ a nde: Ɔɔkɛ to, Isilaɛli, Mokama Mokonga nde masu aande Mokama moti sia. 30 Mpa, onkondɛ Mokama Mokonga nde maɔ na meema aɔ bhulibhu, na maakɔ aɔ bhulibhu na a ekanda laɔ bhulibhu^†. 31 Na maanɔ l'inda ibale a nde: Onkondɛ dhaɔ bía nde ookondi nee owɛ amɛnɛ^†. Nnd'aye be maanɔ atɔɔ nde atesi indɔ.»

32 Mɔngɛngɛlɛ a Tɔlati ndɔ ab'ansisila Yesu ate: «Ngolisi, ɔyɔngi hɛlɛ kpɛɛ. A nde domi. Mokonga a nde moti. Nnd'a be matɔɔ masa iyɛ^†.» 33 A nde yɔnga la bende, onkondɛ Mokonga a meema aɔ bhulibhu, na a maakɔ aɔ bhulibhu na a ekanda laɔ bhulibhu, na onkondɛ dhaɔ sinde ookondi nee owɛ amɛnɛ. Indɔ atɔlɛli kpɛɛ nyɛna la bɔɛmbɔ ntuantua nde oong'ompa Mokonga, na nyɛna la banyama nde baesumbi a nsa a bɔɛmbɔ^†. 34 Yesu ɔna la sinde ai ansisili na bɔɛngɛ, ab'anngodea ate: «Nnd'ɔ dhɔlɔ a Ɛbɔamɛ nda Mokonga.» Mbusa wa, bato nnd'ai ba na mouɔ a ulisa laɛ yɔnga.

Masia na Daudi

(Olengɛ go Mat 22.41-46; Luk 20.41-44)

35 Mbènɔ nde Yesu ai agolisa asuba a endu a Mokonga, ab'aengodea bato ate: «Yɔnga sina nde bangɛngɛlɛ a Tɔlati bayɔnga gela bende, Masia a nde muna-Daudi? 36 Nga, Daudi iyɛ amɛnɛ Meema Mbhumani n'anhahamisi, ayɔngi bende:

Mokama ai anngodei Mokama nde mamɔ ate,

Oikɛ saka a njaga ami la ind'akpɛ,

kida la mbénɔ nde neebhísa banjiu aɔ kusi a ego laɔ^†.

37 Daudi iyɛ amɛnɛ, ab'ankumia bende Mokama. Mpa, boni yɛu Masia aang'abá naɛ?» Da-mɔlɔndɔ a bato bati ai bamɔkanea na sei.

Maanɔ anga bangɛngɛlɛ a Tɔlati

(Olengɛ go Mat 23.1-12; Luk 20.45-47)

38 Mbènɔ nde ai agolisa nee, Yesu ai aengodea bato ate: «Boolengɛi bangɛngɛlɛ a Tɔlati ndɔ hɛlɛ. Nga, bakondi tamba na balɔli nkanjo endanda^b, na kaba la bende bato baeseseɛ áma bato bati batumi.» 39 Bakondi ika l'a mbata nda mosá-mosá sub'endu a sinagogi na a mpuɔ a bosikɛ áma dinyɛ. 40 Ibɔ go, baléa éma nda bamekusa na mɛma la Mokonga mbènɔ enda nga bato baeúbhilila-i. Bato bía bandɔ bamɔna lɛ mokpata nde akali kpɛɛ.

Bɔɛmbɔ nd'amekusa

(Olengɛ go Luk 21.1-4)

41 Esa imoti Yesu ab'aika kubhi na kubhi a sanduku a bɔɛmbɔ, n'alengelela sinde mɔlɔndɔ a bato ai bagesa na ntondɔ asuba a sanduku-li. Batondi bati ai bagabha ntondɔ ati. 42 Mpa, amekusa moti muyɛnɛ, ab'abhia. N'iyɛ ab'amaa nyia-kichɛlɛ ibale ɛdɛdɛ inde nndag'a na esombi. 43 Iwa, Yesu ab'aekoga bagoli nde baɛ, ab'aengodea ate: «Domi nenongodei, amekusa muyɛnɛ nde agesi bɔɛmbɔ ati asuba a sanduku ndɔ nyɛna la bato bɔbhu. 44 Nga, bato la bande batɔɔ bagabhi nde ntondɔ nde nnda bai nee bungu. Mpa iyɛ, a buyɛnɛ laɛ ab'agabha ntondɔ bhulibhu nde ai nee, bhulibhu nde ai aanga anendisa.»