Yesu angi Yɛlusalɛma na boumu
(Olengɛ go Mat 21.1-11; Luk 19.28-40; Yɔan 12.12-19)
11
Mbènɔ nde Yesu na bagoli nde baɛ bakidi nee mpiti a Yɛlusalɛma, bhi-bhi la Bɛtɛfagɛ na Bɛtania, aba bakida mpiti a mamba a Mijeituni. Yesu ab'aetea adha bagoli nde baɛ babale mosá. 2 Ab'aengodea ate: «Bogɛ a nji nda mosá lanu ndɔ. A ngia lanu, bondhonda ndende njɔngɔ a ponda na bannyangi, na nto adai-mbɛ mɛnɔ antata aɛ. Bonkodɛ na bombhiɛ nee oni. 3 Na nabana nto anoulisi ate: ‹Bɔkɔli bo nde anga ee?› Bonsisilɛ bote: ‹Mokama a na sei a tambela laɛ, ansisa go ani mbènɔ-mbènɔ nde.›»4 Aba baga na dhonda la njɔngɔ a ponda ndɔ na banhangi na nsɛngɛ a iso a mpume a endu imoti. Aba bankoda. 5 Adha bato nde bai wa, aba baeulisa bate: «Bonkoda njɔngɔ a ponda ndɔ nde anga ee?» 6 Na ibɔ aba baesisila bía nde Yesu ai aengodei nee. Mpa bato ndɔ aba balebea bende bangɛ nee. 7 Bagoli aba bambhia a Yesu na njɔngɔ a ponda ndɔ, aba babhísa ngɔmbɛ ndabɔ antata aɛ, na Yesu ab'aikidia yu†. 8 Bato bati aba batanda ngɔmbɛ ndabɔ a asii, na bande batɔɔ kasa-kasa a mee nde ai basɛngi na tioa. 9 Bato nde ai batamba mosá la Yesu, na bande bai babhia mbusa aɛ na bakoga kpɛɛ bate,
Osanab!
Ntutu anga mmbe abhii a ina a Mokama!
10 Ntutu abɛ a ɛbɔamɛ nde abhia nde, ɛbɔamɛ nda tata asu Daudi!
Osana anga Mokonga mmbe a n'egoo kpɛɛ†!
11 Yesu ab'akida naa Yɛlusalɛma na ngia l'asuba a endu a Mokonga. Ab'alenga éma bhulibhu nde ai iyo. Bía nde máni ai n'aye agɔgɔmani nee, ab'aóba na bagoli nde baɛ mɔkɔ́ na babale na siana labɔ naa Bɛtania.
Yesu ajomi mee
(Olengɛ go Mat 21.18-19)
12 Uma-li ndɔ, mbènɔ nde batoi nee Bɛtania, Yesu ab'akua nja. 13 Ab'aɔna dhɔlɔ aɛ mee a motini n'a na kasa ati. Ab'asɛdɛa mpiti-li ga lenga la mbénɔ aanga aɔna au mbùa. Mbènɔ nde akidi nee bhi-bhi la mee-li, ab'adhonda au masa kasa bosa, nga ai na abi-mbɛ mbènɔ a jɔdɔa-li. 14 Mpa, Yesu ab'anngodea mee ndɔ ate: «Nto nnd'alɛ akua n'ani mbùa nde atoa angaɔ.» Na bagoli nde baɛ ai baɔka yɔnga ndɔ.
Yesu aebèigi basómbisi-nkumba sub'endu a Mokonga
(Olengɛ go Mat 21.12-17; Luk 19.45-48; Yɔan 2.13-22)
15 Mbusa indɔ, aba bakida Yɛlusalɛma. Yesu ab'angia asub'a nsɛngɛ a endu a Mokonga, ab'akɛngɛtisa bèaga la bande ai basómbisaga na bande ai basómbigi nkumba asub'endu a Mokonga. Ab'akpungbumisaga mɛja nda bande ai babalisanaga ntondɔ na mbata nda bande ai baesómbisa baeyenga. 16 Nnd'ai ye alebea gela bende nto akpangisanɛ nsɛngɛ a endu a Mokonga ndɔ n'akumbi nkumba. 17 Mbusa indɔ, ab'aegolisa na hana la bato ndɔ ate: «Nndaga baandeki asuba a Ketabo nda Mokonga bende: ‹Bakoga mande endu ami bende endu a ɛmɛmi a Mokonga inda bato nde ba lɛɛngɔ bhulibhu.›? Mpa, benu botii yu nde nga abɛ nsomba a tulanelaga la bakukuba†» 18 Baomi nde ba baɛlɛli na bangɛngɛlɛ a Tɔlati, inde baɔki nee bo, aba bakaba sinde bammóa nee. Mpa ai bantea nga ai baɔna sinde egolisi aɛ ai aebangisa nee na mɔlɔndɔ a bato. 19 Mbènɔ nde ɛgɔgɔ akidi nee, Yesu na bagoli nde baɛ aba batoa a bɔma ndɔ.
Yesu na mee a motini nde ai aɔmi ndɔ
(Olengɛ go Mat 21.20-22)
20 Umauma-li, mbènɔ a tesa labɔ a asii ndɔ, Yesu na bagoli nde baɛ aba baɔna mee a motini nde Yesu ai ajomi ndɔ n'aɔmi na miigi aɛ bhulibhu. 21 Mpa, Pɛtɛlɔ ab'akanisa yɔnga nde Yesu ai ayɔngi ndɔ. Ab'anngodea ate: «Labi, onengɛi mee nde auma onjomi sinde nde aɔmi nee bhulanaɛ!» 22 Emesunga na Yesu ate: «Boosobelɛi Mokonga. 23 Nenongodei domi, nabana nto anngodei mamba nde bende: ‹Ookingɛ ani na odhudhulanɛ asuba a ngɛji.› Nabana nnd'a na maamaa asuba a meema aɛ, n'alebei bende yɔnga nde ayɔngi ndɔ atɔisana mande, kesi indɔ abá masa ìbo. 24 Indɔ yɛu aangisi nenongodea bende, éma bhulibhu nde bɔmɛma, bolebeɛ bende aye bo nee, na indɔ abá mande indanu. 25 Na n'aye bome a mɛma la Mokonga, na bo na yɔnga na nto, boniliɛ mbɛɛ, nga abhanu na kobha n'iyɛ aliliɛ ilɔlɔ ndanu na benu. [ 26 Mpa, na nnd'aye bolilii ilɔlɔ nde badhanu banɔkɔlɛli, Abhanu mmbe a na kobha nnd'aanga alilia ilɔlɔ ndanu nde bɔkɔlic.]»
Bokama la Yesu atoi nde iwani?
(Olengɛ go Mat 21.23-27; Luk 20.1-8)
27 Mbusa indɔ, Yesu na bagoli nde baɛ, aba baga go naa Yɛlusalɛma. Bía nde Yesu ai atambaga nee a nsɛngɛ asub'endu a Mokonga, baomi nde ba baɛlɛli, bangɛngɛlɛ a Tɔlati na bakpɛga aba babhia mpiti a Yesu, 28 na ulisa laɛ bate: «A bokama sina yɛu ɔk'ɔkɔla éma nde? Màni yɛu aopi bokama la kɔla-li?»
29 Emesunga na Yesu ate: «Nenoulisa masa yɔnga imoti. N'aye bomosisili mpa yɛu aba nenongodea mbénɔ nɛkɔla éma ndɔ nde a bokama la nto sina. 30 Ndiisɔ nde Yɔani ai akɔla, màni yɛu ai ammòi bokama ndɔ? Bokama-li ai atoi nde na kobha aɔ go anga bato†? Bomosisilɛ to mpa.»
31 Mpa, aba baulisana nkunguanabɔ bate: «N'aye bensisili bende: ‹Na kobha›, kesi asoulisa gela bende: ‹Anga ee yɛu nnd'ai bolebei inde ai ayɔngi?› 32 Na n'aye bensisili bende atoi nde anga bato, kesi…» Nga ai batea mɔlɔndɔ a bato nga bɔbhu ai baúbha bende Yɔani ai nde múbhilili domi. 33 Anga indɔ, aba bansisila Yesu bate: «Nndaga beúbha.» Mpa, Yesu n'iyɛ ab'aesisila ate: «Na eme iisi, nnd'aanga nenongodea mbénɔ a nde a bokama la màni yɛu nɛkɔla éma ndɔ.»