Yesu agolisaga yɔnga la kɔ́mana la bato a eyamani
(Olengɛ go Mat 19.1-12; Luk 16.18)
10
Yesu ab'atoa wa, ab'aga a lɛɛngɔ a Yudɛa na kubhi a Yɔlɔdani. Iyo go, mɔlɔndɔ a bato aba batulanaga a mpiti aɛ, ab'akɛngɛtisa golisa labɔ go bía nde ai nde nkani ndaɛ. 2 Adha baFalisayo aba basɛdɛa a mpiti aɛ a nkabɔ a lɛ̀nga laɛ. Aba bamulisa bate: «Maanɔ ndasu asosii gela bende moo am'bèɛ nkaɛ?» 3 Emesunga na Yesu ate: «Maanɔ nda Mósa anososii nde bóni?» 4 Eme ibɔ bate: «Mósa ai asosii bende nto aanga aandeka baloa a bèa la nkaɛ†.»5 Yesu ab'aengodea ate: «Mósa ai aandeki anu maanɔ ndɔ nde nga bo na meema akpɛ.» 6 Mbènɔ nde Mokonga akɛngɛtisi nee tɛlɛkisa la lɛɛngɔ, ai ankɔkɔtii nde moo bona nke. 7 Anga indɔ yɛu moo an'doa mande abhaɛ n'amáɛ na aba bajuana bona nkaɛ. 8 Na babale labɔ aba baja ngobho moti. Anga indɔ, ibɔ ba nnda aye bato babale, mpa baetii ngobho moti. 9 Nga indɔ, inde Mokonga ajuanisi, abá-i be nto nde akatanisa yu.
10 Mbènɔ nde bakidi nee n'endu, bagoli nde baɛ aba bamulisa go Yesu adha yɔnga ndɔ. 11 Mpa, ab'aesisila ate: «N'aye nto am'bèi nkaɛ na ab'ansea nke matɔɔ, kesi aetii nto a bojini anga nke maa mosá ndɔ. 12 Aɔ go nabana nke ankɔ́mi munyaɛ na ga ɔmana anga moo matɔɔ, kesi n'iyɛ ajini.»
Yesu agesi anga bani ntutu
(Olengɛ go Mat 19.13-15; Luk 18.15-17)
13 Mbusa wa, bato aba baebhia na bani nɔngɔ a Yesu nga abhísɛ njaga aɛ antata abɔ. Bagoli nde baɛ aba baekaleaga bato ndɔ. 14 Ɔna la bo, indɔ ab'anɛma Yesu na ngodea la bagoli nde baɛ ate: «Boodoɛ bani bɛdɛdɛ babhiɛ nɔngɔ ami. Bɔɔkɔ́misa-i nga Ɛbɔamɛ nda Mokonga a nde inda bato nde ba bía ibɔ†. 15 Nenongodei domi bende nto nde nnd'alebei Ɛbɔamɛ nda Mokonga bía nii mɛdɛ nnd'alɛ akua n'angi asubi.» 16 Mpa, Yesu ab'aebomba bani ndɔ, ab'agesa anga abɔ ntutu n'abhísi njaga aɛ antata abɔ.
Yesu ayɔnga bona ntondi
(Olengɛ go Mat 19.16-30; Luk 18.18-30)
17 Mbènɔ nde Yesu agee mosá na tamba ndaɛ, nto moti ab'abhia mbangɔ, ab'abúna moo-a-kuu laɛ a dodo mosá laɛ, ab'amulisa ate: «Ngolisi manja, aanga nɛkɔla nde ee nga nebɛ na lenda la mɛyɔ?» 18 Yesu ab'anngodea ate: «Anga ee yɛu omokogi bende nto manja? Nnd'a na nto nde a manja, masa Mokonga iyɛ nganga. 19 Oúbha maanɔ nde:
Ommóa-i nto,
ojina-i,
ouba-i,
ɔnyɔngɛla-i nto mbéa,
ondhemaga-i nto n'ɔbɛsi éma ndaɛ,
onsikisɛ abhaɔ n'amáɔ†.»
20 Nto ndɔ ab'ansisila Yesu ate: «Ngolisi, indɔ bhulibhu aye mɛnɔ nɛkɔli toa l'a konii lami.» 21 Yesu ab'anenga na konda laɛ. Ab'anngodea ate: «Obóli masa éma imoti: ogɛ, na osómbisɛ éma ndaɔ bhulibhu, na oopɛ yu bayɛnɛ, mpa obá na lua na kobha. Mbusa indɔ mpa, obhiɛ na omobeleɛ.» 22 Mbusa ɔka la yɔnga ndɔ, ekiki a nto ndɔ ab'atulana ab'aga n'a na ngomi nga ai na lua ati.
23 Mpa, Yesu ab'aelenga bagoli na bantimbi, ab'aengodea ate: «Haa! A akpɛ anga batondi ngia l'asuba a Ɛbɔamɛ nda Mokonga!» 24 Yɔnga ndɔ ab'aebangisa bagoli nde baɛ kpɛɛ. Mpa, Yesu ab'asilia go yɔnga ndɔ ate: «Baanami sɛ! A akpɛ ngia l'asuba a Ɛbɔamɛ nda Mokonga! 25 A awɛdɛ kpɛɛ anga ngamia ngia l'asuba a kubhu a sindanɔ nyɛna la ntondi ngia l'Ɛbɔamɛ nda Mokonga.» 26 Yɔnga ndɔ ab'aepa bagoli nde baɛ mbombi. Aba bayɔngisana nkunguanabɔ bate: «Mpa màni yɛu aang'alama?» 27 Yesu ab'aelenga na ngodea labɔ ate: «Anga nto nnd'aanga atɔisana, kanga anga Mokonga. Nga éma bhulibhu atɔisana anga Mokonga.» 28 Mpa, Pɛtɛlɔ ab'akɛngɛtisa ngodea la Yesu ate: «Olengɛ, besu bedu éma ndasu bhulibhu a yɔnga la belea laɔ.» 29 Yesu ab'anngodea ate: «Domi inde, nenongodei: Nabana nto adu endu aɛ, bana-amáɛ, baalɔɛ, amáɛ, abhaɛ, baanaɛ aɔ tio aɛ, a yɔnga lami na a yɔnga la Mbinɔ Anja, 30 abá mande na éma ndɔ bhulibhu nkobà eyana imoti, abɛ endu, baana-emá, baalɔ, baemá, bani na tio. Indɔ bhulibhu abá mande nee áma imoti na enobɔ a mbènɔ nde be au nde, mpa na a mbènɔ nde alɛ abhia go abá lɛ na lenda la mɛyɔ. 31 Bato bati bande ba mosá-mosá, baetia lɛ bande ba mbusa-mbusa, na bande ba mbusa-mbusa baja lɛ bande ba mosá-mosá.»
Yesu atɔmia a nkobà l'inda isalɔ yɔnga la kukua laɛ na jujua laɛ a kukua
(Olengɛ go Mat 20.17-19; Luk 18.31-34)
32 Yesu na bagoli nde baɛ aba batoa wa, aba bataliila Yɛlusalɛma. Yesu n'iyɛ n'ame mosá labɔ. Meema a bagoli nde baɛ ab'asanga, na bande ai baebelea n'ibɔ bɔɔ ab'aebaa. Yesu ab'aɛbɛsa go bagoli nde baɛ mɔkɔ́ na babale, ab'akɛngɛtisa tɔmila labɔ yɔnga nde andhonda mande. 33 Ab'aengodea ate: «Aande betalia Yɛlusalɛma nde. Iyo, iyɛ Muna-Nto bamóbisa mande a njaga a baomi nde ba baɛlɛli na anga bangɛngɛlɛ a Tɔlati. Basɔ̀a mande yɔnga la kukua laɛ, bamóbisa mande a njaga bato nde nndaga baYuda. 34 N'ibɔ banjangelaga mande, bansulia mande soi, bam'bɛtaga mande na kibɔkɔ na bammóa mande. Na mbusa kia l'inda isalɔ, ajujua mande angala a bakú.»
Ɛmɛmi nda Yakɔbɔ bona Yɔani anga Yesu
(Olengɛ go Mat 20.20-28)
35 Mbusa indɔ, Yakɔbɔ bona Yɔani, bana-Jɛbɛdayo, aba babhia mpiti a Yesu na ngodea laɛ bate: «Ngolisi, bekondi bende inde bɛɔmɛma mande ɔkɔlɛ asu iyu.» 36 Yesu ab'aeulisa ate: «Éma sina yɛu bokondi bote nɛkɔlɛ anu?» 37 Aba bansisila bate: «Mbènɔ nde obá mande a ɛbɔamɛ nda boumu ndaɔ, olebeɛ bende adha besu moti aikɛ a njaga aɔ nd'akpɛ na matɔɔ a njaga aɔ nd'emisɔ.» 38 Emesunga na Yesu ate: «Nndaga boúbha éma nde bɔmɛmi. Aanga bɔtɔa noa la kɔpɔ a enobɔ nde eme nenoa mande, na aanga bolebea banondiisɛ na mambala ndiisɔ a enobɔ nde bamondiisa mande ne?» 39 Aba bansisila bate: «Aanga bɛtɔa.» Mpa, Yesu ab'aengodea ate: «A nde domi! Bonoa mande kɔpɔ a enobɔ nde nenoa na banondiisa mande mambala ndiisɔ a enobɔ nde bamondiisa mande†. 40 Mpa, a yɔnga la ikisa la bato, abɛ a njaga ami nd'akpɛ aɔ go a njaga ami nd'emisɔ, eme yɛu nndaga negabha indɔ. Mpuɔ ndɔ a nde inda bande Mokonga aye mɛnɔ aekɔkɔtiili.»
41 Mbènɔ nde bagoli mɔkɔ́ la bande batɔɔ ndɔ baɔki nee bo, aba basunula anga Yakɔbɔ na Yɔani. 42 Mpa, Yesu ab'aekoga bɔbhu na ngodea labɔ ate: «Boúbha inde anyɛna a lɛɛngɔ nde a a mpiti-mpiti asu: bande baúbhianani bía baamɛ ndɔ baɛsɔndɔlisaga na bokpɛ bato nde babɔ. Na baomi nde ba nji baeikidiaga bato nde babɔ. 43 Mpa, abá-i bo a meeme anu. Mmbe akondi bende ajɛ omi angala anu, abɛ nto a nkási nde manu. 44 Na mmbe akondi bende ajɛ nto nde maa mosá-mosá angala anu, abɛ nkɔbɛ nde ma bɔbhu. 45 Nga, Muna-Nto, nnd'abhii nga bato baetiɛ bato a nkási nde baɛ. Abhii gɔɛ nde bhia kɔlɛla la bato nkási na boogabha la iyɛ nganga nga lèela la bato bati malɔnga†.»
Yesu anamisi timetime Balatimayo
(Olengɛ go Mat 20.29-34; Luk 18.35-43)
46 Mbusa wa, aba bakida Yelikɔ. Yesu na bagoli nde baɛ, na da-mɔlɔndɔ a bato aba batoa a bɔma nda Yelikɔ. Toa labɔ o, timetime moti mmbe bankoga bate Balatimayo, muna-Timayo, ai aiki a mpiti a asii n'amɛmanaga. 47 Mbènɔ nde aɔki nee bende a nde Yesu nto nde maa Najalɛti yɛu a a mbɔ anyɛna ndɔ, ab'akɛngɛtisa koga kpɛɛ ate: «Yesu, etata la Daudi, belebele, omokuliɛ ngomi!» 48 Bato bati aba bansolea bende adhaɛ. Mpa iyɛ, ab'akoga go kpɛɛ ate: «Etata la Daudi ee! Omokuliɛ ngomi!» 49 Yesu ab'ama, na yɔnga la ate: «Bonkogɛi.» Aba bankoga timetime ndɔ bate: «Odhodeɛ meema aɔ! Omɛ, aokoga!» 50 Timetime ndɔ ab'atubha kɔti ndaɛ, ab'ahɔ́a dia na ga la saka naande Yesu a nee. 51 Mpa, Yesu ab'amulisa ate: «Éma sina yɛu okondi bende nɛkɔlɛ aɔ?» Emesunga na timetime ndɔ ate: «Labi, nekondi nte nɛɔnɛ go!» 52 Yesu ab'anngodea ate: «Ogɛ, boosobela laɔ aolamisi.» Makanga lɛbha, ab'aɔna go, na aba am'belea Yesu asuba a asii.