Maibhe a amekusa bona nsɔ̀i-yɔnga
18
Yesu ab'aemaela bagoli nde baɛ maibhe moti a ɔngia labɔ bende atɔlɛli bammɛmɛ Mokonga esa-li bhulibhu makanga bunua la meema. 2 Ab'aengodea ate: «Nsɔ̀i-yɔnga moti ai aiki a bɔma imoti. Mmbe nnd'ai antea Mokonga na nnd'ai aesikisa bato badhaɛ. 3 Amekusa moti n'iyɛ ai aiki a bɔma ndɔ. Nke ndɔ ai abhiaga na mɔtɛ a nsɔ̀i-yɔnga ndɔ, bhia ngodea laɛ ate: ‹Ɔsɔ̀ɛ yɔnga namɔ na nto nde be na iyɛ a yɔnga nde.› 4 Esa ati, nsɔ̀i-yɔnga ndɔ n'akɔma aande kɔma. Mpa mbusa ab'aɛyɔngɛla iyɛ amɛnɛ ate: ‹Nangɛ bende nnda nentea Mokonga na nnda neesikisa bato, 5 mpa, nga amekusa nde amɔkɛndɛlisi, nɛsɔ̀a yɔnga ndaɛ na pa laɛ domi ndaɛ, nga kesi asala alɛ abhia aloisa moo ami.›» 6 Mpa, Mokama Yesu ab'ayɔnga ate: «Bɔɔkí wa inde nsɔ̀i-yɔnga majede nde ayɔngi ndɔ? 7 Mbénɔ mpa Mokonga, n'iyɛ, nnd'aanga aepa bato nde aɛsɔmbɔli na bande bangamea etonge na kiia domi ndabɔ? Aɔ mbénɔ aanga alɛbha makanga tabela labɔ? 8 Nenongodei asɔ̀a mande yɔnga ndabɔ dia. Mbènɔ nde Muna-Nto abhia mande nee, ote aedhonda mande bato na baha na boosobela asuba na lɛɛngɔ?»Maibhe a moFalisayo na nèisi-manjànjà
9 Yesu ab'amaa go maibhe nde anga bande ai baaka bate a nde bato a domi na bhɔna la badhabɔ ate: 10 «Esa imoti, baboo babale ai batalii a endu a Mokonga ga mɛma. Moti ai nde moFalisayo na matɔɔ nèisi-manjànjà. 11 MoFalisayo ab'ama, ab'ammɛma Mokonga a meema aɛ ate: ‹Hoo Mokonga! Neosimi nga nndaga ne bía bato batɔɔ, bakukuba, bato a kɔla la bujede na bato a bojini. Neosimi go nga nndaga ne bía nèisi-manjànjà nde. 12 Eme ani, aki neosa nkobà ibale a yenga makanga léa la eléa nga mɛma laɔ. Ago, aki neopa motolɔ a lua namɔ bhulibhu.›
13 Nèisi-manjànjà ndɔ ab'ama aɛ dhɔlɔ. N'iyɛ nnd'ai akengei nangɛbɛ mesa la moo aɛ a lenga la na kobha. Mpa ab'aɛbhɛdɛla etatamaa, n'ayɔnga ate: ‹Ai! Mokonga, omokuliɛ ngomi, eme nto a ilɔlɔ!›» 14 Yesu ab'aengodea ate: «Nenongodea bende, nèisi-manjànjà ndɔ yɛu ai asiani nɔngɔ aɛ n'aye Mokonga anebei bía nto a domi, makanga moFalisayo ndɔ. Nga, nto nde aebhísa gulu a badhaɛ bandhidhisa mande, na mmbe aedhidhisi bansòmba mande.»
Yesu agesi ntutu anga bani bɛdɛdɛ
15 Bato ai baebhia a Yesu nangɛ na bani bɛdɛdɛ nga agesɛ ntutu anga abɔ. Ɔna la indɔ, bagoli nde baɛ aba baesolea bato ndɔ. 16 Yesu ab'ayɔnga ate baebhiɛ na bani bɛdɛdɛ ndɔ a mpiti aɛ. Mpa, ab'aengodea bagoli nde baɛ ate: «Boodoɛ bani bɛdɛdɛ babhiɛ nɔngɔ ami na bɔɔkɔmisa-i. Nga Ɛbɔamɛ nda Mokonga a nde inda bato nde ba bía bani nde. 17 Na domi, nenongodea, nto nde nnd'alebei Ɛbɔamɛ nda Mokonga bía nii mɛdɛ nnd'alɛ angia asubi.»
Yesu bona ntondi moti
18 Mokama moti mmbe ma baYuda ab'amulisa Yesu ate: «Ngolisi manja, nɛkɔlɛ nde iboni nga nebɛ na mɛyɔ?» 19 Yesu ab'ansisila ate: «Anga éma sina yɛu omokogi bende nto manja? Nnd'a we nto manja na nndaga masa Mokonga iyɛ nganga. 20 Oúbha sinde nde Maanɔ ayɔngi nee: Ojina-i, ommóa-i nto, ouba-i, ɔnyɔngɛla-i nto mbea, onsikisɛ abhaɔ na amáɔ.» 21 Mokama ndɔ ab'ansisila Yesu ate: «Maanɔ ndɔ bhulibhu nesikisi iyu toa la buluana lami.» 22 Ɔka la indɔ, Yesu ab'anngodea ate: «Otigisi kɔla la éma imoti. Ogɛ osómbisɛ nkumba ndaɔ bhulibhu, na oobuilɛ yu bayɛnɛ. N'aye ɔkɔli bo, mpa oba na lua na kobha. Mbusa indɔ mpa, obhiɛ na omobeleɛ.» 23 Mbusa ɔka la yɔnga ndɔ, nto ndɔ ab'akua ngomi kpɛɛ, nga ai na lua ati.
24 Mbènɔ nde Yesu amɔni ntondi ndɔ n'a na ngomi ati, ab'ayɔnga ate: «Akali kpɛɛ anga nto a lua ngia la asuba Ɛbɔamɛ nda Mokonga! 25 Bía nde akali nee anga ngamia ngia l'asuba kubhu a sindanɔ, akali go kpɛɛ anga ntondi ngia l'a Ɛbɔamɛ nda Mokonga.» 26 Bato nde bai bamɔkɛana aba bayɔnga bate: «Mpa, màni yɛu aang'alama?» 27 Na Yesu ab'aesisila ate: «Inde atalokani anga bato, anga Mokonga atɔisana.»
28 Mpa Pɛtɛlɔ ab'anngodea Yesu ate: «Olengɛ to, bedu éma nde ai be nee bhulibhu na baemea laɔ.» 29 Eme sunga na Yesu ate: «Nenongodea domi bende, nabana nto adu endu aɛ, nkaɛ, bana-amáɛ, babɔti aɛ aɔ baanaɛ a yɔnga l'Ɛbɔamɛ nda Mokonga, 30 abá mande na éma asii, toa l'a mbènɔ nde, nyɛna la inde adu ndɔ. Na a mbènɔ nde abhia, alɛ go alenda a mɛyɔ.»
Yesu atɔmia mbinɔ a kukua laɛ na jujua laɛ a kukua
31 Toa la wa Yesu ab'aetulanisa bagoli mɔkɔ na babale a mpiti aɛ, na ab'aengodea ate: «Bɔmɔɔkaneɛ, ayunde bega Yɛlusalɛma nde, na yɔnga bhulibhu nde baúbhilili ai baandeki anga Muna-Nto aɔnɛana mande. 32 A nde bende bamóbisa mande nde a njaga a bande nndaga baYuda. Bantɛbhɛlaga mande, bamɔtaga mande na suliaga laɛ soi. 33 Mbusa bɛta laɛ kpɛɛ, bammóa mande, na a esa-li nda isalɔ, ajujua mande a kukua.» 34 Mpa yɔnga ndɔ nnd'ai angi hɛlɛ a etue la bagoli nde baɛ. Yɔnga-li ab'atiga angabɔ bía maibhe nga nnd'ai baúbhi inde Yesu ai akabi ate ayɔngɛ.
Yesu anamisi timetime
35 Mbènɔ nde Yesu ai asaki akidɛ nee Yelikɔ, timetime moti n'aiki a mpiti a asii n'amɛmanaga. 36 Timetime ndɔ ab'aɔka mɔlɔndɔ a bato na banyɛna, na ab'aulisa ate: «Éma sina ndɔ anyɛna ndɔ?»
37 Bato ndɔ aba banngodea bate: «Yesu nde maa Najalɛti a yɛ mbɔ atesa ndɔ.» 38 Mpa, timetime ndɔ ab'akoga kpɛɛ ate: «Yesu muna-Daudi, okuɛ ngomi ami!» 39 Bato nde bai batamba mosá la Yesu aba bankaleaga nga bandhaisɛ. Mpa n'iyɛ ab'akoga go kpɛɛ ate: «Muna-Daudi, okuɛ ngomi ami!» 40 Yesu ab'ama na ab'aesosia ate bambhiɛ nee. Mbènɔ nde akidi nee a mpiti aɛ, Yesu ab'amulisa ate: 41 «Okabi ote nɛkɔlɛ aɔ nde éma sina?» Timetime ndɔ ab'ansisila ate: «Mokama, nte nɛɔnɛ go!» 42 Yesu ab'anngodea ate: «Iso aɔ aeukuɛ. Boosobela laɔ aolamisi.» 43 Amakanga lɛbha, ab'aɔna go. Aba am'belea Yesu n'ambhebha Mokonga. Inde bato bɔbhu baɔni nee bo, na ibɔ aba bambhebha Mokonga.