Ilɔlɔ na sinde aanga balilia nee
17
Na Yesu ab'aengodea bagoli nde baɛ ate: «Éma ajede nde akaba gusa la bato a kɔla la ilɔlɔ nnd'aanga abolana. Mpa, a nde boanya anga mmbe abhìsa indɔ. 2 Atɔlɛli masa nyanga l'ɛtɛ mati a kingo aɛ na maa laɛ asuba a kibha a íbo enda nga angusa-i adha bani nde moti. 3 Anga indɔ, bolengelelɛi tambela lanu hɛlɛ.Nabana dhaɔ aɔkɔlɛli ajede, onhanɛ. Nabana adu bujede ndaɛ, ɔb'ɔngɛgia. 4 Na nabana, a kia imoti, aɔkɔlɛli ajede nkobà sobe-lalɔ n'ago abhii nɔngɔ aɔ nkobà sobe-lalɔ ate: ‹Nedu bujede namɔ ndɔ›, ɔb'ɔngɛgia.»
Boosobela bía mbùa a aladali
5 Batetei aba banngodea Mokama bate: «Ɔtɔdisɛ boosobela lasu.» 6 Eme sunga n'iyɛ ate: «Nabana boosobela lanu a sunga na nyia-mbùa mɛdɛ la aladali, mmbɛ aanga bongodea mee a nkumɔ nde bende: ‹Ookingɛ ani na aga ɔtɛlɛ asuba a íbo mati.› N'iyu aba a a nde bo.
7 Mpa, màni angala anu yɛu n'aye a na nkɔbɛ ndhɛmi aɔ go nangi a banyama, mbènɔ a toa la nkɔbɛ-li na tio aanga anngodea ate: ‹Obhiɛ dia oléanɛ?› 8 Nndag'a bo. Anngodea gɔɛ nde ate: ‹Ɔɔmbanɛ ami, ɔlɔlanɛ hɛlɛ a kɔlɛla lami nkási a mbènɔ nde léana na noa. Na mbusa iwa yɛu na owɛ oléana na noa.› 9 Mpa boni yɛu, mokama ndɔ aanga ansima nkɔbɛ ndɔ a inde adhu ansosii ate akɔlɛ aɛ? Nndag'a bo! 10 Na indɔ a bo anganu. Mbènɔ nde bɔkɔla éma bhulibhu nde banososii, bɔyɔngɛ bote: ‹Be nde bakɔbɛ bosa. Bɛkɔli masa inde basososii.›»
Yesu aelamisi bato a kebukebu mɔkɔ
11 Yesu ai aga saka Yɛlusalɛma. Mpa, asii ndɔ n'atesi a nsɔlɔ a Samalia na Galilaya. 12 Mbènɔ nde angi nee a nji imoti, baboo mɔkɔ bande baku kebukebu aba babhia bandhonda. Aba bama dhɔlɔ aɛ n'ɛdɛ. 13 Aba bantobea bate: «Yesu, Ngolisi! Okuɛ ngomi asu.» 14 Yesu ab'aɛɔna na ngodea labɔ ate: «Bogɛi, aga bɔɔɔngianɛ anga baɛlɛli.» Aba baga. Na baha na asii aba balama. 15 Moti angala abɔ, ɔna la bía nde alami nee, ab'asiana mbusa, n'ambhebha Mokonga na moyo enda. 16 Ab'akpungbumana mosá la Yesu, endondo aɛ ab'adhoa dodo n'ansima. Na nto ndɔ ai nde moSamalia. 17 Mpa Yesu ab'ayɔnga ate: «Ka ɔɔna te bato nde adhu balami badhu nde mɔkɔ. Mpa bande ba sobe-komi ba wani? 18 Nnd'a angala abɔ mmbe akanisi bhia pa la Mokonga boumu, masa ntambi nde?» 19 Mpa, Yesu ab'anngodea ntambi ndɔ ate: «Mɛ to, na ogɛ aɔ. Boosobela laɔ aolamisi.»
Ɛbɔamɛ nda Mokonga abhia nde iboni
20 BaFalisayo aba bamulisa Yesu bate: «Ɛbɔamɛ nda Mokonga abhia mande nde esa sina?» Eme sunga na Yesu ate: «Ɛbɔamɛ nda Mokonga nnd'aanga abhia bato na baɔna na iso. 21 Nnd'aanga bayɔnga bate: ‹A a nde!› aɔ go ‹A a ndoi!› Nga, boúbhɛ bende, ɛbɔamɛ nda Mokonga aye a na benu.»
Esa la siana la Muna-Nto
22 Mpa, ab'aengodea bagoli nde baɛ ate: «Abá mande be esa nde boba na sei a ɔna la Muna-Nto, nangɛ a kia imoti, na nnd'aanga aye bɔmɔna. 23 Bato banongodea mande bate: ‹A a mbɔ a o ndɔ, a a mbe a oni nde.› Boga-i we aɔ bokamanaga-i we. 24 Nga, mbúa n'aye aɛnia na kobha, aki ajegia kobha-li bhulibhu. Na ìbo yɛu, Muna-Nto abá mande a esa la siana laɛ. 25 Mpa, atɔlɛli mbɛɛ anobɛ kpɛɛ, na bato nde ba ɛbɔti nde bankɔmɛ.
26 Éma nde ai mɛnɔ akɔlɛkani kala a esa la Nɔa, na ìbo yɛu abá mande a esa la siana la Muna-Nto. 27 Nga, a esa la Nɔa, bato ai baléa na noa, ai basea na ɔmana kida la esa nde Nɔa angi nee asuba a koko mati. Mpa, íbo a mbúa ati ab'atumisa lɛɛngɔ-li bhulibhu na tindisa la bato-li bɔbhu. 28 Abá mande go nde bía a esa la Loti. Bato ai baléa na noa, ai basómba na sombisa, ai bakona na hìa. 29 Mpa, esa nde Loti atoi nee a bɔma nda Sɔdɔmɔ, Mokonga ab'agusa nsa na kibeliti toa la na kobha bía íbo a mbúa, ab'aetindisa bato nde ba nji ndɔ bɔbhu. 30 Ìbo yɛu abá mande a esa nde Muna-Nto aóbela mande nee.
31 A esa ndɔ, nto nde abá mande a gu a muujɔ a endu, nangɛ n'a na nkumba ndaɛ asub'endu ndɔ, asima-i ga bɛsa-li. Nangɛ mmbe abá mande na tio, asiana-i nɔngɔ aɛ. 32 Bonkanisɛi nka-Loti. 33 Nto nde akaba mande langa la lenda laɛ abungisa mande yu, na mmbe abungisa mande lenda laɛ, mmbɔ yɛu alanga mande yu. 34 Nenongodei bende, kiia a esa ndɔ, bato babale bala mande antata eka imoti. Banga mande na moti angala abɔ, na dhaɛ aba ban'doa. 35 Bake babale babá mande na badhɔa a mpuɔ imoti, banga mande na moti na dhaɛ aba ban'doa. [ 36 Baboo babale babá mande asuba a tio imoti, banga mande na moti na moti ab'asakaa.]» 37 Bagoli aba bamulisa bate: «Mokama, yɔnga ndɔ aɔnɛana mande nde iwani?» Eme sunga na Yesu ate: «Áma nde kiinda a be, iwa yɛu bàndia batulanaga mande.»