Maibhe la mbhísi-lua n'a na ebhetebhete
16
Mbusa indɔ Yesu ab'aemaela bagoli nde baɛ maibhe nde ate: «Ntondi moti ai na mbhísi-lua nde maɛ. Bato aba babhia bantɔnga mbhísi-lua ndɔ nɔngɔ aɛ bate: ‹Mbhísi-lua nde maɔ abungisaga lua ndaɔ.› 2 Ìbo yɛu ntondi ndɔ ab'ankoga na ulisa laɛ ate: ‹Yɔnga sina nde nɛɔka na bayɔnga anga aɔ nde? Omopɛ mbɛɛ etangi la ntondɔ nde obhísi ndɔ, nga nnd'aanga ob'obhísa aye ntondɔ namɔ.› 3 Mpa, mbhísi-lua ndɔ ab'ayɔnga asuba a meema aɛ ate: ‹Nɛkɔlanɛ mpa nde iboni? Nga, mokama nde mamɔ a a mbe amoùta bokama la bhísa la ntondɔ ndaɛ nde. Mpa, nnda ne na ekanda la dhɛma la tio. Nangɛ mɛmanaga, nnd'aanga nɛtɔisa, nga nekua soni-li. 4 Abɛ bo, neúbha inde nɛkɔla mande n'aye mokama amobèi a nkási, nga babɛ beli bato nde bamopikila mande nɔngɔ abɔ.›5 Mpa, mbhísi-lua ndɔ ab'aekogisisa bato bɔbhu bande ba na moonda nda mokama nde maɛ ndɔ. Aba babhia moti-moti. Ab'amulisa mmbe maa mosá-mosá ate: ‹Moonda nda mokama nde mamɔ inde o nee a nde enga?› 6 Ab'ansisila ate: ‹Ne na galoa ndaɛ eyana ibale nda gamba.› Mbhísi-lua ndɔ ab'anngodea ate: ‹Ɔbɛsɛ nsaeɔ ndaɔ nde, dia, oikɛ a dodo na oandekɛ eyana imoti.› 7 Mpa, ab'anngodea go matɔɔ ate: ‹Na owɛ moonda la indaɔ a nde enga?› Mmbɔ ab'ansisila ate: ‹Sakib a nganɔ eyana itanɔ.› Mbhísi-lua ndɔ ab'anngodea ate: ‹Ɔbɛsɛ nsaeɔ ndaɔ nde, oikɛ a dodo, oandekɛ ote, eyana ini.› 8 Mpa, mokama ndɔ ab'ambhebha mbhísi-lua a man'diɛ ndɔ, nga ai akɔli a maɛnɛkɔ anja. Nga, bato nde ba lɛɛngɔ nde baúbha sɔlɔlia la éma na maɛnɛkɔ anja a meeme abɔ nyɛna la bato nde bansikisi Mokonga.»
Nto nnd'aanga atɔa n'aji nkɔbɛ nde ma bakama babale
9 Mpa, Yesu ab'atɔdisa go ate: «Bɔɔkɛ inde nenongodea nte, bɔkɔlɛlɛi ntondɔ nda na lɛɛngɔ oni nde nga boopatɛ badhanu. Nga esa atɔɔ n'aye mande ntondɔ ndɔ asi, mpa, na ibɔ aba banopikila a buki la mɛyɔ. 10 Mmbe a nde nto a domi a mbénɔ a lengela la éma ɛdɛdɛ, kesi abá mande go nto a domi a mbénɔ a lengela la éma atiti. Na mmbe adhema a éma ɛdɛdɛ, nangɛ a éma atiti abá masa ìbo. 11 Mpa na benu na nnd'aye bo na domi a bía nde bɔkɔlɛla ntondɔ nda na lɛɛngɔ oni, màni yɛu anopa mande ntondɔ niina bende bɔkɔlɛlɛ yu? 12 Na nabana nnda bo na domi a lengelela la lua nda nto matɔɔ, màni yɛu aanga anopa mande lua l'indanu?
13 Nnd'a be nkɔbɛ nde aang'aɛkɔlɛla bakama babale mobili. Nga kesi an'ya moti na konda la mmbe matɔɔ. Aɔ go ab'ansikisa moti na bhɔna la mmbe matɔɔ. Nnd'aanga boja bakɔbɛ nde ba Mokonga na kɔlɛla la Ntondɔ.»
Yesu agolisa a yɔnga la Maanɔ nda Mósa n'Ɛbɔamɛ nda Mokonga
14 Ɔka la yɔnga ndɔ bhulibhu, baFalisayo aba bantɛbhɛlaga Yesu nga, ai bakondi ntondɔ kpɛɛ. 15 Mpa, Yesu ab'aengodea ate: «Benu boeangelisa a iso a bato gea-la-bende, bo nde bato a domi. Mokonga yɛu aúbha inde a asuba a meema anu. Mpa boúbhɛ bende inde bato batukumisa, a nde indɔ yɛu Mokonga abhɔnisa.»
16 «Elemɔ a Maanɔ nda Mósa na baketabo a baúbhililic agee na ga kida la elemɔ a Yɔani-Ndiisi. Toa la mbènɔ ndɔ balabha Mbinɔ Anja nd'Ɛbɔamɛ nda Mokonga, na bato-li bɔbhu baengisa au n'ekanda. 17 Aang'aba awɛdɛ anga kobha na dodo nyɛna. Mpa, nnd'a be nangɛ nyia-gbutu a maandekɔ n'ɛdɛ nda Maanɔ nde anyɛna mande bosa.
18 N'aye nto am'bèi nkaɛ na sea la nke matɔɔ akɔli nde bojini. Na n'aye nto n'ammɔmi nke nde munyaɛ am'bèi, n'iyɛ kesi akɔli bojini.»
Maibhe la ntondi na Lajalɔ
19 «Ai be ntondi moti, mmbe ai alɔla masa ngɔmbɛ anja na inda ntondɔ ati. Esa-li bhulibhu ai aléa hɛlɛ bía nde ai nde asuba a dinyɛ. 20 Muyɛnɛ moti, mmbe bankoga bate Lajalɔ ai bambhísa a dodo a iso a mpume a endu a ntondi ndɔ. Ngobho aɛ bhulibhu ai masa ndase. 21 Ai na sei a léa l'adha elea nde ai aguaga kusi a mɛja nda ntondi ndɔ. Nangɛ bamboa bai babhia badiliaga ndase ndaɛ. 22 Muyɛnɛ ndɔ ab'akua, na bamalaeka aba bambhísa a ekubha a Abolaimu. Na ntondi ndɔ n'iyɛ ab'akua, aba bamúmba.
23 Asuba a nji a baku áma nde ai anobela ndɔ, ab'amesa moo aɛ, ab'amɔna Abolaimu dhɔlɔ, na Lajalɔ n'aiki a ekubha aɛ. 24 Mpa ab'aelakela ate: ‹Abolaimu, ebha! Okuɛ ngomi ami! Onteɛ ami Lajalɔ bende aùbhɛ sese a mbùa-njaga aɛ asuba a íbo, nga adhɛisɛgɛ edaa ami. Nga eme a a mbe nenoba nde noba asuba a nsa nde.› 25 Mpa, Abolaimu ab'ansisila ate: ‹Nami sa! Okanisɛ éma anja-nja nde oi o nee a lenda laɔ, Lajalɔ iyɛ n'anoba. A mbènɔ nde, iyɛ a asuba a bujɛmɛ, mpa na owɛ aye onoba. 26 Nnd'a masa indɔ bosa, a meeme asu na benu a beli kubhu enda makanga sungia inde asokatanisi, anga bande bakabi toa la ani bende bagɛ nɔngɔ anu o, nnd'aanga batɔisa yalea-li. Na benu o, nnd'aanga aba go be na nto nde aang'atɔisa toa la o na yalea la saka oni.›
27 Ntondi ndɔ ab'anngodea go ate: ‹Ebha sɛ! Belebele, onteɛ Lajalɔ a endu a abhami. 28 Nga, ne na batika ami batanɔ, agɛ aehanɛ nga babhia-i áma a noba nde.› 29 Eme sunga na Abolaimu ate: ‹Bandɔ ba na Maanɔ nda Mósa na inda baúbhilili iyo. Baɛɔkaneɛ bandɔ.› 30 Ntondi ndɔ ab'ayɔnga ate: ‹Iisi, ebha Abolaimu. N'aye dhu nto atoi angala a baku, ab'aga nɔngɔ abɔ, kesi batia tambela labɔ.› 31 Abolaimu iyɛ ab'ayɔnga go ate: ‹Na nabana bakɔmi ɔka la Mósa na baúbhilili, nangɛ nto ajujuɛ angala a baku, nnd'aanga balebea.›»