Yesu nnd'aɛkɔmi bato a ilɔlɔ
15
Balèisi-manjànjà na bato a ilɔlɔ bati ai babhiaga mpiti a Yesu nga ɔkanea laɛ. 2 Mpa, baFalisayo na bagolisi a Maanɔ aba baingimanaga anga Yesu, bate: «Nto nde aeseseaga bato a ilɔlɔ na léanaga la n'ibɔ.»Maibhe la mboli nde abungi na aɔnɛani
3 Mpa, Yesu ab'aemaela maibhe nde ate: 4 «Màni angala anu yɛu, n'aye a na bamboli eyana imoti na n'aye am'bungisi moti angala abɔ, nnd'aanga aedoa bande batɔɔ ndɔ asuba a ngalagɛ ga kabaga la moti nde abungi kida la mbènɔ nde amɔna nee? 5 Na n'aye amɔni, ab'ajanga na maa laɛ a ɛbhɛga aɛ. 6 Mpa, a kida la nɔngɔ aɛ, ab'aekoga badhaɛ na bande baika a mpiti aɛ na ngodea labɔ ate: ‹Bejangɛ áma imoti, nga aye nɛmɔni mboli nde mamɔ nde ai abungi ndɔ!›» 7 Nenongodei bende, ìbo yɛu abá mande bujɛmɛ mati na kobha anga nto a ilɔlɔ moti mmbe atii tambela laɛ ajede, nyɛna la bato a domi ekomi sobe-komi na sobe-komi bande nnda ba na sei a doa la ilɔlɔ.
Maibhe la kichɛlɛ nde abungi na aɔnɛani
8 Ago, nke sina yɛu, n'aye a na kichɛlɛ mɔkɔ na n'aye abungisi imoti, nnd'aanga alolisa kasoko ndaɛ, na kpɔla la endu a nkabɔ a iyu hɛlɛ kida la mbènɔ nde aɔna nee? 9 Na n'aye aɔni yu, ab'aekoga badhaɛ na bande ba a mpiti aɛ na ngodea labɔ ate: «Bejangɛ áma imoti, nga aye nɛɔni kichɛlɛ nde ai abungi anga ami ndɔ.» 10 Nenongodei bende, ìbo yɛu bamalaeka nde ba Mokonga babá asuba a bujɛmɛ mati a yɔnga la nto a ilɔlɔ moti mmbe atii tambela laɛ.
Maibhe la nyia-m'bungɔgɔ mmbe aɔnɛani
11 Yesu ab'ayɔnga go ate: «Nto moti ai na baluana nde baɛ babale. 12 Mmbe nii ab'anngodea abhaɛ ate: ‹Ebha, omopɛ gbutu a moando la inamɔ.› Abhabɔ ab'abua abɔ lua ndaɛ ndɔ. 13 Mbusa kia ɛdɛ, mmbe nii ndɔ ab'anyangaga nkumba ndaɛ bhulibhu na ga la lɛɛngɔ a dhɔlɔ. Iyo, ab'alenda asuba a bujede na gɔba la lua ndaɛ bhulibhu asuba a jali-jali holoholo. 14 Mbusa a gɔba la lua ndaɛ bhulibhu, nnja mati ab'agua a lɛɛngɔ ndɔ na nii ndɔ ab'aetia muyɛnɛ. 15 A yɔnga la indɔ, ab'aga akaba nkási anga nto moti mmbe maa lɛɛngɔ ndɔ. Nto ndɔ ab'antea na tio aɛ, ga langa la bangea nde baɛ. 16 Na nii ndɔ ai na sei a boekutisa la na adha tɔnɛ nde bangea ndɔ ai baléa. Mpa nnd'ai na nto nde ai aanga ammòa yu.
17 Mpa ab'akɛngɛtisa boeanilia, na ab'ayɔnga ate: ‹Bato a nkási benga nde ba ebha babhomoa n'ekuta, mpa eme ani, nekua na nnja!› 18 Nesiana mande nɔngɔ a ebha. Nenngodea mande nte: ‹Ebha, nealii anga Mokonga na anga aɔ. 19 Anga indɔ, nnda aye nɛtɔlɛli omotangɛ bía naɔ. Omobhísɛ ye masa bía adha bato a nkási nde baɔ.› 20 Ab'asiana nɔngɔ a abhaɛ. N'aha dhɔlɔ n'ɛdɛ, abhaɛ ab'amɔna, na kulia laɛ elúngu kpɛɛ. Ab'atatea naa nde a nee na ab'aga angulia na ab'ansesea. 21 Nii-li ab'anngodea ate: ‹Ebha, nealii anga Mokonga na anga aɔ. Anga indɔ, nnd'aye nɛtɔlɛli omotangɛ bía naɔ...› 22 Mpa, abhaɛ ab'aengodea bakɔbɛ nde baɛ ate: ‹Bokamisɛgɛ! Bobhiɛ na nkanjo ind'anja kpɛɛ ndɔ, bɔnɔlisɛ. Bogesɛ pɛtɛ a mbùa-njaga aɛ, na bɔnɔlisɛ belatɔ. 23 Bombhiɛ na nyia-ntɛ nde anɔni, bɔnsɛngɛ. Beléɛ na bejangɛ, 24 nga nami nde ai n'aye aku n'iyɛ aye ajujuu, ai n'aye abungi n'iyɛ aɔnɛani.› Na aba bakɛngɛtisa janga.
25 A mbènɔ ndɔ, naɛ la mmbe omi ai na tio. A siana laɛ, ab'akida bhaandɔ a endu, ab'aɔka lembɔ na njoo. 26 Ìbo yɛu, ab'ankoga adha bakɔbɛ nde ba abhaɛ moti. Ab'amulisa ate mbénɔ ee yɛu akidi we. 27 Eme sunga na nkɔbɛ ndɔ ate: ‹Mɔtɔ aɔ yɛu akidi. Mpa, abhaɔ ansɛngi aɛ nyia-ntɛ nde anɔni nga naɛ asiani nɔngɔ aɛ n'aha akandigi.› 28 Naɛ la mmbe omi ndɔ ab'asunula na kɔ́ma la ngia l'asuba a endu ndɔ. Ìbo yɛu, abhaɛ ab'aóba na ntanga, ab'angamelaga nga angiɛ. 29 Nii ndɔ ab'ansisila abhaɛ ate: ‹Chaa, ebha! Ka aye elemɔ ati na nɛɔkɔlɛla nkási, nɛkɔmi-mbɛ mɛnɔ kɔla la inde omongodei. Mpa, omopi-mbɛ mɛnɔ nangɛ nyia-mɛmɛ, gea-la-bende nejangɛ na badhami. 30 Mpa, mbènɔ nde naɔ nde akidi nee, mmbe ali lua ndaɔ bhulibhu na bambalaka, a a mbɔ ommói aɛ nyia-ntɛ nde anɔni ndɔ!›