9
Mpa go, Yesu ab'aengodea go ate: «Nenongodei domi, angala a bato nde ba ani nde, adh'abɔ nnd'alɛ bakua mosá la ɔna l'Ɛbɔamɛ nda Mokonga n'abhia n'ekanda.»Bootia la ngobho a Yesu
(Olengɛ go Mat 17.1-13; Luk 9.28-36)
2 Mbusa kia motoba, Yesu aba am'bɛsa Pɛtɛlɔ, Yakɔbɔ na Yɔani, ab'aga n'ibɔ mbamba antata a mamba áma nde asengedi. Mosá labɔ, ngobho a Yesu ab'aetia. 3 Ngɔmbɛ ndaɛ ab'abhumana n'angelemana masa bo bhiɛ! Bobhu la inde nto nnd'aanga atɔisa ngelemisa-li asuba na lɛɛngɔ oni†. 4 Mpa, Mósa na Elia aba baeóbela, na baambola na Yesu. 5 Pɛtɛlɔ ab'anngodea Yesu ate: «Labia, abɔngi angasu ika la iyani. Behìɛ ngbangba isalɔ: imoti indaɔ, imoti nda Mósa na ind'atɔɔ nda Elia.» 6 Pɛtɛlɔ ai aboli mbénɔ ayɔngɛ nde ee, nga, iyɛ na badhaɛ bɔɔ ai n'aye aebai kpɛɛ. 7 Mpa, ebundu ab'abhia aedegelaga, na moyo ab'atoa au ate: «Mmbe a nde Nami, mmbe nenkondi kpɛɛ. Bɔmɔkaneɛi†!» 8 Makanga lɛbha, lenganaga l'a mpiti abɔ, nnd'ai ye bamɔni nto matɔɔ masa Yesu iyɛ nganga na ibɔ.
9 N'aha badhidha toa la na mamba, Yesu ab'aesosia bende bantɔmila-i nto inde adhu baɔni, kida la esa nde Muna-Nto ajujua mande nee toa la angala bàku. 10 Bagoli aba babhísa yɔnga ndɔ. Mpa, na baulisana bate: «Jujua l'angala bakú a nde yɔnga la iboni?»
11 Aba bamulisa Yesu bate: «Nga éma sina bangɛngɛlɛ a Tɔlati bayɔnga bate atɔlɛli Elia abhiɛ mbɛɛ mosá†?» 12 Yesu ab'aesisila ate: «A nde domi, Elia abhia mbɛɛ bhia bɔngisa la éma-li bhulibhu. Mpa nga éma sina baandeki bende Muna-Nto anoba mande kpɛɛ na bhɔnisa laɛ†? 13 Mpa, nenongodea, Elia aye abhii, na bato ai bankɔli bía nde ai bakondi nee, sinde ai baandeki nee a yɔnga laɛ.»
Yesu anamisi nii nde a na baketi
(Olengɛ go Mat 17.14-21; Luk 9.37-43)
14 Mbènɔ nde Yesu na bagoli nde basalɔ ndɔ bakidi ne bhi-bhi la bagoli batɔɔ, aba baɔna da-mɔlɔndɔ a bato na baetimbi. Bangɛngɛlɛ a Tɔlati na basisilanaga yɔnga n'ibɔ. 15 Abi ndɔ, inde bamɔni na Yesu bende, ab'aebangisa kpɛɛ. Aba babhia mbangɔ bhia sesea laɛ. 16 Yesu ab'aeulisa bagoli nde baɛ ate: «Bokakatana na ibɔ nde a yɔnga la ee?»
17 Mpa, nto moti angala a mɔlɔndɔ a bato ndɔ ab'ansisila ate: «Ngolisi, adhu nembhii na nami nɔngɔ aɔ, nga a na nketi nde antalokisa yɔnga. 18 Mpuɔ-li bhulibhu áma nde nketi ndɔ ankidia, ankpula a dodo. Mpa nii-li atosa hulu a nyɔɔ aɛ na goga la minyɔ aɛ, na dhendemisa laɛ. Adhu neengodei bagoli nde baɔ bende bam'bèɛ nketi ndɔ, mpa nnd'adhu batɔisi.» 19 Yesu ab'aengodea ate: «Chaa! Benu ɛbɔti a makanga boosobela nde sa! Neba lɛ na benu nde kida la esa sina? Kida la mbènɔ sina yɛu nenokumbila lɛ nkumba ndanu? Bombhiɛi to na nii ndɔ ani.» 20 Aba bambhia nee a mpiti a Yesu. Ɔna la Yesu, makanga lɛbha, nketi ndɔ ab'ansugbaga nii ndɔ kpɛɛ, ab'angusa a dodo, ab'aelingitisaga na hulu n'atoa a nyɔɔ aɛ. 21 Yesu ab'amulisa abha-nii ndɔ ate: «A nde toa la elemɔ sina yɛu naɔ nde akɔlana bende?» Emesunga n'iyɛ ate: «Toa la konii laɛ. 22 Nkobà ati, nketi-li aki ammaa a nsa aɔ go asub'ibo nga angɔbɛlɛgɛ. Mpa n'aye ɔtɔisi, osokuliɛ elúngu na osotabelɛ!»
23 Yesu ab'anngodea ate: «Nga éma sina ɔyɔngi bende n'aye ɔtɔisi? Éma-li bhulibhu atɔisana anga mmbe a na boosobela.» 24 Dia ndɔ, abha-nii ndɔ ab'akoga kpɛɛ ate: «Nelebei, obhiɛ omotabelɛ a bóla la boosobela namɔ nde!» 25 Yesu, ɔna la sinde mɔlɔndɔ a bato babhia na batulanaga nee, ab'ankalea nketi ndɔ ate: «Owɛ nketi a ebhobho na ekulukulu nde sa! Neososii nte otoɛ to anga nii nde, na osiana-i ye mɛnɔ angaɛ!» 26 Nketi ndɔ ab'alaka na sugbaga la nii ndɔ kpɛɛ, ab'atoa angaɛ. Nyia-muluana ndɔ ab'aika bía mmbe aku. Da-bato nde bai be aba bayɔnga bate: «Aku.» 27 Mpa Yesu ab'abɛsa njaga aɛ, ab'ammesa n'iyɛ ab'ama. 28 Yesu siana la na nji, bagoli nde baɛ aba bamulisa mbamba bate: «Nga bóni yɛu nnd'adhu bɛtɔi bèa la nketi ndɔ?» 29 Emesunga na Yesu ate: «Mambala nketi ndɔ masa ɛmɛmi yɛu aanga am'bèa.»
Yesu alabhi go mbinɔ a kuá laɛ na jujua laɛ
(Olengɛ go Mat 17.22-23; Luk 9.43-45)
30 Aba batoa wa na tɔmba la lɛɛngɔ a Galilaya. Mpa Yesu nnd'ai akabi ate nangɛ nto moti aúbhɛ áma ai ba beli. 31 Nga ai aegolisa bagoli nde baɛ n'aengodea ate: «Muna-Nto bamóbisa mande a njaga a bato na bande bammóa mande na mbusa esa isalɔ ajujua mande toa l'a kukua.» 32 Mpa nnd'ai baɔka maibhe ndɔ ago na batea ulisa laɛ.
Màni yɛu a nde nto mati a ɛbɔamɛ nda na kobha?
(Olengɛ go Mat 18.1-5; Luk 9.46-48)
33 Aba baga naa Kapɛlɛnaumu. Mbènɔ nde Yesu ai angi n'endu ab'aeulisa ate: «Amande bɔyɔnganaga a nkunguananu nde yɔnga sina na asii?» 34 Aba badhaa, nga na asii ai basanea nde úbha la mbénɔ màni yɛu a nde omi nyɛna la badhaɛ. 35 Mpa Yesu ab'aika a dodo na koga la bagoli nde baɛ bande bamɔkɔ́ na babale na ngodea labɔ bende: «N'aye nto akabi ate aetiɛ mmbe maa mosá-mosá, abɛ mmbe maa mbusa-mbusa na nkɔbɛ nde ma bato-li bɔbhu.» 36 Mbusa indɔ, Yesu aba am'bɛsa nii moti na bhísa laɛ a meeme abɔ na bomba laɛ ab'aengodea ate: 37 «Nto n'aye ansesei nii moti bía mmbe a ina ami, kesi amosesei nde eme. Na mmbe amosesei, nndag'a nde eme yɛu amosesei, mpa kesi ansesei nde mmbe amotei.» 38 Mbusa iwa, Yɔani ab'anngodea ate: «Ngolisi, adhu bɛmɔni nto moti n'aebèa baketi a ina aɔ, mpa adhu bete bɛnkɔ́misɛ nga nndag'asobelea.» 39 Yesu ab'aengodea ate: «Bonkalelisa-i, nga nnd'a weli mmbe aang'akɔla ekesɔ a ina ami na mbusa-li ab'amokumia ajede. 40 Mmbe nndag'a njiu asu mmbɔ a nde mmbe masu. 41 Nga kela nto nde anopa kɔpɔ imoti la íbo a ina ami, nga bo nde bato nde ba Kilisitɔ, nenongodea domi, nnd'aanga abungisa elèe ndaɛ. 42 Nabana a weli nto nde angusa moti angala a bani nde bamolebei nde asuba ilɔlɔ, abɔngi bannyangɛ a kingo aɛ da-ɛtɛ na maa laɛ asuba a ngɛji mati. 43 Nabana njaga aɔ aogusa asuba a ilɔlɔ, oudɛ. Abɔngi angaɔ ngia l'asuba a bujɛmɛ na njaga moti sìa, makanga ja la na njaga ibale mbusa iwa ob'oga nde asuba a Gɛɛna, áma nsa nnd'aki alimia [ 44 áma nde banguja nde nnda bakua, na nsa nnd'alimia we.] 45 Na ego laɔ n'aye aogusa asuba a ilɔlɔ, oudɛ. Abɔngi angaɔ ngia asuba bujɛmɛ na ego imoti bosa, makanga ja la na ego ibale mbusa iwa ob'oga nde asuba a Gɛɛna, áma nsa nnd'aki alimia [ 46 áma nde banguja nde nnda bakua, na nsa nnd'alimia we.] 47 Na n'aye iso aɔ aogusa asuba a ilɔlɔ, ɔkɔngɛ. Abɔngi angaɔ ngia asuba bujɛmɛ na iso moti sìa, makanga ja la na iso ibale mbusa iwa ob'oga nde asuba Gɛɛna, áma nsa nnd'aki alimia 48 áma nde banguja nde nnda bakua, na nsa nnd'alimia we†.