Yesu aelisi bato ɛlufu ini
(Olengɛ go Mat 15.32-39)
8
A elemɔ ndɔ, da-mɔlɔndɔ a bato ai batulanigi go. Bía nde nnda bai na inde baléa, Yesu ab'aekoga bagoli nde baɛ na ngodea labɔ ate: 2 «Ngomi a mɔlɔndɔ a bato nde amomói. Nga, a a nde aye kia isalɔ na ba a mpuɔ imoti n'eme ani nde, mpa na nnda ba na éma nde baléa. 3 Na n'aye neejisi nɔngɔ abɔ nja, kesi badusuanelaga na asii nga, adha abɔ auma batoigi dhɔlɔ.» 4 Emesunga na bagoli nde baɛ bate: «Iwani yɛu aanga bɛɔna mokate nde aekutisa bande bɔbhu a ngalagɛ nde?» 5 Yesu ab'aeulisa ate: «Bo nde na mokate enga ani?» Emesunga n'ibɔ bate: «Sobe-lalɔ.»6 Mpa, Yesu ab'aesosia mɔlɔndɔ a bato ndɔ bende baikɛgɛ a dodo. Ab'abɛsa mokate sobe-lalɔ ndɔ, ab'ansìma Mokonga, ab'abúnaga yu, ab'aepa bagoli nde baɛ nga baegabheɛ bato. Aba baegabheaga mɔlɔndɔ a bato-li. 7 Na bai go na banyia-basale bɛdɛ. Yesu ab'ansìma Mokonga a yɔnga la banyia-basale ndɔ, na ngodea la bagoli nde baɛ bende n'iyu baegabheɛ bato-li. 8 Bato aba baléa, na aba bakuta. Bagoli aba basɔngiaga sakelaga nde ai atigigi, ab'atuma etele sobe-lalɔ. 9 Bato ndɔ bai bía ɛlufu ini. Mpa, Yesu ab'aejisa nɔngɔ abɔ. 10 Makanga lɛbha, Yesu ab'adaa a koko na bagoli nde baɛ, na ga labɔ a lɛɛngɔ a Dalimanuta.
BaFalisayo bamɛmi mbunde la bangisa
(Olengɛ go Mat 16.1-4)
11 BaFalisayo aba bakidianaga na kɛngɛtisa la ulisaga la Yesu. A kaba la lɛ̀nga laɛ, aba bammɛma bate aɛɔngiɛ mbunde la bangisa, a úbhisa la bende Mokonga yɛu antei. 12 Mpa, Yesu ab'ahola mɛhu aɛ na heuma la kpɛɛ, na yɔnga la ate: «Anga éma sina yɛu bato nde ba elemɔ nde bakaba mbunde la bangisa? Nenongodei domi bende, Mokonga nnd'aanga aepa yu.» 13 Mpa, Yesu ab'aedoa, na ab'adaa go a koko na jabha laɛ kubhi a ngɛji.
Masau nda baFalisayo na inda Ɛlɔdɛ
(Olengɛ go Mat 16.5-12)
14 A jabha labɔ, bagoli ab'ai babosela kumba la mokate. Ai bangesi masa moti asuba a koko-li. 15 Yesu ab'aesosia ate: «Boolengelelɛ hɛlɛ, boteɛi masau nda baFalisayo na inda Ɛlɔdɛ.» 16 Bagoli aba bayɔngisanaga nkunguanabɔ bate: «Ayɔngi bo nga nnda be na mokate.»
17 Yesu úbhilila la inde ai bayɔnga, ab'aeulisa ate: «Anga ee yɛu bɔyɔnganaga masa a yɔnga la mokate nde nndaga bo nee? Bɔɔki-mbɛ na boúbhi-mbɛ? Nga boni yɛu meema anu atiadi bende? 18 Bo na iso, nnda bɔɔna? Bo na etue, nnda bɔɔka†? Na nnd'aye bokanisa, 19 mbènɔ nde ai nebúnigi mokate itanɔ anga bato ɛlufu itanɔ ndɔ? Gbutu-gbutu a mokate nde ai bɔsɔngii ndɔ, ai botumisi nde etele enga?» Eme ibɔ: «Mɔkɔ́ na ibale†.» 20 «Na mbènɔ nde nebúnigi mokate sobe-lalɔ a bato ɛlufu ini ndɔ, ai nde etele enga yɛu ai botumisigi au gbutu-gbutu a mokate?» Eme ibɔ: «Sobe-lalɔ†.» 21 Na ab'aengodea ate: «Kida la mbènɔ nde bɔɔki-mbɛ a a nde ɔka?»
Yesu anamisi timetime moti naa Bɛtɛsaida
22 Yesu na bagoli nde baɛ aba bakida Bɛtɛsaida. Iyo aba bambhia aɛ na timetime moti, aba bangamelaga Yesu gela bende ambhɛdiɛ adha yɛ. 23 Yesu ab'andhungila timetime ndɔ a njaga, na ga laɛ nee na ngba la na nji. Mpa, ab'asìa soi a iso aɛ, na bhísa la njaga antata aɛ na ulisa laɛ ate: «Aye ɔɔna éma?» 24 Timetime ndɔ ab'akoda iso aɛ, ab'agea ate: «Nɛɛɔna bato bía mee nde atambaga.» 25 Yesu ab'abhísa go njaga aɛ antata a iso a timetime ndɔ, n'iyɛ ab'alama na ɔna la éma-li bhulibhu hɛlɛ. 26 Mpa, Yesu ab'antea bende asianɛ nɔngɔ aɛ ate: «Ɔnyɛna-i ye go a nji nde.»
Pɛtɛlɔ amúbhi Yesu bía Masiaa
(Olengɛ go Mat 16.13-20; Luk 9.18-21)
27 Yesu na bagoli nde baɛ aba baga a banyia-nji ntuantua nda mpiti a bɔma nda Kaisalia-Filipɔb. Na asii, Yesu ab'aeulisa bagoli nde baɛ ate: «Bato bayɔnga bate ne nde màni?» 28 Aba bansisila bate: «Bato moti-moti bagea bate o nde Yɔani-Nndiisi. Bande batɔɔ bagea bate o nde Elia, na batɔɔ go bate o nde adha baúbhilili nde ba Mokonga.» 29 Yesu ab'aeulisa go ate: «Mpa, na benu bote ne nde màni?» Emesunga na Pɛtɛlɔ ate: «Owɛ, o nde Masiac.» 30 Mpa, Yesu ab'aesosia bende banngodea-i nto mbinɔ aɛ.
Yesu atɔmia mbinɔ a kuá laɛ na jujua laɛ
(Olengɛ go Mat 16.21-28; Luk 9.22-27)
31 Mbusa wa, Yesu ab'akɛngɛtisa golisaga la bagoli nde baɛ ate: «Atɔlɛli iyɛ Muna-Nto anobɛ kpɛɛ, bakpɛga, baomi nde ba baɛlɛli na bangɛngɛlɛ a Tɔlati ban'yɛ na móisisa laɛ. Na mbusa a kia isalɔ ajujua mande a toa l'a kukua.» 32 Ai abhòmeli yɔnga ndɔ nde bhòmela. Pɛtɛlɔ ab'ankoga Yesu mbamba na kɛngɛtisa la solea laɛ. 33 Yesu ab'aetiisana, aɛɔni ye bagoli nde baɛ, mpa ab'ankalea Pɛtɛlɔ kpɛɛ ate: «Toɛ to a iso ami Sitani nde sa! Nga, maakɔ aɔ nndaga bía inda Mokonga, mpa, a nde inda koto.»
Sinde aanga bam'belea na Yesu
34 Mbusa indɔ, Yesu ab'aekoga mɔlɔndɔ a bato na bagoli nde baɛ, ab'aengodea ate: «N'aye nto akondi belea lami, atɔlɛli aɛkɔ́mɛ iyɛ amɛnɛ. Akumbɛ mosalaba ndaɛ, na amobeleɛ. 35 Nga, nto nde akonda lamisa la lenda laɛ, abungisa mande yu. Mpa mmbe abungisa lenda laɛ a yɔnga lami na a yɔnga la Mbinɔ Anja, mmbɔ yɛu alamisa mande yu. 36 Nga a nde a yɔnga la bonja sina yɛu nto aelingɛ na éma bhulibhu nda na lɛɛngɔ, na bungisa la lenda laɛ? 37 Éma sina yɛu nto aanga agabha nga alamisɛ lenda laɛ? 38 N'aye nto amokulia soni na a yɔnga lami mosá la bato nde ba ɛbɔtɛani nda bato a ilɔlɔ na bande bankɔ́mi Mokonga nde, mpa iyɛ Muna-Nto ankulia mande soni, esa nde abhia mande ne a boumu nda Abhaɛ áma imoti na bamalaeka a bobhu.»