Yesu anamisi n'dɔtu
(Olengɛ go Mat 9.1-8; Luk 5.17-26)
2
Mbusa kia ɛdɛ, Yesu ab'asiana go naa Kapɛlɛnaumu. Mbinɔ aɛ ab'andanda gela bende a asub'endu. 2 Da-mɔlɔndɔ a bato aba batulanaga wa, kida la bende nnd'ai ye be mpuɔ asuba a endu-li, nangɛ na nsɛngɛ a iso a mpume-li. Yesu ai aegolisa yɔnga nda Mokonga. 3 Mpa bato báni bende ab'ai babhia nɔngɔ a Yesu na bankumbi nto nde ngobho aɛ ai n'aye aku. 4 A ɔna la sinde nnd'ai aanga batɔisa kidisa laɛ mosá la Yesu a yɔnga la mɔlɔndɔ a bato, mpa aba badaa a guamuujɔ, kida la na ntɔndɔ a mpuɔ nde Yesu aleɔ. Aba bakakoa be, aba bandhidhisila n'dɔtu ndɔ be, n'ale antata a ekà. 5 Yesu ɔna la boosobela labɔ, ab'anngodea n'dɔtu ndɔ ate: «Nami, nelilii ilɔlɔ ndaɔ.»6 Mpa, adha bangɛngɛlɛ a Tɔlati bande bai baiki wa aba baeulisa asuba a meema abɔ bate: 7 «Anga éma sina yɛu nku-ganja nde ayɔngi bende? Amɔtigi nde Mokonga. Màni yɛu aanga alilia ilɔlɔ na nndaga Mokonga iyɛ amɛnɛ?» 8 Yesu ab'ai aúbhilila inde bai baaka asuba a meema abɔ na ngodea labɔ ate: «Anga éma sina yɛu boaka ìbo a meema anu? 9 Éma sina yɛu awɛdɛmani kpɛɛ a ngodea la n'dɔtu bende: ‹Nelilii ilɔlɔ ndaɔ› na yɔnga la bende: ‹Mɛ to, okumbɛ ekà ndaɔ na otambɛ!›? 10 Mpa, nga boúbhɛ gela bende: Muna-Nto, a na bokama la lilia la ilɔlɔ na dodo oni…» mpa, ab'anngodea n'dɔtu ndɔ ate: 11 «Mɛ to! Ɔbɛsɛ ekà ndaɔ na ogɛ nɔngɔ aɔ.» 12 Makanga lɛbha, ab'ama, ab'abɛsa ekà ndaɛ na óba mosá la bato-li bɔbhu. Indɔ ab'aebangisa bato bɔbhu. Aba bambhebha Mokonga, bate: «Bɛɔni-mbɛ mɛnɔ éma bía inde.»
Yesu ankogi Lawi
(Olengɛ go Mat 9.9-13; Luk 5.27-32)
13 Yesu ab'aga go na nkpalɔ a ngɛji nda Galilaya. Mɔlɔndɔ a bato ai babhia nɔngɔ aɛ, n'iyɛ ai aegolisa. 14 N'adhu anyɛna ab'amɔna Lawia, muna-Alifayo, n'aiki a ntua la lèisila la au manjanja. Yesu ab'anngodea ate: «Omobeleɛ!» Lawi ab'ama na beléá laɛ.
15 Adhoi ndɔ, Yesu n'aha aléanaga nɔngɔ a Lawi, balèisi a manjanja bati na bato a ilɔlɔ bai baléanaga na Yesu na bagoli nde baɛ nga, bato bati bía bandɔ ai bam'belea. 16 Bangɛngɛlɛ a Tɔlati bande bai a boio nda baFalisayo, mbènɔ nde bamɔni na Yesu n'aléana na balèisi a manjanja na bato a ilɔlɔ ndɔ, aba baeulisa bagoli nde baɛ bate: «Éma sina nde? Aléana na balèisi a manjanja na bato a ilɔlɔ?» 17 Yesu aɔki ye indɔ, ab'aengodea ate: «Bato nde bakandigi nnda ba na sei a namisi. Bajegi yɛu. Nndaga nebhii nde áma koga la bato a domi. Neebhilii gɔɛ nde bato a ilɔlɔ.»
Yesu agolisa a yɔnga la mɛma makanga léa l'eléa
(Olengɛ go Mat 9.14-17; Luk 5.33-39)
18 Esa imoti, bagoli nde ba Yɔani na baFalisayo aba baika makanga léa l'eléa a yɔnga la mɛma la Mokonga. Anga indɔ, bato aba babhia banngodea Yesu bate: «Anga éma sina, bagoli nde ba Yɔani na bagoli nde ba baFalisayo baika makanga léa l'eléa, mpa bagoli nde baɔ, ibɔ iisi?» 19 Emesunga na Yesu ate: «Mpa bande baekogi a mpuɔ a ehali, boaki bote aanga baika makanga léa l'eléa n'aha baiki na nhali-li? Nndag'a bo, n'aha baiki na nhali-li, nnd'aanga baika makanga léa l'eléa. 20 Mpa abhia mande esa nde nhali atoa mande a meeme abɔ, na a esa ndɔ yɛu baika mande makanga léa l'eléa.
21 Nnd'a na nto nde aanga abɛsa hale a ngɔmbɛ nda mbènɔ-mbènɔ na dandia-li a ngɔmbɛ nda kala. N'aye akɔli bo, kesi haleka a ngɔmbɛ nda mbènɔ-mbènɔ ndɔ abhòma ngɔmbɛ nda kala ndɔ, na boobhòma-li ab'aetia ati. 22 Nndag'a go na nto nde aanga abɛsa esima nda kala nde bakɔkɔtii na ntɛga la nyama na dua l'asubi divai nda mbènɔ-mbènɔ. N'aye akɔli bo kesi divai-li abhòma esima ndɔ na ibale-li bhulibhu ab'abunga. Mpa atɔlɛli gɔɛ nde dua la divai nda mbènɔ-mbènɔ asuba a esima nda mbènɔ-mbènɔ.»
Yesu a nde Mokama la Sabato
(Olengɛ go Mat 12.1-8; Luk 6.1-5)
23 Esa la sabato, Yesu na bagoli nde baɛ aba bakpangisanaga tio a nganɔ. Na batambaga, bagoli nde baɛ aba bakɛngɛtisa kɔdaga l'adha mbùa a nganɔ-li. 24 Mpa, baFalisayo aba banngodea Yesu bate: «Ebha mokula! Anga éma sina bagoli nde baɔ bakɔla nkási na nnd'atɔlɛli kɔla-li esa la sabato?» 25 Yesu ab'aesisila ate: «Bɔsɔmi-mbɛ mɛnɔ inde Daudi na bato nde baɛ ai bakɔli esa nde ai báku na nja na nnda ba na éma la léa? 26 Ai nde a mbènɔ nde Abiatali ai nee mɔɛlɛli mati. Daudi ai angi asuba a endu a Mokonga, ab'ai aléa mokate nde baɛlɛli aki bagabha anga Mokonga. Maanɔ ndasu asosii bende masa baɛlɛli yɛu aanga baléa mokate ndɔ. Mpa, Daudi ai abɛsi na ab'aepa na bato nde baɛ.» 27 Na Yesu ab'ai aengodea ate: «Mokonga ai abhísi sabato nde a yɔnga la nto. Nndag'ai ambhísi nto a yɔnga la sabato. 28 Anga indɔ, Muna-Nto a nde Mokama nangɛ mmbe maa sabato.»