Mbinɔ Anja sinde
Malekɔ
ai aandeki nee
Yɔani-Nndiisi alabha Mbinɔ Anja
(Olengɛ go Mat 3.1-12; Luk 3.1-18; Yɔan 1.19-28)
1
Ibende yɛu Mbinɔ Anja nda Yesu Kilisitɔ, Muna-Mokonga, ai akɛngɛtisi nee. 2 Mokonga ai ayɔngɛli a ketabo nda múbhilili Isaya bende:«Aande nentea ntɔmii-mbinɔ nde mamɔ mosá laɔ nde,
nga akɔkɔtiɛ asii ndaɔ†.
3 Nto moti alabha na ngalagɛ ate:
‹Bɔkɔkɔtiɛ ahe nda Mokama!
Bokakiɛ aɛ banyia-asii nde ame hɛlɛ!›»
4 Adhoi ndɔ, Yɔani-Nndiisi ab'aóbela na ngalagɛ, n'aelabhela bato ate: «Botiɛi meema anu, boondiisisɛ, nga Mokonga aliliɛ ilɔlɔ ndanu.» 5 Bato bɔbhu bande ba lɛɛngɔ a Yudɛa na bande ba bɔma nda Yɛlusalɛma ai baga nɔngɔ aɛ. Ai babhia bangoda ilɔlɔ ndabɔ, n'iyɛ ab'aendiisa asuba a íbo Yɔlɔdani.
6 Yɔani ai alɔla ngɔmbɛ nde ai bakɔkɔtii na tinda la ngamia, n'aetigii ngoli a kɔjɔ a mpende aɛ. Eléa ndaɛ ai nde banyɔnyɔ na boi nda na ndula. 7 Ai alabha ate: «Nto moti abhia mande mbusa ami, a na ekanda nyɛna lami, mmbe nnda nɛtɔlɛli nangɛ kukuma nga koda la ngoli a belatɔ ndaɛ. 8 Eme nenondiisi a íbo, mpa iyɛ gɔɛ yɛu anondiisa mande na Meema Mbhumani.»
Ndiisa la Yesu na lɛ̀nga laɛ
(Olengɛ go Mat 3.13—4.11; Luk 3.21-22; 4.1-13)
9 Adhoi ndɔ, Yesu ab'atoa naa Najalɛti nda Galilaya, na Yɔani ab'anndiisa asuba a Yɔlɔdani. 10 A mbènɔ nde ai atoa nee asuba a íbo ndɔ, ab'aɔna kobha n'aeukuu, na Meema Mbhumani n'asìma antata aɛ bía eyenga. 11 Moyo ab'atoa na kobha bende: «Owɛ, o nde ngɔmu nde mamɔa, mmbe nenkondi kpɛɛ. Ne na bujɛmɛ mati a yɔnga laɔ.»
12 Makanga lɛbha, Meema Mbhumani ab'anhahamisa Yesu na ga laɛ nee na ngalagɛ. 13 Ab'aika na ngalagɛ kia ekomi ini. Iyo, Sitani ab'anɛnga. Yesu ai áma imoti na banyama nde ba na ndula, na bamalaeka ai bantabela.
Yesu aekogi bagoli nde ba mosá-mosá
(Olengɛ go Mat 4.12-22; Luk 4.14-15; 5.1-11)
14 Mbusa inde bannyangi na Yɔani, Yesu ab'aga naa Galilaya. Ai alabha Mbinɔ Anja nda Mokonga, 15 ate: «Mbènɔ-li aye akidi, nga Ɛbɔamɛ nda Mokonga aye a bhi-bhi. Botiɛ meema anu na bolebeɛ Mbinɔ Anja.»
16 Yesu ai atambaga na nkpalɔ a ngɛji nda Galilaya, ab'amɔna Simoni na mɔtɔɔ aɛ Andeleya, na babɛta ntala asuba a ngɛji ndɔ, nga bai nde bande ai bakɔlaga nkási ndɔ. 17 Yesu ab'aengodea ate: «Bobhiɛ bomobeleɛ, nenotia mande balɔbi a bato.» 18 Makanga lɛbha, aba badoa ntala ndabɔ na belea laɛ. 19 Yesu ab'asɛdɛa mosá nɛdɛ, ab'aɛɔna bana-Jɛbɛdayɔ: Yakɔbɔ na Yɔani mɔtɔɔ aɛ. Bai asuba a koko ndabɔ na bakɔkɔtiaga ntala ndabɔ. 20 Dia ndɔ, ab'aekoga. Aba ban'doa abhabɔ Jɛbɛdayɔ na bato a nkási asuba a koko, na beléá la Yesu.
Yesu anamisi nto a baketi
(Olengɛ go Luk 4.31-37)
21 Mbusa a wa, Yesu na bagoli nde baɛ aba baga naa Kapɛlɛnaumu. A esa la sabato, makanga lɛbha Yesu ab'angia asuba a endu a sinagogi, na kɛngɛtisa la golisa la Yɔnga nda Mokonga. 22 Bande bai bamɔkanea ai aebangisi kpɛɛ a sinde ai agolisa nee, nga egolisi aɛ nndaga ai bía inda bangɛngɛlɛ a Tɔlati, mpa ai aegolisa nde bía nto nde a na bokama. 23 A mbènɔ ndɔ, ai asuba a endu a sinagogi ndɔ moo moti mmbe ai na baketi, ab'alaka 24 ate: «Yesu nde maa Najalɛti, okaba angasu nde éma sina? Obhii nde nga osobungisɛ? Neoúbha: o nde Amɛn'a Bobhu nde ma Mokonga.»
25 Yesu ab'aekalea baketi ndɔ ate: «Bodhaɛ to, botoɛ to angaɛ!» 26 Baketi ndɔ aba bansugbaga nto ndɔ kpɛɛ. Aba batoa angaɛ na batata kpɛɛ. 27 Ab'ai aebangisa bato-li bɔbhu kida la boeulisa a nkunguanabɔ bate: «Inde a nde éma sina? A nde mambala egoli atɔɔ, ago a na ekanda! Aesosia baketi na ibɔ aba bamɔka.» 28 Makanga lɛbha, boumu la Yesu ab'andanda a nji nda Galilaya bhulibhu.
Yesu aelamisi bajegi bati
(Olengɛ go Mat 8.14-17; Luk 4.38-41)
29 A toa labɔ asuba a endu a sinagogi ndɔ bende, Yesu na Yakɔbɔ bona Yɔani ab'ai baga na mɔtɛ a Simoni na Andeleya. 30 Iyo, aba bandhonda amá-nka-Simoni n'aekakii a ekà, nga ai n'akpɔkpɔma na heɔ. Aba bankidia na tɔmila la Yesu mbinɔ aɛ. 31 Yesu ab'asɛdɛa a mpiti aɛ, ab'andhunga a njaga aɛ na mesa laɛ. Na nsɛsia ndɔ ab'asía angaɛ. Na nke ndɔ, ab'akɛngɛtisa tabela labɔ.
32 Akidi ɛgɔgɔ, máni n'aye agee, bato aba baebhia aɛ na bajegi bɔbhu na bande ai ba na baketi. 33 Na bato-li bɔbhu nde bai a bɔma ndɔ, ai n'aye batulanigi a iso a mpume-li. 34 Yesu ab'aelamisa bato bati nde bai na jega ntuantua, na bèa la baketi bati. Nnd'ai alebea gela bende baketi ndɔ bayɔngɛ nga ai bamúbhi mbénɔ a nde màni.
Yesu atɔmbi Galilaya bhuu
(Olengɛ go Luk 4.42-44)
35 Umauma kpɛɛ, dhoda n'aha we, Yesu ab'ama, ab'aóba na nsɛngɛ na ga laɛ na a mpuɔ a nganga. Iyo, ab'aga ammɛma Mokonga. 36 Simoni na badhaɛ aba baga áma a nkabɔ aɛ. 37 Aba bandhonda, na ngodea laɛ bate: «Bato bɔbhu baokabaga.» 38 Emesunga na Yesu ate: «Begɛi áma atɔɔ, a nji nda bhibhi-bhibhi lasu neelabhelɛgɛ go bato iyo, nga indɔ yɛu nebhilii.» 39 Ab'aga n'atɔmba nji nde a a Galilaya bhulibhu. Ab'aelabhela bato asuba a endu a sinagogi ndabɔ, na iyo ab'aebèa go baketi.
Yesu anamisi nto a kebukebu
(Olengɛ go Mat 8.1-4; Luk 5.12-16)
40 Nto a kebukebu moti ab'abhia a mpiti a Yesu, ab'aluta mooku laɛ a dodo mosá la Yesu, na gamelaga laɛ ate: «N'aye okondi, ɔɔng'ɔtɔa n'omososi.» 41 Yesu ab'ankulia ngomi, ab'akakia njaga aɛ, ab'ambhɛdɛa na ngodea laɛ ate: «Nekondi, neososi.» 42 Makanga lɛbha, kebukebu-li ab'atoa angaɛ na ngobho aɛ ab'akɔkɔtiana. 43 Mbusa a Yesu haná laɛ kpɛɛ, makanga lɛbha ab'antea 44 ate: «Onngodea-i nto yɔnga nde. Mpa, ogɛ ɔɔɔngianɛ anga mɔɛlɛli na ogabhɛ bɔɛmbɔ a bolamɔ laɔ sinde Mósa ai asosii nee, nga bato-li bɔbhu baúbhɛ gela bende olami domi.» 45 Nto a kebukebu ndɔ ab'aga, na kɛngɛtisa la tɔmiaga a mpuɔ-li bhulibhu sinde alami nee. Anga indɔ, Yesu nnd'ai ye atɔa ngia l'a bɔma bato na baɔna, mpa ai aikilanigi ye masa n'ɛbhɛ n'ɛbhɛ, na ngalagɛ. Na bato ai batoa mpuɔ-li bhulibhu bhia la nɔngɔ aɛ.