Maibhe la nto nde akona mbo
(Olengɛ go Mat 13.1-9; Luk 8.4-8)
4
Yesu ab'akɛngɛtisa go golisaga la bato na nkpalɔ a ngɛji nda Galilaya. Da-mɔlɔndɔ a bato bati aba batulanaga a mpiti aɛ. Anga indɔ, ab'adaa a koko na ab'aika au antata a ngɛji-li, na da-mɔlɔndɔ a bato ndɔ na ba a nkpalɔ a ngɛji-li. 2 Mpa, ab'aegolisaga yɔnga ati a maibhe. Ai aengodea asuba a maanɔ ndaɛ ate: 3 «Bɔɔkɛi! Nto moti ai agee akona mbo. 4 Ai akidi, mbènɔ nde ai akona yu, adh'au ab'agua a mpiti a asii, bambabu aba babhia baléa yu. 5 Atɔɔ ab'agua áma bálábálá, áma nde nnd'ai be dodo ati. Mbo ndɔ ab'atɛla dia nga nnd'ai be dodo enda. 6 Mbènɔ nde máni abɛti nee kpɛɛ, ab'asumba yu. Mbo ndɔ ab'aɔma nga ai abóli miigi. 7 Mbo atɔɔ go ab'agua angala a kuà. Kuà ndɔ ab'atɛla, ab'abɔkanisa mbo ndɔ n'iyu ab'ataloka bɔta la mbùa. 8 Mpa, mbo atɔɔ ai agu a dodo anja. Ab'atɛla, ab'amɔta hɛlɛ na bɔta la mbùa ati. Imoti ab'abɔta mbùa ekomi-isalɔ, atɔɔ ekomi-motoba na atɔɔ go ab'abɔta mbùa eyana imoti.» 9 Na Yesu ai aengodea ate: «Mmbe a n'etue la ɔka, aɔkɛ aɛ.»Yesu ayɔnga n'ibɔ a maibhe
(Olengɛ go Mat 13.10-17; Luk 8.9-10)
10 Mbènɔ nde Yesu atoi nee angala da-mɔlɔndɔ a bato ndɔ, bato nde bai a mpiti aɛ na bande bamɔkɔ́ na babale, aba bakɛngɛtisa ulisa laɛ a yɔnga la maibhe ndaɛ. 11 Yesu ab'aesisila ate: «Mokonga anoúbhisi yɔnga la bɔsɔmbi nd'ɛbɔamɛ ndaɛ. Bande batɔɔ baɔkɛla yɔnga-li nde asuba a maibhe, 12 nga,
‹N'aye balenga na iso abɔ baɔna-i mɛnɔ.
N'aye baɔka n'etue labɔ baúbha-i mɛnɔ,
tea la bende babhia-i batia meema abɔ na
Mokonga ab'aelilia.›»
Yesu atɔmia maibhe la nto nde akona mbo
(Olengɛ go Mat 13.18-23; Luk 8.11-15)
13 Mpa, Yesu ab'aengodea ate: «Nnda bɔɔka maibhe nde? Iboni yɛu mpa bɔɔka mande maibhe la ind'atɔɔ ndɔ bhulibhu?
14 Nkoni a nde mmbe akona Yɔnga. 15 Bato batɔɔ ba nde bía mbo nde agu a ɛbhɛ l'a asii, áma bakoni Yɔnga. N'aye baɔki, kanga lɛbha Sitani ab'abhia atosa Yɔnga ndɔ asuba abɔ. 16 Batɔɔ ba nde bía mbo nde bakoni áma ɛtɛ, baɔkɛ ye Yɔnga-li balebea yu dia na bujɛmɛ. 17 Mpa nnda ba na miigi asuba abɔ, na babhɛdɛla yu masa a mbènɔ engbi. Mpa mboà na enobɔ nde atoa a yɔnga la Mokonga n'aye akidi, aba bagua dia. 18 Batɔɔ ba nde bía mbo nde agu angala a kuà. Baɔka yɔnga ndɔ, 19 mpa maakɔ a éma-éma nda na lɛɛngɔ oni, na dhemisanaga nda lua, na sei-sei a éma ntina-ntina, n'aye angi asub'abɔ ab'akubisa yɔnga-li na nnd'aanga abɔta mbùa. 20 Na mbo atɔɔ ai agu a dodo la mɔbɔa. Dodo la mɔbɔa ndɔ, a nde bía bato nde baɔka yɔnga la Mokonga, aba balebea yu, n'iyu ab'abɔta mbùa asuba abɔ. Moti ab'abɔta mbùa ekomi isalɔ, atɔɔ ab'abɔta ekomi motoba, na atɔɔ go eyana imoti.»
Maibhe a tala
(Olengɛ go Luk 8.16-18)
21 Mbusa indɔ, Yesu ab'aeulisa ate: «Nto aanga atɔa n'abhii na tala nga adegelɛgɛ yu na bholo aɔ nga abhísɛ yu go kusi a ekà? Iisi. A gɔɛ nde nga aɔkɔkisɛ yu n'egoo a nkɛngɛ. 22 Nga, nnd'a be éma nde aɛsɔmɛni inde nnd'aɔnɛana mande a máni, na nnd'a na éma nde abhuniani inde nnd'aúbhianana mande etonge. 23 Mmbe a n'etue la ɔka la yɔnga, aɔkɛ.» 24 Mpa Yesu ab'aengodea ate: «Bolengelelɛ yɔnga nde bɔɔka ndɔ hɛlɛ. Éma nde bɔɔlɛ̀nga na badhanu indɔ yɛu alɛ banɔlɛ̀nga nee, na tɔdɛisila lanu au atɔɔ. 25 Nga mmbe a na éma, batɔdɛisa mande aɛ, na mmbe nnd'a na éma, babɛsa mande nangɛ inde a nee.»
Maibhe la mbo nde aɛtɛlɛli iyu nganga
26 Yesu ab'ayɔnga go ate: «Ibende yɛu ɛbɔamɛ nda Mokonga akengi: a nde bía nto moti, mmbe ai aanji mbo asuba a tio. 27 N'aye ayombii, kiia na etonge, mbo-li ab'atɛla na mɔta, makanga nto ndɔ úbha. 28 Nga, dodo iyu nganga atɛlisa kasa, mbusa indɔ, mbùa ab'abɛlɛa a nkɔgɔ ndɔ. 29 Na n'aye mbùa ndɔ ajɔdɔi, nto ndɔ ab'abhia na mbàɔ nga elemɔ a gubha aye akidi.»
Maibhe la mbùa a aladali
(Olengɛ go Mat 13.31-32,34; Luk 13.18-19)
30 Yesu ab'ayɔnga go ate: «Na éma sina yɛu aanga bɛlɛnganisa n'Ɛbɔamɛ nda Mokonga? Akengi nde maibhe sina? 31 A nde bía mbo la aladali. N'aye bankona a nde nyia-mbo mɛdɛ nyɛna la mbo bhulibhu nda na lɛɛngɔ. 32 Mpa, n'aye bankoni, ab'atɛla na ja la mati kpɛɛ nyɛna la mbo bhulibhu nde bakoni na tio. Atɔa au ntabhi-ntabhi atiti inde bambabu aanga bahìa au endu abɔ a elimbiɔ-li.»
33 Ai nde a maibhe ntua-ntua ndɔ yɛu Yesu ai aɛtɔmila bato yɔnga nda Mokonga a inde ai aanga baɔka. 34 Nnd'ai ayɔnga n'ibɔ makanga maibhe. Mpa, n'aye aiki na bagoli nde baɛ ibɔ nganga yɛu ai angoda abɔ maibhe ndɔ bhulibhu.
Yesu akalei kukisa
(Olengɛ go Mat 8.23-27; Luk 8.22-25)
35 Mbènɔ nde ai akidi nee ɛgɔgɔ a esa ndɔ, Yesu ab'aengodea bagoli nde baɛ ate: «Bejabhɛ kubhi ndoi.» 36 Bagoli nde baɛ aba badoana na mɔlɔndɔ a bato ndɔ, aba baga badaa a koko nde Yesu ai a au ndɔ a jabhisa-li. Na bato batɔɔ aba badaa a koko la ind'atɔɔ. 37 Mbusa nɛdɛ, kukai mati ab'atesa asuba a ngɛji-li. Íbo ati ab'angia asuba a koko-li kida la tuma l'au. 38 Mbènɔ ndɔ, Yesu ai n'ale mbusa a sese a koko-li n'agesi moo aɛ a ngimiɔ. Aba banjujusa na bátáta bate: «Ngolisi, indɔ nnd'aɔkɔla éma bía nde betínda nee nde?» 39 Yesu ab'ajujua, ab'akalea kukisa ndɔ na ngodea la ngɛji-li ate: «Dhàɛ to bojɛɛ!» Kukisa-li ab'adhaa na bhulibhu ab'akɔlɔmana kpɛɛ. 40 Mpa, mbusa-li Yesu ab'aengodea bagoli nde baɛ ate: «Nga boni yɛu bo nde babɔbɔɔ bende? Bobi-mbɛ na maakɔ ang'ami?» 41 Mpa, bɔɔ mati ab'aebaa, na aba bayɔngisana nkunguanabɔ bate: «Nto sina mmbe? Nɛngɛbɛ kukisa na ngɛji aɔka yɔnga laɛ!»