Yesu anamisi nto a baketi
(Olengɛ go Mat 8.28-34; Luk 8.26-39)
5
Mbusa indɔ, Yesu na bagoli nde baɛ aba bakida kubhi a ngɛji, a lɛɛngɔ a baGɛlasi. 2 Yesu toa l'asuba a koko-li, makanga lɛbha, nto a baketi moti ab'atoa na bhota bhia tulana la n'iyɛ. 3 Ai aika masa na bhota na nto nnd'aanga ai annyangaga nɛngɛbɛ na nkɔndɔ́. 4 Nga gɔndɔ ati ai bakengea nyangaga la ego laɛ na njaga aɛ na nkɔndɔ́, mpa iyɛ n'audaga nkɔndɔ́ ndɔ. Nnd'ai weli mmbe ai a n'ekanda la tɔisa laɛ. 5 Esa-li bhulibhu, etonge na kiia n'atambaga na bhota na na mamba, na laka na boobotisaga la n'ɛtɛ. 6 Ɔna la Yesu dhɔlɔ, ab'atatea na ga búna la moo-a-kuu laɛ mosá laɛ. 7 Ab'alaka kpɛɛ ate: «Okaba nde éma sina ang'ami Yesu Muna-Mokonga mmbe maa n'egoo kpɛɛ? Nɛɔmɛmi a ina a Mokonga, omonobisa-i!» 8 Nga Yesu ai n'aye anngodei bende: «Otoɛ ang'a nto nde, owɛ nketi nde majede nde sa!» 9 Mbusa-li Yesu ab'amulisa ate: «Ina aɔ a nde ee?» Ab'ansisila ate: «Ina ami a nde batayo nga be bati.» 10 Ab'angamelaga Yesu bende aetea-i dhɔlɔ a lɛɛngɔ ndɔ. 11 Mpa bhi-bhi na iwa, na mamba ai beli da-boio a bangea na baléanaga. 12 Baketi ndɔ, aba bangamelaga Yesu bate: «Osoteɛ asuba a bangea nde nga bengiɛ asuba abɔ.» 13 Yesu ab'alebea. Mpa aba batoa anga nto ndɔ, na ga ngia l'asuba a bangea ndɔ na da-boio ndɔ aba badhidha mbangɔ kege ndɔ na ga boemaa l'asuba na ngɛji. Bai nde bía bangea ɛlufu ibale, bɔbhu aba bakɛka na ntɔɔ. 14 Bande ai baelanga, aba batatea na ga tɔmia la yɔnga ndɔ na bɔma na n'ɛbhɛ n'ɛbhɛ la nji-li. Bato-li, ɔka la indɔ, aba baga baɔna inde ai aóbeli iweli. 15 Aba bakida a mpiti a Yesu na ɔna la nto nde ai na batayo la baketi ndɔ, n'aiki, n'alɔlani n'a masa hɛlɛ. Mpa bɔɔ ab'aebaa. 16 Bande ai baɔni yɔnga ndɔ, aba baengodea bato batɔɔ inde ai aóbeli anga nto a baketi na anga bangea ndɔ. 17 Anga indɔ, bato aba bangamelaga Yesu bende agɛ dhɔlɔ a lɛɛngɔ abɔ. 18 Mbènɔ nde Yesu adai ne a koko-li, mmbe ai na baketi ndɔ, ab'angamelaga Yesu bende babɛ n'iyɛ. 19 Kanga bende Yesu alebei. Mpa ab'anngodea ate: «Ogɛ nɔngɔ aɔ mpiti a batobaɔ, oengodeɛ éma bhulibhu nde Mokama aɔkɔlɛli na sinde aokulii nee ngomi.» 20 Nto ndɔ ab'aga aɛ, ab'akɛngɛtisa labha l'asuba a lɛɛngɔ a Bɔma Mɔkɔ́, éma nde Yesu ai ankɔlɛli. Bato-li bɔbhu ab'aebangisa.Bolamisi a nyike nde ma Yailo na nke nde ai na jega la melua
(Olengɛ go Mat 9.18-26; Luk 8.40-56)
21 Mbènɔ nde Yesu ajabhi nee a koko-li kida la kubhi, da-mɔlɔndɔ a bato aba batulana a mpiti aɛ. Ai nde a nkpalɔ a ngɛji. 22 Mpa ab'akida wa adha baomi nde ba sinagogi moti, mmbe bankoga bate Yailo. Ɔna la Yesu, ab'agua a ego laɛ 23 na gamelaga laɛ ate: «Nami atigisi akuɛ, obhiɛ ogesɛ njaga aɔ angaɛ nga alamɛ na alendɛ.» 24 Mpa Yesu ab'aga n'iyɛ, na da-mɔlɔndɔ a bato aba bam'belea na bansɔ́anisa. 25 Mpa, ai wa nke moti mmbe a na jega la melua toa la elemɔ mɔkɔ́ na ibale. 26 Ai n'aye mɛnɔ anobi kpɛɛ a njaga a balamisi bati, na bungisa la lua nde ai nee bhulibhu, makanga làma. Mpa go n'aga n'ajega nde kpɛɛ. 27 Ai aɔki mbinɔ a Yesu, ab'abhia asuba a mɔlɔndɔ a bato ndɔ mbusa-mbusa na bhɛdia la ngɔmbɛ ndaɛ. 28 Nga nke ndɔ ai ayɔnga a meema aɛ bende: «N'aye nɛtɔisi masa bhɛdia la ngɔmbɛ ndaɛ, kesi nelami.» 29 A mbènɔ ndɔ, nsangi nde ai atoa angaɛ ndɔ ab'aɔma na ab'aúbha a ngobho aɛ bende alami a inde ai annobisa ndɔ. 30 Mbènɔ ndɔ Yesu ab'aúbha bende ekanda atoi angaɛ. Ab'aetiila sak'áma bato batumi na yɔnga la ate: «Màni yɛu abhɛdɛi ngɔmbɛ namɔ?» 31 Bagoli nde baɛ aba banngodea bate: «Chaa! Ɔɔna da-mɔlɔndɔ a bato nde baɔsɔ́anisa nde, mpa ote: ‹Mbénɔ màni yɛu amɔbhɛdɛi?›» 32 Mpa ab'alenganaga bhɛ-bhɛ laɛ nga amɔnɛ mmbe ai akɔli indɔ. 33 Nke ndɔ ab'atea, n'apupa ɔna la inde ai aóbeli, ab'abhia aemaa a ego laɛ na ngodea laɛ domi-li bhulibhu. 34 Mpa Yesu ab'anngodea ate: «Nami, boosobela laɔ aolamisi. Ogɛ na bɔkɔlɔ, olamɛ a jega ndaɔ.» 35 Ai n'aha ayɔnga, bato aba bakida toa la nɔngɔ a omi nde maa endu a sinagogi ndɔ. Aba banngodea bate: «Nyike nde maɔ aku. Nga boni kɛndɛlisa la Ngolisi?» 36 Mpa Yesu makanga gesa la meema aɛ a inde ai bayɔnga, ab'anngodea omi nde ma sinagogi ndɔ ate: «Otea-i. Obɛ masa na boosobela.» 37 Ab'aekalelisa bato batɔɔ beléá laɛ, masa Pɛtɛlɔ, Yakɔbɔ na Yɔani mɔtɔ a Yakɔbɔ. 38 Aba baga bakida n'endu a omi nde ma sinagogi ndɔ. Yesu ab'aɛɔna bato bati na babhìsa nkokoto ati na gama na laka la kpɛɛ. 39 Ab'angia na ngodea labɔ ate: «Nga iboni yɛu boyayali na gama? Nyike nde nndaga aku, ale nde tɔɔ.» 40 Aba bantɛbhɛlaga. Yesu ab'aeóbisa bhulanabɔ na ntanga, ab'atiga na abha-nii-li na amáɛ na bande ai batambi n'iyɛ. Ab'angia áma ai bambhísi nii-li. 41 Ab'abɛsa njaga a nii-li na ngodea laɛ ate: «Talita kumua», a nde yɔnga la bende: «Nyia-nyike, nte ojujuɛ!» 42 Makanga lɛbha nyia-nyike ndɔ ab'ama na tamba. Mbènɔ nde baɔni na indɔ, bande bai iwa ab'aebangisa kpɛɛ. Nyia-nyike ndɔ, ai na elemɔ mɔkɔ́ na ibale. 43 Na Yesu ab'aekalelisa kpɛɛ bende bangoda-i yɔnga ndɔ, ab'aengodea ate bammòɛ nyike ndɔ eléa.