Bato nde ba Najalɛti bakɔ́mi lebea la Yesu
(Olengɛ go Mat 13.53-58; Luk 4.16-30)
6
Mbusa indɔ, Yesu ab'atoa wa na ga laɛ a nji nde ai amɔtɛli aua, na bagoli nde baɛ aba bam'belea. 2 Esa la sabato, Yesu ab'akɛngɛtisa golisa asuba a endu a sinagogi. Ab'aebangisa da-baɔkanei nde bai wa, na yɔnga la bate: «Nto nde atosa éma nde bhulibhu nde iwani? Mambala bɔɛngɛ sina nde a nee nde? Na ekanda la tɔisa la ekesɔ bía inde? 3 Nndaga mmbe aki ahìaga endu a bato ndɔ yɛu a a mbe, muna-Malia, muna-amáɛ na Yakɔbɔ, Yɔsɛ, Yuda na Simoni? Baalɔɛ nndaga baiki na besu ani?» Indɔ ab'aɛlɛma angaɛ kpɛɛ, ab'aangisa na bakɔ́mi lebea laɛ.4 Mpa Yesu ab'aengodea ate: «Múbhilili aki bansikisa mpuɔ-li bhulibhu, makanga na nji aɛ nda bɔtɛana, a meeme a babɔti aɛ na batobaɛ.» 5 Na iwa nnd'ai ye atɔi kɔla la ekesɔ naa imoti, masa bhísa la njaga aɛ antata adha bajegi ntuantua nde bai be a lamisa labɔ. 6 Aba am'bangisa ɔna la sinde bato ndɔ nnda ba na boosobela.
Yesu aetei batetei nde baɛ
(Olengɛ go Mat 10.5-15; Luk 9.1-6)
Mbusa iwa, Yesu ab'anyɛnaga a nji nda bhi-bhi bhi-bhi bhulibhu n'agolisaga. 7 Ab'aekoga bande bamɔkɔ́ na babale ndɔ na kɛngɛtisa la tea labɔ bale-bale. Ab'aepa bokama la bèa la baketi. 8 Ab'aesosia bende bakumba-i naa éma imoti na asii masa manga. Ab'aengodea ate: «Bokumba-i ntànda, aɔ njombi, aɔ go ntondɔ asuba a kela ndanu. 9 Bɔlɔlɛi belatɔ, mpa bokumba-i ngɔmbɛ nde boebongoa nee.» 10 Ab'aengodea ate: «N'aye bongi asub'endu moti, boikɛ wa kida la mbènɔ nde botoa nee iyo.
11 N'aye bokidi a nji imoti, na bakɔ́mi sesea lanu aɔ ɔkanea lanu, botoɛ be, botitiɛ eluule a ego lanu, a úbhisa labɔ bende yɔnga aegulia mande.» 12 Mbusa indɔ, batetei aba batoa, na ga la na balabha bate: «Botiɛi meema anu.» 13 Aba baebèaga baketi bati anga bato, aba baesìa bajegi bati gamba na aba balama.
Kukua la Yɔani-Nndiisi
(Olengɛ go Mat 14.1-12; Luk 9.7-9)
14 A mbènɔ ndɔ, mɔamɛ Ɛlɔdɛb ab'aɔka mbinɔ a Yesu, nga ina a Yesu ai n'aye aúbhianani kpɛɛ. Bato moti-moti ai bayɔnga bate: «A nde Yɔani-Nndiisi yɛu ajujui toa l'a kukua! Indɔ yɛu aangisi abɛ na ekanda la kɔla la ekesɔ.» 15 Bande batɔɔ bate: «A nde Elia.» Na bande batɔɔ go bate: «Mmbe a nde múbhilili bía adha baúbhilili nde ba kala.» 16 Mbusa a ɔka la yɔnga ndɔ bhulibhu, Ɛlɔdɛ ab'ayɔnga ate: «Mmbe a nde Yɔani-Nndiisi mmbe ai nɛsɛngi moo aɛ ndɔ, ajujui toa l'a kukua!»
17 Nga, Ɛlɔdɛ ai n'aye annyangisisi Yɔani, na ngisa laɛ asub'endu a enyangi. Ɛlɔdɛ ai akɔli bo nde a yɔnga la nkaɛ Ɛlɔdia, mmbe Filipɔc, muna-abhaɛ, ai ammɔmi mosá ndɔ. 18 Yɔani ai n'aye anngodei Ɛlɔdɛ ate: «Nndaga atɔlɛli ɔmmɔmɛ nka-muna-abhaɔ†.» 19 Ɛlɔdia ai n'aye asunuli anga Yɔani, ai akondi bende ammóisisɛ. Mpa nndag'ai atɔisi. 20 Nga Ɛlɔdɛ ai antea Yɔani. Ai aúbha bende a nde nto a domi na nto nde ma Mokonga, na anga indɔ ab'ananga. Mbènɔ nde Ɛlɔdɛ amɔki na Yɔani, ab'asaimana kpɛɛ, mpa go ai n'aha na sei a ɔkanea laɛ. 21 Mpa, adhoi ndɔ, esa imoti la bujɛmɛ la kanisa la bɔtɛana la Ɛlɔdɛ ab'akida. Ab'akɔla dinyɛ anga bakama nde baɛ, baomi nde ba basoda na bakpɛga nde ba Galilaya. 22 Iwa, nyike nde ma Ɛlɔdia ab'angia na njoa la hɛlɛ. Ɛlɔdɛ na batambi nde ai aekogei eléa aba bajanga kpɛɛ. Mpa, mɔamɛ ab'anngodea nyike ndɔ, ate: «Ɔmɔmɛmɛ éma nde okondi, na eme neopa yu.» 23 Ɛlɔdɛ ab'ahɔ̀a bende: «Éma nde ɔmɔmɛma bhulibhu neopa, nangɛbɛ hale a ɛbɔamɛ namɔ.» 24 Nyike ndɔ ab'aóba na ntanga, ab'aga amulisa amáɛ ate: «Nɛmmɛmɛ nde éma sina?» Emesunga n'amáɛ ate: «Ɔmmɛmɛ moo a Yɔani-Nndiisi.» 25 Nyike ndɔ ab'asiana dia-dia nɔngɔ a mɔamɛ na ngodea laɛ ate: «Nekabi nte omopɛ mbènɔ nde ani moo a Yɔani-Nndiisi a saani.» 26 Mɔamɛ ab'aja na ngomi kpɛɛ. Mpa, nga ai n'aye ahɔ̀i kala mosá la batambi nde baɛ, nnd'ai akondi kɔ́mɛla laɛ. 27 Makanga lɛbha, mɔamɛ ab'antea soda moti, adha balangi nde baɛ, na sosia la bende abhiɛ na moo a Yɔani. Soda ndɔ ab'aga asɛnga moo a Yɔani asub'endu nde ai bannyangeli au, 28 ab'abhia nee asuba a saani na mòa la nyike ndɔ. Mpa, na nyike ndɔ ab'ammòa yu amáɛ. 29 Mbènɔ nde bagoli nde ba Yɔani baɔki na yɔnga ndɔ, aba babhia babɛsa kiinda aɛ, na ga úmba-li na bhota.
Yesu aelisi da-mɔlɔndɔ a bato
(Olengɛ go Mat 14.13-21; Luk 9.10-17; Yɔan 6.1-14)
30 Mbusa iwa, batetei ndɔ aba batulanaga a mpiti a Yesu na tɔmila laɛ éma-li bhulibhu nde ai bakɔli na inde ai bagolisi. 31 Mpa, Yesu ab'aengodea ate: «Bobhiɛ, begɛ mbamba a mpuɔ a nganga, na boyombiɛ nɛdɛ.» Ai ayɔngi indɔ nga bato bati bai bakidianaga na batɔɔ na baga. Yesu na bagoli nde baɛ nnd'ai ye baɔni mbènɔ a léa l'eléa. 32 Anga indɔ, aba baga a koko ibɔ bamɛnɛ a mpuɔ a nganga. 33 Mpa bato bati aba baɛɔna sinde baga nee, aba baúbhilila áma nde bagee. N'ibɔ aba baga dia-dia n'ego toa la bɔma bhulibhu, na ga kida la we mosá la Yesu na bagoli nde baɛ. 34 Sìma laɛ a koko-li, Yesu ab'aɔna da-mɔlɔndɔ a bato, ab'akua ngomi abɔ kpɛɛ nga, bai nde bía bamboli nde nnda ba na nangi†. Anga indɔ, ab'akɛngɛtisa golisaga labɔ éma ati.
35 Bía nde máni ai n'aye agɔgɔmani nee, bagoli nde baɛ aba babhia a mpiti aɛ, na ngodea laɛ bate: «Iyani a nde ngalagɛ, ago máni nde aye agɔgɔmani nde. 36 Oojisɛ bato-li, nga bagɛ na mɔlɔngɔ na a nji-nji nde aikigi bhi-bhi ani, basómbɛ abɔ eléa.» 37 Emesunga na Yesu ate: «Benu nganga yɛu boepɛ eléa.» Aba bansisila bate: «Okabi ote begɛ besómbɛ mokate inda kichɛlɛ eyana ibale na pa la bato nde baléɛ?» 38 Yesu ab'aeulisa ate: «Bo nde na mokate enga? Bogɛ bolengɛ.» Mbusa lengisana-li, aba babhia banngodea bate: «Be na mokate itanɔ na basale babale.» 39 Mpa Yesu ab'aesosia bende baeikisɛ bato bɔbhu a mpitɔ-mpitɔ angala a kasa adhɛɛ. 40 Aba baika a boio-boio. Boio imoti bato eyana imoti, na boio atɔɔ ekomi itanɔ. 41 Yesu ab'abɛsa mokate nd'itanɔ na basale nde babale ndɔ, ab'alenga na kobha, ab'ansìma Mokonga. Ab'abúnaga mokate ndɔ, ab'aepa bagoli nde baɛ nga baebuiɛgɛ bato-li bɔbhu. Aba go aebuaga a bɔbhu basale nde babale ndɔ. 42 Bato bɔbhu aba baléa, na aba bakuta. 43 Aba basɔngiaga na tumisa la etele† mɔkɔ́ na ibale la gbutu-gbutu a mokate na basale nde ai atigiligi. 44 Angala a bande bai bali mokate ndɔ, bai be baboo ɛlufu itanɔ.
Yesu atambi antata a íbo
(Olengɛ go Mat 14.22-33; Yɔan 6.15-21)
45 Makanga lɛbha, Yesu ab'aesosia bagoli nde baɛ bende badaɛ a koko, na bagɛ mosá, jabhela la Bɛtɛsaida, mpa iyɛ n'aha aɔkɔana na mɔlɔndɔ a bato ndɔ. 46 Mbusa a ɔkɔana la n'ibɔ, ab'atalia na mamba ga mɛma. 47 Akidi ye ɛgɔgɔ, koko-li ai n'aye akidi a meeme a ngɛji-li, Yesu iyɛ amɛnɛ n'aha kubhi. 48 Ab'aɛɔna bagoli nde baɛ sinde bamana na jabhisa la koko-li nga moheɔ n'akaba nde sisa-li mbusa. A ɔ́sa la kɔkɔ, Yesu ab'abhia saka naa nde ba nee, n'atamba antata a íbo-li. Ai asaki aekpalɛ. 49 Mbènɔ nde bagoli bamɔni nee n'atamba antata a ngɛji, aba baaka bate a nde mpunda. Aba balaka, 50 nga, bɔbhu ai bamɔni na bɔɔ ab'aebaa kpɛɛ. Makanga lɛbha, Yesu ab'ayɔnga n'ibɔ ate: «Bodhodeɛi meema anu! A nde eme yɛ mbɔ. Botea-i!»
51 Mpa, n'iyɛ ab'adaa asuba a koko-li áma imoti n'ibɔ. Na moheɔ-li ab'akɔlɔmana. Ab'aebangisa bagoli nde baɛ kpɛɛ aye mɛnɔ, 52 nga ai na baúbhi-mbɛ hɛlɛ inde biisa la mokate ndɔ ai akabi te ayɔngɛ. Mpa, meema abɔ ai akali kpɛɛ.
Yesu aelamisi bajegi a lɛɛngɔ a Gɛnɛjalɛti
(Olengɛ go Mat 14.34-36)
53 Mbusa a jabha labɔ, aba bakida a lɛɛngɔ a Gɛnɛjalɛti, na aba baɔkɔkisa koko ndabɔ wa. 54 A toa labɔ asuba a koko-li, makanga lɛbha, bato aba bamúbhilila Yesu. 55 Bato ndɔ aba batɔmba lɛɛngɔ ndɔ bhulibhu, ga bhia la na bajegi na baekumbi a kipoi na ga labɔ nee áma nde ai baɔki bende Yesu aleɔ. 56 Na áma nde Yesu ai angia bhulibhu, abɛ asuba a nji, aɔ na bɔma nangɛ go na mɔlɔngɔ, ai baebhísa bajegi na ntanga. Aba bangamelaga Yesu bende bajegi ndɔ babhɛdiɛ masa sese a ngɔmbɛ ndaɛ. Bande ai bambhɛdia, ai balama.