شئیتان ایسّایا چَکّاسیت
4
1 رَندا، چه پاکێن روهئے رهشۆنیا ایسّا گیابانا شت تان شئیتان آییا بچَکّاسیت.*
2 چِل شپ و چِل رۆچ رۆچگ دارگا رند ایسّا شدیگ بوت.
3 گڑا شئیتان په آییئے چَکّاسگا آتک و گوَشتی:
«اگن تئو هُدائے چُکّ ائے، اے سِنگان بگوَش نگن ببنت.»
4 ایسّایا پَسّئو دات:
«پاکێن کتابا نبیسگ بوتگ:
‹مردم تهنا په نان زندگَ نبیت،
چه هُدائے زبانئے سجّهێن هبرانی مَنّگا زندگَ بیت.›» *
5 پدا شئیتانا ایسّا پاکێن شهرا برت و مزنێن پرستشگاهئے دیوالئے بُرزترێن جاگها اۆشتارێنت و
6 گوَشتی:
«اگن تئو هُدائے چُکّ ائے گڑا وتا چه اِدا جهلاد دئور بدئے چیا که نبیسگ بوتگ:
هُدا په تئیی نِگهپانیا وتی پرێشتگان هُکمَ کنت و
آ، ترا وتی دَستانی دلا دارنت
تان تئیی پاد ڈۆکێا ملگّیت.»*
7 ایسّایا گوَشت:
«هئو، بله چُش هم نبیسگ بوتگ:
وتی هُداوندێن هُدایا مچَکّاس و آزمایش مکن.»*
8 نون شئیتانا یک سکّێن بُرزێن کۆهێئے سرا برت و چه اۆدا دنیائے سجّهێن بادشاهی و آیانی شان و شئوکتی پێش داشتنت و
9 گوَشتی:
«اگن تئو منی دێما کۆنڈان بکپئے و منا پرستش بکنئے، من اے سجّهێنان ترا دئیان.»
10 گڑا ایسّایا گوَشت:
«او شئیتان!
چه منی دێما گُم بئے!
پاکێن کتابا نبیسگ بوتگ:
وتی هُداوندێن هُدایا پرستش بکن و تهنا هماییئے هِزمتا بکن.»*
11 نون شئیتانا آ یله دات و شت.
پرێشتگ آتکنت و ایسّائے هِزمتِش کرت.
ایسّائے هِزمتکاریئے بُنگێج
12 وهدے ایسّا سَهیگ بوت که یَهیا دَزگیر کنگ بوتگ، گڑا جَلیلا شت.
13 ناسِرَهئے شهری یله دات و کَپَرناهومئے شهرا جهمنند بوت.
کَپَرناهوم، جَلیلئے مَزَن‌گوَرمئے* کِرّا، زِبولون و نَپْتالیئے کبیلهانی سرڈگارا اِنت.
14 پمێشکا اے ڈئول بوت که اِشئیا نبیئے گوَشتن سرجم ببیت:
15 زِبولون و نَپْتالیئے سرڈگار، گوَرمئے مزن‌راهئے سرا،
اُرْدُنئے کئورئے آ دستا، جَلیلئے هما هَند و هنکێن که درکئوم جهمنند اَنت،
16 هما کئوما که زِندی تهاریا گوَستگ‌اَت،
مزنێن رُژناییے دیست و
هما مُلک و ڈگار که اۆدا مَرک ساهێل اَت،
اۆدئے جهمنندانی سرا رُژناییا سر جت.*
17 چه هما وهدا، ایسّایا اے کُلئو و پئیگامئے رسێنگ بُنگێج کرت.
گوَشتی:
«چه وتی گناهان پشۆمان ببێت چیا که آسمانی بادشاهی نزّیک اِنت.»
ایسّائے ائولی چارێن مرید
18 وهدے ایسّا جَلیلئے مَزَن‌گوَرمئے لَمبا* گام جنَگا اَت، دو براتی دیست، یکّے شَمون اَت که پَنّامی پِتْرُس اَت و دومی آییئے برات اَنْدْریاس اَت.
آیانی کار ماهیگیری اَت و آ وهدا په ماهیگیریا وتی دام و ماهۆران گوَرما چێر گێجگا اتنت.
19 ایسّایا گۆن آیان گوَشت:
«بیاێت، منی رَندگیریا بکنێت و من شمارا انچُشَ کنان که ماهیگ گِرگئے بدلا، مردمانی دلا شکار بکنێت.»*
20 آیان هما دمانا وتی دام یله دات و آییئے همراه بوتنت.
21 وهدے کمّے دێما شت، دگه دو برات، آکوب و یوهَنّایی دیستنت که زِبْدیئے چُکّ اتنت.
بۆجیگئے* تها گۆن وتی پت زِبْدیا نِشتگ‌اتنت و وتی ماهۆران سْراچگ و شَرّ کنگا اتنت.
ایسّایا آ لۆٹتنت.
22 آیان هم وتی پت گۆن بۆجیگا یله دات و آییئے همراه بوتنت.
جَلیلئے دَمگا، ایسّائے هِزمتکاری
23 ایسّایا سجّهێن جَلیلا تَرّ و گردَ کرت.
آییا کنیسهانی* تها مردم درس و سَبکَ دات، هُدائے بادشاهیئے مستاگَ* رسێنت و مردم چه ناجۆڑی و نادْراهیان جۆڑ و دْراهَ کرتنت.
24 سجّهێن سوریَها آییئے نام و تئوار پْرشت و مردمان هر ڈئولێن ناجۆڑ و نادْراه، جِنّی، مِرْگیئے نادْراه،* لَنگ و مُنڈ ایسّائے کِرّا آورتنت و آییا دْراهَ کرتنت.
25 جَلیل، دِکاپولیس، اورْشَلیم، یَهودیَه و اُرْدُنئے کئورئے آ دستئے هَند و دَمگانی بازێن مردمے آتک و ایسّائے همراه بوت.