پاکێن اِنجیل چه
مَرکاسئے
کَلَما
مَرکاسئے اِنجیلئے پجّار
اے کتابئے نبیسۆک، مَرکاس، ایسّا مَسیهئے مرید شَمون پِتْرُسئے سنگت و چه بُنگێجی کِلیسائے باورمندان یکّے اَت. کاسِدانی کارئے کتابا، لهتێن جاگها مَرکاسئے نام آتکگ که پِتْرُس و پولُسئے سنگت اِنت. باور اِش اِنت، هما وهدا که مَرکاس، پِتْرُس و پولُسئے همراهیا رومئے شهرا نندۆک بوتگ، آییا په رومئے شهرئے جهمنندێن درکئومان اے کتاب نبشتگ. لهتێن زانتکارانی هئیال همِش اِنت که مَرکاسا، ایسّائے بارئوا بازێن یادداشتے چه پِتْرُسا زرتگ.
چارێن اِنجیلانی تها، مَرکاسئے کتاب چه آ دگران گوَنڈتر اِنت. اے کتابا، ایسّا مَسیهئے هُداوندی، چه آییئے مۆجزه و هئیران کنۆکێن کاران پێش دارگ بوتگ.
مَرکاسئے اِنجیلا، مردمانی دێما ایسّائے آیگ، جَلیلئے دَمگا آییئے تالیم و کار، دێم په اورْشَلیما رئوگئے وهدا آییئے داتگێن سر و سۆج، اورْشَلیما آییئے گُڈّی رۆچانی سرگوَست، مَرک و زندگ بئیگ نبیسگ بوتگ‌اَنت.