16
Yhángmòq gi, Garai Gasâng é sàksé dò lé wàq yù mù, hau é matú Dawiq saî tô é zúm má kat to luî, Garai Gasâng é hí má myi nyhé hkungga pé eq zùmhkaû hkungga pé nhông byî akô nghut ri. 2 Dawiq gi, myi nyhé hkungga pé eq zùmhkaû hkungga haú pé lé ban nhông byî é htâng, haû Yhûmsîng Garaî é myìng lang luî, shiwa byu pé lé shimân byî ri. 3 Hau htâng, yhang gi, Isira-elaq yùqgè myiwe wuì yùq hkangmó lé, mùk ralong long, sho rahkyí hkyí eq tsibyiq shi kyuq ralong long tsing byî ri.4 Yhang gi, haû Yhûmsîng Garaî é sàksé dò hí má dójaú râ matú le, Isira-elaq é Garai Gasang, haû Yhûmsîng Garai lé dûng xoq mù, jeju hkya-on luî, hkya-on kúngtôn râ matú le, Lewiq byù ra-am lé wò hun tô ri; 5 haú bang má, Asap gi, zau nghut mù, yhâng é a-ô má gi, Zehkariq nghut ri; haú htâng má gi, tíng pé eq tíng góng pé bàt é bang Yi-ela, Shemiramot, Yehi-ela, Matahti‑aq, Eli-ap, Benai-a, Obet Edom eq Yi-ela pé nghut akô. Asap gi, chapchéng bàt ri. 6 Hkyangjông nhik Benai-a eq Yahazi-ela gi, Garai Gasâng é dangshikaq sàksé dò é hí má tut ayang mùt su nhik nghut akô nghut ri.
Dawiq É Jeju Hkya-on Kúngtôn Dang
7 Haú nyí, Dawiq gi, Yhûmsîng Garai lé jeju hkya-on kúngton é dang taí râ matú, sânghi má, Asap eq yhâng é gu-mang wuì lé a-ô mâ é eq rajung za wò byî ri;
8 Yhûmsîng Garai lé jeju hkya-on keq; Yhâng é myìng lé lang keq;
Yhang kut é hkyô pé lé, byù myû wuì lé sé nhâng keq.
9 Yhang lé mahkôn hkôn keq; Yhang lé hkya-on mahkôn hkôn keq.
Yhang kut é maúhpo múzó lé, taî pyô keq ô!
10 Yhâng é chyoiyúng myìng gi, hkya-on wàq toq é hui sháng gàq;
Yhûmsîng Garai lé hô bâng é i-myìt nhiklhum gi, gabú byam chyû nyì sháng gàq.
11 Yhûmsîng Garai eq Yhâng é wum-o lé hô keq;
hkâ-nhám le, Yhâng é myòqdong lé hô keq.
12-13 Yhâng é duìnhâng zoshâng Isira-elaq é awùt ashín pé ê,
Yhang hkyin yu é Yakup é yhang zo yhang shû pé ê,
Yhang kut é maúhpo múzó eq maúhpo alhô agàn lé le,
Yhang taî htoq é târâ jéyáng hkyô lé le, myìtbun keq.
14 Yhang gi, ngá-nhûng é Garai Gasang nghut é, haû Yhûmsîng Garai nghut ri;
Yhâng é târâ jéyáng hkyô pé gi, myìdàm gón má jòq nyi ri.
15 Yhang gi, pyàt bán rahkying é matú, Yhang hkyô tô é hkunmó nghut é,
Yhâng é dangshikaq lé ahtum abyùq myìtbûn nyi lhê.
16 Dangshikaq haû gi, Abraham eq tô tô é dangshikaq nghut mù,
Isak lé dâkam tô é dang nghut lhê.
17-18 “Hkanan mau lé, nàng sing yù râ gàmbùm dông,
Ngò, nang lé byi râ nghut lhê.” ga Yhang taî é má,
Yakup é matú gi, târâ wàng hkunmó dông,
Isira-elaq pê é matú gi, ahtum abyùq dangshikaq dông,
dangshikaq haú lé lhoq gingtíng byi bê nghut ri.
19 Haú u, haú bang gi, byù du ra-tsuí za nghut mù,
haú mau má byù bíng dùt kô é hkûn,
20 ra-myû mai ra-myû shut yông jé mù,
ra-ming mai ra-ming shut lám jé ló kô é nghut lhê.
21 Nghut kôle, Yhûmsîng Garai gi, ó yùq lé le, yhángmòq lé a zìk zo nhâng;
yhángmòq é yánmai kúm gi, hkóhkam pé lé,
22 “Ngò hkyin yu é, Ngá é namngón xû bùt hui bang lé, hkâzáng kó;
Ngá é myìqhtoî pé lé hkâ-nô nhâng kó.” ga tân ri.
23 Myìdàm htoq mâ é bànshoq bang, haû Yhûmsîng Garai lé mahkôn hkya-on keq;
nyí wuî Yhâng é hkyi yù hkyô lé, taî pyô keq.
24 Byù myû wui chyáng, Yhâng é hpungwup shingkang lé, taî pyô mù,
byù bànshoq bâng chyáng, Yhang kut é maúhpo hkyô lé taî pyô keq.
25 Hkâsu mù gâ le, haû Yhûmsîng Garai gi, gyaú Sû nghut mù, hkya-ôn é hui gíng dik Sû nghut ri;
Yhang gi, garaî pé bànshoq htoq jé gyùq kyûm râ é Sû nghut lhê.
26 Hkâsu mù gâ le, byù myû wui é garaî pé gi, hparà hpôlhô pé chyat nghut ri;
nghut kôlhang, haû Yhûmsîng Garai gi, mauhkûng lé hpan é Sû nghut ri.
27 Hkìkhkâm hkyô eq kô làm hkyô gi, Yhâng é hí má nghut mù,
wum-o eq gabú jang gi, Yhâng é chyoiyúng jowò má nghut nyi ri.
28 Byù myû wuì mâ é yhûmhtu pé ê, haû Yhûmsîng Garai lé hkya-on keq;
Yhûmsîng Garai gi, hpungwup shingkang eq wum-o bo ri nghû, yín yû keq.
29 Yhûmsîng Garaî é myìng gi, hpungwup shingkang bo ri nghû, yín yû keq;
nhông râ hkungga chûng mù, Yhâng é hí má wang lé keq.
Chyoiyúng hkìkhkâm hkyô dông mai Yhûmsîng Garai lé noqkuq keq.
30 Myìdàm htoq mâ é lhúnglhâng bang ê, Yhâng é hí má gyùq nán nyî keq;
mingkan gi, a wó lhoqdui nhún loshoq, Yhâng èq gingtíng shoq xuq to bê nghut ri.
31 Mauhkûng eq myigùng, gabú byam chyu kó sháng gàq;
yhángmòq gi, byù myû wui chyáng, “Haû Yhûmsîng Garai gi, ùp nyi ri.” ga taí kó sháng gàq.
32 Wuìmau eq haú má nyi é lhúnglháng gi, htê mó lhoqhtoq kó sháng gàq;
yò pé eq haú má jòq é bànshoq gi, gabú kó sháng gàq.
33 Hau htâng, yòso mâ é sikgâm pé bànshoq le, gabú mahkôn hkôn kôrâ nghut lhê;
Yhûmsîng Garai gi, myìdàm htoq lé târâ jéyáng râ matú lé lô râ nghut mù,
yhángmòq gi, mahkôn hkya-on kôrâ nghut lhê.
34 Yhûmsîng Garai gi, gè Sû nghut é yánmai, Yhang lé jeju hkya-on keq;
Yhâng é chyitdàp myìt gi, ahtum abyùq gîng nyi ri.
35 “Ngá-mòq lé hkyi yù Sû Garai Gasang ê, ngá-mòq lé hkyi yù laq;
Náng é chyoiyúng myîng lé, jeju wó bun mù,
Nang lé hkya-ôn é má, hpúng shingkang bo nyì sháng gàq,
gótû a-myû wui chyáng mai, ngá-mòq lé tsîng yù mù, hkyi yù laq.” nghû taî garu keq.
36 Isira-elaq é Garai Gasang, Yhûmsîng Garai gi,
ahtum abyùq pyàt dedu, hkya-on huî nyì sháng gàq.
Byù lhúnglhâng bang gi, “Amen! Yhûmsîng Garai lé hkya-ôn lhê.” ga taí kó sháng gàq.
37 Hau mù, Dawiq gi, haû Yhûmsîng Garaî é dangshikaq sàksé dò hí má, nyí wuî wùn wàq âng é wò eq rajung za dójaú nyì râ matú, Asap eq yhâng é gu-mang wuì lé le, 38 Obet Edom eq yhâng é gu-mang wuì 68 yùq lé le, nyhi tô ri. Yeduhtun é yhang zo Obet Edom eq Hosa gi, hkum zúng su nhik nghut akô.
39-40 Dawiq gi, myi nyhé hkungga nhong é hkungga gyàp má, nyí wuî myín nàp Yhûmsîng Garai lé myi nyhé hkungga nhông byi râ matú, Gibe-on mâ é myhang é jowò mâ é Yhûmsîng Garaî é sàksé zúm hí má hkyangjong Zadok eq yhâng é hkyangjong gu-mang wuì lé nyhi tô ri. Haû gi, Isira-elaq byu pé lé byî to bê nghut é, haû Yhûmsîng Garaî é târâ má kâ tô é eq rajung za nghut ri. 41 Haû Yhûmsîng Garaî é chyitdàp myìt gi, ahtum abyùq gîng nyi é yánmai, Yhang lé jeju hkya-on râ matú, Heman, Yeduhtun eq myìng lang luî hkyin masàt to huî é bang lé le, yhángmòq eq rahá nyhi tô ri. 42 Heman eq Yeduhtun nhik gi, tut pé eq chapchéng pé lé mùt myhíng bàt myhíng râ wò le, Garai Gasang lé mahkôn hkôn râ matú gótû bàt myhîng jung zè pé bàt râ wò le, yu tô akô nghut ri. Yeduhtun é yhang zô pé gi, hkum zúng wò yu akô nghut ri.
43 Haû mù, shiwa byù bànshoq bang gi, ó le ô é yhûm shut taû ló bekô nghut ri; Dawiq le, yhâng é yhûm i-kun lé shimân byi râ matú yhûm shut taû ló bê nghut ri.