Hkóhkam Pê É Hkóhkâm Garai Gasang
1 Hko Labaû 16:23-33
96
Haû Yhûmsîng Garai lé,mahkôn sik èq mahkôn keq;
myìdàm htoq mâ é bànshoq bang,
haû Yhûmsîng Garai lé,
mahkôn hkya-on keq.
2 Haû Yhûmsîng Garai lé,
mahkôn hkôn mù,
Yhâng é myìng lé hkya-on keq;
nyí wuî Yhâng é hkyi yù hkyô lé,
taî pyô keq.
3 Byù myû wui chyáng,
Yhâng é hpungwup shingkang lé,
taî pyô mù,
byù bànshoq bâng chyáng,
Yhang kut é maúhpo hkyô lé,
taî pyô keq.
4 Hkâsu mù gâ le, haû Yhûmsîng Garai gi,
gyaú dik Sû nghut mù,
hkya-ôn é hui gíng Sû nghut ri;
Yhang gi, garaî pé bànshoq htoq má,
gyùq kyûm râ é Sû nghut lhê.
5 Hkâsu mù gâ le, byù myû wui é garaî pé gi,
hparà hpôlhô pé chyat nghut ri;
nghut kôlhang, haû Yhûmsîng Garai gi, mauhkûng lé
hpan é Sû nghut ri.
6 Hkìkhkâm hkyô eq kô làm hkyô gi,
Yhâng é hí má nghut mù,
wum-o eq hpungwup shingkang gi,
Yhâng é chyoiyúng jowò má nghut nyi ri.
7 Byù myû wuì mâ é yhûmhtu pé ê,
haû Yhûmsîng Garai lé hkya-on keq;
Yhûmsîng Garai gi,
hpungwup shingkang eq wum-o bo ri nghû, yín yû keq.
8 Yhûmsîng Garaî é myìng gi,
hpungwup shingkang bo ri nghû,
yín yû keq;
nhông râ hkungga chûng mù,
Yhâng é yhûmwàng má,
wang lé keq.
9 Yhâng é chyoiyúng hkìkhkâm hkyô dông mai,
Yhûmsîng Garaî lé noqkuq keq;
myìdàm htoq mâ é lhúnglhâng bang ê,
Yhâng é hí má gyùq nán nyî keq.
10 “Yhûmsîng Garai gi, hkóhkâm nghut ri.” nghû,
byù myû wui chyáng taí keq;
mingkan gi, a wó lhoqdui nhún loshoq,
Yhâng èq gingtíng shoq xuq to bê nghut ri;
Yhang gi, díngmán é dông,
byu pé lé târâ jéyáng râ nghut lhê.
11 Mauhkûng eq myigùng,
gabú byam chyu kó sháng gàq;
wuimau eq haú má nyi é lhúnglháng gi,
htê mó lhoqhtoq kó sháng gàq;
12 yò pé eq haú má jòq é bànshoq gi,
gabú kó sháng gàq.
Hau htâng, yòso mâ é sikgâm pé bànshoq le,
gabú mahkôn hkôn kôrâ nghut lhê;
13 Yhûmsîng Garai gi,
myìdàm htoq lé târâ jéyáng râ matú, lé lô râ nghut mù,
yhángmòq gi, mahkôn hkya-on kôrâ nghut lhê.
Yhang gi, díngmán hkyô mai,
mingkan lé târâ jéyáng mù,
tengmán hkyô mai,
byu pé lé jéyáng râ nghut lhê.