YOBAQ
Laiká
(Job)
Dang-hi Hpóng
1
Uza mau má, Yobaq gâ é byù rayùq nyi ri; yhang gi, ra a bo é eq i-myìt díngmán é sû nghut mù, Garai Gasang lé gyùq hkúngga luî, agè ashop hkyô lé koi pyâm é sû nghut ri. 2 Yhang gi, yùqzo nyhit yùq eq byìzo sum yuq wó ri. 3 Hau htoq agó, yhang gi, sau nyhit hkyîng, gola-uk sum hkyîng, no ngo shô zúm, loze ngo shô eq duìnhâng zoshâng myo myo lé le sing ri. Yhang gi, buìhtoq hkyam mâ é byù bànshoq bâng htoq má jé gyaú sû nghut ri.4 Yhang zo yùqzô pé gi, masàt tô é buìnyì má, ó le ô é yhûm má poî kut kô é nghut mù, yhángmòq eq rahá poî zoshuq chôm zo chôm shuq râ matú, yhángmòq é nhammó sum yuq lé le ji yù yù kut akô nghut ri. 5 Poî buìnyì pé lai jáng, Yobaq gi, yhang zô pé lé ji yù nhâng mù, lhoq chyoiyúng nhâng luî, “Ngá zô pé gi, yhángmòq é myìt mai Garai Gasang lé mara shut luî, nhîng pyám bekô âbe.” ga myìt yù mù, nàpsûn noq le toq luî, yhángmòq yùq hkangmó é matú myi nyhé hkungga nhông byi byi kut ri. Yobaq gi, haû su ayang kut nyi ri.
6 Ra-nyí lé, maumang lagyô péa gi, yhûmsing gùng lé haû Yhûmsîng Garaî é hí má lé shit kô é hkûn, Tsádán le, yhángmòq eq rahá bo lé ri. 7 Haú hkûn, haû Yhûmsîng Garai gi, Tsádán lé, “Nàng, hká mai lé lo é nghut lhê lhú?” ga myi jáng, Tsádán gi, haû Yhûmsîng Garai lé, “Myìdàm htoq gón má yông wún mù, ê ê lò lò kut wún é mai htoq lo é nghut lhê.” ga tû taî ri.
8 Haû mù, haû Yhûmsîng Garai gi, Tsádán lé, “Ngá é duìnhâng zoshâng Yobaq lé nàng wú xûm tô lhê lhú? Myìdàm htoq má yhang su dùt é byù ó a nyì; yhang gi, ra a bo é eq i-myìt díngmán é nghut luî, Garai Gasang lé gyùq hkúngga mù, agè ashop hkyô lé koi pyâm é sû nghut ri.” ga taî ri.
9 Tsádán gi, “Yobaq, haî le a nghut tô é má Garai Gasang lé gyùq hkúnggâ é nghut lhê lhú? 10 Nàng gi, yhang lé le, yhâng é yhûmbyù wuì eq yhang wó é lhúnglháng lé le, kyâm lhîng to byi bê a nghut lhí? Nàng gi, yhâng é hkyîshi lòqshi má shimân byi mù, yhâng é shigu gaunyhaú gi, ra-mau gón byíng to bê nghut ri mhaî. 11 Nghut kôlhang, ahkuî, Náng é lòq lhâm kat mù, yhang wó é lhúnglháng lé lhoqhtên pyám byi aq; haú hkûn, yhang gi, Náng é myòq hí má yhang, Nang lé nhîng pyám râ nghut lhê.” ga tû taî ri.
12 Haû mù, haû Yhûmsîng Garai gi, Tsádán lé, “Haû jáng, yhang wó é lhúnglháng gi, náng é lòq má nghut bê; nghut kôlhang, yhang lé za nàng hkâzáng.” ga taî ri.
Haû mù, Tsádán gi, haû Yhûmsîng Garaî é hí mai htoq ló bê nghut ri.
13 Ra-nyí lé, Yobaq é yhang zo yùqzo byìzô pé gi, yhángmòq é yhang mangmó é yhûm má poî zoshuq chôm zo chôm shuq nyi bùm kô é hkûn, 14 hkyang shit sû rayùq gi, Yobaq chyáng din jé lô mù, “No pé gi, yò hpuq nyî mù, loze pé gi, a-nàm má mhan zô nyì kô é hkûn, 15 Sabe-a byu pé lé htim kômù, haú pé lé kôn ló bekô nghut ri. Yhángmòq gi, duìnhâng zoshâng wuì lé le, sham èq sat pyám bekô nghut ri; ngò baú za, nang lé hkyáng lo shit râ matú wó hpang lùt lo é nghut lhê!” ga taî kyô ri.
16 Haú yùq hkyang ru shit nyi ashî le, hkyang shit sû góyùq jé lô mù, “Garai Gasâng é myi gi, mauhkûng mai gyó lô luî, sau pé eq duìnhâng zoshâng wuì lé nyhê hkyô pyám bê nghut ri; ngò baú za, nang lé hkyáng lo shit râ matú wó hpang lùt lo é nghut lhê!” ga taî kyô ri.
17 Haú yùq hkyang ru shit nyi ashî le, hkyang shit sû góyùq jé lô mù, “Hkalade byu pé sum hpúng htîm dòq lô kômù, náng é gola-uk pé lé kôn ló bekô nghut ri. Yhángmòq gi, náng é duìnhâng zoshâng wuì lé le, sham èq sat pyám bekô nghut ri; ngò baú za, nang lé hkyáng lo shit râ matú wó hpang lùt lo é nghut lhê!” ga taî kyô ri.
18 Haú yùq hkyang ru shit nyi ashî le, hkyang shit sû góyùq dum jé lô mù, “Náng é yùqzo byìzô pé gi, yhángmòq é yhang mangmó yhûm má poî zoshuq chôm zo chôm shuq nyi bùm kô é hkûn, 19 yòso mai laìdun mó lò mù, yhûm myi chyûn má lo mùt luî, yhûm haû gi, yhángmòq é ahtoq má gyòp gyó mù, yhángmòq shi byùq bekô nghut ri. Ngò baú za, nang lé hkyáng lo shit râ matú wó hpang lùt lo é nghut lhê!” ga taî kyô ri.
20 Haú hkûn, Yobaq gi, toq mù, yhâng é mèbu lâng cheq luî, xâm wùq pyám mù, myigùng má ngóm gòp luî, noqkuq mù,
21 “Ngò gi, ngá nû é ûng mai gùngchîn hku lé é nghut mù,
gùngchîn dum taû ló râ nghut lhê.
Haû Yhûmsîng Garai gi, byi bê nghut mù, haû Yhûmsîng Garai gi, dum yu pyám bê nghut ri;
haû Yhûmsîng Garaî é myìng gi, hkungsô wó nyî sháng gàq ô!” ga taî ri.
22 Yobaq gi, haú pé bànshoq hui zo kôlhang, mara le a shut, Garai Gasang lé le, mara a hûn nghut ri.