2
Dum ra-nyí lé, maumang lagyô péa gi, yhûmsing gùng lé haû Yhûmsîng Garaî é hí má lé shit kô é nghut mù, Tsádán le, yhángmòq eq rahá bo lé lô luî, yhâng gùng lé htoq shit ri. 2 Haú hkûn, haû Yhûmsîng Garai gi, Tsádán lé, “Nàng, hká mai lé lo é nghut lhê lhú?” ga myî ri.Tsádán gi, haû Yhûmsîng Garai lé, “Myìdàm htoq gón má yông wún mù, ê ê lò lò kut wún é mai htoq lo é nghut lhê.” ga tû taî ri.
3 Haû jáng, Yhûmsîng Garai gi, Tsádán lé, “Ngá é duìnhâng zoshâng Yobaq lé nàng wú xûm tô lhê lhú? Myìdàm htoq má yhang su dùt é byù ó a nyì; yhang gi, ra a bo é eq i-myìt díngmán é nghut luî, Garai Gasang lé gyùq hkúngga mù, agè ashop hkyô lé koi pyâm é sû nghut ri. Yhang hai mara a bò kôlhang, yhang lé lhoqhtên pyám râ matú, nàng, Ngo lé myìt toq nhâng kôle, yhang gi, i-myìt ru díng nyi ashî nghut ri.” ga taî ri.
4 Haû jáng, Tsádán gi, “Sho-kuq é matú sho-kuq gâ é eq rajung za, byù rayùq gi, yhûmsing é chyungxê é matú, yhang wó é bànshoq byî pyám râ nghut lhê. 5 Nghut kôlhang, ahkuî, Náng é lòq lhâm kat mù, yhâng é gùngsho eq showui showang pé lé záng lhoqnhô byi aq; haû jáng, yhang gi, Náng é myòq hí má yhang, Nang lé hkyak nhîng pyám râ nghut lhê.” ga tû taî ri.
6 Haû Yhûmsîng Garai gi, Tsádán lé, “Haû jáng, nghut bê. Yhang gi, náng é lòq má nghut nyi ri; yhâng é chyungxe lé kúm lhoqlhut to byi ra râ nghut lhê.” ga taî ri.
7 Haû mù, Tsádán gi, haû Yhûmsîng Garaî é hí mai htoq ló luî, Yobaq lé, hkyîwa mai ují lagùng jé shoq hkê-nho dik jung byìng yùq nhâng bê nghut ri. 8 Haû mù, Yobaq gi, tso-au jàp lé yù mù, myiwap bùm má zùng uchyang, yhâng é gùng má kyin ri.
9 Haú hkûn, yhâng é yhûmsîng myhí gi, “Nàng gi, i-myìt ru díng nyi ashî lhú? Garai Gasang lé nhîng pyám luî, shi byùq àq!” ga taî ri.
10 Yhang kúm gi, “Nàng gi, byù na myhí su ga dang taî ri. Garai Gasâng chyáng mai ge é hkyô lé hàp yù bê nghut le nhîng, Yhâng chyáng mai wuîhke hkyô lé le ge hàp yu lhê, a nghut lhí?” ga tû taî ri.
Yobaq gi, haú pé bànshoq hui zo kôlhang, dang dông lháng mara a shut nghut ri.
11 Yobaq é luzúm wuî nghut é, Teman byù Elihpaza, Shu-a byù Bilidat eq Namat byù Zohpara pé sum yuq gi, Yobaq chyáng dùt é wuîhke jamjau hkyô haú pé bànshoq lé wó gyo kôjáng, yhang eq rahá ê bo yón râ eq yhang lé nhik ê tíng byi râ matú, rahá chôm zùp sháng ga hpyê ge lhûm to kômù, ó le ô é yhûm mai htoq e ló bekô nghut ri. 12 Yhángmòq gi, we we mai yhang lé myàng kôlhang, yhang lé gyai wú sé wui kô é yánmai, wùt ngaù kôluî, yhûmsing é mèbu lé lâng cheq pyám kômù, hpuílhup lé yhángmòq é ulhum má gyó gyun shoq kyaq tâng akô nghut ri. 13 Haû mù, yhángmòq gi, yhang eq rahá nyhit nyí nyhit myîn myigùng má zùng mù, yhang, gyai yhang hpu zô dik nyi é lé myàng kô é yánmai, ó yùq le, yhang lé dang rahkun lháng a nyò kó nghut ri.