Esihta 1

ESIHTA

Laiká

(Esther)

Washiti Lé Hkóhkâm Myhí Ayá Mai Lhoqhkyô Pyâm É Hkyô

A‑ô mâ é hkyô pé gi, Hkóhkâm Ahasuru, Indi-a mau mai Hkusha mau jé shoq, 127 mau lé ùp nyi é hkûn dùt é nghut lhê. 2 Haú ayòq abun má, yhang gi, Susa wà mó mâ é gingtíng jowò hkaû mâ é yhâng é tángmyhâng mai ùp nyi é nghut ri. 3 Yhang gi, hkóhkâm kut é sum zân má, yhâng é zaugun sûwún wuî eq duìnhâng zoshâng wuì bànshoq é matú zoshuq poî mó kut byî ri. Haû mù, mau hkangmó mâ é zaugun sûwún wuî, Perisi eq Medi gyèzaû pé eq xânghpoq nge wó bang bànshoq gi, yhâng é hí má lé zùp zîng nyi bum akô nghut ri.

4 Haú hkûn, yhang gi, yhángmòq lé, buìnyì 180 nyí yhang, yhâng é hkóhkâm mîngdán gón eq sêng é sùtzè pé, hkìkhkâm hkyô eq kô myhâng hkyô pé lé tûn shit ri. 5 Buìnyì haú pé lai jáng, yhang gi, Susa wà mó mâ é hkóhkâm wâng má nyi é tiq zo ko zo lhúnglháng bâng é matú, hkóhkâm wâng ban hkyâm hkaû má, buìnyì nyhit nyí yhang zoshuq poî kut byî ri. 6 Hkyâm haú má, lùq hpyû zìng má gi, ngùn hkóng pé lhâng to mù, nú nhâm é ji tui eq mê é tui pê èq, hpyu é nyui é pán-gyang pé lé gyân tô ri. Ngùn hing èq saî tô é yhupgyàp pé lé gi, ne é, hpyu é, palhé isâm htoq é, nyui é lùqgòk pé hkâng tô é jang má tô tô ri. 7 Yhángmòq gi, a pung é hîng gòm mai tsibyiq wing shuq bum akô; hkóhkâm wá byi huq nau é myìt bo é eq rajung za, tsibyiq wing gi, agùn agó yhang nghut ri. 8 Tsibyiq wing shuq é má hkóhkâm hkunmó hkyô to bê eq rajung za, yhûmsîng nau é myhó shuq râ matú jaú byi sháng gàq ga, hkóhkâm gi, yhâng é duìnhâng zoshâng wuì lé hkunmó hkyô tô ri.

9 Haú ahkyíng má yhang, Hkóhkâm myhí Washiti le, Ahasuru é hkóhkâm wânghkaû mâ é myiwe wui é matú zoshuq poî kut byî nyi ri.

10 Hkóhkâm wá é zoshuq poî kut é nyhit nyí nghû râ buìnyì má, hkóhkâm hpó gi, tsibyiq wing shuq luî, i‑myìt gyai ngón nyi é yánmai, yhâng é duìnhâng zoshâng wuì u-nuk nghut é Mehuman, Bizihta, Harabona, Bigihta, Abagihta, Zehtara eq Hkarahka pé nyhit yùq lé ji hâng yù mù, 11 Hkóhkâm myhí Washiti lé hkóhkâm jánmaú tsung nhâng luî, ê shui lò râ matú hkunmó hkyô kat ri. Haû gi, zaugun sûwún wuî eq mingbyû wui é hí má hkóhkâm myhí yúng é hkyô lé tûn shit râ matú nghut ri; hkâsu mù gâ le, yhang gi, gyai wú yúng sû nghut ri. 12 Nghut kôlhang, Hkóhkâm myhí Washiti gi, u-nuk pé lé taî kyô é hkóhkâm dang lé lhom he-ngìk pyám luî, a ê kut ri. Haû mù luî, hkóhkâm gi, gyai yhang nhikmó-yô nyì bê nghut ri.

13-14 Haû mù, târâ eq târâ ràp-rá hkyô sê dik bang lé byìn hpyê é htûng jòq é eq rajung za, hkóhkam é nàm má hkâ-nhám le nyi nyi é, ayá le je kô é, Perisi, Medi ming má hpàqchyî je bò luî, ahkyíng yàm-yòq sê wú é zaugun sûwún nyhit yùq nghut é, Hkarashena, Shehta, Atmahta, Tarishi, Mere, Marasena, Memuhkan pé lé ji yù mù, 15 “Hkóhkâm myhí Washiti gi, u-nuk pé taî kyô é Hkóhkâm Ahasuru é dang lé lhom he-ngìk pyám bê nghut é yánmai, târâ dông ga jáng, yhang lé hkâsu kut râ lhú?” ga yhángmòq lé myî wú ri.

16 Haú hkûn, Memuhkan gi, hkóhkâm eq zaugun sûwún wui é hí má, “Hkóhkâm myhí Washiti gi, hkóhkâm lé za shut é a nghut, Hkóhkâm Ahasuru é mîngdán má nyi é zaugun sûwún wuî bànshoq eq mingbyû wuì lhúnglháng lé shut bê nghut ri. 17 Hkâsu mù gâ le, jowò hkangmó mâ é myiwe wuì gi, haú hkyô lé wó gyo kôjáng, ‘Hkóhkâm Ahasuru gi, hkóhkâm myhí lé shuî lé râ matú hkunmó hkyó kôlhang, hkóhkâm myhí a lé nghut ri.’ ga taí mù, yhángmòq é yhûmsîng hpô pé lé a hkúngga kut kôrâ nghut lhê. 18 Hkû-nyí hkóhkâm myhí kut é hkyô shî lé, Perisi, Medi mau mâ é zaugun sûwún myhî pé wó gyo kôjáng, yhángmòq le, hkóhkam é zaugun sûwún wuî bànshoq lé haû su kut kôrâ nghut lhê; haû mù, guì wú é hkyô eq nhikmó-yô é hkyô ru htoq nyî berâ nghut lhê.

19 Haû mù, hkóhkâm gyô é nghut jáng, Washiti gi, hkóhkam é hí má hkâ-nhám le a wó wàng râ hkunmó hkyó mù, hkunmó haû a ge htaî lhik byùq râ matú, Perisi eq Medi mau târâ laiká má kâ to sháng gàq; hau htoq agó, hkóhkâm gi, Washiti htoq je réng é myiwe lé hkóhkâm myhí ayá byî pyám sháng gàq. 20 Haú hkûn, hkóhkam é hkunmó gi, mîngdán gón byo myín ló mù, i-kun myhî pé bànshoq bang gi, yhûmsing é yùqgè wuì lé, xânghpoq nge wó kôlhang, a wó kôlhang, hkúngga ra kôrâ nghut lhê.” ga taî ri.

21 Hpàqchyî byi dang haú lé, hkóhkâm eq yhâng é zaugun sûwún wuî gyô nguì kômù, hkóhkâm gi, Memuhkan é dang eq rajung za kut bê nghut ri. 22 Yhûmsîng hpó rayùq gi, yhûmsing é yhûm má ùphkâng râ matú le, yhûmsing é myíng dông nyo nyì râ matú le, hkóhkâm gi, yhûmsing mau mâ é laiká dông le, yhûmsing a-myu é dang dông le, hkóhkâm mau ra-mau gón jàm shoq hkunmó hkyó laiká tsing hun kat bê nghut ri.