Ló Htâng Dàm Nehemi-a Asik Dum Shuî Htaî Lhik Yu É Hkyô
13
Haú nyí má, Mosheq é laiká bùk lé, shiwa byu pê é hí má htê mó èq nghap kyô akô. Haú má, Ammon byu pé eq Moba byu pé, Garai Gasâng é shiwa hpong má wàng râ ahkáng hkâ-nhám le wó kôrâ a nghut ga kâ tô é lé, myàng nghap akô nghut ri. 2 Hkâsu mù gâ le, yhángmòq gi, Isira-elaq byu pé lé, zoshuq eq wuì a lhom byi kô é htoq agó, yhángmòq lé nhing nhâng râ matú, Balam lé nghô yu akô nghut ri. (Nghut kôlhang, ngá-nhûng é Garai Gasang gi, nhing dang lé, shimân jeju dang dùt nhâng bê nghut ri.) 3 Shiwa byu pé gi, haû târâ lé wó gyo kôjáng, tûngbaù byu pé eq a-nyhó achí nyi é bang bànshoq lé, Isira-elaq a-myû mai lhoqkâng pyâm akô nghut ri.4 Hau é hí má, ngá-nhûng é Garai Gasâng é yhûm mâ é chyî pé lé wú gon râ matú, hkyangjong Eli-aship lé wò byî tô akô; yhang gi, Tobi-a eq zùmhkau é luzúm nghut mù, 5 Tobi-a lé, gùqzò hkungga pé, namngón jung pé, noqkuq yhûm mâ é chûngzè pé lé tsing kat to râ matú le, Lewiq byu pé, mahkôn hkôn bang eq hkum zúng bâng é matú tô tô é târâ eq rajung za, gùqzò muilhum, tsibyiq wing asik eq tsanlun xû pé mâ é xê gàmbùm rabùm kat râ matú le, hkyangjông pê é matú byi râ chyûnghuq pé kat râ matú le, chung nyì gù nghut é chyî mó lajang byî bê nghut ri.
6 Nghut kôlhang, haú pé bànshoq dùt nyi é u le, ngò gi, Yerusalem wà mó má a nyi záng tô é nghut lhê. Hkâsu mù gâ le, Babelon hkóhkâm Aritasase ùp é súm xe í zan zàn má, ngò, yhâng chyáng taû ló é nghut lhê. Tsómra myáng é htâng má, ngò gi, yhang lé ahkáng dung luî, 7 Yerusalem wà mó má dum taû jé lé é nghut lhê. Haú hkûn, ngò gi, Eli-aship mai, Garai Gasâng é noqkuq yhûmwàng hkaû má, Tobi-a lé wàp hen lajang byî é dông agè ashop hkyô kut é lé wó sê yu ri. 8 Haû mù, ngò gi, gyai yhang yón kuq é myìt èq Tobi-a é yhûm chûngzè bànshoq lé, wàp mai hkyom tâng htoq pyám byî é nghut lhê. 9 Ngò gi, wàp pé lé lhoqsan lhoqyúng râ matú hkunmó hkyô é nghut lhê. Hau htâng, Garai Gasâng é yhûm má chung é zè pé eq rahá, gùqzò hkungga eq namngón jung pé lé, wàp haú pé má dum kat tô é nghut lhê.
10 Haû Lewiq byu pé eq sêng é gàmbùm lé a byi shi kô é yánmai, dójaú râ wò wó é Lewiq byu pé eq mahkôn hkôn bang bànshoq gi, yhûmsing é yò pé shut taû ló bekô nghut é hkyô lé le, ngò wó sê yu ri. 11 Haû mù, ngò gi, zaugun sûwún wuî lé tan luî, “Garai Gasâng é yhûm lé, haî mù tô pyâm tô akô lhú?” nghû myî é nghut lhê. Hau htâng, ngò gi, Lewiq byu pé eq mahkôn hkôn bang lé ji tsîng yù mù, yhûmsing é múzó lé dum xoq wùn wàq nhâng bê nghut lhê.
12 Haû mù, Yudaq byù bànshoq bang gi, gùqzò muilhum, tsibyiq wing asik eq tsanlun xû mâ é xê gàmbùm ragàmbùm lé, chyî pé má yu lé lo bum akô nghut ri. 13 Ngò gi, hkyangjong Shelemi-a, chyirê hpó Zadok eq Lewiq byù Pedai-a ga sû lé, chyî pé wú gôn lajang râ wò byi mù, yhángmòq lé htuqbáng râ matú, Matani-a é yhang shu, Zahkura é yhang zo yùqzo Hanan lé wò byî tô é nghut lhê; haî mù gâ le, yhángmòq lé gi, wó lum é bang ga myìt sôn yu kô é yánmai nghut lhê. Yhángmòq gi, yhángmòq é gu-mang Lewiq byu pé lé, garúm htuqbáng é zè tsing gàm byi râ matú wò byî é hui bang nghut bum akô nghut ri.
14 Ngá é Garai Gasang ê, múzó shí hkyo é yánmai, ngo lé myìtbun laq. Ngá é Garai Gasâng é noqkuq yhum é matú le, haû eq sêng é dójaú é múzó é matú lé, ngò lhumzui luî, kut bê nghut é hkyô lé hkâ bùt sut pyám byi ô!
15 Buìnyì haú yòq haú bun pé má, ngò gi, Yudaq mau má, byu pé mai, Bánno Buìnyì má tsibyiq wing pyik kô é lé le, gùqzò muilhum lé tsîng yù mù, loze pé má buí chung é htoq agó, tsibyiq wing, tsibyiq shi pé, hkohúm-shi eq gótû ung zè pé bànshoq lé le buí chûng luî, Bánno Buìnyì má, zè haú pé bànshoq lé, Yerusalem wà mó shut dé hâng nyi bùm kô é lé myang ri. Haû mù, ngò gi, Bánno Buìnyì má, zoshuq a ung râ matú, yhángmòq lé sidìq byî é nghut lhê. 16 Turuq wà mó mai Yerusalem wà mó má lé nyi é byu pé gi, ngozo eq gótû ung zê ajà jà lé yu lé kômù, Yerusalem wà mó má, Bánno Buìnyì lé, Yudaq byu pé lé ung byi byi kut akô nghut ri. 17 Haû mù, ngò gi, Yudaq byu pé mâ é xânghpoq nge wó bang lé tan luî, “Bánno Buìnyì lé lhoqwùq pyâm é, agè ashop hkyô lé núngmòq kut nyî kô é gi, hkâsu kó lhú? 18 Núngmòq é îchyí îwâ pé le rajung za kut kô é nghut mù, ngá-nhûng é Garai Gasang gi, ngá-nhûng chyáng le, wà mó shi é ahtoq má le, wuîhke jamjau hpuzô é hkyô shí pé bànshoq jé nhâng bê, a nghut kó lhí? Ahkuî, núngmòq gi, Bánno Buìnyì lhoqwùq pyâm é dông, Isira-elaq byu pé lé nhikmó-yô é hkyô je riyhang lhoqhtoq nyî bekô nghut ri.” nghû taî é nghut lhê.
19 Bánno Buìnyì jé lô yàm, Yerusalem wà mó hkum má, myínhtâng buìloq záng nyi ashî u mai, Bánno Buìnyì lai shoq, hkum pé lé a hpông é za tsing myhî to râ matú, ngò hkunmó hkyô é nghut lhê. Bánno Buìnyì má, haí jung zè le a wó htô wàng râ matú, ngá é byu pé ra-am lé, hkum pé má zúng nhang tô bum é nghut lhê. 20 Haû mù, wuìloq kut bang eq gaì zè ajà jà ûng é bang gi, Yerusalem wà mó shinggan má, ra í myîn yhup râ dùt byùq akô nghut ri. 21 Nghut kôlhang, ngò gi, yhángmòq lé, “Núngmòq, myín lé wàhkûm shinggan má haî mù yhup kô é lhú? Núngmòq, htâng má haû su dum kut kôjáng, chyup yû râ nghut lhê.” nghû sidìq byî é nghut lhê. Haú hkûn mai, yhángmòq gi, Bánno Buìnyì má a lé lo kó nghut ri. 22 Hau htâng, ngò gi, Lewiq byu pé lé, yhûmsing gùng yhûmsîng lhoq chyoiyúng yû mù, Bánno Buìnyì lé wó chyoiyúng nyî nhâng râ matú, hkum pé lé zúng râ hkunmó hkyô é nghut lhê.
Ngá é Garai Gasang ê, múzó shí hkyo é yánmai, ngo lé myìtbun mù, Náng é chyitdàp myìt mó má cháng luî, ngo lé shogyo nhikmyîn yù laq ô!
23 Hau htoq agó, buìnyì haú pé má, ngò gi, Ashidot a-myû, Ammon a-myû eq Moba a-myû myiwe zo wuî lé hâng yu é Yudaq byù ra-am lé myàng ri. 24 Yhángmòq é zoshâng wuì rawuí gû kô gi, Ashidot a-myû myíng nyhô é, a nghut jáng, gótû byu pê é myíng rahú hú lé za nyò kut kômù, Yudaq byu pê é myíng lé hká dông nyò râ a sê byùq lo kó nghut ri. 25 Haû mù, ngò gi, yhángmòq lé tan luî, nhîng pyâm é nghut lhê. Ra-am lé gi, bàt luî, yhángmòq é xâm lé kyaq hpûn pyâm byî é nghut lhê. Hau htâng, ngò gi, yhángmòq lé, Garai Gasâng é myìng mai dakâm nhâng luî, “Núngmòq gi, núngmòq é byìzô pé lé, yhángmòq é yhang zo yùqzô pé eq a yu lhum nhâng; yhángmòq é byìzô pé lé, núngmòq é yùqzô pê é matú nghut nghut, núngmòq é matú nghut nghut, a yù râ nghut lhê. 26 Hkâsu mù gâ le, Isira-elaq byu pê é hkóhkam Sholumon gi, myi yû hkyô má haú dông kut luî, mara shut bê a nghut kó lhú? Gótû byù myû myo myo má, yhang su hkìk é hkóhkâm a nyì. Yhang lé gi, Garai Gasang èq chyitdàp luî, Garai Gasang gi, yhang lé, Isira-elaq byù bànshoq lé ùp é hkóhkâm kut nhâng bê nghut ri. Nghut kôlhang, yhang lháng gi, tûngbaù myiwe wui èq mara shuî kut shut é hui zo ri. 27 Ahkuî, núngmòq le, shî gyùq chiq hpo agè ashop bànshoq lé kut nyi akô nghu é eq, tûngbaù myiwe hâng yù mù, ngá-nhûng é Garai Gasang lé a jujúm kut nyi akô nghu é lé, ngá-mòq wó gyo ra râ lhú?” nghû taî é nghut lhê.
28 Hkyangjong mó Eli-aship é yhang zo Yoi-ada é yhang zo yùqzô pé mâ é rayùq gi, Horoni byù Sanbalat é zo-moq hpó nghut mù, ngò gi, yhang lé ngá chyáng mai hkat htoq pyâm é nghut lhê.
29 Ngá é Garai Gasang ê, yhángmòq gi, hkyangjong ayá lé le, Lewiq byu pé eq hkyangjong a-myû wui é dangshikaq lé le, achaq achyut kut pyám kô é yánmai, yhángmòq lé myàng byi laq ô!
30 Haû mù, ngò gi, hkyangjông pé eq Lewiq byu pé lé, tûngbaù pé eq sêng é jung hkangmó mai lhoqchyoi lhoqyúng yû luî, ó le ô é múzó kut râ matú, wò tsing hun to bê nghut lhê. 31 Ngò gi, ding tô é ahkyíng jé jáng, htang chyûnghuq lé le, sânghi myhîng é kyôshi myuishi pé lé le, nhông byi râ matú lajâng to byi bê nghut lhê.
Ngá é Garai Gasang ê, jeju shit é dông ngo lé myìtbun laq ô!