Hkyangjông Pé Eq Lewiq Byu Pé
12
A-ô pé mâ é gi, Yeshu-a eq Shelatila é yhang zo yùqzo Zerubabela le mù rahá taû lo é hkyangjông pé eq Lewiq byu pé nghut lhê. Serai-a, Yeremi-aq, Ezira, 2 Amari-a, Maluk, Hatusha, 3 Shehkani-a, Rehum, Meremot, 4 Ido, Genehton, Abiya, 5 Mijamin, Madi-a, Bilaga, 6 Shemai-a, Yoi-arip, Yedai-a. 7 Salu, Amok, Hiliki-a, Yedai-a pé nghut akô.Shí bang gi, Yeshu-a é i-pyàt má, hkyangjông pé eq yhángmòq é gu-mang wui é ushuq pé nghut akô.
8 Lewiq byu pé gi, Yeshu-a, Binui, Katmi-ela, Sherebi-a, Yudaq eq, jeju hkya-on mahkôn lé, yhâng é gu-mang wuì eq rahá shuî-û sû nghut nyi é Matani-a pé nghut akô. 9 Yhángmòq é gu-mâng nhik Bakbuki-a eq Uno gi, dójaú é hkûn, myòq hí hkyam shut yàp é su nhik nghut akô nghut ri.
Yeshu-a É Awùt Ashín pé
10 Yeshu-a gi, Yoi-akim lé hkû; Yoi-akim gi, Eli-aship lé hkû; Eli-aship gi, Yoi-ada lé hku; 11 Yoi-ada gi, Yonahtan lé hkû; Yonahtan gi, Yadu-a lé hku ri.
12 A-ô mâ é gi, Yoi-akim é i-pyàt mâ é hkyangjong yhûmhtu pé mâ é ushuq pé nghut ri:
Serai-a yhûmhtu mâ é gi, Merai-a;
Yeremi-aq yhûmhtu mâ é gi, Hanani-a;
13 Ezira yhûmhtu mâ é gi, Meshulam;
Amari-a yhûmhtu mâ é gi, Yehohanan;
14 Maluk yhûmhtu mâ é gi, Yonahtan;
Shebani-a yhûmhtu mâ é gi, Yosep;
15 Harim yhûmhtu mâ é gi, Atna,
Merai-ot yhûmhtu mâ é gi, Helakai;
16 Ido yhûmhtu mâ é gi, Zehkariq;
Ginehton yhûmhtu mâ é gi, Meshulam;
17 Abiya yhûmhtu mâ é gi, Zihkri;
Mini-amin eq Mo-adi-a yhûmhtu mâ é gi, Pilatai;
18 Bilaga yhûmhtu mâ é gi, Shamu-a;
Shemai-a yhûmhtu mâ é gi, Yehonahtan;
19 Yoi-arip yhûmhtu mâ é gi, Matenai;
Yedai-a yhûmhtu mâ é gi, Uzi;
20 Salu yhûmhtu mâ é gi, Kalai;
Amok yhûmhtu mâ é gi, Ebera;
21 Hiliki-a yhûmhtu mâ é gi, Hashabi-a;
Yedai-a yhûmhtu mâ é gi, Nehtanela pé nghut akô nghut ri.
22 Eli-aship, Yoi-ada, Yohanan eq Yadu-a pê é i-pyàt mâ é, Lewiq up é yhûmhtu ushuq pé eq hkyangjông pé é yhûmhtu ushuq pé lé gi, Perisi hkóhkâm Dari ùp é ayòq abun má kâ xûm tô akô nghut ri. 23 Eli-aship é yhang zo Yohanan é i-pyàt jé shoq mâ é, Lewiq é awùt ashîn pê é yhûmhtu ushuq pé lé gi, haû mhô-myi shindâm laiká bùk pé má kâ xûm tô ri. 24 Lewiq byu pê é ushuq pé gi, Hashabi-a, Sherebi-a, Katmi-ela é yhang zo Yeshu-a eq, yhángmòq é myòq hî hkyam shut yàp tô é, haû Garai Gasâng é byù Dawiq shit kyô tô é eq rajung za, jeju bun luî hkya-on râ matú, rahpûng htâng rahpúng htaí lô pyî gàn kut râ dông wò byî tô é yhángmòq é gu-mang wuì nghut bum akô nghut ri.
25 Matani-a, Bakbuki-a, Obadi-a, Meshulam, Talamon eq Akup pé gi, wâng hkum nàm pé mâ é chyî pé lé zúng é hkum zúng bang nghut akô. 26 Haú bang gi, Yozadak é yhang shu, Yeshu-a é yhang zo yùqzo Yoi-akim é buìnyì pé má le, ming zau Nehemi-a é buìnyì pé má le, târâ sará nghut é hkyangjong Ezira é buìnyì pé má le, dójaú akô nghut ri.
Yerusalem Wàhkûm Lé Àp Nhong É Hkyô
27 Yerusalem wàhkûm lé àp nhong é hkûn, àp nhong é poî haú má gabú myìt mai jeju hkya-on mahkôn hkôn luî, chapchéng eq tíng pé ajà jà bàt râ matú, Lewiq byu pé lé, nyi é jowò châng ho yù mù, Yerusalem wà mó má shuî lo bum akô nghut ri. 28 Mahkôn hkôn bang gi, Yerusalem wà mó awui ayàm mau pé nghut é, Netohpat byu pê é wà pé mai le, 29 Bet Giligala jowò mai le, Geba eq Azimawet jowò mai le lé zùp zîng bum akô; hkâsu mù gâ le, mahkôn hkôn bang gi, Yerusalem wà mó awui ayàm má, yhángmòq é matú, wà xuq tô bum akô nghut ri. 30 Hkyangjông pé eq Lewiq byu pé gi, lhoqchyoi lhoqyúng hking dông yhûmsing gùng yhûmsîng lhoqchyoi lhoqyúng kô é htâng má, shiwa byu pé lé le, wâng hkum pé eq wàhkûm haú lé le, lhoqchyoi lhoqyúng bekô nghut ri.
31 Ngò gi, Yudaq byu pê é ushuq pé lé, wàhkûm hpyo má dòq ló nhâng luî, jeju hkya-on râ matú, mahkôn hkon é hpúng mó í hpúng lé wò byî é nghut lhê; rahpúng gi, wàhkûm hpyo mai A-pyâng Hkum shut nghut é lòqyo hkyam shut sô e ló akô. 32 Hoshai-a eq Yudaq ushuq pé rawuí gû gi, haú bâng é htâng má châng e ló akô. 33 Yhángmòq eq rahá, Azari-a, Ezira, Meshulam, 34 Yudaq, Ben-yamin, Shemai-a, Yeremi-aq, 35 tut chung é hkyangjông pé ra-am, Asap akoq mâ é Zahkura é shu ké kup, Mihkai-a é shu ké tsáng, Matani-a é shu ké, Shemai-a é yhang shu, Yonahtan é yhang zo yùqzo Zehkariq, 36 yhâng é gu-mang wuì nghut é, haû Garai Gasâng é byù Dawiq shit kyô tô é bàt ngón jung zè chûng bang Shemai-a, Azarela, Milalai, Gilalai, Ma-ai, Nehtanela, Yudaq eq Hanani pé bo châng e bum akô nghut ri. Târâ sará Ezira mai yhángmòq lé shuî-û e ló ri. 37 Yhángmòq gi, Wuìbúm Hkum mai, Dawiq é Wà shut dòq ló é zùmhtâng mai sô dòq ló kômù, Dawiq é hkóhkâm wâng ahtoq mai laî byìt ló kôluî, buìhtoq hkyam shut mâ é Wuì Hkum jé shoq xoq sô e ló akô nghut ri.
38 Dum, jeju hkya-ôn nyi é góhpúng gi, lòqpaî hkyam shut e ló akô. Ngò gi, shiwa byu pé rawuí gû eq rahá kut luî, yhángmòq é htâng má wàhkûm hpyo mai châng e ló luî, Myi Bunghkyûng Mâchya gâ é jowò mai lai luî, Wàhkûm Làm Mó ga jang jé shoq châng ê mù, 39 Ehprim Hkum jé, haû mai Hkum Xau jé, haû mai Ngozo Hkum jé, haû mai Hananela Mâchya jé, haû mai Shô ùp Mâchya lai luî, Sau Hkum lháng lai shoq ê mù, Wà Zúng Hkum hkun má no bê nghut lhê.
40 Jeju hkya-ôn nyi é mahkôn hkon é hpúng mó í hpúng gi, Garai Gasâng é yhûm hkaû má ó le ô é jowò yù bekô nghut ri; ngò le, zaugun sûwún wuî rawuí gû eq rahá haû su kut bê nghut lhê. 41 Hau htoq agó, hkyangjông pé nghut é, yhûmsing é tut chung tô é Eli-akim, Mase-a, Mini-amin, Mihkai-a, Eli-onai, Zehkariq, Hanani-a pé le, 42 Mase-a, Shemai-a, Ele-aza, Uzi, Yehohanan, Malikiya, Elam, Ezera pé le haú dông kut akô nghut ri. Mahkôn hkon é bang gi, Yezarahi-a shuî-û é dông htê mó o mó eq hkon akô nghut ri. 43 Haú nyí má, yhángmòq gi, hkungga mó pé nhông kôluî, gabú nguì ngón bum akô; hkâsu mù gâ le, Garai Gasang gi, yhángmòq lé gyai yhang nguì ngón hkyô byî é yánmai nghut ri. Myiwe zoshâng wuì le, gabú nguì ngón bum akô nghut ri. Haû Yerusalem wà mó é gabú nguì ngón nyi é htê lé, we we mai lháng wó gyô ri.
44 Haú nyí má, chyûnghuq pé, sânghi myhîng é kyôshi myuishi pé eq xê gàmbùm ragàmbùm kat râ chyî pé lé wú gon byù hkyin htoq tô akô. Haú bang gi, hkyangjông pé eq Lewiq byu pê é matú, târâ má bo tô é gàmbùm eq rajung za, wàhtum pê é awui ayàm mâ é yò pé mai hkyui tsîng yù mù, chyî pé má tsing kat to ra râ nghut lhê. Yudaq byù gi, dójaú nyi é hkyangjông pé eq Lewiq byu pê é yánmai, gabú nhik dìk nyi bum akô nghut ri. 45 Yhángmòq eq rahá, mahkôn hkôn bang eq hkum zúng bang gi, Dawiq eq yhang zo Sholumon hkunmó hkyô tô é dông, yhángmòq é Garai Gasâng é múzó lé le, lhoqsan lhoqyúng é múzó lé le châng kut bum akô nghut ri. 46 Hkâsu mù gâ le, góhkûn, Dawiq eq Asap é i-pyàt má, mahkôn hkôn bâng é matú le, Garai Gasang lé jeju hkya-on mâhkon é matú le, hkyô shit é bang nyi bùm kô é nghut lhê. 47 Haû mù, Zerubabela eq Nehemi-a é i-pyàt má, Isira-elaq byu pé bànshoq bang gi, mahkôn hkôn bang eq hkum zúng bâng é matú, nyí wui é gàmbùm chyûnghuq byî akô. Yhángmòq gi, gótû Lewiq byu pê é matú le, gàmbùm san kut to byî akô; haû Lewiq byu pé gi, Arun é awùt ashîn pê é matú, gàmbùm san kut to byî akô nghut ri.