EZIRA LAIKÁ
Laiká
(Ezra)
Shúm Zûng Bang Taû Lò Râ Matú Hkóhkâm Kuru Garúm Yu É Hkyô
1
Perisi hkóhkâm Kuru ùp é sânghî zàn má, haû Yhûmsîng Garai gi, Yeremi-aq mai taî é haû Yhûmsîng Garaî é dang lhoqdìk râ matú, Kuru lé, yhâng é ming jàm shoq laiká lhoqpyô râ i-myìt nhaû toq byî ri. Hkóhkâm Kuru kâ é laiká má gi,2 “Perisi hkóhkâm Kuru taî le,
‘Mauhkûng mâ é Garai Gasang, haû Yhûmsîng Garai gi, myìdàm htoq mâ é mîngdán pé bànshoq ngo lé byi mù, Yudaq mau mâ é Yerusalem wà mó má Yhâng é matú noqkuq yhûm saí râ wò ngo lé byi bê nghut ri. 3 Núngmòq chyáng mâ é Yhâng é byù ó yùq nghut kôle, Yerusalem wà mó má nyi é Garai Gasang, Isira-elaq byu pê é Garai Gasang, haû Yhûmsîng Garaî é noqkuq yhûm lé saí râ matú, Yudaq mau mâ é Yerusalem wà mó má dòq ló kô sháng gàq; yhángmòq é Garai Gasang gi, yhángmòq eq rahá nghut nyî sháng gàq. 4 Jowò hkangmó má nyi myìt gyó tô é bang gi, yhángmòq lé, Yerusalem wà mó mâ é Garai Gasâng é noqkuq yhum é matú, ngùn, hîng, zoshuq pé, shigu gaunyhaú pé eq byi naû hkungga pé châng garúm kat kó sháng gàq.’ gâ ri.” ga bo tô ri.
5 Haû mù, yhûmsing é i-myìt má Garai Gasâng èq myìt naû toq byi huî é, Yudaq up eq Ben-yamin up mâ é yhûmhtu ushuq pé, hkyangjông pé eq Lewiq byu pé gi, Yerusalem wà mó mâ é haû Yhûmsîng Garaî é yhûm saí râ matú, dòq ló râ hên bekô nghut ri. 6 Yhángmòq é awui ayàm má nyi é bànshoq bang gi, byi naû hkungga bànshoq mai lai luî, ngùn hîng zèhkoq pé, sùtzè pé, shigu gaunyhaú pé eq hpaudap jung chyûnghuq pé châng htuqbáng kat akô nghut ri.
7 Hau htoq agó, hkóhkâm Kuru gi, Nebuhkatneza èq Yerusalem wà mó mai yu lò luî, yhâng é hparà noqkuq yhûm má kat tô é, haû Yhûmsîng Garaî é noqkuq yhûm eq sêng é zèhkoq pé lé yu htoq ri. 8 Perisi hkóhkâm Kuru gi, sùtdò zúng sû Mihtiredat lé haú pé yu htoq nhâng mù, Yudaq byu pê é ushuq Sheshibaza é lòq má nghap byi nhang ri.
9 Zè jihpán gi,
10 hîng hkoq sum xê hkyap;ngùn hkoq myí sho raxê hkyap;gótû zèhkoq pé rahkyîng nghut ri.
11 Haû mù, hîng eq ngùn zèhkoq bànshoq gi, ngó hkying myi shô bo ri. Shúm zung é bang gi, Babelon mau mai Yerusalem wà mó má dum taû lò kô é hkûn, Sheshibaza gi, zèhkoq haú pé bànshoq lé yhángmòq eq rahá yu lo ri.