36
Haú mau mâ é mingbyû wuì gi, Yosi-a é yhang zo Yeho-ahaza lé ji yù mù, Yerusalem wà mó má yhâng wâ é hkô má hkóhkâm kut nhang akô nghut ri.
Yudaq Hkóhkâm Yeho-ahaza
2 Yeho-ahaza gi, chyungxe zànwut í xe sum zân má hkóhkâm dùt mù, Yerusalem wà mó má lha-mó sum hkyap ùp ri. 3 Egutuq hkóhkâm gi, Yerusalem wà mó má zung é Yeho-ahaza lé lhoqhkyô pyám mù, Yudaq byu pé lé, ngùnhtung rahkying rashô joí eq hîng raxe rajoí chup yu ri. 4 Yhang gi, Yeho-ahaza é yhang gu Eli-akim lé Yudaq byu pé eq Yerusalem wà byu pê é hkóhkâm kut nhâng mù, yhâng é myìng lé Yehoi-akim ga htaî myhíng byî ri. Nghut kôlhang, Nehko gi, Eli-akim é yhang mang Yeho-ahaza lé chyup yû mù, Egutuq ming má shuî ló ri.
Yudaq Hkóhkâm Yehoi-akim
5 Yehoi-akim gi, chyungxe zànwut í xe ngo zân má hkóhkâm dùt mù, Yerusalem wà mó má raxe razàn ùp ri. Yhang gi, yhâng é Garai Gasang nghut é, haû Yhûmsîng Garaî é myòq hí má agè ashop é hkyô kut ri. 6 Babelon hkóhkâm Nebuhkatneza gi, yhang lé majan lé zan luî, Babelon mau shut chyup shuî ló râ matú, yhang lé gyi kyum hut byî akô nghut ri. 7 Hau htoq agó, Nebuhkatneza gi, haû Yhûmsîng Garaî é noqkuq yhûm mâ é zèhkoq pé lé le yu chûng mù, Babelon mâ é yhâng é noqkuq yhûm má ló kat tô ri.
8 Yehoi-akim ùp é gótû hkyô pé, yhang kut é achaq achyut hkyô pé eq yhang lé mara hun é hkyô pé lé gi, Isira-elaq eq Yudaq hkóhkâm pê é laiká bùk má kâ tô é nghut ri. Yhang zo Yehoi-ahkin gi, yhâng é hkóhkâm hkô má zùng bê nghut ri.
Yudaq Hkóhkâm Yehoi-ahkin
9 Yehoi-ahkin gi, chyungxe zànwut raxe shit zân má hkóhkâm dùt mù, Yerusalem wà mó má lha-mó sum hkyap èq raxê nyí ùp ri. Yhang gi, haû Yhûmsîng Garaî é myòq hí má agè ashop é hkyô kut ri. 10 Razàn ló byíng jáng, Hkóhkâm Nebuhkatneza gi, byù nhâng mù, haû Yhûmsîng Garaî é noqkuq yhûm mâ é gù bo jung zèhkoq pé lé ê yu lò nhang é htoq agó, yhang lé le Babelon má ê chyup shuî lò nhâng luî, yhâng wahtánga Zedeki-a lé Yudaq mau eq Yerusalem wà mó é ahtoq má hkóhkâm kut nhang ri.
Yudaq Hkóhkâm Zedeki-a
11 Zedeki-a gi, chyungxe zànwut í xe razàn má hkóhkâm dùt mù, Yerusalem wà mó má raxe razàn ùp ri. 12 Yhang gi, yhâng é Garai Gasang nghut é, haû Yhûmsîng Garaî é myòq hí má agè ashop é hkyô kut mù, haû Yhûmsîng Garaî é dang taí sû myìqhtoi Yeremi-aq é hí má yhûmsing gùng yhûmsîng i-myìt a lhoqnyhûm nghut ri. 13 Hau htoq agó, yhang gi, Garai Gasâng é myìng lang luî dâkam to nhâng bê nghut kôlhang, Hkóhkâm Nebuhkatneza lé gumlau toq mù, Isira-elaq é Garai Gasang, haû Yhûmsîng Garaî shut a lhing lò râ matú, yhâng é i-myìt eq nhiklhum lé kíng kíng lhoqhtan tô ri. 14 Hau htoq agó, hkyangjông pé eq shiwa byu pê é ushuq pé bànshoq gi, gótû byù myû wuì kut é achaq achyut hkyô bànshoq châng kut kômù, je riyhang a jujúm lo dùt byùq akô; Yerusalem wà mó má haû Yhûmsîng Garai lhoq chyoiyúng tô é noqkuq yhûm lé agòt a-û kut pyâm akô nghut ri.
Yerusalem Gyop Gyó Byùq É Hkyô
15 Yhángmòq é îchyí îwâ pê é Garai Gasang, haû Yhûmsîng Garai gi, Yhâng é byu pé eq Yhâng é nyì jowò lé shogyo nhikmyîn é yánmai, adàm dàm yhángmòq chyáng Yhâng é lagyô pé lé dang kyô kat ri. 16 Nghut kôlhang, yhángmòq gi, a wó hkyi yù loshoq haû Yhûmsîng Garai mai Yhâng é byu pé lé nhikmó-yô é hkûn jé shoq, Garai Gasâng é lagyô pé lé rhoî dang lhom taí kômù, Yhâng é dang pé lé haî su a ngàm lhom kut kôluî, Yhâng é myìqhtoî pé lé rhoî jihkyoî lhom kut pyâm akô nghut ri. 17 Haû mù, haû Yhûmsîng Garai gi, Babelon byu pê é hkóhkâm lé yhángmòq chyáng nhang kat é nghut luî, haú yùq gi, yhángmòq é chyoiyúng jowò hkaû má yhángmòq é zorâm wuì lé sham èq sat pyám luî, myiwe yùqgè zo wuî lé le, myhî mang hpô mâng pé eq wum nyhóm bang lé le, a shogyo kó kut ri. Garai Gasang gi, yhángmòq bànshoq bang lé Nebuhkatneza é lòq má àp byî pyám bê nghut ri. 18 Yhang gi, Garai Gasâng é noqkuq yhûm mâ é zèhkoq pé tiq é kô é bànshoq lé le, haû Yhûmsîng Garaî é noqkuq yhûm mâ é sùtzè pé lé le, hkóhkâm hpô é sùtzè pé eq yhâng é zaugun wuì pê é sùtzè pé lé le, Babelon mau má yu ló bê nghut ri. 19 Yhángmòq gi, Garai Gasâng é noqkuq yhûm lé nyhê hkyô pyám mù, Yerusalem wàhkûm lé hpyoq hpyi pyám luî, hkóhkâm wâng bànshoq lé nyhê hkyô pyám mù, haú mâ é hpaudap jung bànshoq lé lhoqhtên pyám bekô nghut ri.
20 Hkóhkâm hpó gi, shâm mai wó hpang lùt mù, nyi myìt tô é bang lé shúm dông Babelon mau má shuî ló é nghut luî, yhángmòq gi, Perisi mîngdán wó gingtîng byùq é hkûn jé shoq, yhang eq yhang zô pê é jùn dùt bekô nghut ri. 21 Haû mù, maumyî haû gi, bánnô gabú nyî bê nghut ri; haû gi, Yeremi-aq taî é haû Yhûmsîng Garaî é dang lé lhoqdìk é nyhit xê zàn byíng shoq, chamchyuîyuì bánnô to bê nghut ri.
22 Perisi hkóhkâm Kuru ùp é sânghî zàn má, haû Yhûmsîng Garai gi, Yeremi-aq mai taî é haû Yhûmsîng Garaî é dang lhoqdìk râ matú, Kuru lé, yhâng é ming jàm shoq laiká lhoqpyô râ i-myìt nhaû toq byî ri. Hkóhkâm Kuru kâ é laiká má gi,
23 “Perisi hkóhkâm Kuru taî le,
‘Mauhkûng mâ é Garai Gasang, haû Yhûmsîng Garai gi, myìdàm htoq mâ é mîngdán pé bànshoq ngo lé byi mù, Yudaq mau mâ é Yerusalem wà mó má Yhâng é matú noqkuq yhûm saí râ wò ngo lé byi bê nghut ri. Núngmòq chyáng mâ é Yhâng é byù ó yùq nghut kôle, ge taû ló râ nghut lhê; yhángmòq é Garai Gasang, haû Yhûmsîng Garai gi, yhángmòq eq rahá nghut nyî sháng gàq.’ gâ ri.” ga taî ri.