Yosi-a Lhoqlhai Poî Kut É Hkyô
35
Yosi-a gi, Yerusalem wà mó má haû Yhûmsîng Garaî é matú Lhoqlhai Poî kut ri; lha-mó sânghî hkyap raxe myi nyí nyí má, Lhoqlhai Poî hkungga sau zo lé sat bekô nghut ri. 2 Yhang gi, hkyangjông pé lé yhángmòq é wò hun to mù, haû Yhûmsîng Garaî é noqkuq yhûm má dójaú râ matú, yhángmòq lé myìt wum byî ri. 3 Yhang gi, Isira-elaq byù bànshoq bang lé mhoq shit é eq haû Yhûmsîng Garaî é matú lhoq chyoiyúng yu é hui bê nghut é Lewiq byu pé lé, “Haû chyoiyúng é sàksé dò lé, Isira-elaq é hkóhkâm Dawiq é yhang zo Sholumon saî é noqkuq yhûm má kat to keq. Ahkuî mai, haú lé núngmòq é gòqsân mai wàq râ a nghut lo. Ahkuî, núngmòq é Garai Gasang nghut é, haû Yhûmsîng Garai eq Yhâng é Isira-elaq byu pé lé dójaú keq. 4 Isira-elaq é Hkóhkâm Dawiq eq yhang zo Sholumon kâ shit tô é eq rajung za, núngmòq é byù hpúng mâ é yhûmhtu pé má cháng luî, yhûmsing gùng yhûmsîng hen lajâng to lo keq.5 Núngmòq é gu-mang Isira-elaq shiwa byu pê é yhûmhtu pé mâ é byu hpúng pê é matú, Lewiq byu pé ahpúng hpúng kut haû chyoiyúng jowò má yàp to keq. 6 Mosheq dông haû Yhûmsîng Garai hkunmó hkyô tô é eq rajung za, Lhoqlhai Poî hkungga sau zo pé lé sat mù, yhûmsing gùng yhûmsîng lhoq chyoiyúng yû luî, núngmòq é gu-mang Isira-elaq byu pê é matú hkungga sau zo sho lé hen lajang keq.” ga taî ri.
7 Hau htoq agó, Yosi-a gi, zîng tô é shiwa byù bànshoq bâng é Lhoqlhai Poî hkunggâ é matú, sau zo eq bainám sûm mun eq no sum hkyîng kat byî ri; haú pé bànshoq gi, hkóhkam é sùtzè mâ é chyat nghut ri.
8 Yhâng é zaugun wuì le, yhûmsîng byí nau é myìt mai, mingbyû wuì, hkyangjông pé eq Lewiq byu pé lé hkungga pé byî akô. Garai Gasâng é noqkuq yhûm lé wú gôn é zaugun wuì nghut é, Hiliki-a, Zehkariq eq Yehi-ela pé gi, hkyangjông pé lé, Lhoqlhai Poî hkungga sau bainám í hkying hkyuq shô eq no sum shô htoq byî akô nghut ri. 9 Lewiq byu pê é ushuq pé nghut é, Konani-a eq rahá, yhang gû nhik Shemai-a eq Nehtanela le, Hashabi-a, Yi-ela eq Yozabat pé le, Lewiq byu pé lé, Lhoqlhai Poî hkungga sau bainám ngo hkyîng eq no ngo shô htoq byî akô nghut ri.
10 Haû hkóhkâm hpó hkunmó hkyô tô é eq rajung za, haû dójaú hkyô lé ban lajâng to kôjáng, hkyangjông pé gi, yhángmòq é jowò má, Lewiq byu pé gi, yhángmòq é byù hpúng pé má yàp tô bum akô nghut ri. 11 Haû Lhoqlhai Poî sau zô pé lé sat kôjáng, Lewiq byu pé gi, sho-kuq hî nyì kô é hkûn, hkyangjông pé gi, yhûmsing é lòq èq hkungga gyàp má sui hpyûn gyûn akô nghut ri. 12 Yhángmòq gi, Mosheq é laiká bùk má kâ tô é eq rajung za, haû Yhûmsîng Garai lé nhông byi râ matú, shiwa byu pé mâ é yhûmhtu pê é byù hpúng lé byi râ ga, myi nyhé hkungga pé lé gam hkoq tô akô nghut ri. No pé lé le, haû eq rajung za kut akô nghut ri. 13 Yhángmòq gi, htûngli jòq é eq rajung za, Lhoqlhai Poî hkungga sho lé myi má nyhîn nyhoq mù, chyoiyúng hkungga pé lé, tso-au pé, mingdam pé eq auhpyén pé má chyoq luî, shiwa byù bànshoq bang lé hân jaú byî akô nghut ri. 14 Hau htâng má, yhángmòq gi, yhángmòq é matú le, hkyangjông pê é matú le, hen lajâng akô; hkâsu mù gâ le, Arun é awùt ashín hkyangjông pé gi, myín jé shoq, myi nyhé hkungga pé eq xû htung pé lé nhông byî nyi akô nghut ri. Haû mù, Lewiq byu pé gi, yhûmsing é matú le, Arun é awùt ashín hkyangjông pê é matú le, hen lajâng tô akô nghut ri.
15 Dawiq, Asap, Heman eq hkóhkam é myìqhtoi Yeduhtun mai sang tô é eq rajung za, mahkôn hkon é Asap é awùt ashín pé gi, yhûmsing é jowò má nyi tô akô. Hkum zúng bang le, dui lu a râ é za hkum hkangmó má zúng nyi bum akô; hkâsu mù gâ le, yhángmòq é gu-mang Lewiq byu pé gi, yhángmòq é matú hen lajang byî akô nghut ri.
16 Haû mù, Hkóhkâm Yosi-a hkunmó hkyô é eq rajung za, Lhoqlhai Poî kut râ hkyô eq séng mù le, haû Yhûmsîng Garaî é hkungga gyàp má myi nyhé hkungga nhông râ hkyô eq séng mù le, haû Yhûmsîng Garai lé dójaú râ hkyô bànshoq lé, haú nyí má yhang bànshoq hen to bê nghut ri. 17 Haú má jé nyi tô é Isira-elaq byu pé gi, haú hkûn, Lhoqlhai Poî eq Múnchi a bo é Mùk Zo Poî lé nyhit nyí yhang kut akô nghut ri. 18 Myìqhtoi Samu-elaq é i-pyàt mai haú hkûn jé shoq, Isira-elaq ming má haû su kut é Lhoqlhai Poî a jòq wú lo nghut ri. Yosi-a eq rahá, hkyangjông pé, Lewiq pé, Yerusalem wà byu pé eq haú má rahá nghut nyi é, Yudaq byù eq Isira-elaq byù bànshoq bang kut é Lhoqlhai Poî sû é lé, Isira-elaq hkóhkam pé mai ó yùq le a kut wú kó nghut ri. 19 Lhoqlhai Poî shî lé gi, Yosi-a ùp é raxe shit zan zàn má kut é nghut ri.
Yosi-a Shi Byùq É Hkyô
20 Haú pé bànshoq ban kut tô é htâng, Yosi-a gi, noqkuq yhûm lé rago ban lajâng tô é hkûn, Egutuq ming mâ é hkóhkâm Nehko gi, Uhprat Wuìlàng yàm mâ é Hkarahkemesha wà má majan toq râ matú dòq lo é nghut mù, Yosi-a gi, yhang lé majan lhom zan râ matú shuî yán htoq e ló ri. 21 Nghut kôlhang, yhâng chyáng Nehko danglù hun kat é gi, “Yudaq hkóhkâm ê, nàng eq ngá é gyoro má hai a-ngùt jòq ri lhú? Hkû-nyí ngò nang lé htim râ a nghut; ngò eq gyè dut é bang lé majan zan râ matú shèq htoq lé lo é ru nghut lhê. Garai Gasang gi, ngo lé hân kut àq ga taî é nghut lhê. Ngò eq rahá nghut nyi é Garai Gasang gi, nang lé a lhoqhtên pyám sháng gàq, Yhang lé htuqhtîng nyi é mai nô pyám lo aq.” gâ ri.
22 Nghut kôlhang, Yosi-a gi, yhâng chyáng mai a lhing taû ló é za, Nehko taî kyô é Garai Gasâng é hkunmó lé a gyo kut luî, majan zan râ ga, mâyû byu é hking wùt chûng mù, Megido pá má yhang lé majan ê zan râ ga e ló bê nghut ri.
23 Lai bik bang gi, Hkóhkâm Yosi-a lé záng bìk byi bê nghut mù, yhang gi, yhâng é zaugun wuì lé, “Ngò dàm mó dàp bê; ngo lé shuî htoq ló keq.” ga taî ri. 24 Haû mù, yhángmòq gi, yhang lé yhâng é gyèlhêng mai wàq htoq yû mù, yhâng é gyèlhêng gócham má kat chûng luî, Yerusalem wà mó má htô lo akô; yhang gi, haú má shi byùq bê nghut luî, yhâng é îchyí îwâ pê é lùp má myhup yhûm pyâm é hui bê nghut ri. Yudaq byù bànshoq eq Yerusalem wà byù wuì gi, yhâng é matú iyon yon ngaùhkyang sang akô nghut ri.
25 Yeremi-aq gi, Yosi-a é matú ngaùhkyang sang é nghut mù, mahkôn hkon é yùqgè myiwe wuì bànshoq gi, hkû-nyí jé shoq, ngaùhkyang sang é má Yosi-a é hkyô lé dang tsûm kat akô nghut ri. Dang haú pé gi, Isira-elaq byu pé chung é htûngli dùt byùq mù, Ngaùhkyang Sâng laiká má kâ tô é nghut ri.